حياكم

(لا تشرهون ترى تصير باحسن العائلات)

قاتل الله الفراغ.. عز الله راحوا فيها اهل المعرس.. ثلاثين جمس وست جيوب ناصين الاستراحه وانواع البواري والازعاج.. واذا جبنا طاري الازعاج ما لنا بالطيب نصيب عند جامع الراجحي بعد الجمعه.. والجمعه بعد العصر ياهو طفش ودك تشق الفنيله من الغثا.. والفنايل هالايام رابصه بالعرق.. والعرق ما ينزف من الجبهه صح الا بعد ماتقرط ذاك القرن الاخضر مع صحن قلابه على الصبح.. وعلى الصبح هالعالم نفسيات وكل واحد يقول الحرش عندي.. ولاتحارش الباكستاني اذا ما زبط لك الماصوره ولا تسوي فيها قدامه تراك تبطي وربي.. ياكثر اللي يبطون عن العزايم ولا تفوتهم طقة بلوت بالاستراحه.. وعلى طاري الاستراحات كل يوم والثاني هات التنظيم رد التنظيم وتاليتها بنغالي زابن داخل غرفته.. والله يلعن البنغاليه بكل كتاب.. وقال ايش معرض كتاب؟؟ ياعمي لايكثر بس اي كتاب واي معرض عسانا نقرا الجرايد ايام الدوري وسلم لي عليها اذا خلص.. وسلموا لي على راعي الدكان اللي مازال يقاوم بين مطرقة العثيم وسندان السدحان.. والسدحان والقصبي حالفين هالسنه انهم ماراح يسوون طاش علشان ما تمل العالم بعد 12 سنه متواصله.. والتواصل بين الجيران على كيف كيفك بس لا تسأل احد عن اسم جاره منعا للاحراج.. واذا تبي الاحراج صح اعزم الرجاجيل وقل للمعزبه تراني مانيب جايب شي من برا انتي اطبخي خصوصا اذا كانت من بنات العشرين.. والعشرين ناقص عشره يساوي اربعين في نظام القروض البنكيه عندنا لأنهم يساعدون المواطن على مشقة الحياه جزاهم الله خير.. والخير قدامك على طريق الشمال وانت وضميرك تغتال كائن حي مسكين ووديع اسمه بعير.. والكائن الحي عموما لايمكنه ان يتجاهل روعة التنسيق والازدهار اللذان تعيشهما احياء جنوب الرياض.. وآآآآه يالرياض يابعد طوايف جدي انتي والله انك بعيني احلى من كوالالمبور هاللي اشغلونا عندها كل من فقس من بطن امه قص جواز وراح لها.. والجواز السعودي مهم جدا وله احترام غير طبيعي عند اخواننا في سوريا.. وما دام وصلنا لديار ابومعروف اسمحوا لي انتخي بذاك القرم.. يالبّى قلبك يابومعروف..

محبتي

فهد