وخلصت الاختبارات ][ تعالوا نفرغ تعب الاختبارات هنا ][ - نادي الهلال السعودي - شبكة الزعيم

دانكن دونات · #1 25/06/2008, 01:57 AM

السلام عليكم ورحمة الله وبركاته

يالله ان تحيي كل بإسمه ..

أكثر الطلاب والطالبات في المرحلة المتوسطة والثانوية انتهوا من الامتحانات

وفيه ناس ماخلصوا وباقي عليهم فقه

الأسبوع الأول انصرم بسرعة ولاكأنه اسبوع ..

الأسبوع الثاني وانصرم وبكرة الأربعاء بمعنى اليوم الاربعاء

الغبنة انا اكثر الطلاب بيخلصون اختبارات وبيفلونها

وفيه ناس تخلص اختبارات وتذاكر مرة ثانية لأختبار التحصيل

وتجلس وتسجل وتنتظر كل الاجازة تسجيل في تسجيل

وفي الأخير يمكن ما تنقبل

قبل اسبوع كنت اكلم واحد من المثقفين في المجلس العام ماجد

وجبنا طاري التسجيل في الجامعات والكليات ..

وقال كلمة بغيت ازعل منه تدرون وش قال :

قال زمان ما كان فيه اختبار تحصيل ولا يحزنون

يعني الحين قدرات + 3 اختبارات كل اسبوع + تحصيل = تدخل جامعة

وقسماً بالله ظغط في ظغط .

ياخي القدرات ايه ماقلنا شئ

تجمعون نسبة ثاني مع ثالث وتنقصون مدري وش تسوون فيها قلنها ايه

لكن اختبار تحصيل في 5 مواد علمية حراااام

إلى كل طالب ثالث ثانوي التوكل ع الله والشئ اللي بيصير بيصير بإذن الله

والواسطة ماتضمنها لو ابوك مدير في جامعة الأمام سعود < وخر بس

أتمنى التوفيق لطلابنا وطالباتنا ..

أسئلة اتمنى الاجابة عليها :

1- هل انت راضي على نظام الوزارة الحالي قدرات وتحصيل واختبار كل اسبوع ؟

2- ما أصعب اختبار واجهته في الاسبوعين الماضيين ( للطلاب والطالبات فقط )

3- ماذ تريد من الوزارة ؟

4- موقف طريف في الاختبارات ؟

فمان الله

برب نوم وراي اختبار حديث

فمان الله

متآبعه بصمت · #2 25/06/2008, 02:04 AM

هلا بأخوي وليد

مرآآآآآآآآحب والله فيك

..

بالتوفيق لك ولكل طالب وطالبة ومسلم ومسلمة

ياعسى ربي يسعد الجميع ويهنيه بحياته

..

لآ هنتْ على تفاعلك مع الطلاب ومواساتهم

ورده

ورده

نوره الايطاليه · #3 25/06/2008, 02:05 AM

إقتباس


	1- هل انت راضي على نظام الوزارة الحالي قدرات وتحصيل واختبار كل اسبوع ؟

بـ .. الأمـآنه " لآ "

إقتباس


	2- ما أصعب اختبار واجهته في الاسبوعين الماضيين ( للطلاب والطالبات فقط )

أختبار مادة الكيمياء

إقتباس


	3- ماذ تريد من الوزارة ؟

تعدل في نظامها الحالي و تتبع نظام دول الخليج الآخرى

إقتباس


	4- موقف طريف في الاختبارات ؟

من شين الحظ انهم حطوا مكاني اول وحدهـ

يعطيك العافيه اخوي دانكن دونات على الموضوع

و دعواتك لنا .. علينا بكرا فقه

بنت فهد · #4 25/06/2008, 02:08 AM

هلا والله

جـ1| لا والله موراضيه بس اللي فلحو فيه انهم ما حطو الاسئله

جـ2\ رياااااااااااضياااات لو لله يبعده عني صرت بخير

جـ3|ودي يفكونا من مناهجهم والله ما استفدنا شي الدروس تتكرر كل سنه

جـ4\ الموقف اني بعد ما خلصت اختباري نمت ذيك النومه عن عشر ساعات وجت الاستاذه وصحتني وقالت نايمه قلت يعني وانتهت رحلتي بكل سعاده ووناسه

واتوقع اصعب اختبار واجهك بيكون الحديث لانك تركته ودخلت النت

تقبل مروري بنت فهد

هلالي في مانع · #5 25/06/2008, 02:12 AM

1- هل انت راضي على نظام الوزارة الحالي قدرات وتحصيل واختبار كل اسبوع ؟

توني مــا وصــلت ل هذي المرحلــة

,, !!

2- ما أصعب اختبار واجهته في الاسبوعين الماضيين ( للطلاب والطالبات فقط )

والله وأنــا أخووكــ ,, !!! كــل شئ مرييـت عليه صعبب =| !! و خــاصة الانجليزي وو خاصة أن أنــا ب D.A.S =s يــاعني انجليييزي =| !! وو أتــوقع دووووووور ثــاني =( !!

3- ماذ تريد من الوزارة ؟

تشوف حللل لــ مدرستنـأ

لانهم ما يختبرونـا أنجليزي الوزارة hhh !!

الدريبي الهلالي · #6 25/06/2008, 02:30 AM

وعليكم السلام ورحمه الله ,,

أخوي اسمح لي مع اني منيب بالثانوي ,,

- هل انت راضي على نظام الوزارة الحالي قدرات وتحصيل واختبار كل اسبوع ؟

أخوي لو نكون واقعيين شوي الحين فيه طلاب داخلين مدارس اهليه وطالب داخل حكومي اللي بالحكومي جاب 85% واللي بالأهلي

جاب فوق 95% طبعا هو ثور بس دافينه فأتوقع دخول الثور للجامعه غلط وبينظلم اللي بالحكومي مع إنه أحسن منه فاتوقع التحصيلي

والقياس هو العدل بين للطلاب نعود للوقت أتوقع لو تكون الفترات أطول أحسن ويكون التسجيل في الجامعات في اخر شهر بالصيف
2- ما أصعب اختبار واجهته في الاسبوعين الماضيين ( للطلاب والطالبات فقط )

أصعب إختبار واجهته قبل شهر طبعا لاني مخلص من زمان هو الريض حسبي الله على اللي حطه بس أشوا عدينا وجبنا درجه حليوه

3- ماذ تريد من الوزارة ؟

الجواب لطلاب الثانوي والمتوسط
4- موقف طريف في الاختبارات ؟

ما أذكر والله

--
Best Regards

Yours truly,
Eng.AbU DrB

abo_nasser · #7 25/06/2008, 02:32 AM

هلا وغلا خيووو..

يالله ان تحييه..تو مانور المجلس..

إقتباس


	الأسبوع الثاني وانصرم وبكرة الأربعاء بمعنى اليوم الاربعاء

انصرم هاااااه..؟؟

قسم لو انك تصرم في مزرعة جدك انه ابرك..يا الدلخ

انا باجاوب نيابه عن اخواني ولقافه مني..

جـ1/احد راضي فيه..؟؟؟

جـ2/كلها ما عدا اختبار الادب ..لان مدرستهم اعطاهم الاسئله..

جـ3/الفكه منهم..

جـ4/هذا الموقف صار لي مع احد اخواني الفاغرين..

رجعنا من صلاة الفجر وسالت واحد منهم ..وش عندك اختبار بكرا..؟؟
قال كيمياء..

قلت ذاكرت زين ..؟؟
قال ما عاد الا اراجع..

قلت ..ما هي الاغوال..؟؟

قال..امممممممم ...هذي في الكيمياء والا الفيزياء..

قلت ...سقها

...والله ينجحك على الحافه..

الله يوفق ابناءنا وبناتنا..

(===وش عنده الشايب..

سلاااااااااااااااااااااااااااااااااااام

أميرٍ · #8 25/06/2008, 02:33 AM

انا في الجاامعه ..الله يعين ،!!

بالتوفيق للطلاب والطالباات .!!

نونه المزيونه · #9 25/06/2008, 02:40 AM

1- هل انت راضي على نظام الوزارة الحالي قدرات وتحصيل واختبار كل اسبوع ؟

طبعا لا والف لا

2- ما أصعب اختبار واجهته في الاسبوعين الماضيين ( للطلاب والطالبات فقط )

التاريخ والانجلش

3- ماذ تريد من الوزارة ؟

الله يعافيهم يغيرون مناهجهم اللي تجيب المرض

4- موقف طريف في الاختبارات ؟

والله كل الاختبارات ضيقة صدر ونكد مافيه مواقف طريفه

يسلموووووووو اخوي وليد موضوع رووووووعه

دانكن دونات · #10 25/06/2008, 02:57 AM

متآبعه بصمت

نورتي الموضوع بالمرور ولكن خرب يوم قلتي اسمي الحقيقي

دمتِ بود ورده

نوره الإيطالية

هلا بالأخت / نورة

تو مانور المنتدى واهلا بكِ في شبكة الزعيم

وأشكرك ع الطرح

دمتِ بود

بنت فهد

أشكرك ع المرور ..

وتعالي فيه احد يذاكر حديث هذي الأيام

الله يعين ويارب يكون سهل ومفهوم

دمتِ بود

هلالي في مانع

لامافي مانع طبعاً

انا اللي فهمته في ردك اول سطرين

لكن بعدها مافهمت شئ بصراحة

دمت بود

الدريبي الهلالي

هلا اخوي .

انا معك في كل كلمة قلتها

لكن قدرات زائد تحصيل واختبار كل اسبوع صعبة بقوة

لو يشيلون التحصيل افضل .

شكراً لك ع طرحك وع مرورك

دمت بود

دانكن دونات · #11 25/06/2008, 03:05 AM

abo_nasser

سلٌمه

إقتباس


	انصرم هاااااه..؟؟ قسم لو انك تصرم في مزرعة جدك انه ابرك..يا الدلخ

يالييييييل ياخي لا تدقق كثير ..

فضحتنا خل الموضوع ينصرم

إقتباس


	جـ4/هذا الموقف صار لي مع احد اخواني الفاغرين.. رجعنا من صلاة الفجر وسالت واحد منهم ..وش عندك اختبار بكرا..؟؟ قال كيمياء.. قلت ذاكرت زين ..؟؟ قال ما عاد الا اراجع.. قلت ..ما هي الاغوال..؟؟ قال..امممممممم ...هذي في الكيمياء والا الفيزياء.. قلت ...سقها...والله ينجحك على الحافه..

ـههههههههههههههههههههههههههههههههههههههههـ

يقولون هذا الشبل من ذاك الأسد ..

يافغرة

برايفت لأبو ناصر :-

كم رسالة وصلتك مني بالجوال ؟

دمت بود

أميرٍ

هلا فيك اخوي

امين والجميع إن شاء الله

لاهنت ع المرور

دمت بود ورده

نونه المزيونه

هلا فيك اختي نونه

وشفيكم معلقين ع اسم وليد الله يهديكم

ترى ما أعرف لميس ولا شئ

أشكرك ع المرور

دمتِ بود

كَلْ اَلْـ حَ ـيَاةْ · #12 25/06/2008, 03:12 AM

هلا باللي عندهم اختبار بكرى خخخخخخخخخخخخخخـ
اللهم لاشماتهـ

إقتباس


	هل انت راضي على نظام الوزارة الحالي قدرات وتحصيل واختبار كل اسبوع ؟

بصراحهـ حلو وشين

حلو انهـكـ تقدر تعوض .. والشين انهـ ممل ومتعب ..

إقتباس


	ما أصعب اختبار واجهته في الاسبوعين الماضيين

الانجليزي

جبت فيهـ عيد بقوووووووووووة

إقتباس


	3- ماذ تريد من الوزارة ؟

ابيها تريحنا من مواد مال امها داعي

إقتباس


	موقف طريف في الاختبارات ؟

اني نمت باالقاعهـ

خخخخخخخخخخـ ثاني مرهـ اسويهـ
المرهـ الاولى العام
وهالسنهـ سويتها مرهـ ثانيهـ

بس والله يا لهـ طعم غييييييييييييييييييييييير

هذي ملاحظهـ لاحظتهـ شكل كلـهـ من تأثير الامتحانات عليكـ

يالفاهر

إقتباس


	وفيه ناس ماخلصوا وباقي عليهم فقه

إقتباس


	برب نوم وراي اختبار حديث

يعني أي واحد فيهم
الي اعرفهـ ان انتم يا ثالث عندكم حديث

بس وش قصة اهلهـ الفقهـ الحين خاش عرض

وااااااااااااااااااااااااااااااااااااااااااااااااااااو
بجي للرياض بتنور

طبعا بوجود أهلهـ بس بتنور زيادهـ بي

الله يوصلني لكم بالسلامهـ

فجر الرياض · #13 25/06/2008, 03:15 AM

^
^

حت حت جد بتجينا الله يحييك بتنورينا

هلا دانكن دونت

جد الله يعينكم قياس واشياء كثيراحس مالها داعي

بس يله تحملوا

كلنا تعبنا مافيه شي يجي براحه

يله بالتوفيق لجميع الطلاب والطالبات

الغدير الازرق · #14 25/06/2008, 03:16 AM

اهليييين وسهليييين دانكن دونات

أجل تقوولي الموضوع مايستحق التثبيت وأنا قايل إنه يستحق

زورنا عااااد بالعالمية ترى محسووبك صاااار عالمي وشووي شوووي

وبسحب على المجلس

إلا تعاااال أنت وش تبي الحين

؟؟

الله يوفقك وليد ويسهل أمرك الله يعينكم تسجييييل وليلكم طوييييل

عاااد يقولون إنكم ياحقين العلمي جبتوا الكريسميس بالفيزياء
وبالكيمياء بخخخخخخخخخخــ

مالي خلق اجاوب على اسئلتك ماصدقنا نخلص ورانا ترم صيفي
الأسبوع الجاااي

دمت بكل حاجة حلووة

قاهر أسيا الآوحد · #15 25/06/2008, 03:18 AM