السلام عليكم ورحمة الله وبركاته ..

إخواني الكل يعلم بالإستنفآر اللي يمر به جميع الطلاب .. من تفكير في النسبة ومن تفكير المكآن الذي سوف .

أقبع في بقية الـ 5 سنوآت القآدمة .. وأمور كثيرة .. جلها هم .. ونطلب الله التوفيق دنيا وآخرة

لمن إختبر الإختبار التحصيلي .. (( خآصة من تعب على الإختبار في الإعداد عليه )) .

أود أن اسأل عن طبيعة الأسئلة ومدى صعوبتها وأيضا سهولتها .. وأيضا عن كتآب إسمه (( مذكرة رآئز للتحصيلي ))

من المركز (( رآئز )) هل يكفي وشآمل أم لا .. ؟ وعن التجربة الشخصية اللي مر فيها . ؟

وأي نصيحة لأخوكم محتآج وقفة منكم ودعواتكم ..!

بالتوفيق للجميع .. في إنتظار الردود .!

وعليكم السلام

ياخوي الاسأله نوعا ما فيها لف ودوران بس انت اهم شي ركز واقرا السؤال كم مره وبسنف الوقت خلك سريع عشان الوقت

الله يوفقك ويوفقنا ولاتنساني بالدعاء

و عليكم السلام ورحمة الله و بركاته

الحين الطلاب و أنت في الإختبار و الله يوفقكم إن شاء الله ....

وعليكم السلام ورحمه الله وبركاته

اخوي في كتاب اسمه رام لونه برتقالي بتلقاه بجرير اتوقع ان شاء الله انه شامل بس انا ما امداني اذكره الا ليله الاختبار واستفدت منه

اشتر وان شاء الله بيفدك ومذكره رائز خذها زياده الخير خيرين

والله يوفقكم وتدخلون التخصصات اللي تبونها

كتاب رام 2 شاريه انا من العبيكان

ترى فيه رام 1 حق اختبار القياس

ورام 2 البرتقالي حق الاختبار التحصيلي


الله يوفق الجميع

اخوي

اولا:اشتر المذكره حقت رائز(يفضل بدون دوره)واذا لازم دوره خذها مع انها مب مفيده جدا(المذكره تكفي)سعر الدوره 1100ريال
هذا الكلام السنه الماضيه

ثانيا:اشتر كتاب رام2 من جرير (مايتعدى 20 الى 35 ريال)

ثالثا:اذا اخذت الدوره .بعد كل محاضره راح يكون فيه بريك 10دقائق استغله في مذاكرة ما اخذته في المحاضره
واذا رجعت بيتكم ارتاح وبعدين ذاكر اللي خذته في اليوم كله

اما اذا ما اخذت الدوره.فتحتاج 10 ايام(يومين لكل ماده)

رابعا:بعد ماتخلص من المذكره بشكل كامل.ابدأ في رام2(حل الاسئله الموجوده في نهاية الكتاب فقط وارجع لحلها)

وما انصحك ان تحل ب CD وانما حل عادي(مثل الاختبار)بتحصل اوراق مثل حقت الاجوبه في الاختبار

ولون الاختيار الصحيح عشان تتعود على الجو

ولاتذاكر الكتاب الآن فقط حل وتدرب.

خامسا:قبل الاختبار بيوم او يومين ابدا في المراجعه من رام 2(لانه مختصر اكثر وجيد للمراجعه وبالتحديد للرباضيات)
اما الانجليزي فاذا انت مميز فيها فمايحتاج الا اننك تقراها من المذكره فقط.

سادسا: لاتنسى ان تتدرب في معمل الحاسب الآلي في معمل رائز
لان فيه برامج ممتازه

وفي النهايه توكل على الله


انا هذه كانت طريقتي السنه الماضيه والحمدلله جبت 80 ودرجتي في القدرات عاليه جدا جدا جدا ولله الحمد

ودخلت في تخصص الحاسب الآلي ومرووووق(يصير خير هههههه)

اهم شئ تتعب هذه الفتره بعدين بترتااااااح

اول شي ياطويل العمر لازم تعرف انه لايوجد كتاب موحد تأخذ منه الأسأله
وبالنسبة للأسأله تكون من مادة الرياضيات والفيزياء والكيمياء والأنجليزي
مثلا اسئلة الأحياء تكون نصا مما درسته في الثانوية اما بالنسبة للمواد الأخرى فغالبا تكون استنتاجيه يعني الفكره الأساسية تكون ماخذها في الثانوية ولكن السؤال ليس مباشر لهذه الفكرة
شفني جبت في القدرات 86 والتحصيلي يوم دخلته والله قلت ماجيب فوق 60 وجبت 75 والحمد لله

كتاب رائز كويس جدا واحد من الشباب الله يذكره بالخير صمه واجب بالتسعين

الامر الاخر يجب ان تكون واثق من نفسك ونايم كويس

الامر الثالث ترى الاسئله تتكرر فحاول تسال الي قبل وش جاهم اسئله


والله يوفقك ويوفقك الجميع
تشــــــــــــــــاو

الله يوفقك أخوي في إمتحاناتك.....

اما بخصوص الإختبار التحصيلي..فأنا مادخلت دورات ولا قرأت كتب ولاشئ..وإن شاءالله يكونون الإخوان اللي قبلي أفادوك بخصوص هالشئ....

لكن عن طبيعة الأسئله..
الأسئله طبعاً تكون مما درسته في المرحله الثانوية من المواد الأساسيه..اللي هي :

الرياضيات والفيزياء والكيمياء والإحياء والإنجليزي..

وأكثر شئ يركزون عليه هو منهج ثالث ثانوي ومايتعلق به....يعني على حسب فهمك في ثالث وثاني......

وبشكل عام الإختبار معقول ولاهو صعب ولامعقد مثل القدرات..

واهم شئ ركز ولاتشيل همه ولاترتبك..لأن درجته راح تهمك في مستقبلك وخصوصاً في البرنامج الموحد للكليات الصحيه بجامعة الملك سعود وجامعة الملك فهد للبترول والمعادن وكذلك أرامكو وسابك والبعثات الخارجيه..

عشان كذا إستغل وقتك وراجع الكتب اللي قالوا عنها الإخوان وإسأل عن الدورات إذا هي تفيدك أولا......

ومره ثانيه أقولك لاتشيل همه...انا دخلته بدون لاأفتح شئ مثل ماقلت وأخذت 74 والحمدلله دخلت كلية الهندسه..

بالتوفيق لك أخوي..

والله اخوي انتمى يكووون الاخوان فادوووك بس اقول لا تختبر الا اذا كنت حاط ببالك قسم هالقسم يلطلبوووون منك الاختبار سواااء تحصيلي او قدراااات اوغيره
المهم اني انا اختبرت وما نفعني طيح نسبتي بالارض
والحين ياخوك جالس بالبيت لا شغل ولا مشغله
بس الله يوفقك انشاء الله

الله يعطيكم العآفية إخوآني وما قصرتم ..!

يعجز اللسآن عن الكلام

إعذروني بكلمة .. شكرا (( عسا أن تجمل ) )

اهم شي اذا اختبرت انسى الاختبار لانه راح يجي عكس اللي تتوقع