السلام عليكم ورحمة الله وبركاته

صبكم الله بالخير والخيرات والمسرات...

الموضوع هذا صراحه كنت ابي اكتبه من زمان بس الظروف ما سمحت لي اكتبه الا الحين وهذا انا احطه بين ايديكم....

رأينا هلالنا في السنه الفائته ورأينا المستوى الغير مرضي لي طبعا وللجماهير اللي

تعرف تفكر وتعرف تحلل وتيقن تماما ان الهلال لم يكن في مستواه عطفا على البطولتين...تعالو معي شوي وخلوني اقولكم اللي في قلبي واريح نفسي

اعذروني ترا ملخبط في البطولات يعني اذا فيه خطا لا تلوموني لومو الاتحاد السعودي!!
ابدأ في بطوله الدوري... ماني جايب من اول الدوري بس بقولكم من عند المنعطف

في مباراة القادسيه رأينا المستوى اللي قدمه الهلال وكان مستوى غير مرضي ولحد يقول طارق كان احتياط ولا ياسر ممكن نقول ياسر لان مافيه بديل له بس الوسط فيه غير طارق بس مفتقدين الثقه والسبب يعود للجماهير اللي ما تعرف الا طارق التايب

وين تشجيع اللاعبين الباقين!!! 10 لاعب في الفريق وين راحو !!
كلهم ما يعرفون يلعبون وما فيه الا طارق التايب هو اللي بلحاله يعرف يلعب!!

ومباراة الشباب 0_0!! كم فرصه للشباب ضاعت وكم عارضه وكم صد الدعيع!!!

وين كانو لاعبيننا للاسف ان هذيك المباراة اسوا مباراة اشوفها للهلال في الدوري

والسبب يعود للجمهور الكريم اللي معتمد كل الاعتماد ومسلم الطاره لطارق التايب اللي ما سوا اي شي يذكر في تلك المباراة لان عبده عطيف كان يلعب فيه لين قال امين !!!


وفي مباراة الشباب ايضا واللي انتهت 1_1 واللي سجل فيها سلطان السعود الهدف
ما كان هناك اي مستوى يذكر للهلال اللهم كم فرصه اعدها باصابع يدي!!!

وفي مباراة الحزم شفنا الهدف حق ليلو واللي ما بغى يجي !!! في اخر الثواني من المباراة !!!

وفي مباراة الاتحاد (اخر مباراة) كم وكم وكم فرصه راحت عن الاتحاد هجمات منسقه ..هجوم ناري.دفاااع صخرررر...وسط متجانس...وفي الاخير خطا دفاعي من احمد الدوخي استفاد منه الفريدي وعرضها لياسر ثم ضربها ياسر بشعره!!! وقول
وخذنا البطولة اللي صراحه كان حظ يكسر الحجر واقف معنا ذيك الليله

هذا في الدوري...نروح لكاس ولي العهد..؟

في البداية قابلنا نادي النصر وفزنا عليه وهذي طبعا ماهي غريبه وما كان يومها يحتاج مستوى ولا شي لانه فريق اعتبره من فرق الاولى!!

بعدها قابلنا الليث افضل فريق في هذا السنه من رايي ومن راااي المحللين الفاهمين...على اني اكره البلطان بس هذا مايمنع اني احب الشباب المهم اننا فزناا عليه بااااااااااااالحظ من هدف العبيلي الله يجزاه خير!!!
وترا مدري بعد هي مباراتين مع الشباب ذهاب واياب ولا لا المهم اننا تاهلنا بهدف العبيلي!!

وجينا للنهائي للفريق اللي طايرين في بالعجه ذا الاي ار تي هذا فريق اخرج الاهلي(طبعا اخرجه لان الاهلي الموسم هذا لم يكن ابدا في مستواه المعهود لتخبط الاداره)واخرج الاتحاد(بالحظ طبعاااااا) واخرج الهلال من الخليجيه(لا تعليق على هدفهم في ذلك اليوم)
اللاعبين متبطحين والمهرج حقهم(الرهيب)رايح بالكوره وماشي من غير اخلاق رياضيه...للاسف

المهم اننا فزنا عليهم في النهائي واخذنا كاس ولي العهد...بس كيف جت الاهداااف!!!؟
الهدف الاول شاتها تفاريس جت لياسر ثبتها ابو سعيد وشاتها قول!!!
والهدف الثاني جا من بلنتي والمتسبب فيه تفاريس!!

يعني يومها ما كان في بنااء هجمات ولا كان في صناعة لعب اللهم استعراااض من اللاعب المدلل طارق التايب !! وان مان صنع كم لعبه ما ودي اظلمه!!!

ما ودي ادخل في بطولة فيصل بن فهد والسبب يعود ان اللاعبين صغيرين ومن هالقبيل وماودي اعلق على النهاائي اللي ما لمسو النصر الكوره فيه الا مرتين حقت البلنتي وحقت بلال وفرحااانين بذا البطوله ..زين ماني قايل فيهم شي بسكت !!
بس صراحه هدف عبدالعزيز يدرس في اوروبا مشالله عليه..!!

الحين عرفنا حقيقة البطولات حقت الموسم الفائت الحين بعلق على لاعبيننا ونشوف التقصير من مين؟؟

ابدا بالدعيع. ما قصر والله ابو عبدالعزيز والله يعطيه الصحه والعافيه ...
عبدالعزيز الخثراان..والله مظلووووم اشد الظلم من الجمهور ومع ذلك مؤدي المطلوب منه على اكمل وجه!!
عمر الغامدي..ياحبيبي ما تقطع كوره الا ولازم تكسره يعني مغير تدربي راسك الله يجزاك خير وبس كمالت عدد!!
عبدالله الزوري..اشوف ان مستواك ضايع عقب الاصابه اللي جتك ان شاء الله تكون اصابع ولا يكون غرور!!
ماجد المرشدي..ما عليك من الجاهلين وصغار العقول...
تفاريس..لا تعليق...
خيرات...صخره الدفاع القادمه وبقوه سواء في الهلال او المنتخب...
هوساوي..انشالله لعبك اللي في الوحده ما نشوفه في الهلال...
نامي+مسفر=يبغالكم تجانس فقط مع باقي اللاعبين اما العنقري..والله ما فهمتك مره نقول انك رجعت ومره نقول انك ما تغيرت..عشان ما اظلمك اخر مبارياتك ما قصرت فيها والله ..
الشلهوب..مقدر ظروفك والله واللي صارلك بس ما اقول التقصير منك والله التقصر من الجماهير الجاهله اللي المفروض انها تساعدك وتوقف بجنبك بس شكل الجمهور ما عاد يعرف الا طارق التايب !!!

نواف التمياط...مستواك بعد الاصابه بادي يرجع والله يعطيك العافيه..
احمد الفريدي..والله اللاعب صغير وقدامه مستقبل بس اذا استمر بالمزاجية حقته بقول ان مستقبله عليه السلااااااااااااااااام!!

عبدالعزيز الدوسري...ما اقول الا لله درك ..!!
خالد عزيز...وش اقول وش اخلي الله يعافيك بس...
احمد الصويلح...والله ما قصرت وخصوصا قدام القادسيه والنصر ما يحتاج اقول وش سويت في الدفاع...مكااانك ما قدر يسده المجهم!!!.
ياسر القحطاني...لا تعليق!!..
عبداللطيف الغناام+البرقان=مشالله عليكم
فهد المبارك...والله ما اشوف انك سويت شي للحين اللهم حركه وتسحيب بس!!
فهد المفرج...ما ودي اقول انك السبب في الهدف الاول في مباراة الاتحاد ببطولة الملك اللي في الثانيه 53 بس ماودي انكر الي سويته للهلال!!! حاول تتطور اكثر..
ليلو..احلى هدف شفته للهلال في الموسم اللي راح هو هدف ليلو قدام الاتفاق عقب ما شغل المراوح على ماجد ومن قوة المراوح طاح العمري ومزعها المجهم وعلقها في الشباااك!!! بس ما اقول الا انك صفقه فاااااااشله للاسف...
سعد الذياب..والله ما قصرت صراحه والله يعاااافيك ومكانك جنااح احسن من الظهير..
الخراشي+السعود=الجماهير ما قصرت معكم من حيث النقد عشان كذا ما ودي ازيد عليكم....
طارق التايب...لا تعليق على مستواه والسبب يعود للجمهور الكريم...
والسلام ختااااااام واتمنى اتمنى من الجمهور انه ما ينسىى اللاعبين من حيث التشجيع ويروح لطارق التايب
الهلال كبير قبل ما يجي طارق التايب وكبير وطارق فيه وان راح طارق يبقى الكبير كبير ...

لظلمكم اللاعبين الاخرين اكتفي بسؤال...محد منكم قد سال نفسه ولو مره ليه الشلهوب سوا باص عيون ما اذكر اي مباراة بس محد سال نفسه هالسؤال!!!؟؟؟