السلام عليكم ورحمة الله وبركاته


حبيت انزل اليوم قصه واقعيه للأستاذ يوسف الصالح مرشد لعلاج الإدمان وفيها عبر وتوعيه لشبابنا

مانزلت الموضوع الا باستشاره احد المشرفين وتم الموافقه عليها



وهذي القصه من اربعة اجزاء


اسأل مجرب(1)

بسم الله والصلاة والسلام على رسول الله السلام عليكم
شباب انا سعيد اني اكون معاكم واشكر الاخوان اللي قدمولي الدعوة وجايكم اليوم للمنطقة الشرقية احمل لكم رسالة بس دائما لما اتكلم ابغاكم تعرفون حاجة واحدة اني انا ماني جاي اشهر بمعصيتي عندكم ولا جاي اني اتباهى فيها ولكن انا جايب رسالة وجاي اعلمكم عن عالم غريب ما اتمنى في اي يوم من الايام اي شخص فيكم موجود هنا او خارج هنا انه يوقع فيه عالم اصبح الحلال حرام والحرام حلال عالم ما تمسكه قيود فيه من الغبث فيه من النذالة فيه من الوسخ فيه من اشياء كثيرة اللي سببت الالم لي وللي حولي انا سبق وقلت لكم كانت مشكلتي هي حرية شخصية وكنت اتوقع اني انا قاعد اؤذي روحي بس والعالم الثاني مالي شغل فيه ولكن اكتشفت في الاخير اني انا قاعد اؤذي روحي واؤذي كل الناس اللي حولي وهذا الالم الشديد اللي انا حصلي .
انا قبل اكون معالج في مستشفى الامل في الدمام كنت مدمن مخدرات لمدة 20 سنة سفينة ابحرت فيني لمدة 20 سنة وكانت السفينة مهجورة ما بيها الا انا مرات ترفع فيني ثم تنزلني تحت ولكن كانت رحمة الله هي فوق كل شي انا الحمد لله ان الله انقذني بعد 20 سنة ولكن والله عندي اصدقاء ما يعلم بحالهم الا الله وانا رح اجيبلكم قصص من اشخاص انا شفتهم ماتوا وانا كنت اتعاطى معاهم
بس بالبداية ابغى اعرفكم مين المدمن يقولون في واحد طقت عنده سبيكة في مخه فراح للدكتور قالوه اوه سبيكتك هذه مخروطة لازم تغير مخك فقال له يا دكتور منين اجيبلي مخ قاله في واحد هناك فاتح سوبرماركت يبيع امخاخ روحله وخش عليه واشتري من عنده مخ فالرجال تحمس وطق الباب على الرجال وقاله يقولون انك تبيع امخاخ وانا ابي اشتري مخ مخي ما به فايدة قاله اتفضل المستودع وقاله هذا مخ دكتور يساوي 250 الف ريال وهذا مخ محامي يساوي 500 الف ريال وهذا مخ مدمن يساوي مليون ريال . تعجب هذا شلون الحين مخ المدمن اغلى من مخ الدكتور والمحامي قاله صاحب السوبرماركت ايه لان هذا جديد بعده ما استعمله فكل واحد قاعد يتعاطى مخدرات وكحول انا متاكد 100% انه ما قاعد يستخدم مخه كل واحد يدمن على المخدرات والكحول انا متاكد 100% انه ما قاعد يستخدم مخه ولا قاعد يستخدم عاطفته ولا مشاعره ولا احساسه ابدا يصير على دقيقه وانا كنت واحد منهم كنت اقول كلها يومين واطلع من المخدرات كلها يومين وانتهي هالصيف هذا ابي انتهي ويجي صيف ويروح صيف ويجي شتاء ويروح شتاء واخينا بالله الا ما انتهى اقول الحين عمري 17 سنة خلي يصير عمري 20 ورح اترك المخدرات انا قاعد اقول مو مخدرات انا قاعد اقول الدخان لو فيه خير يقول الواحد انا بتركه! بيسكت على روحه ويقعد يلعب لعبة مع روحه ويقول خلاص هالمرة وهالمرة لحتى صارت 20 سنة والله يعلم كيف هال20 سنة كانت
قبل لا ابدي بقصتي رح ابدي بشيء واحد يا اخوان من اسباب تعاطي المخدرات والوقوع في المخدرات شيء ثمين لو اقول لكل واحد فيكم شو الشي الثمين اللي عندك الحين واحد يقول ساعتي واحد يقول شماغي واحد يقول سيارتي واحد يقول بيتي كل واحد عنده شي ثمين وهذا الشي الثمين ما يتمنى انه احد ياخذه . يعني انا بقولك تعال انت لو بتحب انسان أعطيه اغلى شي عندك شو تعطيه؟ ساعتك اللي تحبها ؟ لا. اول ما تشوفه تقول هذه ساعتي اللي احبها كي لا يقولك اعطني اياها . فكيف احنا نسمع انا نعطي الاشخاص شي ثمين وتتوقعون شنو الشي الثمين اللي حنا نفرط فيه وندش في المخدرات وش يا شباب؟ ترف؟ لا. وش هو عقل؟ لا . اول حاجة يتنازل عنها الشخص اللي بيدش في ادمان المخدرات هو دينه اول شي الدين ويوسف الصالح اول ما فرط في دينه وعشان كده يوم فرط في دينه صر ماله اهمية لانه في شباب كثيرين انا قاعد اشوفهم وانا كنت منهم ما يدري الله وين حاطه وياهم وياهم عليهم عليهم صلوا الساعة صلى وياهم اذا واحد شغل مسجل غنى وياهم ما يدري وين حاطه ما عنده شخصية محددة هذا يوسف الصالح كان في البداية ما عنده شخصية محددة طبعا الظهر في المدرسة رايح يدرس ولكن المرغب والعشاء انا مع جماعة المسجد لانه ابوي يبغاني اروح المسجد فصاير عليهم المغرب والعشاء شيخ وبعد العشاء قعدنا فوق البرحة وسوالف غراميات كنا المغرب والعشاء شيخ واخر الليل رومانسي شاعر صار الصبح صار طالب صار الظهر صار يلعب كورة لاعب كورة اي شنو شخصيتك ؟ ما ادري. بس مع القوم يا شقرا ما عندي شخصية وعشان كده انا كنت صيد سهل فرطت في ديني وكنت اسميهم معقدين . يوم كنت في المكتبة معاهم في المسجد كنت اقول لاحد ربعي متى الله يفكنا من المعقدين هذول. تدرون اول مسكه انمسكت فيها كنت رحت فيها اعدام كنت العب ويا ناس كورة ما ادري من هم بس اجي جاهز والعب كورة معاهم شوي والا الدوريات علينا في الملعب اخذونا طيب انا ماسويت شي يودونا للشرطة ويسولنا حفلة كيك واعطونا كل واحد هدية طبعا هدايا مغلفة عبارة عن كفوف فانا قاعد اتسائل ويا روحي وانا في سيارة النجدة اقول ليش ماخذيني انا ما سويت شي ويوقولي العسكري هس هس . كنت ابي اعرف ليش ماخذيني انا مو بس ابي اعرف ليش ما خذيني انا بعد خايف من الشاكوش في البيت لما يقتلني يسويلني يوم جينا عند الضابط قال منو فيكم سارق انا والله ما سرقت طاخ طيخ طاخ اعترفوا 3 من لاعبين الكورة انهم سرقوا يوم يقول الضابط معاكم 5 سلموهم قلتله يا ضابط انا ما سويت شي قالي لا انت سويت اكثر شي قلتله وشو قال ماشيت ناس ما تعرفهم اسلوبهم وكثير من الشباب يسوي صداقات ويسوي افلام هندية ويا واحد ما يعرفه قبل شهرين ما ادري مجرم حرامي هو سارق ويهديه كل شي واول شي يهديه دينه رجاجيلك هذول هذاك طبعا جايك غرقان ويبي يغرقك فيجيلك يقولك هاه هذا لقوني اش لك ويا المعقدين هذول يا اخي تعال خلنا نطلع نتمشى هاه قاعد يسرق دينك منك يسرق اهم شي عندك اللي هو الدين . دينك كرامتك . انا اقول ان الدين حاجة محتوية على اشياء كثيرة قاعد يسرق منك صلاتك قاعد يسرق منك ايمانك ليش لانه هو سرقوا من عنده اول فهو يجي يسرق عندك وما يسرق الا اغلى شي تعالوا شوفوا لو انت ما عندك دين ولا تصلي ما احد يجيك
يا اخوان انتبهوا شياطين الانس اقوى من شياطين الجن انتبهوا يجيك انه حبيبك واخوك وحياتك وبعدين تلقاه هو اللي يحط السكين على رقبتك وهو اول من يحز (( يوم يعض الظالم على يديه يقول يا ليتني اتخذت مع الرسول سبيلا يا ويلتاه ليتني لم اتخذ فلانا خليلا لقد اضلني عن الذكر بعد اذا جاءني وكان الشيطان للانسان خذولا)) والله هو اول من ينحرك لما يسيطر على الدين حقك خلاص يكون حطك في الحفظ شفتوا الناس المعاريس شلون يخشون القفص الذهبي الواحد فينا يخش القفص الناري عيشة ضنكة والله كنت اطلع من البيت ما ادري رح ارجع للبيت والا ما رح ارجعله عمركم شفتوا واحد يطلع من البيت ما يدري . ابقولكم على سالفة كنت يوم من الايام قاعد اروج حشيش ويطقون الباب ناس وايد مروج والا يطق علي واحد الباب وعليه كرت بطاقة هنا مكتوب عليه التعداد السكاني انا قلت رجال المباحث مسويلني حركة وامسك الرجال وافرشه عند البيت تعداد سكاني ها؟ اوريك قلت علي انا. لانه انا يوم كنت اتعاطى افتكر انه انا ذكي افتكر انه انا واعي يا الله اغبى واحد في الدنيا كلها يوم وانا اتهاوش انا واياه طلع اخوي وقف عند الباب ايش فيك قال الرجال يا اخوي هذا كرتي انا من التعداد السكاني قالي ايش سويت في الرجال قلته لا هذا مباحث كل واحد يطق البيت اخاف يكون مسوين علي كمين وحينها طقت في مخي ليش ما يكون اخوي متفق مع رجال المياحث صرت اطوف ورا اخوي ادخلوا المجلس ادخل وراهم وقاعد اطالعهم ويسال اخوي سؤال واقول اه يا الكذابين تسونها علي والله قاعدلكم هنا فراح سأل اخوي قاله كم عدد السكان؟ كم عدد البيت عندكم؟ قال حنا 8. قال له اخوي 7 . وقفت قدامه اطل عليه شلون 7 حنا 8 واقول حق اخوي حنا 8 واهو ملح 7 . طلع الرجال من المجلس والحق اخوي قلتله تعال انت قلتله 7 وحنا 8 . قال من ال8؟ قلتله انا طبعا انا عديت حالي اول واحد . انا قالي منو انت؟ قلتله انا ساكن وياكم قال انا ادري وين تنام الليلة ليه تنعد على الحكومة مرتين اول اثبت وين انت تروح وخلهم يعدونك . كلامه صحيح يعدوني في المقبرة والا في السجن والا وين والا في البيت ما كان عندي محل ثابت ترى ما كان عندي كروت اكتب عليها يوسف الصالح ص . ب ما بي مكتوب عليها خ ف ، ص ب ما بي صندوق بريد ما بي الا خرابات اول ما يسيطر على دينك يبدي يلعب بيك عاد اوه روموت كونترول يمين يسار الحين بعده ما اعطاك مخدرات بعد يحاول يسحب منك كل شي زين


اسأل مجرب(2)
بعد الدين يبي يفرقك من اهلك وبالوالدين احسانا (( وقضى ربك الا تعبدوا الا اياه وبالوالدين احسانا اما يبلغن عندك الكبر احدهما او كلاهما فلا تقل لهما اف ولا تنهرهما وقل لهما قولا كريما واخفض لهما جناح الذل من الرحمة وقل ربي ارحمهما كما ربياني صغيرا)) بيني وبينكم من يطبق هذه ومن فيكم يرددها عقوق الوالدين حنا فسرناها على كيفنا الله يقول لك لا تقل لهما افا وحنا باليوم نقول لهم 100 مرة لا لا لا. قلنا لا غير اف لانا حنا ترجمنا كلمة لا غير اف . وبالوالدين احسانا تعال شوف يوسف الصالح وش يسوي مع والديه انا والدتي توفت قبل عدة ايام الحمد لله انها ماتت وهي راضية علي اويلاه لو هي ميتة وهي مو راضية شو بيصير بحالي اويلاه لو مو انا اللي منزلها القبر شو بيصير بحالي رحت حق امي وقلت لها امي قولولي انا وش ضريتك بالتعاطي مالي قالت ايش ضريتني يا يوسف انت تقعد من الصبح لليل ومن الليل للصبح عند ربعك وانا ما انام استناك عند باب الشارع يوسف ابغاك تعرف حاجة واحدة ان قلبي يحس فيك ولا يحتاج لجواز ما يحتاج قلبي متصل مع الله بيك تعرفون الرنية اخذوني حق الشرطة وكانت الساعة 12 بالليل بكلم الضابط قالي كلم اهلك كلمت بالتلفون ردت علي امي سكت يوم تقولي يوسف تكلم قلتلها يومه انا بتاخر ربعي عازميني وانا بتاخر قالتلي يوسف عليك الله ما بيك شي قلتها والله يومه لا ما بيني شي قالت لا يوسف انا ويا اذان المغرب قلبي عورني اول ما عورني قلبي قلت يوسف بيه شي يوسف انت بيك شي قلتها اي يومه انا بالمغرب انصدت قالت شفت قلبي حس فيك وانت بالرنية وحنا لا حياة لمن تنادي لا حياة يروح يسهر هو وربعه على البحر والام كذا بالبيت (تحرق اعصابها من الخوف والقلق) يا اخي حس فيها ارفع تلفون وقل لها انا بتاخر لا يعلقها لازم يعلقها
جيت حق ابوي قبل لا يتوفى قلت له يابه ابيك تقولولي انا وش ضريتك بالمخدرات قال يا ولدي انت ضريتني خليت راسي ينزل بالقاع لا اروح مجالس ولا اعرف اروح مسجد كل الناس يتكلمون عنك . ابونا لما يدش البيت نلعب صمت فيكم خير تكلم انا ابوي لما يدش البيت اصير وز ولما يطلع من البيت طاخ طيخ طاع كان ابوي لما يصعد الدرج الفجر وانا بغرفتي فوق السطح يبي يصحيني على صلاة الفجر كنت اسمع كحته واقوم من الفراش مثل الجني والا انا بعد اتوضى ولمن يسافر ابوي وتجيني المسكينة الله يرحمها وتصحيني روحي انتي ورجلك ما بلشتينا انتي ورجلك ما منك فايدة انتي وحنا ما نقدر الا على الامهات والمساكين ما نقدر على الابو لا عصي وهي ماخذة الدور هي الاب وهي الام وهي كل شي وفوق كل هذا تعال شوف الصبح . انا اذكر جانب بيتنا كان في سوق يسمونه سوق حراج مؤقت الساعة تقريبا 6:30 الى 7 الا ربع وتعال شوف يومه وين شرابي يومه وين غترتي يومه وين هذاك يومه وين هذاك اقدر اقول لابوي يوبه وين شرابي ما اقدر وكان من يصحيني اروح المسجد على طول واشوف في شباب وايد لما يصير في خلاف بينه وبين ابوه يحط امه الواسطة . اقولك نعم روحي قولي حق رجلك (ابوه هو) خله يعطيني 50 . زين انت روح قوله لا ما ابغى انتي روحي قوليله فطبعا هي تكون الواسطة وهذا غلط في العلاقة بين الاب وما بين الابن. ولكن وبالوالدين احسانا رسالة يوسف الصالح لكل واحد موجود اللي عنده ام واب على قيد الحياة اول ما يطلع من هنا يروح يبوس راسهم ويقول لهم اسف لانه رح يجي اليوم اللي ما يلقاهم ويحن عليهم لاني انا فقدت امي الحين لاني انا كنت ادور امي الحين والله يا شباب امي ميتة من 10 ايام والله ما اني مصدق انها ميتة والله اني قاعد اروح لها الغرفة وافتح باب الغرفة واقعد اطالع الغرفة واتذكرها واللي الحين يتنعم بامه وابوه وموريهم شقى الله ما رح يعاقبنا الا بوالدينا وهذه من اسباب تعاطي المخدرات يحرصون عليها الناس كانوا اول يقولنلي ربعي ايش هذا اب معقد عندك يا شيخ خلوني اؤمن ان ابوي معقد . ايش هذا يا اخي ابوك هذا ايش هذه امك يا شيخ وخلوني اكره امي خلوني اوريهم نجوم الظهر ولكن ابوقلكم على سالفة . عندي ولد اسمه خالد اتصلت في زوجتي وقالتلي خالد مو بالبيت انا كنت بالعمل خالد مو بالبيت وينه قالت لي دورت عليه بالبيت ما حصلناه رحنا البقالة ما حصلناه واجي بسيارتي خطف جيت البيت امشي مليون وقلبي في حسرة ياللي تأذي امك وابوك الحين بكرة ولدك رح يأذيك ويوم وصلت البقالة الاولى وما لقيته والبقالة الثانية ما لقيته صدقوني يا شباب نزلت من السيارة قلت السيارة ما تخليني ادور ونزلت امشي واركض ركض طاح شماغي وطاحت نعالي وانا ادور وانا اقول الله لا يسويلني مثل ما سويت حق ابوي كرة مطاطية تطقها هناك ترجع عليك بيوم من الايام مثل ما تعاملهم يجي يعاملونك عيالك الا من رحم الله
صالح ولدي طلبني فترة من الفترات اني القي محاضرة عنده في المدرسة ما حبيت احرجه فرحت للمدرسة ولقيت ربعه تعرفون صاير بطل كذاابوي اللي بيحاضر شوفوا فجبته وجلسته جنبي عند الطاولة فما حبيت احرجه واتكلم عن المخدرات تكلمت عن علاقتي مع ابوي وعلاقة حقوق الوالدين اذا ما صارت مضبوطة فيعني ما رح نرتاح بالحياة حق الطلبة يعني فلقيت واحد الظاهر في مشكلة بينه وبين صالح قام يقولي انت تعامل ولدك صالح كده يعني يبي يحرجني ويحرج صالح فقلتله انت ليش تكلموني هذا صالح عندكم قولوله فصالح ارسل لي رسالة بكلمتين قال لهم ابوي اول ما هو كويس الحين ابوي كويس اتحسبون ابو سنة وسنتين وثلاث واربع وخمس ما يحس قلتله قول اللي يريحك . جيته مرة وقلتله يا باب خلنا نروح بيت عمك نتغذى وركب وياي بالسيارة وهو متضايق قال يا بابا انا رايح بيت عمي علشانك انت قلتله بابا ليش قال نسيت يا باب يوم انا صغير ويمسكونك ويربطونك ويطقونك نسيت يا بابا. اوخ وانا اقول ما يدري
جاني واحد في مستشفى الامل يا شباب اقول الكبك يمكن 25 الف ريال والقلم اللي حاطه وسيارة شبح وهذاك الولد كشخة قال انا مدمن مخدرات قلت تفضل وقعد عندي اسبوع بعد حوالي اسبوع جاني الممرض وقالي في حرمة عجوز تبغاك بره والا جيت هذه العجوز جاي حافية بليموزين وعكازها معاها قالتلي انت يوسف الصالح قلتلها اي قالت انا ام عبدالله قلتلها اي عبد الله قالت عبد الله فلان فلان فلان قلتها ايش فيه قالت انا امه قلت لها مستحيل تكونين امه هذا مبين عليه ولد ناس جاخ قالت يا ولدي انا على الله ثم على المحسنين ولدي يسحب كل مال السوق يلعب فيه شفتوا النذل يوم كانت تقولي سوالف تطير المخ بيتنا اجار وغذانا وعشانا على الله ثم على المحسنين قلتلها بس ولدك عنده شبح وقلمه قيمته الفلاني والله لو يبيع القلم يعشيهم 4 ايام قالت يا ولدي هذا كله من مال السوق يسحبني ويخليني انا واخوانه نروح نفر من جديد . عقوق الوالدين السبب الرئيسي بعد الدين .
السبب الثاني العلاقات مع الاسرة تعالوا شوفوا علاقاتنا مع الاسرة لو استثنينا الام والاب وبقى الاخ والاخت والزوجة هي قمة البلاء. اما زوجتي 16 سنة زوجة 16 سنة تحملت الضيم ولكن كان في صبرها العجب قلت لها قوليلي شنو اللي انا اذيتك فيه بالمخدرات قالت لي يوسف انا اهم شي عندي كنت اشوفك تموت ولا قادرة اسويلك شي اشوفك وانت تنتحر ولا قادرة اسويلك شي عشان كده انا قاعد اقول حق الاخوان اللي عندهم مشاكل في التعاطي في المخدرات والا مشاكل بينه وبين زوجته اقوله ارحم زوجتك تكفىارحم زوجتك والله يرحمها انا ما كنت راحمها. اله يغفرلنا في مرة من المرات داش وانا وياها كل ما جيت البيت امي تحت تدرسها وفوق تجيني (ددددددد) اترك المخدرات اترك المخدرات انت تأذيني وانا جاي مطروخ بطقها ايش اسويلها. كان عندي حبوب يسمونها حبوب روش اول ما جيت الي يخليك عطني واحد ليك وواحد لي عطيتها زين افرض انها ادمنت عليها المهم انا ارتاح مو ضروري العالم شو يصير لهم لا المهم انا ارتاح مو ضروري العالم شو يحسون لا المهم انا ارتاح وبس اناني انا ابغى ارتاح . تعالوا شوفوا علاقاتنا مع الاسرة فقدت الاخ والاخت وانا دائما انظر لاخوي انه نذل لان ابوي يحبه اكثر مني لاني انا مو محبوب لاني انا محسود لاني انا ذكي فيقعد هذا رفيق السوء هذا الشخص اللي سحب دينك وعلاقتك مع والدينك يبغي يسحب من عندك علاقاتك مع اهلك

اسال مجرب(3)

الشي الثاني اصدقاء السوء وما ادراك ما اصدقاء السوء اللي في يوم من الايام طالع من البيت ولقيت ابوي يتكلم ويا واحد من ربعي جايبلي مخدرات واسمع ابوي يقوله انت مو برجال انا صراحة جتني حمية على ربعي ورحت لابوي وقلتله اصلك انت مو برجال تعرفوا ايش قال لي ابوي روح الله يهديك اقولكم على سالفة ثانية في عندي جار متعمد انا متعمد كل ما اصلي الفجر اطالع بيته كذا بيته اسود هرمس ما به ولا لمبة فيوم من الايام حوالي فترة بسيطة فجيت ولقيت لمبة غرفته مولعة على صلاة الفجر طالع المسجد قلت عسى ما شر ليكون جارنا خوينا فيه مرض والا شي والا يمكن اهتدى يبي يجي المسجد رحت اصلي في المسجد صلاة الفجر ادور يمين يسار ما لقيت خوي عاد اشتغل عندي حب استطلاع ما اقدر قلت خلني اطق عليه الجرس يا يوسف الحين مو وقته الدنيا ليل خله الصبح تسال عنه قلت لا بسال عنه الحين طقيت عليه الجرس طن ما فتح طن ما فتح طن طن فتح شباك مين قلتله ابو صالح قالي جايلك نزلي قلت له فلان حقه ما شر اشوف لمبتك مفتوحة ليكون واحد من العيال والا انت مسخن قالي لا هي مباراة الارجنتين والبرازيل سهران علشان مباراة الارجنتين والبرازيل
نيجي على الفقرة الثانية واللي هي التقليد وحنا نحب التقليد ترى على فكرة مرض التقليد صايب مو هو بس المدمن الحين الام تقلد والاب يقلد تعرفون هذا لاعب البرازيل اللي حاط على جسمه وشعره كده واش اسمه هو هذا رونالدو راح للحلاق يبي يحلق اقرع وخربت عليه الماكينة وبقت هذه وعليه مباراة فقال حق الحلاق كملي وراء المباراة نزل للملعب وهذه موجودة صار شبابنا بالسعودية كلهم قصوها رونالدوا المسكين تعجب يوم شاف كل العالم هنا ليش قال لانه اللاعب الفلاني يسويها زين وشو اللاعب الفلاني هذا . يا عم انت معقد. ماشي بالسوق ولقيت 3 يمشون اهم 3 بس 6 والا معطينا ظهورهم يمشون والا عليهم بنطلونات كل واحد بنطلونه 60 نعش ويسوي كذا بالبنطلون وش وش ما في عظام بنطلون يتحرك ليش يا اخي وش السالفة قال يا اخي هذه موضة . وشو الموضة موضة بس ما تصلح لك انت . كنت رايح اجتماع للمدارس والا واحد يا جماعة رقبته هالطول والا قاعد قبالي وانا قاعد اتكلم وشدني الانتباه له رقبته هالطول وحاط هنا 650 الف زر قلت والله ما اخليه نهاية الجلسة لازم اسحبه واناديه جيتله قلتله يا ابو الشباب قالي تم قلتلوا يا اخوي وش هو هذا 1،2،3 وشو هذا قال هذه موضة قلتله موضة ليش قالي لانه المدرسة اشوفهم كلهم مسوينها قلتله اللي في المدرسة رقبتهم هالطول وانت رقبتك هالطول تبغى التقليد يصلح لي يصلح لديني يصلح لمجتمعي ما اعرف المهم اني البس وهذا كان اسباب . اسباب مشاكلي كان التقليد الحين تعال لو تروح مدرسة من المدارس وتحصل طالب واحد لبس عدسات خضر بكرة كل المدرسة لابسة خضر صاير طبيعي عندهم يجي واحد ما يدري حاطط ياقة كده المدرسة كلها تقلده . تقليد اوووه حنا للتقليد تقليد ينطبق معانا ؟لا . ينطبق مع ديننا؟ لا . لا ما ينطبق المهم يا اخي هذه المجتمعات الراقية بتسويه لان هذه المجتمعات الراقية دخلت يوسف 20 سنة ادمان 20سنة تعاطي 20 سنة موت والله موت ويا اخوان احذروا التقليد وهذا اول ما بديت اتعاطى مخدرات كان عندنا واحد عينه هني وتجيله ما به صوت يعني مسكين تعبان ويروج مخدرات وكان حلمي في يوم من الايام اني انا اخذ صفة الشخصية هذه شفت شلون لمن يجي العصر وهو قاعد على الكرسي ويروج مخدرات والشمس طاقة بعينه وطبعا لما تطق الشمس بعينه يفتح واحدة ويسكر واحدة فكان حلمي اقوله سلوم يقولي نعم اقوله تصدق يا اخي اتمنى بيوم من الايام اخذ شخصيتك يا حسرة تدرون شلون مات شنق نفسه لانه مل من الحياة صار مثل الشريطة يدورون فيه بالمستشفيات مل شلون يعيش حياة ضنكة والله والله والله اسالوا اللي يستعملون المخدرات قله شلونك؟ يقولك ههه ما ادري. تحس بشي؟ قال لا. تسمع شي؟ قال لا. تتطعم شي؟ قال لا. والله والله كنت اعيش بعيشة ما يعلم بها الا الله .
ابقولكم على قصة تصدقون يا اخوان هذه حاصلتلي انا وفي شهود عليها بعد توبتي بسنتين ان شاء الله اني اكون تايب وادعولي الله يثبتني ويثبت كل مسلم اتصل فيني وكان ملازم والحين رائد هو موجود قالي يوسف امس حنا لقينا فلان تعرفه؟ قلتله اعرفه قال تعرفه عدل قلتله صديقي قال لقيناه ميت في الشارع واتصلنا بولي امره عشان يجي ياخذه يدفنه ما رضوا فيوسف سوي خير ونحسبك من الطيبين وروحوا ادفنوه قلت هذا خوي يعني ادعيله انه الله يغفرله فقلت له انا ما اعرف السالفة وش اسوي قالي روحوا خذوا ورقة من الامارة اسمها تصريح دفن فرحت الامارة سويت تصريح دفن . وش اسوي؟ قال خذ الاشعار عندنا مسجد بالدمام اسمه مسجد الشيخ عيسى اللي عاشوا بالدمام يعرفون هذا المسجد حق غسيل الموتى قال روحوا خذوا اسعاف من عنده فرحنا ناخذ الاسعاف من عنده وطحنا حق المسجد قال والله ما عندنا الا اسعاف واحد دورولكم سيارة وجيبوا ميتكم شوفوا يا شباب ابغى اوريكم على شي بس تكفون ففتنا حق المستشفى المركزي وطقينا على باب الثلاجة اطلع لنا واحد هندي قلناله هذا تصريح الدفن نبي ناخذ الجثة طالع الهندي الورقة يوم يقولي انا وخوي اووووووه هذا نفر ما بي كويس قلت اوووه حتى الهندي يعلم حق الميت فاعطينا الهندي فلوس يجيبلنا الميت والهندي يقول مابي فدشينا حق الثلاجة والهندي مو راضي يفتح الثلاجة يبي يقول 1 2 3 صديق مال انت هنا ويفتح الثلاجة ويسحب ما اعرف انا جديد ويسحب فقال خوي طالع في وجهه يوسف تأكد انه فلان طلعت بوجهه اعوذ بالله من الشيطان الرجيم كل ما قلتها حق واحد مو راضي يصدقني يقول يتهيء لك وخرت قلت حق خوي تعال شوف قال اعوذ بالله من الشيطان الرجيم خل نشيله شلناه وحطيناه في السوبر والله يا شباب انه الريحة في السوبر قعدت اسبوع كامل ريحة خايسة ما اطلعت من السوبر وخذيناه حق المسجد وحطيناه حق المغسلة قال لنا مغسل مسجد الشيخ عيسى انا عندي ميت قاعد اغسله اعلمكم وغسلو خويكم قلنا يالله وقعدنا نغسله واول ما نصب ماء على جسمه والله يا شباب اول ما نصب ماء على جسمه ونبدي نحك بجمسه كذا يطلع جسمه مثل الورق معانا جلده يطلع مثل الورق معانا نبي نرفعه والا تطلع من دبره ريحة شوي والله شوي منو فيكم يبي الحياة هذه او الموتة هذه الحين خلصنا من هذه المشكلة وحطينا عليه الفشت وصلوا عليه الجماعة ووديناه للمقبرة قال ويا المسجد انا بادفن الرجال ويا خويهم اهم 3 بس انتوا ادفنوا خويكم واحنا 2 نبي واحد ثالث خوي وهو موجود ما زال وتايب نزل ينظف القبر قالي يوسف قلتلة ايش قالي انت وفلان ارفعوا هذه وانا بسحبه للقبر تصدقون جينا نرفعه ما قدرنا اطالع خوي وخوي يقولي يوسف شيل اقوله والله انا قاعد اشيل ما قدرنا نرفعه كله ما قدرنا خوي قال يا جماعة وش فيكم اليوم يالله انا امسكه من عند الكفن واسحبه معاكم احس به يقولي يا ولد الصالح لا تنزلني انا مو جاهز حق العذاب الحين الله يخليك يا ولد الصالح لا تنزلني انا ميت على معصية منو فيكم يتمنى الموتة هذه يروح يتعاطى لا تقولون ولد الصالح ما قال الموضوع شغل في مخي يا انا خرفت يا وسوست يا هذه رسالة تكون السبب يا ولد الصالح انتبه وحنا كثر تجينا رسايل ما نقراها نفتح الظرف وش قاعد يصيرلك اي مرض تقول والله لانه الجو شتى وهذا والامراض فايروس ما فايروس يا اخي اعتبرها رسالة من الله وعيد حساباتك . كلامي صح والا لا؟ من فينا لا تجيه رسالة رسائل كل يوم الله يدزها لنا الله يدز لنا واحد مقطوعة رجله بدال ما نفكر بالرسالة مالته نضحك عليه يا شباب الشباب لما تشوفون واحد شايب قاعد يمك ومكحكح لا تضحك عليه وهذا تراه مصيرك توصل كذا ولكن الشباب يضحكون ما نفتكر بالرسايل اللي قاعدة تجينا من الله
الرسالة الثانية لواحدة كلمتني تقريبا من حوالي شهرين تقول انه زوجي بالسجن محكوم 4 سنوات وانا ما ازوره واجد لكن بعض المرات يطلبني خلوة شرعية اروح له تقول في يوم من الايام طلبني الف ريال قال ابي تدبرينلي الف ريال قالت انا على الله وعلى المحسنين بس قلت بعطيه الف ريال عساه ان شاء الله انه يتوب فتقول تحققت من الامر لقيت انه يبغى الف ريال لانه يبي يشتري مخدرات في السجن تقول تجاهلت الموضوع كل يوم اروح له يقول لي وين الالف قلتله والله ما لقيت والشؤون ما اعطونا والمحسنين ما جابولنا تعرف وش يقولها النذل يقول لها يا اخي ابي الف ريال صرفي روحك النذل يقول لها صرفي روحك تعرفون وش معنى صرفي روحك لها معان وايد ولكن معناها هل تعتقدون انه انسان يبغاها تتنازل عن اغلى شي بالدنيا ولكن المخدرات عمت على قلبه وقام ما يحس حتى بشرفه يقول حق زوجته صرفي روحك
ثاني سالفة ام من مدينة ما هي بعيدة عنكم هني اتصلت فيني قعدت ربع ساعة وهي تبكي اقول لها يا بنت الحلال خليني اسمعك قالت لي اش اقولك قلت اسمع اش اقولك قلت لها لا انا متعلم قولي لي ترى اني فاهم والله فاهم قالت لي اسمع يا ابوي انا عندي زوج صار له 35 سنة يتعاطى كالونيا مسويله محل عطور في بطنه ولكن على اساس انه حالتنا المادية بسيطة هو ما عنده فلوس يشرب خمر يروح يشتري الكولونيا رخيصة ولكن بالليل يقلب المجلس عندنا بار اهو عليه ثلج والباقي عليهم الخمر والله هذي انا اسمعها عادي ما في شي قامت تقول الطامة الكبرى انه عنده 4 بنات وكل ليلة يختار واحدة حق ال**اين هذا ابو؟ وتلفونها موجود عندي قلتلها زين ليش يروحون وياه؟ خل يمتنعون قالت اللي تمتنع تنطق حتى يغمى عليها وبعدين يوديها للمقلط ويفصخها ويدخلهم مرة ثانية عليها مينو فيكم يتمنى حاله يصير كده والله انها تبكي دم
وفي واحد اتصل فيني يقولي يوسف الحق علينا اخوي صابه وسواس وشك في زوجته من كثر الحيوب حبوب الشبح والليموني هذه اصنعتها اسرائيل لنا حنا هذه الحبوب ترى فيها خدمتين الخدمة الاولى انها تحرك الخلايا مالة التفكير ومالة التركيز هذه جابتها اسرائيل وذبتها واللي يسمونها الشبح واللي يسمونها الليموني واللي صوبه انتبهوا منها ترى انها واحدة بواحدة يعني ان كان الهروين يدمن عليه الشخص 3 ايام فهذه الحبوب بيومين بس . فقال الحق علي اخوي شاك بزوجته وحابسها هي وعيالها بالبيت وماسك مسدس مو مخلي احد يدش عليهم والله يا شباب شوفوا يا شباب ويقول انهم صار لهم 3 ايام ما اكلوا شي شو نسوي يقول دش فيها مفاوضات الله يخليك الشغلة فيها مسدس ومو قد المفاوضات قعدت المجلس جاني اخينا بالله لو تشوفونه والله انا يوم قعد يمي قلت وين المدمن والا رجل انيق قمة اناقته ولبسه انيق ومثقف تعقدت يوم دريت انه معاه ادب انجليزي وفاهم وواعي ولكن مدمن على المخدرات قالي خير يا شيطان الانس يقول لي انا. قلتله انا مدمن زيك قالي شايفني انا مدمن؟ انت مدمن واللي فيكم على زوجتي كراهية لقيت فيه كراهية يطلع فيكم للسما قلتله ولا يهمك وهذا ومن هالكلام . الحين ابا بقوله اللي فوق ايش ذنبهم؟ اخاف يقولي وش دراك قلتله يا ابن الحلال ترى الامور تصلح وانا كنت مثلك قلتله عندك مسجل قال لي ليه قلت له ابي اسمعك شريط جديد نازل فراح جاب لي مسجل وحطيت الشريط حقي وبدى الشريط ودخل جو هو انا بقوله كلمة فقلت له يا اخي قال اش اش قلت لا دخل جو الرجال تمام يوم يلتفت علي يقولي بالله عليك هذه قصتك؟ قلتله اي والله هذه قصتي تصدق قصتي قال لي لا هذه قصتي فانا قلت يمكن انلحس من الحبوب قلتله قصتك قصتك قال هذه قصتي واكيد اخوي النذل اللي قايلها لك قلت لا والله ما حد قايلها لي هذه قصتي بس عشان انا كنت اتعاطى مخدرات وانت تتعاطى مخدرات قصتنا واحدة بس يا ابن الحلال اللي فوق مالهم ذنب قالي لا اللي فوق فاجرة وانا احاسبها وقعدنا مفاوضات وياه 4 ساعات بس الطامة الكبرى يوم رحنا فتحنا الغرفة والا لقينا طفل عملاه سنتين صاير ازرق والام طايحة ووحدة صغيرة موسخة على روحها لاعب بنفسية عياله لعب ليش لانه مخدرات

اسال مجرب(4)

واحد بالشرقية شك بزوجته بعد من الحبوب الحبوب اوووه الحبوب فقال لها يا مرة انتي ما انتي مضبوطة قالت له يا ابن الحلال حرام عليك انا مصلية مسمية قال لها اقول لك انتي ما انتي مضبوطة بس تدري شلون انا بروح الديرة بجيب امي تقعد عندك تحرسك فراح للديرة جاب امه قال يومه اسمعي انتبهي للمرة ترى المرة ماهي مضبوطة وما تدري امه انه مدمن فبعد يومين شك بامه انها ماهي مضبوطة والله يا شباب شك بامه انها ماهي مضبوطة وانها تساعد زوجته فراح يسوي ايش راح شرى اسمنت ابيض تعرفونه الاسمنت الابيض وقام كل يوم الصبح يرش على الرخام اسمنت ابيض تعرفون ليش عشان يوم يجي من الظهر يشوف منه دايس على الاسمنت شوف ذكي هاه على انه حشاش بس ذكي فكل يوم يجي يشوف الاسمنت ما حد داش عليه يقول اكيد يجونها من فوق قعد وياهم وقام عالسريع جاب الكلاش علشان ما يشك باحد وذبحهم وبعدين وبعدين رسايل منو بيكم يبغى هذا . الحين مجرد تقول انه اخوي مدمن تقول اعوذ بالله شلون لو يسون هذا كله شو بيصير بحالك
وهذه مشاكلنا اذا قدرنا نتخلص من البلوة هذه وما رح نتخلص الا كلنا قلوبنا مع بعض وانا تحت امركم يا شباب سامحوني ومع السلامة
------------------------------------------------------------------------

انتهت القصه اسال الله ان يحمي شبابنا من هذه الافه

اخوكم ابو لـيـان

أبو ليان

صباح الخير يا الغالي

الله يجزاك خير على النقل

للأسف المخدرات أصبحت شي ضروري في زمننا هذا

و ليعلم الجميع و الكلام من الدكتور الجبرين يقول حتى الدخان و المعسل يحتوووون على كحول.

تقبل مروري .

الله يحمينا ويحمي شبابنا


ومن اهم اسباب الوقوع في المخدرات الـــــــــــــــــــــــفــــــــــــــــــــــراغ


جزاك الله خير اخوي

ولـــــكم باكــ أبو ليان مطول الغيبه

قصة تحمل الكثير من العبرات

سمعتها في شريط له عنوانه " هذه قصتي "

اسلوبه كان مأثرا في الالقاء

وبالفعل هي تستحق النقل

شكرا على مجهودكـ أبو ليان