أمــــــن وأمـــــان...!!والله المستعان - نادي الهلال السعودي - شبكة الزعيم

abo_nasser · #1 23/05/2008, 08:37 AM

بـــسم الله الرحمـــن الرحـــيم

الـسـلام عليكــم ورحمة الله وبركاته

اسعد الله صباحكم ومساكم بكل خير..ورده
من اول وكان في خاطري انزل موضوع ..ولكن كل ما حاولت اكتب اتكيسل

..لكن بعد ما شفت ابوالقلق منزل موضوع والتكرونيه مدهره كل يومين منزله موضوع ..قلت ويحي من حالي وش ناقصني عنهم..

(احـــداث ينبع الصناعيه)
في المرحله الثانويه..كنت ادوام مع محمد(من اقربائي)وكعادتنا الكريمه نداوم متاخرين مره يكون هو سبب التاخير ومرارير اكون انا السبب

ينزلني المدرسه وهو يروح دوامه بعد ما ياخذله فرتين على مواقف المدرسه

..في يوم من الايام

طلعنا كالعاده للدوام وكان ابو الشباب مشغل حسين الجسمي ورافع الصوت

..من اول ما طلعنا من البيت وانا اقفل المسجل وهو يشغله ..حسيت ان الجسمي بيطلع ويفقع وجيهنا كثر ما اقفل وهو يشغل

..وقفنا عند الاشاره..وبين ما كنا نحتفل بالمسجل

..سمعنا اصوات غريبه..انا..محمد وش ذا الصوت..؟؟محمد..وش عرفني ما ني جالس جنبك يالدلخ..

...ما كمل كلامه الا سياره جايه وفيها واحد جالس على الطاقه(النافذه)

ومعه رشاش

وجالس يرمي في السماء..

صراحه ..انا انخرشت..بس مو خرشه قويه..

بعدها لفت السياره جهت مدرستي..وليتها ما لفت

..لان اول ما لفت شفنا واحد رابطين ايدينه في شنطة السياره وساحيبنه على الشارع..

..بعدها انخرشت خرشه قويه

..طبعا جميع الناس وقفت مكانها ..الاشاره ولعت خضراء ورجعت حمرت اكثر من مره...وكل هذا من قوة الخرشه..

..كل الناس جلست واقفه الا الثور محمد

راح ولحقهم ..يقول يبي يشوف وش بيسوون ؟؟؟ قلت له يا دلخ رح شفهم لحالك ..انا وش لي صلاح(دخل) فيهم ...ما سمع كلامي وراح جهتهم ..واحنا رايحين واذا بهم راجعين ..وما كان بيننا وبينهم غير الرصيف..

ومروا من جنبنا ومازال ابو الشباب يرمي الرصاص في السماء..محمد من قوة الخرشه ..قام يرفع يده يسلم عليهم ..

..عدوا من جنبنا بسلام ..قلت لمحمد ..نزلني الحين عند المدرسه يا سربوت..

..كنت وقتها منخرش وحاقد على محمد ..نزلت للمدرسه..قابلت
اخوياي ..قالوا لفوا عندنا بالمواقف وجلسوا يكلمون بعض الطلاب عن الفلوجه والعلوج ومن ذا الكلام..

في ذاك اليوم حصلت امور لاول مره ..

اول مره اشوف دوريه واقفه واللي معه سلاح يمشي من قدامه..

كان فيه طلاب فرحانين ..والسبب ان اباءهم اول مره يجون المدرسه وياسلون عنهم..

اول مره اشوف المدير منخرش بقوه

كرهت ابو ام الاغنيه اللي كان الجسمي يغنيها ولا سمعتها ليومكم..

نص سكان الهيئه الملكيه رفضوا ان يدامون اولادهم اليوم التالي الا ابوي سرحنا من صلاة الفجر..

عموما حصلت امور كثيره في هذي الحادثه ..اللي ماخلتني انام مثل العالم والناس لمدة اسبوعين وانا اتذكر الامريكي ما ادري البريطاني اللي سحبوه على خشته قدامي..

من بعدها تاكدت ان ما هناك امان مثل زمان اول

..كان الواحد يوقف سيارته في اي مكان وينام ..كان الواحد يخلي باب حوشه مفتوح ولا يفكر باحد ..كان الواحد يسافر ولا يفكر في بيته..اَاَاَاَاَهـ يا زمن العجايب..

بعد ما انتهت الحادثه وجاء الصيف رحنا للديره ..ومن اول يوم وصلت فيه قابلت واحد من الجماعه ...يقول هو انت اللي اندس ورى سطل الزباله(الله يكرمكم)ايام الاحداث اللي صارت عندكم..؟؟

انا :

لا ..ما اندسيت ورى شيء
بعده قابلني حوالي ثلاث اشخاص وكل واحد يقولي روايه عني مختلفه .. اللي يقول اني دخلت احد البيوت القريبه ..والثاني يقول والثالث يقول وممكن فيه عشره غيرهم تكلموا بس ماكان امامي وطلعوا من ذا الارانب والاشاعات لخلق الله.. صراحه حسيت بعدها اني صرت مشهور ..

على فكره..حتى في منتدانا الاشاعات على قفى من يشيل..

&&&&&&&&&&&&&&&&&&&&&&&&&

سبحان الخالق..

النخل متشكل على كلمة (الله)..

هذي الصوره من مدينه املج..

النهايه ..(اشين ما في الموضوع المقدمه والنهايه) ..

فلذلك ..نشوفكم على خير..

والله يوفق الجميع في اختباراته ..دعواتكم الله يسعدكم..

سلااااااااااااااااااااااااااااااااااااااام