\
/
صباحكم / مسائكم حب ،،
بأجمل عبارات الأبجدية وباحلى لغات الوجدان ،، كم أنا لكم " مشتاق "
وبعدد ذرات الكون مبروك للنادي الزعيم تتويجه لأهم بطولتين محليتين " الدوري والكأس "
وبأذن الله سيكون القادم ما هو أحلى وأجمل في مسيرة الزعيم ،،
\
/
الحـــب عــــذاب
،
'
كم من ليلة سهرتها ،، وكم من شعرة من رأسي نتفتها ،، وكم علبة بيبسي برأسي خبطتها
وكم وكم ، وكل ذا الشغلات لأجل أفهم معني وشلون " الحب عذاب "
كانت العباره هذي جايبه لى الدوخه والصمرقع...ومن كثر ماني اشوفها مكتوبه على الجدران بجنب عبارة الاهلى عز والاتي طز..
>>> لا تسالون عن الهلال ما يحتاج مكتوب بالقلب عاد
ولايفصل بينهما الاعبارة ارض للبيع ...جاني احساس وايحا ان هذا الحب المقصود انه نادي علمي !!!!
ومن أكثر الأشياء اللى جننتني أن كل جدران الحارة مكتوب عليها " الحب عذاب " لدرجة ان حارتنا سموها " حارة المحبين "
وكنا نعيش بلخبطة وغربلة لأن الوصف الوحيد لأي بيت من بيوتنا اذا جينا بنوصف البيت
نقول البيت اللى مكتوب عليه " الحب عذاب " لدرجة أن مرة من المرارير جاء واحد سأل عن نجر ومحماس >> أثنين أخوان من عيال الحارة
وقلت له يا ابن الحلال بيتهم اللى مكتوب عليه " الحب عذاب " وأخذ له لفة ودق الباب مرة ثانية وقال لى ذا بيت نجر ومحماس
بعدها تذكرت أن حتى بيتنا مكتوب عليه " الحب عذاب " ولا بعد عتبة بيتنا زي عتبة بيت نجر ومحماس ..
يعني وين ما تروح بحارتنا تحصل ذي الكلمة ،، عشان كذا ما هو بغريب نطلع كلنا " عشاق ومحبين " >> أقول لا يكثر

وفي حزت المغربيه بعد ماخلصنا مباره كانت بدايتها من بعد ماطلعنا من المدرسه الظهريه تجراءت وسأل الشله وشلون
((الحب عذاب )) اصلاً انا كنت كل يوم اغثهم بنفس السؤال ، شوي الى ولد جارنا اللى توه ساكن ينقز وكان هو الوحيد اللى واضح
انه فاهم شوي لانه هو اللى يصلح سياكلنا،اخذني على جنب وقام يسولف لي بصوت واطي وقال .. انت ماتعرف وشلون
(( الحب عذاب ))...قلت له الا اعرف بس المشكله اني ما اعرف وشلون
قال لي اسمع انا بقول لك بس امانه ماتعلم احد ترى اخوي الكبير قال لي لاتعلم احد امعط اذنك..قال ان علمت بخلي اذني واذنك اربع
قلت له وشلون تخليها اربع،قال مادري بس سمعتها من اخوي دايم يهددني بها ،بس خلني اقلك عن(( الحب عذاب ))قلت يالله تفضل
قال " لما يحب الواحد يضيق صدره ، ويصير بالقوه يتنفس،ويقلب لونه الى الغامق الداكن"
قلت " اااااه عشان كذا اكثر السعوديين شهبانين وغامقين ، اثري اكثرهم يحب الله يعينهم ويصبرهم على الحب.. ."
قال " وبعدين لما يحب الواحد، يسرح كثير ، وينسى اكثر من اول"
قلت" ااااه عشان كذا الشباب يقطعون الاشاره وهي حمراء سرحانين وعشان كذا اكثرنا يسقطون بالدراسه من كثر
ماينسون وان اقول اولا د حارتنا كلهم شغالين في ورش اثري اكثرهم يحب الله يعينهم ويصبرهم على الحب"
قال" واذا حب الواحد يصير عصبي مررره ويشرب دخان كثير"
قلت" ااااه عشان كذا اكثرنا نفوسهم بخشومهم وتحس اننا كلنا نستعمل نفس العطر ماركة مارلبورو. اثري اكثرهم يحب..الله يعينهم..
قال" عشان كذا يقولون (( الحب عذاب ))
قلت له ""تصدق طالما أن الحب كذا فهو وناسه وسهل !!


وبعد الجلسه التاريخيه مع ولد الجار .قررت اني اجرب وادخل بالمعمعه ليه ما اجرب الحب !!
وش يفرق عني عنتر والا قيس ...والا حتى راعي التحليه عني ، ومن ذاك اليوم صاير حمش وعصبي مرررره..
مافي احد ما اخواني الا واصفقه باقرب بلكه شرار يطلع من عيوني ، وعشان البودي يكون متوافق مع وصفات الحبيب ..
.قررت اني اقلب لون وجهي الا بويه بنيه غامق ...صرت اربعه وعشرين ساعه ادوج بالشوارع عشان اخذ حمام شمس
وبعد ماتتحقق المراد وصار الفرق بيني وبين الكبتن ماجد عبدالله سنونه تلمع وانا لا حسيت اني بديت صح ،
وصرت احول كثير اني اسرح ، واحبس نفسي عشان يضيق صدري ، بس صار عندي مشكله واحده عجزت اصير رجل واطلع
الدخان من خشمي عشان كذا قررت اني أكنسل شرب التتن من المواصفات القياسيه
وصرت ما اذاكر دروسي ابد عشان انساهم واسقط!!!

وفي يوم بالمدرسه كنت جالس مسرح ،اتسيرح ماني سارح من جد ، ويجي واحد جلف ويطوط باذني ..وبما اني صرت عصبي
قمت وتهاوشت معاه في الفصل وخلينا البحر طحين ..>>.سمعتها وما اعرف معنها!!!
ويجي المدرس ويوقفنا ..؟؟؟؟
وقال ..انا ماني مجلسكم الا ان كان جاوبتو على اسئلتي ..سأل ألى تهاوش معي وجاوب وجلسه
جاء الدور عليه سالني ..بس انا مارديت عليه وحبست نفسي على الاخر عشان يضيق صدري قال لى هاليومين منت طبيعي وجهك
اسود وصاير تسرح في الفصل كثير، وعصبي ، وتنسي دروسك واجباتك ،صراحه كلماته ووصفه فرحني مررره وتاكدت اني صاير
شلة المحبين من شلة قيس والكابتن نامق اللى بعدنان ولينا...عاد هذا هو(( الحب عذاب ))
ومن يومها وانا رافع خشمي على عيال الحاره ومسوي رجال !!!
\
/


|؛¤ّ,¸¸,ّ¤؛|الـحـب|؛¤ّ,¸¸,ّ¤؛|
.
.
هكذا هو الحب .. بكل لوعاته وآهاته
نبقى مع من احبننا .. نعيش معهم اسعد اللحظات والأوقات
ونبقى بلوعات الحب .. نتنفس اجمل الانفاس
فالحب يجعل من ذلك المحال واقع .. ومن تلك العقبات سِهال نتخطاها
هو غاية المنال .. واحة الأمان
ملجأ تلك القلوب المتعطشة للوئام وروعاته
من يغطى افئدتنا بحنان الدفأ .. فيمنحها سعادة الخٌلد
ما اروعك ايها الحب .. فأنت زاد القلوب
فلولا الحب ولولا هذيان المشاعر به لساد المجتمع الفوضى
بل ولتحولت أفئدة الناس الى حجارة قاسية لا تعرف الرحمة
ويبقى الحب اورع الأحاسيس واجملها في هباب الكون

يا من قرأ أحرفي
.
.
ارأيت ذلك الحب الذي يتفجر بينابع الحب والوفاق
هو ينبوع الصدق .. موشحا بعناقيد الجمال
ويبقى الحب ذلك الاحساس الرفيع الذي لطالما بحثت عنه تلك القلوب
لانه هم ولا احدا سواه ينعش القلوب العطشى
ويا ليتهم عندما ارّخوا لنا هذه الكلمة تناسوا وتجاهلوا حرف في تلك الكلمة الثانية
حرف يعكس لنا مدى روعة الحب ولوعاته
فيا ليتهم حذفوا حرف الألف من كلمة عذاب
ليصبح الحب بكل ابجدياته " الحب عذب "
نعم الحب عذب لصفاء الارواح متى ما التقت بعد لوعات عذاب ..

أحبتي ..
يبقى الحب كما ذكرت انا سابقا عذب
ولكن عند لوعات الفراق وسخط الألم يبقى " الحب عذاب "
فما اقساها تلك اللحظات التى تغتال امالنا بالبقاء بعيدا عن من أحببنا
فهنا ليس لنا الا البكاء والهذيان بطعن الأحزان

و يبقى الحب عذاب .....فما اشد تعبه وما اقوى سعادته وما اكبر حزنه
\
/
همسة
،
.
لكل من قرأ أحرفي
آياتٌ من شكرا لا ينتهي
وعذرا على الأطالة


وتقبلوا فائق إحترامي وتقديري
دمتم بعبير الجوري
\
/
ورده