السلام عليكم ورحمة الله وبركاته
مساء الخير أخباركم جميعا
كنت دائما أضع عنوان (يوم في حياة طالبة ثانوي) للمواقف المضحكة
بكن اليوم للأسف على الرغم من أن كل الأعضاء يطلبون مني أكمل سلستي بمواقف شبيهة
بعد غياب طويل بالنسبة لي عن هالمنتدى الرائع رجعت من جديد
بعد ما حاولت ألملم اللي بقى لي من حياتي وأسعدني جدا ولأول مرة من شهر
وجود كثير من الرسائل من الأعضاء تسأل عن انقطاعي عن المنتدى
أشكرهم جميعا على السؤال
في يوم الثلاثاء قبل شهر بالضبط كنت أنا وأعز صديقاتي اسمها فاتن متواعدين ننزل السوق
وطبعا هذي الوحيدة من صديقاتي اللي أهلي يرضون إني أروح معها بسبب القرب الكبير بيننا
مهما أقول عن هالبنت ما أوفيها حقها كنت أعشق التراب اللي تمشي عليه أفضلها على جميع خواتي
كانت والنعم فيها يعني تعرف كل شي في حياتي أشياء ما أحد يتخيل إنه ممكن يقولها لأحد بس تعرفها عني
المهم تواعدت أنا وياها لأنه الأربعاء المفروض تصير ملكتها وطلعت قبل الموعد بساعة على أساس أختار لها هدية
وبعد الساعة دقيت عليها:
أنا: فتون وجع إن شاء الله وينك..
فاتن : يالله في الطريق لا تصارخين ولا عاد تزعجين قاعدة أكلم زوجي..
أنا: تدرين ياني أكرهه هالرجال بياخذك منا وجع مدري ليه وافقتي من زينه
فاتن: أقول لا تغلطين بس يا عمري ما أبيعك بالدنيا..
أنا (والدموع في عيني) : أقول خلاص يالله بلا هذرة باي
فاتن : باي
وأنا أنتظر دقيت طولت البنية دقيت عليها مشغول أرسلت لها رسالة( يا الدبة وينك والله برجع البيت)
وصلتني رسالة بعد 10 دقايق (هههههه يالله يا الغالية ربع ساعة وأنا عندك)
وبعد نص ساعة يدق علي أخوي ويقول لي وينك قلت له بالسوق قال لي أبغاكي ضروووووووري جايك ألحين استغربت وطلبت منه يأجل
بس ما رضى طلعت معاه وأدق على فاتن في الطريق أبغى أعتذر لها بس الجوال مغلق وأرسلت لها مسج (آسفة يا عمري اختاري الفستان لحالك
هالحمار تركي يبغاني ضروري) وصلت للبيت ودخلني الغرفة وأنا مستغربة وش السالفة بس ساكتة وأحاول أدق عليها بس ما فيه فايدة
بعد ساعة وصل أخوي نايف وهذا أقرب أخواني لي أعتبره صديق مو أخ وأنا خاطبة فاتن له (استهبال) مرة استانست بجيته من السفر بس
بعد استغربت لأنه توه مسافر أول مادخل سلم علي وبعدين قال لي وين مفتاح الغرفة والجوال وبكل حسن نية عطيتة
قلت له : نيوف فاتن مدري وش بلاها ما ترد خطيبتك بتتزوج ونستنا
نايف: أقول وش شعورك إذا فارقتيها
أنا : أمووووووووت بس
نايف : مرام فاتن توفت اليوم بحادث
أنا خلاص الدنيا ما عاد صرت أشوفها بس قمت وطردته ومدري وش بعد قلت له بس أكيد غلطت عليه بكلام كبير مرة
بس ما حسيت إلا بكف على وجهي صحاني (كنت أتوقع إن هذي حركات مصارية بس طلعت تنفع من جد )وبعدها خلاص
قعدت وأنا أصيح وأخوي بجنبي ولا يتكلم وأسمع صوت أمي في الصالة تبكي
ضليت على هالحال 5 أيام ما أدري عن شي وأخوي الله يخليه قاعد بجنبي حتى هو كان لها مكانة خاصة بقلبه صحيح كان يقول يبغى
يتزوجها مزح بس حسيت إنه تضايق لما انخطبت
في اليوم السادس طلبت مني أمي أروح لبيتها بس ضحكت باستهزاء ورحت ابغى أنسدح لقيت الجوال على الطاولة شلته أدور على اسمها
(سلطان بيك) بس ما لقيته يحسبون إني مو حافظة الرقم دقيت عليها بسرعة بس رد علي شخص من صوته عرفت إنه سلطان خطيبها
على طول نزلت دموعي وقفلت: يا الله هذا اللي حبته فاتن كيف حياته بعدها الله يعينه بس
المهم بعد أسبوعين قررت أداوم بالمدرسة وطبعا باتفاق من الشلة قررنا ننسى فاتن ورحت أول يوم من دونها
أول وحدة من البنات كانت أبرار هذي تعرف بكشختها كانت مبهدلة لآخر درجة حظنتها بكل قوتي وبعدين وصلوا البقة كنا 10 بنات بالشلة
صرنا 9 دخلنا الفصل بس ما قدرنا نقعد فيه مكان دايما كانت تصر إنها تقعد فيه وراي حاولت الحصة الأولى بس لا وين اللي
كانت دايما تفتح شعري وأنا أصارخ عليها كانت لعبتها في الحصص شعري صحيح كنت أتضايق بس ألحين لا وينك يا فاتن
ما قدرنا نكمل هاليوم افترقنا كلنا وكل واحدة راحت بيتها
بعد أسبوع من هاليوم طلعت للمدرسة بس استغربت أخوي اللي يوصلني مو من عادته وصلني لمدرسة جديدة
ما علقت على السالفة نزلت ودخلت هالمكان لقيت الشلة في انتظاري وبديا من جديد حياتنا
تعاهدنا إن حنا نظل مع بعض وما ننسى فاتن مهما صار ونسوي اللي نقدر عليه عشان نسعدها
((( الله يرحمك يا فاتن ويسكنك فسيح جناته )))
أتمنى من الكل ما يسوي اللي أنا سويته لأنه غلط حاولوا تنسون بسرعة
دمتم بود
أختكم:
بني حارث
يوم في حياة طالبة ثانوي(الجزء الخامس) 
الوضع العادي
