اســطــورة التــعــليــق : أيـــمـن جـــادة ... ورى ما تمسك الــجــادة ؟! - نادي الهلال السعودي - شبكة الزعيم

الهلالي 11 · #1 05/05/2008, 01:22 PM

قبل كل شي سلام من الله عليكم ورحمة منه وبركاته ايها القوم

يله ردو السلام بنفس الصيغة وبس كلكم تردون السلام بكمل موضوعي

طبعا اذا قريتو الموضوع بتعرفون ليه انا مسلم بلغة عربية فصحى موديل 560 للهجرة

تخيلو من جد اسويها واخلي الموضوع كذا لين تردون السلام كلكم

<== اقول لا يكثر

المهم هلا وغلا بالجميع ... اليوم جاي انشبلكم بموضوع جديد

طبعا انا نادر اني اجيب خبر او انقل موضوع او شي ...
لاني ما احب احط مصدر وقلق

كذا اكون قاعد يطق براسي موضوع واجي انشبلكم فيه هنا

اللي يشوف اني دلخ... او مواضيعي ما تخش مزاجه ... او ثقيل دم ... او فيني اي صفة غير كويسة يبلغ عني الحكومة ...

عشان يحطوني بالبلاك ليست وما عاد تشوفون يوزري

البلاك ليست للي ما يفهمون يعني قائمة الاشخاص اللي يشجعون تشيلسي <=== بينجلد من اسير وشباب البلوز

خلاص زودتها انت واياه لا احد يطلع عن الموضوع نرجع لموضوعنا ...

المهم انا اليوم جايكم بموضوع واعتقد ان الجميع يوافقني الرأي فيه

موضوعي عن المعلق القدير الكبير أيمن جادة

شوفو وش حلاته ... يهبل ... وش هالعيون ... وش هالقمر ... وش هالساعة الانيقة

من صورته تحس ان صوته بيبي فيس

<== يسمع فيها ويدورلها على جملة

اعتقد احد سقطات الجزيرة هذا المعلق الممل ... النشبة ...

والمشكلة معطينه منصب بالجزيرة ... ومسوينه شي كبير وجايبينه بلجنة تحكيم ( مشروع معلق !! )

بالله عليكم ... هذا معلق والا يستهبل !!

اذا له علاقة بالتعليق فهو من بعيد ...

كيف اذا صار الواحد يقربلك ... ولد خالة عم ابو خال عمك من ام ثانية

هو علاقته بالتعليق زي كذا ... مع انه يجيب النوم وبارد وما ادري وش يبي بس له مميزات !!
والمشكلة انه يعلق على مباريات مهمة لفرق كبيرة

انا هنا باذكر لكم مميزات استخدام هذا الشخص المذكور اعلاه :

1/ يمكن استخدامه كمسكن ... يعني اذا كنت نعسان او ودك تنام وما انت قادر تستطيع انك تنام

ما عليك على طول شغل الجزيرة واحضر اي مباراة يعلق عليها هذا المدعو ايمن جادة .
او سجل اي مباراة له وشغلها كل ما احتجت انك تنام

2/ لو عندك واحد من عيالك مسويلك قلق ... يعني انت والمدام ودكم تنامون وهو مضيع عليكم الجو

نفس الشي ما عليك الا تشغله مباراة لايمن جادة ... انا قايلكم ان صوته بيبي فيس ويعرف يتفاهم مع الصغار

<== وبعدين مع هالدلخ

3/ لو العيال كبرت وصارت بالمدارس ... وجاء وقت الاختبارات ... ولا سمح الله عندك واحد من عيالك داج ...
ما يدرس وضعيف ويبغاله مدرس خصوصي ...

ما في اي داعي انك تجيبله مدرس عربي وتدفع مبلغ وقدره

كل اللي عليك اشترك بقناة الجزيرة 112 ريال طول السنة ... وكل ما بغى الولد يدرس شغله القناة

يعني اسلوب جديد حلو ... منه يحضر وينبسط بالمباراة ... ومنه يدرس لغة عربية

خصوصا ان ايمن جادة اكثر شي يتميز فيه باللغة العربية الممنوع من الصرف ...
يعني يقدر يطفش ويصرف اي واحد قدام الشاشة

4/ تقدر تجيب للمدام تلفزيون وتحطه بالمطبخ ... لان ايمن جادة يحب يفتح مواضيع وناسة وسواليف ...
يعني تروح للدوام وترجع تلقى المدام مبسوطة وفيه اللي يسليها ... وهذا اكيد بينعكس ايجابا على جودة الطبخ

5/ تقدر تستخدم صورته كمنظر حلو بالبيت ... خصوصا انه ابيض وممكن الشغالة تعجب فيه ...
وهذا اكيد بينعكس ايجابا على نظافة البيت ... والشغالة بتكون مخلصة في اداء عملها ...

6/ اخيرا يمكن انك تستخدمه معلق على مباراة لكرة القدم ... حتى لو مسجلة وعارف نتيجتها

ما يستفاد من الموضوع للي ما فهم :

- ان المدعو ايمن جادة ينفع يكون اي شي الا معلق

والله لو تبون جبت لكم استخدامات واجد له بس ما ودي اطول الموضوع وتطفشون وتكرشوني بعدين

والله يا ليته يتعلم من عصام الشوالي ... و ... رؤوف خليف

انا بالنسبة لي اعتبر هالاثنين افضل المعلقين في العالم العربي ...

فيه غيرهم مميزين وحلوين ... مثل الطيب ... يوسف سيف ... والقائمة تطول ما ودي انسى احد

خصوصا ان كل واحد له مزاج وبيزعل اذا ما قلت معلقه المفضل !!

انا كذا موضوعي خلص ... خلص افراج الحمد لله ...

داري انكم اذا خلصتو موضوعي تحسون بنفس شعور اذا جت الفسحة ايام المدرسة

ساترك التعليق لكم ... ما رح احط اسئلة نقاشية وحركات ...

لكن اتمنى اللي يرد يقول رأيه وانطباعه عن هالمعلق ... ويذكر افضل معلق يحب يسمع المباراة بصوته

اتمنى الجزيرة تجيب عصام ورؤوف ... والله رح تخطو خطوة كبيرة للامام

اترك التعليق لكم احبتي

... اليكم المايك

طبعا هالموضوع ودي اعبر وافجر ما بداخلي ... بس باسلوبي

يعني بالله اللي وده يقول ما ادري موضوعك وش يبي لا يجرح شعوري ويقولها

ختاما .. اشكر كل عضو صبور ومخلص قدر انه يوصل لهذي الحروف وما سكر موضوعي

تحياتي لكم جميعا ...

اخوكم : الهلالي 11 ( عبدالرحمن )

<== هذي لعيون بعض الناس

J o S e · #2 05/05/2008, 01:39 PM

و عليكم السلام ورحمة الله وبركاته يا أخ العرب عبدالرحمن

أيمن جادة

معلق بكل ما تعنيه الكلمة من معاني و حروف و حركات و إعرابات <<< لا يكثر

لكن إنه مايصلح معلق أبد <<< كيف تجي هذي لا والله من جد مع إحترامي لمحبيه لكنه يبثر الشخص

الكائن أمام شاشة التلفاز و المشكلة إن الجزيرة معطينه منصب و فلوس و جنسية وهو من جنببها يعني

الله يفكنا منه ويجبنا أحد المعلقين اللي سموك ذكرتهم

والله تخيل يعلق على مباريات الدوري

الإسباني رؤوف أو عصام بيكون في حلاوة حماس لكن الحمد لله هالمعلق ما قرب للدوري الايطالي

ما يستفاد من الرد :

1- ألف شكر لك على هذا الموضوع الرائع و المميز ورده

2- أحس إنك جرحت مشاعر محبين هذا المعلق الكبير

3- واصل إبداعك

zizo-5 · #3 05/05/2008, 01:49 PM

وعليكم السلام ورحمة الله وبركاتة

وجهة نظرك يجب ان تُحترم مني ومن جميع الأعضاء بشبكة الزعيم،ومن حقك ان تنقد من اردت،لكن هل يسمى تعليقك على المعلق ايمن جاده بالغبي والوغد نقد ام تجريح وسب ؟ اتمنى عزيزي ان تاخذ كلامي على محمل الملاحظة لا أكثر ولا أقل..

أيمن جادة كـ معلق يعتبر جيد لكن قد يكون أقل مستوى من معلقي الجزيره بشكل عام من يوسف سيف..والكعبي

شاكر ومقدر لك

El merengue · #4 05/05/2008, 02:01 PM

هههههههههههههههههههه

يعطيك العافيه على الموضوع الحلو

او صح نسيت

وعليكم السلام ورحمة الله وبركاته

اما هالمعلق يجيب النوم

ويرفع الضغط

ولا يتكلم عن التحكيم ابد

<== ما يصير فاول او آوت او تسلل الا يحلله

وان شاء الله مانشوف رقعة وجهه الموسم الجاي

ويعطيك العافيه

ورده

الهلالي 11 · #5 05/05/2008, 02:02 PM

^^^^^^^^^^^^^^^^^

اخوي زيزو اشكر مرورك ... وكلامك على العين والراس ...

صدقني اني اهتم للردود واحب النقد ...

احترم ردك ... وانا عدلت الموضوع لعيونك

شاكر مرورك ... واتمنى ما تزعل هي مجرد مصطلحات لا اكثر والا اقل ...

تحياتي لك

LOVE JUVE · #6 05/05/2008, 02:23 PM

المعلق هذا الله يصبرنا عليه

وذبح عشاق الريال نص مبارايات الموسم هو اللي يعلق عليها

يعطيك العافيه اخوي

سي يوو

Rio 5 · #7 05/05/2008, 02:26 PM

سلام من الله وعليكم ورحمة منه وبركاته هذا محدثكم عبدالله الحربي يحييكم من الوطن العربي فقناة art هي الاولى هل فهمتموني يا عرب

<<< ما يطيق الحربي

ايمن جـــ

ـــــاده

ايمن جـــــــآده * * * فهل له من فــــآئده <<< حلوه صح توني مألفها

والله يا اخي العزيز القدير الوفي الصديق المخلص الحكيم << دخلنا ترافيان

انا ما اذكر اني شفت مباراه بتعليق ايمن جاده

يمكن شفت بس ما اعرف صوته

بس تدري كيف انا عرفت انه ممل ودمه ثقيل ؟؟

تعليقاته في مشروع معلق !!

تحس انه مغصوب على التعليق

والله انه ما عنده اي سالفه

اصلا صوته نايم

وانا ما ارتاح الا اذا شفت المباراه بتعليق ايمن جاده

امزح

انا معلقي المفضل معلق زماني وزمانك

رؤوف خليف

انا بعض الاحيان اشوف اعادة المباريات اشوفها بمعلق ثاني غير اللي شفت المباراه في اول مره

ما اقدر احط غير رؤوف خليف

وبمناسبة هذا الموضوع القدير الرائع المنتاز الخطير والمكير والغدار

سويت بيت شعر

يقول

رؤوف خليف * * * فهل يوجد له خليف

R.o.N.a.L.D.o.9 · #8 05/05/2008, 03:16 PM

بإختصار ..: :.. أيمن جادة أفضل معلـّــق بالنســبة لي على الإطلاق ..

منذ كأس العالم 1998 وأنا أتابع تعليقه على المباريات وأستمتع به وبلغته ومفرداته العربــيـّـة الفصحى ...

شكراً جزيلاً

اليوفي و بس · #9 05/05/2008, 03:55 PM

أسلوب المسخره من الأشخاص برأيي غير جيد حتى و لو كان لا يعجبنا !

بالتوفيق لك

BOOCHI · #10 05/05/2008, 04:11 PM

وعليكم السلام

,,

مشكور على الموضوع , والهدف واضح

شخصياً .. اعتبر ايمن جاده معلق جداً عادي , مافيه اي شي يميزه عن غير , يعني ينهضم احياناً

بس مايوصل في قيمة المعلقين الكبار الي بالجزيره , الكعبي ويوسف وحتى المصري الي اسمه علي اعتقد

لكن وش تسوي , هو ماسك منصب قوي بالجزيره , ومتى ما بغى يعلق على اي مباراه علق , وطبيعي يختار من المباريات الكبيرة

بس اسلوبه بالتعليق جداً ممل , الهجمه وهي خطره يموتها تقول كأنه يعلق على كوره طالعه آوت

عافاك ربي ورده

B52* · #11 05/05/2008, 05:02 PM

وعليكم السلام ورحمة الله وبركاته

صراحه معلق يجيب الهم .. غير حماسي .. بارد دم .. يرفع الضغط

A B B O D · #12 05/05/2008, 05:07 PM

حرام عليك يا خوي ..

صحيح ايمن جاده معلق يجيب النوم لكن عليه الفاظ حلوه

مثلاً : " والمدرب حانق على التقدم " .. و " الريال يتقدم على حين غرّه " وهلم جرا ..!

بالنسبة لي معلق عادي .. يعني لا شين ولا زين ..

وبالنسبه لـ أفضل معلق عندي فهم المصريين علي محمد علي او مدري محمد علي محمد

والثاني حاتم بطيشه

وسلامتك ..

L I B E R T Y · #13 05/05/2008, 05:28 PM

كان مفروض عليك أنك تتنزه عن ألفاظ الشوارع جادة و غيرها , وثانيا المسألة اختلاف أذواق لا أكثر , و شخصيا أعتبر أيمن جادة من أفضل المعلقين العرب إن لم يكن الأفضل بالنسبة لي و التقييم لقامة كبيرة مثله لا تأتي عادة من الجماهير العادية , فهو لا يقيّم إلا ممن هم في قامة أيمن جادة , و لا يهمونك يا أيمن أنت أكبر مما أثير حولك من الأمور و الشبهات , و معذرة على الرد ..!

معشوق البرسا · #14 05/05/2008, 05:45 PM

أقـترح .. على .. الجزيـره .. انها .. توظفه .. بالسياسه
تعليقه .. سياسي .. نشرة أخبار ..

ومره .. يقول الزبده .. والسكين .. هههههههه

تسمعــون .. بالمــعلق ..

Z I D A N E · #15 05/05/2008, 08:44 PM

.

وعليكم السلام ورحمة الله وبركاته

بالنسبه لايمن جاده .. انا اشوفه معلق عادي جداً .. واستغرب اكثر منه
في برنامج مشروع معلق .. يقول للمشاركين .. دعوا عنكم الرتابه و البرود اثناء التعليق

شئ غريب بصراحه .. انا اشوفه مقدم برامج يكون احسن بكثير
والله يعينا عليه حنا يا عشاق الريال .. نص المباريات هالموسم علق عليها

كامبياسو

لك اخوي ورده

كان هُنا
المدريدي المرهف
Z I D A N E