الحمدلله ثم الحمدلله ثم الحمدلله ثم الحمدلله
الحمدلله أولا ً وأخيرا ً .. يا جماعة وش هالأعصاب الدمار اللي قبل المباراة .. وش هالجنون .. وش هالتمرد << وش دخلها 
أقسم بالله من الفرحة وصل عندي إحساس إني ما عاد أبي من تشيلسي شي .. خلااااااااص . ماعاد أبي شي
هالمباراة ريحتني راحة كبيرة .. خلاص حتى الكورة ماعاد أبيها .. نعنبوا ابليسهم أربع سنين وأنا أعصاب مع الفريق في هالبطولة ما بغوا ياصلون للنهائي .. بس زين جملوها هالسنة .. زين جابوها
اليوم التشكيلة قبل المباراة أخطيت فيها .. ومالومي صراحة .. كان كل همي أشوف الوسط عندنا من بيلعب فيه .. شفت لامبارد وماكاليلي وبالاك .. ماجاء في بالي ولا واحد بالمية ان ايسيان بيلعب ظهير أيمن !!
بس تصدقون انها ضبطت .. مو ضبطت في المباراة بتحركات أو شيء من هالقبيل ..لا ضبطت بفعل بينيتز الله يجعل حاله دايم كذا لأن الجهة اليمنى لـ ليفربول ما كان مفعل الجهة اليمنى لأن مافيه وكانوا مركزين أكثر من الهجوم عن طريق العمق والطرف الأيسر بالنسبة لهم [ جهة آشلي ] وهذي كانت غلطة بينيتز بتركه بابل إحتياط .. و والله هذا أكثر شي ريحني .. بن عيون إيه نعم صنع هدف لكن مو إبداع منه بقدر ماهو سوء تغطية من مدافعي تشيلسي ولي رجعة مطولة مع هالهدف .. بس سلموني على توريس يقطع شكله ماعنده تفاهم
لذلك كنا نشوف إيسيان يتقدم كثير ويشكل خطورة .. وكان يضم للوسط ويسدد أكثر من تسديدة إلى درجة اننا أحيانا ً ما نحس بأنه ظهير أيمن .. وهذي زينة ايسيان انه راعي كرف 
بس اللي قهرني إلى الآن ما أدري ليه أُلغي هدف إيسيان .. الهدف كما قال لي رؤوف بعد الاستديو أنه هدف شرعي وأن الحكم احتسب تسلل سلبي .. و هذا أكد لي النقطة اللي أعرفها من خلال معلوماتي البسيطة عن قوانين التحكيم في كرة القدم أن اللاعب ما يعتبر متسلل إلا إذا لمس الكرة وهذي ما حصلت .. القانون ما قال أثر القانون اشترط اللمس وهنا الفرق وهالقانون تم إضافته بداية الموسم الماضي 
وبصراحة مع هالهدف اللي تم إلغائه تمنيت أن أنيلكا كان متسلل في هدفنا الثالث .. تقدرون تسمونها لعانة المهم نرجع على نقطة إيسيان و تكتيك المدرب .. طبعا ً الكل متفق ان تشيلسي لا يزال يسير على خطى مورينهو بطريقته وبكل شيء ما عدا بعض الخربشات من كفرات .. لامبارد وبالاك كانوا مكروفين وبقوة برجعتهم للدفاع ومساندتهم القوية للهجوم .. لامبارد في بعض فترات المباراة لو ترجعون تشوفونها إعادة بتشوفونه يرجع ظهير أيمن مع تقدم إيسيان وهذا الكلام في بعض الكرات طبعا ً وهذا أكيد بيقلل من عطائهم داخل الملعب وزين منهم انهم لعبوا هالوقت كله وعشان هالشيء تمنيت أن يكون لامبارد إحتياط ويكون إيسيان و كلود محاور ويكون بالاك لاعب حر و يعطى مهام هجومية أكثر من الدفاعية ولو حصل هالشيء كان ليفربول في خبر كان من دون الأشواط الإضافية .. خاصة ً وأن ليفربول كان هجوميا ً ضعيف اليوم وأخص من ناحية الأطراف والعمق بهالطريقة بيسند في وجيههم
طيب اللحين نجي على هدف توريس اللي يقهر من جد .. خلاص تأهلنا اوكيه .. لكن فيه مشاكل والله في دفاعنا 
دفاعنا تمام لكن بعض الأخطاء تقهر .. الهدف كلود فتح لهالصهيوني مساحة للإختراق من العمق .. و زودها تيري بأنه واقف ولا طلع عليه .. كارفالهو المسيكين تقدم يوم شاف ما حوله والي وترك توريس لحاله .. كارفالهو تلقم كوبري وتيري يتفرج .. بالاك يتمشى وكان المفرض انه على الأقل بحاول يضيق على توريس لأنه كان من الواضح أن بن عيون بيمرر الكورة .. ولقمنا هدف بسوء تغطية تقهر كالو كان أوكيه في الشوط الأول .. في الشوط الثاني قل عطائه شوي .. لكن مهوب أقل من جوي .. وتفاجأنا بأنه يطلع ويلعب مالودا .. مالودا للآسف حتى الآن ما أقنع أحد .. وكل ما استقبل الكرة تقل انها جايته مزعة .. ويمشي شوي ويزلق .. ياشيخ اطلع يا جعلك للرباط .. طيب طلع كالو ما فيه مشكلة بس لا تلعب مالودا .. عندك أنيلكا يعشق الجناح الأيسر .. لعبه وخله يمخمخ عليهم خاصة ً ان لا اربيلوا ولا ريسا عليهم العلم
دخول وخروج لامبارد ليه .. يعني مسوي في أمها بتغتالهم بهدف .. طيب تبي هالعلوم لعب فيليبس على الأقل ان ما سجل بيشكل خطورة وبيشغلهم بسرعته سواءا ً في الإنطلاق بالكرة أو بالضغط على حامل الكرة .. بس بشرط ما يطلع لامبارد .. طلع واحد من اللي مدخلهم ما فيه مشكلة ترى .. أو طلع دروجبا ولو انه ما يطلع هالخال لو وش 
لذلك أشوف تطليعة لاعب وسط ودخول مهاجم غلط كبير خاصة ً وأن المهاجم هو شيفشنكو .. شيفا كبير اوكيه وممكن يسوي شي اوكيه .. لكن شيفا يبي له كورة قدام الباب مهوب جالس يسحب لك ولا ينطلق ولا واحد بيلحقه أما دخول انيلكا 
يا جماعة من زمان وأنا أقول انه من أفضل صفقات تشيلسي .. لاعب ما يسجل اوكيه .. لكنه يفيدك هجوميا ً بصناعة الأهداف وفتح المساحات لدروجبا .. كم أعشقك يا أنيلكا .. اليوم هو أحد نجوم المباراة بالرغم من أنه لعب في الأشواط الإضافية ودائما ً كل ما يدخل يكون فارق كبير في المباراة وش بقى تكلمت عن أغلب الأشياء .. لكن بقى شيء واحد لازم ويجب على كل عاشق لتشيلسي وعلى كل مسؤول وكل لاعب أن يذكره .. وما ينكره ألا جاحد .. ومن غيره .. مورينهو .. فعلا ً شكرا ً مورينهو .. هذا هو الفريق الذي صنعته أنت .. هذا هو فريقك .. إنجاز يسجل بإسم جرانت ولكنه من صناعتك .. مورينهو لم يكتفي بأن صنع فريقا ً لا يُقهر بل أنه صنع مدربا ً لا يعرفه أحد والآن سيرته على كل لسان وهودبشة حتى الدبش رفعتهم يا موري الطريقة + التكتيك + نوعية التبديلات جميعها تجعلني اعتقد أن مورينهو هو الذي يدرب الفريق .. لكن كل ما جت الكاميرا على جرانت أصحى وأتذكر انه مستقيل .. حتى روح الفريق ما زرعها فيهم ألا انت يا موري بشهادة أغلب اللاعبين
والله يا انا طولت اذن الفجر وانا أكتب بس فيه نقطة بعد لازم نذكرها شكرا ً بينيتز لعدم تفعيل الأطراف .. شكرا ً بينيتز لإخراج توريس .. شكرا ً بينيتز لإشراك ريسا هاردلك لعشاق الريدز .. وألف مبروك لعشاق البلوز
![~ ][ UCL ][ بعزيمة وقوة الرجال .. البلوز يرافق المان إلى نهائي الأبطال ][ UCL ][ ~](iconimages/t569607_rtl.gif)
ألف مـــبـــروووووك لعشاق البلوز
والله أبطال من زمان ماشفت لاعبين يلعبون بحماس وأصرار مثل مباراة أمس 
حسب معلوماتي البسيطة والمتواضعة سبب ألغاء الهدف 
الوضع العادي
