بسم الله الرحمن الرحيم




مساء الخير لجميع الأخوان أعضاء وزوار المجلس العام


((أول موضوع لي في المجلس العام أتمنى انه يعجبكم .. أو أتمنى إني أقدر أوصل لحل أنا وإياكم لمشكلة موجودة أحداثها هنا ))

***



ملحوظة آآآآد كدا : جميع الأشخاص في هذه القصة على قيد الحياة .. مع مراعاة فارق التوقيت الزمني << بدينا

--

في أحد الأحياء ( الراقية ) في العاصمة اللندنية الرياض .. دق علي خويي اللي هو ساكن في أحد الأحياء الراقية في العاصمة اللندنية .. وقال يا عزوز تعال بيتنا اللي هو في أحد الاحـ.... << لا يكثر


المهم الرجال قال تعال .. العيال مجتمعين عندي العصر وزي كذا .. والجلسة ما تحلا إلا فيك ( وجه فاق خشته ويضحك ) .. قلت أبركها من ساعة .. ابشر يا أبو سلطان << مهوب بمحمد بن فيصل عشان ما احد يقول فعٌل يوزري وإلا شي << فاهم الواسطة غلط .



المهم يا طويلين الأعمار ..ركبت موتري .. وتوكلت على الله متجه إلى أحد الأحياء الراقية في مدينة الرياض .. طبعا خويي ساكن في ذاك الحي ( عرفتوه ) ؟


وصلت عند بيتهم اللي كنه ملعب الملز سابقا فيصل بن فهد حاليا ( ما شاء لله ) وأشوف أخوه وعيال جيرانهم الصغار مجتمعين عن الباب . قلت بس أكيد فيه مضاربة وإلا شي << تفكير عيال البديعة ..


وأوقف عندهم .. قلت وش السالفة يا فيصل ( فيصل اخو نواف ونواف هو أبو سلطان اللي ساكن فيـ ... كملوا انتووا هع )


المهم سألت فيصل وش فيه .. قال ابد .. بس نوينا نغير مكان الملعب وتهورنا وقلنا نلعب في الشارع .. في هذه اللحظة اغرورقت عيناي من الدمع .. وأتذكر إخواني وأحبائي في البديعة ..وأقول ( اييييه دنيا .. ناس تتضارب على الشارع من يلعب قبل الثاني .. وناس تاركة ملعب مزروع وسط بيت ويلعبون في الشارع .. لا والأدهى من كذا .. انه نوع من أنواع التغيير عندهم )


المهم وادخل أوقف .. وانزل وألقى العيال مجتمعين .. وسلام كيف الحال وش العلوم .. المهم قعدنا نسولف نسولف نسولف << لا يكثر


المهم إني ما كملت نص ساعة. إلا هذا فيصل جاي علينا ويضحك .. وقال يا نواف الحق الحق .. وهو يضحك .. قال نواف وش فيه .. قال ( ركزوا معي الحين ).


قال وقفوا عندنا ناس معهم كامري تفاحية موديل 2003 لوحتها أ هـ ط ... المهم وقفوا عندنا وكانوا 6 .. نزل ثلاثة منهم وجلسوا على الرصيف .. فجأة قام واحد من الثلاثة عند الحارس ( حارس المرمى ) وطلع سلاح ابيض ( سكين ) وقال رح جمع جوالات أخوياك بدون ما يدرون.. وترا ذا دروا.. واحد من عيونك ما بترجع بيتكم وهو معك ..<< تهديد..


عاد ذا الضعيف خاف و(قمط) أم العافية .. قال طيب .. وراح أبو الشباب يجمع الجوالات ورجع أعطاه.. وقاله خذ بس فكنا من شرك.. قال ذاك ابشر بعزك. والله معد تشوفنا هنا << بعد وش يـلعن....


وركبوا الثلاثة في الكامري وراحوا .. بعد ما راحوا بـ 10 دقايق .. بدا يستوعب ذاك الدلخ ان جوالاتهم انسرقت وأنه هو اللي مجمعها .. وقعد يصايح المسكين .. ( ولكن لا ينفع الصياح ).))


المهم قال نواف .. خلاص رح وأبشر بالعوض وأنا اخوك راس ماله جوال ومدري وش .. ( برضه في هذه الاثناء نزلت دمعتي على أخواني وأحبائي وأشقائي القاطنين في البديعه .. لان راس مال الواحد المملكه مطور .. واذا انسرق منه ما يطلع من بيتهم شهر من زود الزعل .. وفوق هذا ( أبطى العوض ) << لا تصدقون


المهم قعدنا انا والعيال نشوف وش السالفة وناخذ ونعطي فيها.. وقاعدين نسأل عن أحياء الأشخاص ذولا .. منهم من قال الدخل المحدود .. ومنهم من قال النسيم .. ومنهم من قال النظيم .. طبعا ولا يهونون حقين الجنادرية ستي .


وأثناء النقاش تناولانا أسباب سرقتهم لها الضعوف .. منهم من قال مخدرات .. ومنهم من قال العطاله .. ومنهم من قال هواية .. ومنهم من قال إثبات رجولة .. مع إن الأخيرة أستبعدها ..لان شنب الواحد وتقاسيم وجهه كأنه مخطط الغروب ( على حسب وصف فيصل مالي شغل أنا )






اللي أبي اعرفه شي واحد :



هل لها الدرجة وصلت في بعض الشباب أنهم يتهجمون على الأشخاص بغرض سرقة شي بـ 1000 أو 2000 ريال ؟؟


هل لها الدرجة ما قدرنا نستوعب هالمشكلة الكبيرة اللي قاعدة تصير .. واللي نسمع أن معدل أعمارهم من 15 -22 ؟؟

خلاصة الموضوع :

1-شرايكم فيني ؟


2- هل معقولة أن اللي يسرقون ساكنين في الاحياء ( الدخل – النسيم – النظيم – الجنادرية – العزيزية -) فقط.؟


3- هل معقولة أن الدافع الاكبر للسرقه يكون ( مخدرات – عطاله – فراغ – إثبات رجولة واللي إستبعدتها لسبب سبق ذكره ) ؟


4- هل معقولة أن الدلخ اللي قعد يجمع الجوالات ما عرف يتصرف ولا عرف يصايح او يسوي شي ؟


5- هل هؤلاء الممارسين لهذه الجريمة ينتمون لعوائل معينة ( اتمنى الاجابة بنـعم او لا فقط .؟ )


6- هل لمستوى الدخل المعيشي لأفراد اسرته له سبب في ذالك ؟


7- وش رايكم في الرمز هذا << بصراحه خاق معه

---



شطحة : ( أنا اعرف أحد أبناء شخصية معروفة ومرموقة في المجتمع .. يسرق !!! )


مع انه مو محتاج ولا شي .. بس مدري وش اسمي ذا الشي .. هل هو لكاعة .. والا شوفوني اسرق .. والا تروني رجال .. والا يبي يجرب ابو زعبل .. يعني بصراحه عجزت القا تفسير لها الحالة بالظبط .





***



عموما اتمنى اني ما طولت عليكم .. وأتمنى تقبلون أول موضوع لي في المجلس العام بصدر رحب ..

إن أًصبت فمن الله .. وإن أسئت فمن نفسي والشيطان .


وتروا نتقبل جميع الآراء بصدر رحب .
***

يا لبا قلب البديعه وأهلها


حرره : و ص ى

إقتباس الرسالة الأصلية كتبت بواسطة ابو طـــــلال أهلا وسهلا بالأخ الغالي وحيالله ولد حي البديعه قالوا علامك تزووور .. حي البديعه كل يوم .. قلت السبب واحدن .. الله حسيبه عليه .>>> اااه يامزعل الفرحان أول موضوع لك .. وماشاء الله طرح جميل .. وأسلوب رائع .. فيه تشويق .. وإثارة .. ومتعة .. تحس ان كل مواضيع الملجس العام في ملعبك بخصوص هالتصرفات .. سمعت عنها كثير .. شباب مستهتر .. تربيه غير موجوده ... قل وازع الدين .. الفوضى الحاصله في البلد وخصوصا في الرياض ومن الكل .. من جهات رسميه او أفراد .. او عمالة .. او خدامات .. الكل يبي الدنيا فوضى .. ويبيها مثل ماعليه تبقى الفوضى .. من أمن العقوبة أساء الأدب .. قبل يومين سمعنا عن سوريين وسعوديين متهاوشون بالنسيم .. ؟!@! بنغاليين مسوين عصابه دعارة ..؟؟!! وتهريب .. تزوير .. افريقيين ممسوكين بقضية سحر .. وشعوذة ..؟؟ مصريين .. ممسوكين بقضية سرقة ( نظارة شمسية ) سعوديين مسكوهم بقضية سرقة سياراة ؟؟ او جوالات ؟؟ طيب دامها على قولتهم عصابة وتم القبض عليهم !! ورى مايمسكون رئيس هالعصابه ويقصون يده !! إقامة الحدود وتعطيلها !! * أذكر واحد سرق جوال خويي .. وكلمني خويي قال كلمه تكفى قلة يرجع جوالي .. كلمته طلع بزر .. قلت له رجع الجوال وعيب عليك .. قال اشغلتوني تراكم .. الجوال مايسوى مية وخمسين ريال !! وينفح علي .. حتى شكيت بنفسي قلت مدري من اللى سارق انا أو هو .. حتى قلت له اسف اخوي تكفى لاتبلغ الشرطه تقبل مروري ياكابتن ... واحييك مرة ثانيه ..

هلا بك والله يا ابو طلال

وش عندك موطوط عندنا في البديعه وتزوره .. ايه ذبحك الحب .. الله يعين ..


والله يا خوك .. اذا رئيس العصابة على قولتك ما قدروا يمسكونه .. واذا مسكوه عنده ظهر .. وش الحل ؟؟..

يعني الدعوة خبصة .. ما تدري من تحاكم او توقف



الا تعال .. وش دخل العماله الحين في السالفه ؟؟؟

---

عموما اسعدني ردك ومروك

واشكرك على اطرائك يا بطل

إقتباس الرسالة الأصلية كتبت بواسطة و ص ى 925 المهم يا طويلين الأعمار ..ركبت موتري .. وتوكلت على الله متجه إلى أحد الأحياء الراقية في مدينة الرياض .. طبعا خويي ساكن في ذاك الحي ( عرفتوه ) ؟

تقصد المنفوحة ؟


على فكرة يالأخوا أنا ساكن في البديعة و فاهم ليش تحس إنهم أكوس ناس


قمة البرائة و أمان بس ما فيهم إلا هالإرهابيين


يعني ما فيه شيء وسط يا إرهابي يا فله


إلا وش أخبارك إنت بس؟


ودي أركز في النقاط بس أسلوبك يخليني أطلع برا الموضوع


قرب إذنك ... موضوعك فيه تعصب حيي


لي عودة مع النقاط إن شاء الله

إقتباس الرسالة الأصلية كتبت بواسطة Canada's gallant تقصد المنفوحة ؟ على فكرة يالأخوا أنا ساكن في البديعة و فاهم ليش تحس إنهم أكوس ناس قمة البرائة و أمان بس ما فيهم إلا هالإرهابيين يعني ما فيه شيء وسط يا إرهابي يا فله إلا وش أخبارك إنت بس؟ ودي أركز في النقاط بس أسلوبك يخليني أطلع برا الموضوع قرب إذنك ... موضوعك فيه تعصب حيي لي عودة مع النقاط إن شاء الله

هلا بك يا << توهق بالاسم ما عرف ينطقه



اول شي ونعم فيك وفي حقين البديعه وانا معكم


بس انا ما سبيتهم .. ولا تعصبت لحي معين .. بالعكس .. انت وانا نسمع اشياء مو زينه عن احياء غرب الرياض .. وكن اي واحد ساكن بالشمال منزه !!
واكبر دليل على ان حقين البديعه مثقفين .. انت كاتب اسمك بالانجليزي .. يعني فيه تطور هع هع

واذا على الارهابيين .. حتى الاندونوسيين ذا الفطس فيهم ارهابيين .. فما بالك باللي اشكالهم في الوضع السليم << راسب في التعبير


ونتظر تركيزك على النقاط بفارغ الصبر يا صقيقي


اسعدني مرورك

انا اتوقع اسباب السرقة (((( الطفرة يا الحبيب )))) <<< شكلك ما قد سمعت فيها

إقتباس الرسالة الأصلية كتبت بواسطة كلنا هلاليين انا اتوقع اسباب السرقة (((( الطفرة يا الحبيب )))) <<< شكلك ما قد سمعت فيها

تمنيت تتكلم اكثر .. وتعلمني وش اسباب الطفرة اللي تتكلم عنها ..
لان الطفرة انواع :
في طفرة في الصناعه
طفرة جينيه
طفرة ( ما فيه فلوس )
الخ الخ الخ


عموما نورت الموضوع يا غالي ( كلنا هلاليين )

إقتباس الرسالة الأصلية كتبت بواسطة و ص ى 925 تمنيت تتكلم اكثر .. وتعلمني وش اسباب الطفرة اللي تتكلم عنها .. لان الطفرة انواع : في طفرة في الصناعه طفرة جينيه طفرة ( ما فيه فلوس ) الخ الخ الخ عموما نورت الموضوع يا غالي ( كلنا هلاليين )

كنت اتمنا تكتب مواضيع عن المشاعر والاحاسيس

مهب (((السرقة))) << الي اسببها اخوي الصغير الي في الابتدائي يعرف اسبابها

إقتباس الرسالة الأصلية كتبت بواسطة كلنا هلاليين كنت اتمنا تكتب مواضيع عن المشاعر والاحاسيس مهب (((السرقة))) << الي اسببها اخوي الصغير الي في الابتدائي يعرف اسبابها

طيب خل اخوك الصغير اذا جاء .. يجلس ويعطينا الاسباب .

انا مو عارف الاسباب .. ممكن يجي يعلمني هو؟


--

وبعدين اخوي اذا كان الموضوع مو عاجبك .. او ما يناسب معاليكم .. ابد مسموح .. لا ترد ولا شي ..
--

واذا على المشاعر والاحاسيس .. المايك عندك .. فيه فوق زر ( موضوع جديد ) لا يردك شي ..


اشكرك على مرورك مرة ثانيه

إقتباس الرسالة الأصلية كتبت بواسطة و ص ى 925 طيب خل اخوك الصغير اذا جاء .. يجلس ويعطينا الاسباب . انا مو عارف الاسباب .. ممكن يجي يعلمني هو؟ -- وبعدين اخوي اذا كان الموضوع مو عاجبك .. او ما يناسب معاليكم .. ابد مسموح .. لا ترد ولا شي .. -- واذا على المشاعر والاحاسيس .. المايك عندك .. فيه فوق زر ( موضوع جديد ) لا يردك شي .. اشكرك على مرورك مرة ثانيه

الحين تبي تفهمني انك زعلان

شوف موضوع جميل انا معك بس ليه ما كتبت منقوووول

حرام عليك تسلب حقوق الاخرين

إقتباس الرسالة الأصلية كتبت بواسطة كلنا هلاليين الحين تبي تفهمني انك زعلان شوف موضوع جميل انا معك بس ليه ما كتبت منقوووول حرام عليك تسلب حقوق الاخرين

وش دعوة ازعل ..

بقولك شي ..اذا اتضح ان الموضوع منقول ..او مو انا اللي كاتبه .. او القصة ما مرت علي

اهديك اليوزر حقي وال387 موضوع ..حلال زلال

وان كانك تبي نروح عند فيصل ونواف .. وتشوف بيتهم اللي كنه الملز .. وتشوف الدلخ اللي كان سبب السالفه كلها .. ما عندك مشكله


بس وانا اخوك لا تشكك بالذمم


اشكرك مرة ثالثه على مرورك

مسائك أحلى ،، و ص ى < احس انك يوم سجلت في المنتدى ماكان لك مزاج تفكر .. أو انك تشتغل في المرور
لا يكون مكبر لوحة السياره ومعلقها في المجلس بس

إقتباس فيصل اخو نواف ونواف هو أبو سلطان اللي ساكن فيـ

اسمائهم قويــه .. ذكرتني بواحد كان معي في الجامعه أسمه فيصل بن عبدالعزيز بن سعود
اذا قال أسمه الدكتور في القاعه ودك انه يسكت عند سعود ومايكمل أسم القبيله

إقتباس في هذه اللحظة اغرورقت عيناي من الدمع .. وأتذكر إخواني وأحبائي في البديعة

تستاهل محد قال لك خاوي عيال النعمه خلك مثلي اذا مريت من جنب حي راقي أسارع في الخطى على شان عيني ماتطيح على قصر والا سياره فخمه ثم اروح للبيت اتهاوش مع ابوي .. لييييه يومك صغير ماجمعت قواطي الببسي مع الراجحي كان يمديك الحين عندك بنك < خلوني أعبر

إقتباس ناس تتضارب على الشارع من يلعب قبل الثاني .. وناس تاركة ملعب مزروع وسط بيت ويلعبون في الشارع

ذكرتني بأيام الطفوله وأيام ( برغش سنتر ) هذا مدمن سنتره .. حتى لو كان حارس يسنتر ثم يرجع حارس ماكنا نقول له شي لأنه راعي الكوره .. لكن إذا انا اللي جايب الكوره أفقع وجهه اذا جاء يسنتر .. الله يذكره بالخير

إقتباس لوحتها أ هـ ط

وش قصتك مع اللوحات ؟؟

إقتباس عاد ذا الضعيف خاف و(قمط) أم العافية .. قال طيب .. وراح أبو الشباب يجمع الجوالات ورجع أعطاه.. وقاله خذ بس فكنا من شرك

شفت الفرق بين عيال الأحياء الراقيه وعيال ( البديعه .. النسيم . النظيم .. بلا بلا بلا
عيال النعمه إذا فتشت جيوبه تلقى N95 و MP3 ومايسمع الا لـ آشلي وهالري دوف
لكن عيال النسيم اذا فتشت جيوبه بتلقى نبيطه وفي جيبه الأمامي فشقتين حصى يفجر بها وجهــك اذا نويت تسرقه

إقتباس المهم قال نواف .. خلاص رح وأبشر بالعوض وأنا اخوك راس ماله جوال ومدري وش

يارجال اذا على جوال تهوون لكن المصيبه اذا جاك واحد وسطرك كف وأخذ الجوال
ياخي والله ما ارقد من القهر .. ليه يسطرني ياخي خذ الجوال بس لا تسطرني

،،،

-شرايكم فيني ؟
احسن واحد في البديعه

2- هل معقولة أن اللي يسرقون ساكنين في الاحياء ( الدخل – النسيم – النظيم – الجنادرية – العزيزية -) فقط.؟
لا ياعزيزي مو شـرط والأرهاب لا وطن له < وانا أعتب عليك لأنك خصيت أهل الرياض بالموضوع .. بالعكس يالغالي في جميع الأحياء ومناطق المملكه فيها الصالح والطالح .. والنسيم والنظيم والجنادريه يسكنها دكاتره وطلاب في مراحل علميه متقدمه وأبناء متربين أحسن تربيه لكن ماكذب اللي قال الخير يخص والشر يعم


3- هل معقولة أن الدافع الاكبر للسرقه يكون ( مخدرات – عطاله – فراغ – إثبات رجولة واللي إستبعدتها لسبب سبق ذكره ) ؟
انا من وجهه نظري أن التربيه وسوء بناء مستقبل الأبناء هو السبب الرئيسي في توجه بعض المراهقين للسرقه
بمعنى ان الأب إذا ترك أبنائه في مراحل التكوين الدراسي بدون أهتمام .. طبيعي راح يتخرج بنسبه لا تأهله لوظيفه أو ماراح يتخرج خير شر .. وبكذا راح نشوف الأبن يسرق وينهب ليحقق رغباته الشخصيه
وأعتقد أيضا من أسباب السرقه هو غلاء الأسعار << لازم ندخل غلاء الأسعار في كل شي

5- هل هؤلاء الممارسين لهذه الجريمة ينتمون لعوائل معينة ( اتمنى الاجابة بنـعم او لا فقط .؟ )
لا

6- هل لمستوى الدخل المعيشي لأفراد اسرته له سبب في ذالك ؟
كما ذكرت سوء بناء المستقبل والتدني المعيشي سبب لتوجه المراهقين للسرقه ليحقق بها رغباته الشخصيه

7- وش رايكم في الرمز هذا << بصراحه خاق معه
خققان

،،،

حياك الله مره أخرى ونورت المجلس بطرحك الجميــل وتقبل بثارتي وبعض التعليقات السامجه ولا تحرمنا جديد طرحك

إقتباس الرسالة الأصلية كتبت بواسطة و ص ى 925 وش دعوة ازعل .. بقولك شي ..اذا اتضح ان الموضوع منقول ..او مو انا اللي كاتبه .. او القصة ما مرت علي اهديك اليوزر حقي وال387 موضوع ..حلال زلال وان كانك تبي نروح عند فيصل ونواف .. وتشوف بيتهم اللي كنه الملز .. وتشوف الدلخ اللي كان سبب السالفه كلها .. ما عندك مشكله بس وانا اخوك لا تشكك بالذمم اشكرك مرة ثالثه على مرورك

اخوياك بس متى فاضي انت

وبنسبة لقصة الموضوع انه منقول ( امزح معك انت وجهك)

SKY

يا بعد قلبي والله

لو فيه منك اثنين بس .. كان صرتوا ثلاثه هع

إقتباس مسائك أحلى ،، و ص ى < احس انك يوم سجلت في المنتدى ماكان لك مزاج تفكر .. أو انك تشتغل في المرور لا يكون مكبر لوحة السياره ومعلقها في المجلس بس

اما من ناحية التسجيل .. انا مسجل ولا كان عندي امل انهم يفعلون اليوزر .. بس فجأة لقيتهم يقولون مبروك .. رح قدم اوراقك الاصل عشان تصير مع الكويسين .. مثلك وشرواك

إقتباس تستاهل محد قال لك خاوي عيال النعمه خلك مثلي اذا مريت من جنب حي راقي أسارع في الخطى على شان عيني ماتطيح على قصر والا سياره فخمه ثم اروح للبيت اتهاوش مع ابوي .. لييييه يومك صغير ماجمعت قواطي الببسي مع الراجحي كان يمديك الحين عندك بنك < خلوني أعبر

صدقني يا سكاي اني اجي بيتهم من ورا.. عشان ما اشوف وجه البيت وانغبن .. وارجع لابوي واعطيه حلين لا ثالث لهما .. يا انه يغير البيت .. والا انا اللي بغير ابوي

إقتباس ذكرتني بأيام الطفوله وأيام ( برغش سنتر ) هذا مدمن سنتره .. حتى لو كان حارس يسنتر ثم يرجع حارس ماكنا نقول له شي لأنه راعي الكوره .. لكن إذا انا اللي جايب الكوره أفقع وجهه اذا جاء يسنتر .. الله يذكره بالخير

الله يذكره بالخير .. وعظم الله أجرك..شكل كان اصبع رجله الكبير بدون احساس << من كثر ما يمزعكم بالكورة ..

إقتباس وش قصتك مع اللوحات ؟؟

الله يهديك بس .. كل السالفه عشان تدرون اني صادق << مشكله اول مرة يكتب موضوع في العام ومنخرش

إقتباس عيال النعمه إذا فتشت جيوبه تلقى N95 و MP3 ومايسمع الا لـ آشلي وهالري دوف

اخر واحد .. ما كن اخوه دوفي دوف .؟

إقتباس لا ياعزيزي مو شـرط والأرهاب لا وطن له < وانا أعتب عليك لأنك خصيت أهل الرياض بالموضوع .. بالعكس يالغالي في جميع الأحياء ومناطق المملكه فيها الصالح والطالح .. والنسيم والنظيم والجنادريه يسكنها دكاتره وطلاب في مراحل علميه متقدمه وأبناء متربين أحسن تربيه لكن ماكذب اللي قال الخير يخص والشر يعم

سكاي . انا خصيت الرياض لعدة اعتبارات .. اول شي عاصمة ادارية .. ثاني شي اكثر تجمع سكاني فيها .. وانت تدري ان المدن الكبيرة هي قدوة للصغيرة ثالث شي .. مقر نادي الهلال فيها .. ومقر بيتنا فيها .. عشان كذا خصيتها في المووضوع .. اما بالنسبة للاحياء .. بالعكس كلهم على العين والراس .. وكل حي فيه الصالح والطالح .. لكن الفكرة العامة كذا .. وانت ما تقدر تغير فكرة معينه .. الا بطرح ونقاش هادف

---

اشكرك اخوي سكاي على اثرائك لموضوعي

ولا خلا ولا عدم يا الغالي


شرفت

إقتباس الرسالة الأصلية كتبت بواسطة كلنا هلاليين اخوياك بس متى فاضي انت وبنسبة لقصة الموضوع انه منقول ( امزح معك انت وجهك)

خذ راحتك يا الغلا

ومتى ما نويت تخاويني ارسل لي تلكس بس

اشكرك على روحك الطيبه