كثروا راعين " البربسة " !! و دبلوا تسبودنا !!

عندي سؤال يا ناس .. الحين إذا مشيتوا في "سوق" .. ومرّ واحد "أقزم" و " أصلع " ولابس "فسفوري" مخطط بـ وردي !!
يلفت انتباهكم وإلا ما يلفت الانتباه ؟! فـ راح تلاحظون العالم كلها تناظره !! والبزارين من الروعة والوحشة .. ودهّم يسلموّن عليه !! وبعضهم متوزّي وراء أمه يحسبونه يلحق !! وحقين المحلات طالعين ويناظرون !! لأنه " شيء غريب " !! هل هو عشانه " أقزم" !! هل عشان تنسيقه للألوان "تسنه قرعته" !!
عشان كذا !! موب ضروري (الإنسان السوّي) يكون ملفت للانتباه في كل الأحوال !!
وفي زمن " صارت السنافر " محط الأنظار !!

فهالصورة يا جماعة الخير !! هي واقع " مصغّر " للقزمان الموجودين في الوسط الرياضي !!
سواءا " في الصحف " !! سواء في " التلفزيون" !! سواءا من "إداريين " ومسؤولين !!



وشلون ؟!

وأنتم تدرون أن " المهبول والخبل " !!
يا أنه من أول ما طلع على الدنيا وهو " منلحس" !!
أو أنه " تعرض لهزّة نفسية " أو " مرض عقلي " فـ انهبل !!

إذن فيه " مهبـّل من ربك " !!
وفيه " مهبـّل" من هالدنيا !!

نفسهم نفس القزمان !! ففيه " قزمان من ربك " !! وفيه قزمان " نفسيين " !!
ويا كثرهم كثراه !! وحنا قلنا إن " القزمان يلفتون الانتباه " !!



تعالوا نشوف !!

- كون الهلال يكون بطل كأس ولي العهد .. ثاني أهم بطولة محلية !! وينافس على كل البطولات !! ووصيف "كأس "نواف بن " فيصل بن فهد ولأسباب لا تخفى على أحد !! و استحقاقه تشريف المملكة العربية السعودية " آسيويا " !! وباقي له " تعادل وفوز " ويحقق كأس الدوري "البطولة الأغلى" !! وكونه " بنى أفضل فريق أولمبي سعودي " وقدّم "أفضل "وجوه" شابة للساحة الرياضية" حاليا !! ورغم هذا كله " يسلب وتصادر كل حقوقه " بكل بجاحة !!

فهالشيء سبب قوي من مسببات (مرض الـ قزمنة النفسية ) !!
وهذا مرض أنا استحدثته .. وبراءة الاكتشاف "محفوظة لكل هلالي" !!




مرض (القزمنة) النفسية !!

الأعراض :

يجيك واحد أقوى إنجاز سوّاه بحياته إنه " اكتتب في ينساب و زين " !! وكان وده يكتتب في "جبل عمر " لكنه مطفـّر ذيك الفترة ولا تسان زاد حصيلة انجازاته إلى ثلاث اكتتابات!! لكن الله أقوى !!

فهو مضطرب فكريا !! ولا له أي أهداف واضحة !! و هيجانه وثورته .. ما يملك ولا مثقال ذرة .. لفهم ( أبعادها ) ونتايجها !! ولا عنده غاية يوصلها " لأنه عارف أنه أقزم وفشل في التكيف مع ظروف الحياة !! وفشل في صنع "علاقات اجتماعية سويّة " !! وفشل في تحقيق ذاته إلا بمحاولة "التطاولات المضحكة " !! وفشل في تنمية النظرة "الواقعية للحياة" !!

يقول "فرويد" : الفصام ضعف الذات !!

و "مغاط" يشبـّه : (المصابين بالقزمنة النفسية ) إنهم مثل (أبو جعل ) !! عرفتوه ؟!
لأن (الجعل أو أبو جعل ) يطير بشكل (غبي) وبدون (هدف) !!
قد شفتوه ( موقـّع صح ؟!) من عرفنا (الجعل) وهو يدربي (.......) و إذا طار .. اتجه لم أقرب جدار .. وصدمه وطاح على الأرض مرة ثانية !!


أسباب القزمنة النفسية :

- إحساس بالفشل !! والاحباط من " منجزات الغير " !! وتخيلهم أنهم يحاولون إصلاح خلل وهمي هم من (اخترعه) و لقصر "منظورهم المعرفي والفكري والاستيعابي" تكونت لديهم معقتدات بعدم " التوافق" لمجرد ( الرفض) !! وللرفض فقط !! وهناك سبب آخر جوهري .. هو "خوفهم من الغير لمجرد الخوف " !!


إمكانية علاجهم :

تختلف هذه الحالة في تشخصيها .. مثلها مثل أي مرض " عقلي" أو "عصبي نفسي " !!
فبعض المصابين بهذا المرض .. لا يستجيبون للعلاج مطلقا !!
لماذا : لأن " الأوهام والأفكار التي عقولهم " تزيد من تعقيد المشكلة .. وتحول (استعداداته وقدراته وهذه المعتقدات التي بناها وآمن بها ) بينه وبين "تماثله للشفاء " !!
وهذا " أخطر نوع " !!



ولذلك يجب استخدام اللفظ التالي للتعامل مع هذه الفئة وهو :

يا رجال اقضب الباب بس !! ما أحدن طق لك خبر !! لا أنت ولا معتقداتك يالجعل !!



الدرجات الأخرى .. إمكانية شفاءها " متفاوتة بنسب مختلفة " .. وبعض المصابين بمرض (القزمنة النفسية ) يكون:
" لفترة المراهقة المتأخرة" دور في ذلك .. فيكبر ويعقل !!
وبعضهم يبي من "يستقعد له " ويعلمه أن الله حق !! فيركد ويعقل !!

------------------------


طيب وش المطلوب من ( إدارة ولاعبي الهلال ) في هالفترة ؟!


أولا : هل قد شفتوا (عاقل) يجي عند ( ثور ) !! لأن الثور ثور !! ولا هنا أكبر من (راسه) وأصغر من (مخه) !! لذلك ( ابعدوا عنهم ) !!
أضف إلى ذلك "انتشار هالمرض بالآونة الأخيرة " !!
والأعراض وبينـّاها !!
والاسباب ووضحنـّاها !!


لذلك نبي من الإدارة (استيعاب خطورة الانصراف والانشغال في هالنوعية من الاشخاص) لاعتقاد الإدارة أن هالنوعية ( أصحـّاء) !! وهنا مكمن الخطر !!

لأن بعضهم " ما راح يتسجيب للعلاج نهائيا " !!
و مبزرتهم يكبرون ويعقلون !!
واللي يتطاول .. التاريخ !! والمنطق !! والجمهور .. يبي يفكونكم من ( شرّه) !!
أرقدوا وآمنوا !!

---------------------------------

لنا أهدافنا الواضحة والمحددة :

- تهيئة اللاعبين نفسيا ً بإخراجهم من "جو" التوتر السائد .. في الوسط الرياضي هذه الفترة !!
ومحاولة " امتصاص الشحن النفسي" المتراكم من "ضغط المباريات " وصعوبة اللقاءات القادمة !!

- تقديم مستوى متميّز في لقاء الشباب القادم .. بعيد كل البعد عن " الشد العصبي " .. وعدم التركيز !! نريد " نفسيات هادئة متوازنة كالماء" بعيدة عن التشويش !! وملاحقة ما يكتب وما يثار وما يقال !! لنذهب لجدة بـ " عزم وظروف مختلفة تماما" وبروح متجددة .. تجلب لنا الذهب بحول الله وقوته !!

-------------------

اعتذر بقوة عن الإطالة ..<<-- يقولها وهو مستحي :$