قصتي مع الخشبيه زعل وضحك - نادي الهلال السعودي - شبكة الزعيم

الزيرابوعزيز · #1 03/04/2008, 10:31 PM

بسم الله الرحمن الرحيم

السلام عليكم ورحمة الله وبركاته

في البداية نبارك لأنفسنا كسب هالكوكبة من النجوم الشباب والمستوى اللي قدموه امام كبار النصر
وشفن الجمهور مشحون قلنا نوسع صدر المجلس العام ونطلعهم من المود الحزين
ونخربط عليهم شوي واللي فاضي يقرا

واللي مو فاضي يعذرني اذا طولت
كان يا ماكان فيه واحد اللي هو انا ابوعزيز

كلمني مشرف بالزعيم وقالي يا ابو عزيز ودنا تشرفنا
بكرا بالقناة السعودية الرياضية (الخشبية )<<تراه حاقد عشان كذا يقول الخشبية هع

قلت وش السالفة قال ابد انت ومعك ستة اشخاص بتتقابلون مع ستة اشخاص من جمهور النصر
عطني رقم جوالك وانا اخلي منسق الجمهور يكلمك كلمني المنسق وقلت ابشر قال الوعد
بكرا الاثنين اللقاء باستاد الملك فهد الدولي جهز معلومات عن الهلال والنهائيات بينا وبين النصر
والكلام هذا قاله لي المشرف وعضو ثاني قالي بعد نبيكم تكسرون روس النصراوية

قلت ابشر مالكم الا اللي يبيض وجيهكم
عاد هم كلموني يوم الاثنين بالليل تقريبا الساعة وحده
وانا اشد الهمه واتصفح صفحات الانترنت

وانا اسجل بورقه كل المعلومات اللازمة

وجلست ذيك الليلة كله اجمع معلومات <<رجعوني لايام الدراسة قبل سبع سنين

وطلعت من الاستراحة ورحت البيت ابي انام عقب صلاة الفجر

ونومي كله هواجيس وحلوم كيف اتكلم وشلون بيطلع شكلي

اذن الظهر وقمت فاز من النوم وعلى طول لاقرب اسواق عندنا
واشتري اغلى شماغ واغلى عقال متحمس

للقاء
واشتري قلم قلت لازم يكون جيبي فيه قلم مايصير انت الحين مهم وبتطلع بالتلفزيون

قلت وش ناقص ايه ناقصني جزم الله يكرمكم قلت بنفس يا ابو عزيز وشوله الجزم هم بيطلعون
وجهك ونص جسمك من فوق مهب نازلين تحت ماتفكر

قلت لنفسي لا بس ولو <<هذي بس ولو شيباننا عودونا عليها الموضوع غلط وتقوله وجهة نظرك يقول
لا بس ولو

شريت الجزم احلى جزم وارسم جزم بالسوق
وطرت للحلاق وجلست عنده ساعة مافيه دهون الا حطه بوجهي مع اني ماتعودت احط دهونات ابد
قلت لا لازم تطلع صورتنا ميه الميه صرفت تقريبا حول 600 ريال ذيك الظهرية
ودق علي المنسق قال دبر لنا واحد زياده ودورت ومالقيت شقلت اخوي الصغير من احلى نومه
وقلت البس وتجهز عندنا لقاء بالتلفزيون وابيك تحلق وتتضبط ماله داعي شكلك يطلع غلط
بالتلفزيون

ويوم خلص طلعنا بعد صلاة المغرب متوجهين للملعب واللي يشوفني يقول هذا معرس بيروح لزواجه
من الكشخه

واعطي اخوي الاوراق وقلت هذي عشر اوراق طلعتهن من النت ابيك تراجعهن ما ابيك تفشلني عند
الجماعة ترى فيه 22 مليون شخص بيشوفونك اخوي خاف وضاق صدره قال هونت

قلت لا عادي واعتبر الوضع طبيعي وانس الكميرات <<عاد شوفوا من اللي ينصح اللي يشوفه يقول
سلمان المطيويع متعود <<مايدري اني مرتبك اكثر منه

وصلنا للاستاد وتقابلت مع المنسق لجمهور الهلال ودخلنا الاستاد وجلسنا على كراسي
بس استغربنا ان الكراسي اكثر من سته لقيناها 15 كرسي للهلال و15 للنصر
التفت على المنسق قلتله كيف الوضع كذا قال مادري انا مثلك اخبر اننا بنكون سته اشخاص
اسكتنا وشوي الا كل شوي واحد او اثنين داخلين للملعب اللقاء طبعا بالمضمار حق الملعب
واشوف كل من دخل صار يعرف اما المصور او المخرج او المقدم
ماتسمعهم الا فلان تعال اجلس هنا والمخرج يقول لاخوياه لا قربو هنا
قلنا ماعلينا انا والمنسق الوحيدين من شبكة الزعيم قلنا نبي نكفي ونوفي ان شاء الله
عاد المخرج والمصورين كل واحد زقارته ماتنزل عن اثمه

تأخر المقدم للبرنامج اللي عرفنا ان اسمه النهائي في عيون الجماهير
المخرج بدا يهدد ويقول اذا تأخر زياده تراي ابلغي البرنامج
وحنا نقول يا رب مايلغيه

وصل المقدم اخيرا وكنا 15 مقابل 15 نصراوي
ومن يوم بدا البرنامج وبدت الحرب بيننا وبينهم

وكل واحد يسحب المقرفون من الثاني وكل واحد يبي يثبت نفسه وان كلامه صح
والمقدم كل شوي يسحب المقرفون منا ويعطيه اخوياهم ويقول لحظه ما اخذنا راي وفلان وكررها ثلاث مرات على نفس الشخص مالكم بالطويلة البرنامج صار خبص وخبيص
لأن المقدم هذا انا اول مرة اشوفه يقدم اخبره يلاحق اللاعبين بالملعب يجري لقاءات مابعد المباراة
وش جابه يقدم برنامج قلنا ماعلينا نكمل معهم ونشوف وش النهاية
انتهى البرنامج وتفرقنا وكان معنا شاعر قال قصيده بالنصراويين وضحكنا شوي

قلنا متى بيعرض البرنامج قالو بكرا الثلاثاء الساعة 1.30 بالليل
ومافيه احد الا علمته تراني ابطلع بالتلفزيون وقلت كذا ورديت بكذا وخذ هياط

وعندي منتدى خاص انا مدير عام فيه واحط بتوقيعي دعاية عن البرنامج
واكتب موضوع بمنتدى الرياضة عن الموضوع
واجلس اعد الساعات والدقايق انتظر البرنامج
يوم جت الساعة 1.30 من يوم الثلاثاء ماجابوا البرنامج

جابو مباراة الهلال والاهلي اعاده وادق على المنسق واتهاوش انا واياه

وين البرنامج والله من الفشيلة والقهر

واخوياي بالاستراحة طايحين علي ضحك

وانا انواع القهر تعبي راح بلوشي
وش اقول للي بالمنتدى عندي وش اقول لاخوياي
غير كذا انا اطالب ومن هذا المنبر

يرجعون لي ال 600 ريال اللي صرفتها عشان
مقابلتهم البايخه اللي ما عرضت

ويردون لي كرامتي ليش اخوياي يضحكون علي كل من شافني اشر علي وقعد يضحك

(الزير ابوعزيز)
طيب انا ابقول مافيه مشكله الثلاثين شخص اللي حضرو وتعبوا انفسهم
مثلي ماراعو شعورهم
اذا كانوا هم مايعرفون يقدمون برامج وفشل برنامجهم ليش ينادونا

اخيرا شيء بخاطري وحبيت اسولف لكم عن سالفتي نطلعكم شوي من مود النهائي

ونعتذر من الاطالة

فزاع الاجيال · #2 03/04/2008, 10:52 PM

لا يا خوي اذكر اني شايفها بالرياضيه بالليل قبل ما انام ..

وجالسين بالنص وكان واحدن من الهلاليين على ما اذكر لابس بدله يمين ..

وجالسين بالنص على اول الملعب ..

ويمين الهلال ويسار النصر ..

لا ذي انعرضت وشايفها انا الله يجزاك خير ..

وكان بوه مقدمين واحد منهم ولد المجاهد واسمه فهد وهو الصغير توه متخرج شكله .. الي دايم يقابل مع الاعبين والثاني ابيضاني اذا ما خربطت وما يطلع كثير ..

لا الحلقه انعرضت بس بالليل ..

و معليش ما علقت على السالفه بس علقت على الموضوع ..

تحياتي ..

ازرق+ابيض=عشق الهلال · #3 03/04/2008, 10:53 PM

هههههههههههههههههههههه لقد انه موضوع حركتات ياابو عزيز ان شاء الله مايعرضون البرنامج <<<<نذل
(وش ترجى من الخشبيه)
عوافي خيو وتقبل مروري

القيصر رهيب · #4 03/04/2008, 11:06 PM

تسنـــها طويلة ؟ ؟

ولا يتهيأ لي

استفسار عن يوزرك

هو بشد الزاء الاولى ولا بدون شد الزاء الاولى ؟

---------

والله يخوك إني مدري

بس استديو الشبكة قالو إنهم بينزلون البرنامج

ولا نزلوهـ مدري عآد هو عرض ولا مدري عآد

عاد مدري

بس اللي أدري عنه إني أبدعيلك تتعوض عن ستميتك ذا اللي مان علينا بها << أنواع التشطيح

تجيك بدالها ست ستميات

وشكغا

الزيرابوعزيز · #5 03/04/2008, 11:19 PM

إقتباس

الرسالة الأصلية كتبت بواسطة فزاع الاجيال


	لا يا خوي اذكر اني شايفها بالرياضيه بالليل قبل ما انام .. وجالسين بالنص وكان واحدن من الهلاليين على ما اذكر لابس بدله يمين .. وجالسين بالنص على اول الملعب .. ويمين الهلال ويسار النصر .. لا ذي انعرضت وشايفها انا الله يجزاك خير .. وكان بوه مقدمين واحد منهم ولد المجاهد واسمه فهد وهو الصغير توه متخرج شكله .. الي دايم يقابل مع الاعبين والثاني ابيضاني اذا ما خربطت وما يطلع كثير .. لا الحلقه انعرضت بس بالليل .. و معليش ما علقت على السالفه بس علقت على الموضوع .. تحياتي ..

معقوووووله انا بعد ردك اتصلت على (المنسق )
وقالي انه سمع انها عرضت العصر بس ما بلغني
ونأسف عن الخطأ الغير مقصووووووووووووود <<<دايم متفشل

مع اني جلست يوم الثلاثاء كله على التلفزيون الى الفجر وماشفتها ؟؟؟
لأنهم بالبرنامج قالو لنا تكلموا كأن المباراة بكرا قلت مالها الا يوم الثلاثاء
اللي يقدر يجيب لي البرنامج اكون له شاكر

وللمشرف الحق بحذف الموضوع وتحياتي للجميع

فزاع الاجيال · #6 03/04/2008, 11:31 PM

^

^

حاول تشوف القناه و تاخذ الحلقه من عندهم .. لان ما اتوقع ان احد مسجل الحلقه

..

والحلقه ممكن انعرضت العصر.. بس انا شايفها بالليل حول الساعه 12 قبل لا انام .. لاني اخليه التلفزيون مولع وانام عنده دايم

.!

بني حارث · #7 03/04/2008, 11:38 PM

هههههههههههههههههههههههههههههه
خخخخخخخخخخخخخخخخخخخخخخخخخخخخ
ههههههههههههههههههههههههههههههههه
خخخخخخخخخخخخخخخخخخخخخخخخخخخخخخ
عسى بس لقطت وجهك
هههههههههههههههههه
صراحة فاتني
مشكور أخوي

غلاهم وماخذه حلاهم · #8 04/04/2008, 12:35 AM

خخخخخ متكشخ ودنيا واخر شي مانعرضت او بالاخص ماشفت نفسك ^ــ^[[الله لايحط احدكم بهالموقف ]]

حاول تاخذها من نفس القناة هذا اذا كانو هم مسجلينها *ـ*

سلام

فجر الرياض · #9 04/04/2008, 02:00 AM

الى شفتها كانوا جايبينها العصر

و واحد من الهلاليين الي على اليمين

قال لنصراوي يوم مدح

الظاهر انه التايب اذكر الله

بس ماطول عرض الحلقه اتوقع انها فقره من برنامج

على العموم ماقصرت بالمعلومات الي جمعتها وبكشختك الي فاتك عــ TV

عوافي..

big_1_boss · #10 04/04/2008, 02:18 AM

شف وجه التيس واحلب لبن

.......................................................................

♫ ROMAntico · #11 04/04/2008, 03:52 AM

ههههههههههههههههههههههههههههههههههههههههههههههههههههههههههه

ياااحرااااااااااام تنرحم

وقسم إني جالسه عند الـ TV من بدررري أتحرى البرنامج وآخرتها عادوا مباراة الهلال

اللي يقهر إن البرنامج تسجيل مو مباشر نقول صار خلل صار شي يعني

قسم بالله يقهرووووووووووووووووون معطين الناس أشكل وموب أول مرهـ

مايحمدون ربهم فيه ناس معطيتهم وجه وتتابع قناتهم الخايسه

شكراً الزير ابو عزيز على سرد القصه والله يعوضكـ راحت الكشخه بلّووشي

باسكن روبنز · #12 04/04/2008, 09:51 AM

هههههههههههههههههههه

احســن

هذه نيتك ليه ماعلمتنا عشان ننتظر الحلقة

<< شريرة

تتعوض ان شاء الله مررة ثانيـة مع العـراب ( نيشان )

الزير ابو عزيز

الله يعطيك العافيـة

مشكـور ... ورده

أبوشلاخ الهلالي · #13 04/04/2008, 10:31 AM

هلابكـ أخوي أبو عزيز ,,
أنتظرت من الساعة وحده إلى الفجر ..
ولا عرضو البرنامج .. أما إذا كان عرض قبل
الساعة وحده فهذا غلط الخشبية وعدم اهتمامها بالمشاهد
ووقت المشاهد .. بعد ماقرأت موضوعكـ تحسفت اني ماشفت
البرنامج ونشوف خشتكـ الحلوهـ ..

يو(((الثنيان)))سف · #14 04/04/2008, 02:11 PM

والله قهر

شي يرفع ضغط البارد

الله يعينك

ارفع عليهم دعوى قضائيه

تراني اتكلم جد والله

اجل الناس فاضين لهم

لا ومتخسر 600 ريال ومزعج الناس انا بطلع بالتلفزيون واخرتها يضيع وجهك

على الاقل طالب بتعويض عن طيحة الوجه

على العموم اذا كسبت القضيه

لاتنساني ياخوك

Hictar · #15 04/04/2008, 02:58 PM

البرنامج إنعرض بس ما شفته
دخلت على أخوياي يوم المباراه وقالي عن البرنامج
إنهم مجمعين هلاليه ونصراويه ببرنامج وكل واحد يتكلم عن ناديه
بس رأيه إن البرنامج فاشل وشرشح بالقناة

أذكر قبل سنه قابلوا معي بالقناة بطريق الملك عبدالله ( الممشى ) كنت أهرول وأول ما أخذت يمين ( إلا وواحد يوقف بوجهي ) !!!!
قلت بنفسي وش يبي هذا ؟
قالي معليش ممكن دقيقه ؟
قلت تفضل
قالي بنسوي معك لقاء تتكلم فيه عن الإنترنت

قالي وش تعرف عن الإنترنت ؟
قلت النت لعباتي لا تخاف

أول ما شغل الكاميرا وقالي تكلم ( فغرت خشتي ) ونسيت كل الكلام

بالطقاق طلعت مني كلمتنين والباقي ( آآآآآآآآآآآآآآآآآآآآآآآآآآآآ- آآآآآآآآآآآآآآآآآآآآآآآآآآآآآ )

وبعدها سألته متى بيعرضون البرنامج ؟
قالي الساعه 11
بعد ما تركتهم بخمس دقايق قلت بنفسي أنا وش سويت

ما حلقت ولبسي فاشل وأنواع العرق من الهروله

حسيت إن الشعب كله بيتمصخر علي بوقتها

علمت اللي حولي إنهم ينتظرون المسخره اللي بتصير لي من الشعب

بس الحمد لله جابوا البرنامج ولا عرضوا التقرير

وطلعت منها سليم السليم