هلالي الظهران يقص شريط افتتاح مشروع تقديم "خدمة " الزواج لاخواتنا السعوديات!! (اهداء خاص لأمي)
السلام عليكم أجمعين.. عازبين وعانسين..
شلونكم يالربع؟ وشلون الدنيا معكم؟!
يارب انكم ترفلون بثياب الصحه والعافيه وتزقحون.. أما انا فلا اشوف احد يسأل عني.. لاني انسان مقصر حتى النخاع.. بالاماريه حتى ابوي اللي هو أبوي مايناديني الا "القطوع".. هو كذا دايم يحطمني شكله منقهر مني بس ماعليه اعرفه من زمان ويمون علي.. حتى الربع في الاستراحه من زود ماني قطوع يسموني شركة الاتصالات من كثر ماني أقطّع في البلوت..
الزبده.. فكونا من البربسه وخلوني اخش بالموضوع اللي عرضته على رنا القاسم وعيت تناقشه على أثير ام بي سي-اف ام.. وبعد مارفضت قالت مجاملة: نبيك تشارك معنا في حلقة اليوم وتعطينا صفه فيك تتمنى تتخلص منها.. قلت: فيني صفه اتمنى اتخلص منها وهي اني اسمع اذاعتكم احيانا (ياحليلي اذا حقدت على احد) قالت: وجهة نظرك ونتقبلها.. طيب عندك اهداء؟ قلت: ايه عندي اهداء خاص جدا جدا لك يارنا أغنية "تحملتك بما فيه الكفايه".. قالت: طيب ياخي دامك ماتتحملني ليه متصل؟ قلت: أبسمع صوتي هو أحلى في الراديو ولا في التليفون.. قالت: صوتك يهبببببل.. قلت: وانتي أهبل..
مادريت الا والخط يطنطن.. خلها تستاهل ليه تعيّ علي.. اصلا راحت عليها من عقب ريما يالبى صوتها..ما أتأخر كل يوم عن الدوام الابسببها .. خصوصا اذا قالت "برضو" يوووووووووووه والله اني اذا سمعتها اغوص بالمقعد..و شوي واحول جنب الفرامل.. المهم عاد قلت مالي الا اخوياي بالشبكه اعرضه عليهم..
المهم قبل ابدأ بسرد سالفتي عندي رجاء خاص للعوانس يروحون يدوخون شوي ثم يرجعون ماحنا بناقصين حالات اغماء..
=.=.=.=.=.=.=.=.=.=
في احد الليالي الغابره على مدينتي الحزينه المتأهبه لفراقي.. كنت على موعد مع رحله للخطوط السعوديه..وكان الشوق قد غمرني وتغلغل باحشائي وتشبعت به أحداقي وتشلخت منه أنفاسي لأجل لقيا أهلي واحبابي ولأمارس عاداتي من انواع الدجة وصنوف الفلة.. الا ان هذا الشوق الجارف العرمرم اصطدم بتأخير الرحلة كعادة الخطوط المبجله الاّ انهم زادوا من لعانتهم قليلا وطلبوا عدم مغادرة الصاله!
لم يقتلني القهر ولم تغتالني الحسره فأنا وكعادتي متفائل بالحياة الى اخر رمق.. فعزمت على أن اجعل من ليلتي بهيةً مهما كان المكان.. فأخذت قدحاً من الكابتشينو وكيساً من الفصفص وذهبت الى ركنٍ منزوٍ هادئ.. وانتزعت هاتفي من موضعه علّي أنعم بجو من الحميميه مع ذكرياتي.. بدأت تقليب محتويات جهازي لكني لم ألبث طويلا حتى طبَّ عليّ شخص.. ووبخني أيما توبيخ..ونهرني أيما تنهير (صح كذا؟).. وحذرني من العبث بجوالي بغرض سدّ باب الذرائع المؤديه الى الترقيم!!
عدت أدراجي لمقعدي السابق مقدراً خصوصية المجتمع وحساسيته.. فلما غصت بمقعدي فاذا بالعوائل تتوافد عن يميني وعن شمالي ثم طبَّ شخص اخر مفرقزاً بعينيه قائلاً: ياخي ماتستحي جالس مكان العوايل!! ثم استتابني ثلاثا.. فتبت في الثالثة وعصمت مالي ودمي وكيس فصفصي من أماكن العوائل!!
لم أيأس فمطارتنا الشاهقة بها من المعالم مايأسر الألباب ومن المقاعد مايكفي لمرتاديها.. فجلست على مقعدٍ يبعد عني الشبهات.. فأمامي مجموعة شياب كل واحد ماسك كتاب وأحسبهم من مدعين الثقافه والله حسيبهم.. وخلفي مجموعة من العلوج الكفرة تقول كنهم بالعين مسجلات! وهؤلاء حشوا فينا وفي بلدنا الين دخت(لاتقولوا يتصنت هذول كفار مافيها شي).. وعن يميني بنقالي غلبه النعاس وترك العنان لفمه حتى حامت نفسي من رائحة الخياس.. وعن يساري آآآه ياقلبي وحده قرفانه مثلي.. معها زوجها سافهها وجالس يلعب سوليتير بجواله!! لكن ما أن رآني وحيدا الا وقد شبك يده بيدها واخذ يوشوشها نكايةً فيني..
مكثت على هذا الحال حتى نادى المنادي بالصعود الى الطائره..فلما صعد الجمع الغفير من العائلات ألقيت بكيس الفصفص أرضاً وهتفت صارخاً: لعنبوا ابليسكم ذي ديره؟ كل شي للحريم!! قال لي الموظف بعد أن قزني وأانا ألقي بكيس الفصفص أرضاً: انهبلت أنت؟ قلت: اي والله انهبلت.. أحد يشوف هالاشكال وماينهبل؟! قال وهو يقطع كرت صعود الطائره: يالله رح دور لك مقعد فاضي لان مقعدك جالسين عليه عايله..
شخص بصري وعظم جللي وكبرت مصيبتي.. فما كان مني الا ان اتجهت للمقعد الشاغر بجوار رفيقنا البنقالي لأفكر بوضوح في حالي!!
أخذتُ أسرح وأطق الهاجوس تلو الهاجوس.. والوضع العام للركاب هو الهدوء بعدما أعياهم التأخير والانتظار.. ولم يكن يبدد هذا الهدوء الاّ شخير جاري البنقالي مصحوباً بانبعاثات سامه كانت محفزة للتفكير!! ألقيت نظرة الى الجانب الاخر من الطائره لأرى لاعب السوليتير قد أسند رأسه الى كتف زوجته.. وفي لحظةٍ تجلى بها أحد الهواجيس.. " ايه يابو سباستيان مهوب أصرفلك تتزوج! وين بتلقى رومنسيه أحلى من انك تلعب سوليتير ومرتك جنبك.! ياخي على الاقل تجلس في المكان اللي تبي وماعليك من أطلق شنب.. بعدين وش ينقصك؟ من يومك صغير وانت انسان ورع ومنفتح (هيه انت وياه المقصود بـ ورع هنا هو الورَع المأخوذ من التقوى..ومنفتح يعني مثقف).. وعشت طفوله مفعمه بالحب والحنان في كنف والديك.. ليش يابو سباستيان ماتتأهل؟ "
وصلت لمنزلنا وقد أخذ الارهاق مني مأخذه فلقد أعياني الانتظار والتأخير.. وسيطرت هواجيس الزواج على ماتبقى من قواي.. استأذنت والديًّ للخلود الى الراحه..
ولجت الى مخدعي وقبل أن أهمًّ بالنوم أردت أن أتابع الردود الجديده في مشاركتي الاخيره فقرأت مصادفةً خبر خطبة واحد من الاخوان.. فأصابتاني الغلقه ولامست مايجول بفكري فعزمت أن أنهض لأفاتح والديّ بالأمر....
فعلا فاتحتهم بالموضوع وماكان من أم عمرٍ الا ان استانست ونقزت لكي تأتي بقلم وورقه.. حتى انا كنت مستانس مهوب عشاني بتأهل لأ.. بس لانه اول مره بحياتي أملّي أمي واخليها تكتب.. من وانا صغير تمليني المقاضي وتقول عطها أبوك..
شوفي يمه.. شخصيتها مابيها تكون قويه مثل فريال خانو ولا ابيها رخمه مثل أم بشير.. ابي شخصيتها تكون مثل سعاد خانو.. يعني قويه على عيالها وفاهمه علي ومافيه مشاكل لو نافخت علي مره او مرتين.. بس هاه يمه أهم شي مابي وحده راعية حكي.. فلانه قالت وعلانه سوت وأختك قهرتني ومن هالخرابيط,, بعدين مابيها لابدويه خالصه.. ياحلاتي انا أجر بالربابه وهي تقصد.. ولا ابيها حضريه زود وتفضحني بكل مكان.. يعني ابي فيها أصالة البدو وأتيكيت الحضر,, وسجلي عندك ابيها تكون محترمه.. يعني راعية صلاه وحجاب بس ماتكون حقنه زياده عن اللزوم,, بعدين ابيها تكون من النوع الحياوي علشان أذوّب هالحياء بطريقتي ,, وسجلي عندك بعد ابي تعليمها يكون ثانوي او بكالوريوس لايزيد ولاينقص,, أما الوظيفه ماهمتني.. سواء كانت موظفه او لا.. المهم تكون راعية بيت وماتقصر عليه.. بالعربي اذا رجعت من شغلي القى طباخها جاهز,, وياحبذا تكون من رواد محلات الهرم علشان ماتخسرني واجد ونستثني من هالقاعده ماركات نعومي وليسانزا وماكان في حكمها..
بادرتني أم عمر: خلاص قضيت من الصفات الشخصيه؟ قلت:ايه تقريبا.. قالت: وهذي الورقه وقلبناها.. شفت اننا مانحتاج الا ورقه وحده.. قلت: ماشاء الله عليك ياأم عمر وانا اقول من وين لي هالذهانه.. خلي الورقه على جنب.. هذي يبلها مخمخه,, قوليلي يمه وش اكثر قناه تعرض مسلسلات ولاتدرين هاكي الريموت وتنقي لي البنات على ذوقك..
والله ومرت ساعتين وأم عمر تقلب في هالمحطات وتعلق وانا منصت لارائها وملاحظاتها.. وعقب ماخلصت تقليب طلعت من جيبي صوره لــ "اشوريا راي" وقلتلها: والله يمه ذوق حلو وطمنتيني لاني كنت اشك لو تركت لك الخيار كان زوجتيني بنت حسن كراني بس الحمدلله الحين ارتحت.. لكن كان فيك حيل دوري لي وحده فيها ريحة من هالطخمه اللي بالصوره..
بس باقي عندي كم ملاحظه ابيك تحطينها في بالك.. الاولى: انك تبعدي عن الخطابات.. لان كل وحده تجيب لها قائمه تقول مندوب مبيعات.. وكل وحده تعطيك مواصفات على كيف كيفك علشان اتزوج البنت اللي هي جايبتها لزوم تاخذ حق الخطابه.. لدرجة اني سمعت عن وحده من الخطابات تقول خذ فلانه وبكلم اهلها يسوون لك خصم,, والملاحظه الثانيه: يمه لاتاخذي اراء بنات الثانوي.. تجيك الوحده تقعد تمدح صديقتها شهرين.. ثمن ماتجيب سيرتها.. ويوم تسألها عنها تقول: فكنا منها المغروره.. تعرف وقتها انهم متطاقين,, أما الملاحظه الاخيره: لازم تعرفين اني مو مثل اللي يتشرط ويقول ابيها طويله وشعرها أشقر ومدري ايش.. وتلقين اهله ياخذونه على قد عقله ويقولون لقينا ويخطبون له وحده مهيب يم المواصفات اللي يبيها.. واذا جاء وقت الشوفه وشافها قال: ايه هذي اللي ابي .. تراني ماأخق بسرعه .. هذا اللي عندي يمه وكان الله مع المحسنين..
قالت الله يطول بعمرها: على كذا وانا امك بتصقع الاربعين ولاخطبنا لك.. بس ماعليك ازهلها وان شاءالله ندبرها (كفو والله).. بس انت ماعلمتني وشهي مواصفاتك؟ قلت: والله مواليد حزيران وعيوني عسليه وبرجي الثور .. وش دعوه يام عمر.. تراني ولد بطنك مانيب غريب.. قالت: طيب يالثور وش هواياتك؟ قلت: والله الوهقه ياهالسؤال.. المره الوحيده اللي عرفت هواياتي فيها ..مره سجلت بمنتدى قبل 3 سنين وعبيت خانة الهوايات كالتالي: التحجير لأي واحد يبي يتجاوز من اليمين في الدايري الشرقي.. السكيتينق.. مراسلة الفتيات.. أحلام اليقظه.. ممارسة التنفس الاصطناعي..
بس ياليت نحذف مراسلة الفتيات من القائمه لانجيب العيد.. قالت: لو اني ابحذف كان حذفتها كلها وحذفتك وراها.. انت عطني يومين بس ويصير خير ان شاءالله!!
المهم.. عقب يومين اصحى من النوم وبوهتي طايره وألقى البيت حوسه..أمي وخالاتي وجيش خدامات.. ناس تطبخ فوق وناس تطبخ تحت.. قلت: عسى ماشر؟ قالت الماما: الليله مسويه عزيمة حريم كبيره..انت بس رح الحلاق وتضبط وخذ معك اغراضك وتعال البيت الساعه عشر!!
والله واروح اتضبط ورجعت البيت الساعه 10.. وألقى البيت زحمه غير طبيعيه من جد.. وكأنه صاير سوق فيه تخفيضات بالعشر الاواخر من هالزحمه.. الظاهر أم عمر ماتعرف وحده الا وعزمتها هي وبناتها..
المهم أخذتني أمي على جنب ودخلتني غرفه بلحالي.. وقالت: شوف أبنقي أقرب وحده للمواصفات وبستأذن منها هي وأمها وبدخلك عليهم.. وش رايك؟ قلت بكل حياء: يمه خلاص!! السكوت علامة الرضا..
ووجاءت اللحظه الحاسمه.. وجاءت أمي تقول: يالله البنت تحتريك بالغرفه الثانيه.. قلت: منهي؟ أي بنت؟ << ياشين اللي يسوون نفسهم مايعرفون قالت: أوووه شكلي باهون.. قلت: لا لا لحظه.. وش اللي تهونين لعب عيال هو.. انتي روحي وانا الحقك..
دقيت الباب عليهم وقلت: يمه عندك احد؟ (<<لاياشيخ) .. دخلت عندهم وانا اناظر بالارض.. جلست قد كذا "." وطلعت .. ويوم جات أمي تسألني: هاه بشر ان شاء الله اعجبتك البنت؟ قلت: والله حلوه جزمتها (<< هذا اللي شافه ) .. تستهبلين يمه مدري شلون كذا !! قالت: طيب اصبر.. انت خلك بالغرفه وانا بدخلها عليك.. قلت: ايه كذا صح الحين..
فعلاً دخلت البنت.. وخفق قلبي وحسيت بانشكاحه عظيمه.. حسيت ان ودي اقوم اخمها هي وأمها ..وقلت: ايه هذي اللي ابي (<< افا وين راحت الملاحظات والهياط اللي من الصبح )..صرت أقزّها شوي وهي تصد عني.. وبعدين هي تقزّني وانا أصد عنها.. استمرينا على هالحال قزّه تتبعها صده.. الين في مره كان دورها تقزّني وبالغلط قزّيتها وجات عيني بعينها.. وعلى طول صديت وهي صدت وبتلنا على كذا.. الى ان تداركت أمي الموقف وقالت: وش تشربون؟ قلت انا: أي شي.. والبنيه قالت: وانا بعد أي شي.. أما أمها قالت: ياحليلهم اللي يستحون.. أنا أبي قهوه..
الشاهد.. استاذنت أم البنت وقالت: عن اذنكم شوي.. ولحقتها أمي تجيب المشروب.. ماامداني أخذ راحتي وارفع راسي الا وام البنت داخله ومعها ثنين من بزارينها جلستهم معنا.. ماأخفيكم ان كان ودي أسدد لها وحده هي وبزارينها بس ولو لأجل عين تكرم مدينه..
دخلت أمي ومعها الصينيه.. فيها عصير لي وللبنت وقهوه لامها.. وراحت صوبهم لكن قالت امها: مايصير الرجال بالاول.. جاتني أمي ومدت لي الصينيه.. طالعت في أم البنت وابتسمت ابتسامه صفراء وخذيت القهوه حقها ( ماقلتلكم ياحليلي اذا حقدت على احد).. وعطيت أمي غمزه..
قامت أمي واخذت معها أم البنت.. وانا مسكت البزارين وقلت وش رايكم نلعب واحد طش وانا اللي ادوركم وراحوا يتخبون (أحلى تصريفه للبزارين).. ورجعت للقمر اللي يحتريني.. دخلت عليها وجمعت شجاعتي وقلت: السلام عليكم .. قالت: وعليكم السلام.. سكت شوي وقلت: السلام عليكم (هلالي الظهران وسيع الوجه اللي تخبرونه ضاعت علومه).. قالت: وعليكم السلام ورحمة الله وبركاته (مدري هي انلخمت ولا تصرف لي؟).. استجمعت شجاعتي مره ثانيه وقلت لازم اسولف معها حتى اختبر عقليتها .. فقلت لها: تعرفين منصور البلوي..شالوه! قالت بصوت منخفض اقرب للهمس: شلون يعني شالوه؟ قلت: شالوه يعني قشعوه..
حسيت أن في عيونها حكي بس حيائها منعها تتكلم..فاستنهضتها واستحثيتها للكلام: قولي يالقمر اللي في السماء.. قولي يالطاووس اللي في الحديقه.. قولي يالغزال في المحطه اللي عند الخط.. قولي يابعدي؟
قالت: ههه ههههه أجل غزال عند المحطه!! قلت وانا ارتشف العصير: مهوب أي محطه.. المحطه اللي عند الخط.. فكبت البنت في ضحك عميق.. وقالت وهي تغالب ضحكاتها: كنت ابي اقول.. هذا الدب كم يحتاج شيول علشان يشيله؟ فانكبينا انا واياها في نوبة ضحك عميق ايضاً.. وبعد أن تبادلنا مقولة "الله يرجك" وسقطت الميانه أخذنا نتجاذب أطراف الحديث.. وكان بيننا توافق عجيب غريب وكأن شخصيتها مفصله لشخصيتي.. حتى الرغبات كانت متقاربه باستثناء اني احب الجراك وهي تحب المعسل.. واذكر اني كتبت معلقه طويله اهجوها فيها.. قلت في مطلعها:
لا تحسبنَّ الكـيـفَ ليــاً تمزمزه ×× لن تبلغ الكيفَ حتى تضرب الحجرا فالكيفُ مجدٌ كمن عمّرَ ناطحةً ×× ولـيس كــمن أراد تسـلق الشـجـرا
فما كان منها الا ان ردت علي ببيت أسطوري.. قالت فيه:
ياحبيبي ياحبيبي لاجراك ولا معسل ×× الشفايف لك جراك والبراطم لي معسل
وكان هذا البيت الساحق الماحق سبب في الاقلاع عن التعاطي..
ومرت الايام حتى أتى اليوم الموعود اللي بنكتب فيه الكتاب.. دخلت أنا وابوي عند عمي بوجود المأذون.. ودخلت أمي عند خطيبتي وخالتي.. جلسنا نتقهوى والمأذون نص ساعه يشرح لي وش أقول.. وانا مع الارتباك ألخبط في الكلام.. مره أنسى كم كلمه.. ومره أقدم كلمه على الثانيه.. الين حفظت المطلوب مني.. بدأ المأذون يتكلم الين وصل للفظ "زوجتك ابنتي".. وأجيك أنا مدرعم مع الحوسه واقول:زوجتك ابنتي..
قفلت مع المأذون وقال: ياولدي انت متى تزوجت حتى تزوج بنتك.. وعيّا يكمل كتب الكتاب يقول: ولدكم مهوب مضبوط..
المهم..عقب ماأقنعوه وعطوني ورقه اقرأ اللي فيها ووقعنا وقرينا الفاتحه على روح البنت وقضينا.. أخذني عمي لقسم الحريم وانا في وضع مزري.. دخلت المجلس وانا في حالة توهان وفداغه..
قالت أمي: ماتبي تبارك للعروس؟ قلت لعروسي: ألف مبروك .. قالت: الله يبارك فيك ومبروك لك بعد.. قلت لها: الله يبارك فيك وعقبالك ان شاء الله .. ومني العيال ومنك البنات..
تداركت أمي الموقف كالعاده وأخذت العروس تبارك لها.. وانا جاتني أم العروس تبارك لي وتوصيني.. تقول: حط بنتي في عيونك.. وانا اقول في نفسي وش قالوا لك فاتح فندق في عيوني يوم اني احط بنتك فيه (<<على تبن .. دارين وش حليلك) .. خرجت أمي ومعها أم العروس وهي توصيني بالدعاء..
ويوم خرجوا وأقفل باب الغرفه واشغل شيلي الطرحه واحط يدي على راسها واقول: سبحان الذي سخر لنا هذا (<<مدري هو تضييع ولا وراي خط من جد ).. الا وباب الغرفه يدق...!!!
اثاريني عزّمت افاتحهم بالسالفه بس الظاهر راحت علي نومه من التعب وتركت اللاب توب مفتوح على صفحة موضوعي.. ولا هنا عروس ولاهم يحزنون..
غسلت وجهي ورحت للصاله.. وألقى أبوي جالس يقرا الجريده ويناظرني بعين وهو كاتم الضحكه ويقول لي: هلا بالظهراني..>> انلخم .. استحيت وماقدرت احط عيني بعينه << ناتفه بكم ذبه في ذاك الموضوع.. شوي سألني أبوي يقول: منهو "المشاغب" تعرفه انت؟ قلت: لا انا مااعرف الاعضاء.. المشاغب قوّم الله خشمه كاتب رد ينافي الاداب والذوق العام.. بس اذا تبون الصدق والله ابوي رهيب وعن ألف رجال<< خايف يطيح الموضوع بيده..
الزبده..كان من البديهي اني الغي فكرة اني افاتحهم بالسالفه.. خصوصا ان أمي حاقده علي يوم أتأخر عليها هذاك اليوم في الزواج وأقولها أن الكفر ضرب علي وأنا جالس على النت أكتب موضوع..اصلا وين المشكله.. خلونا بنانسي وميريام فارس وماعلينا قصور.. بعدين مهو بضروري اذا جيت العب سوليتير تكون زوجتي جنبي لاني بصراحه مستعد أكل عسل مع الناس ولا اكل بصل بلحالي..
=.=.=.=.=.=.=.=.=.=.=
الخلاصه:-
1- يايخلون فيه مكان للشباب والا ترى نبي نبلش بمريام ونانسي.. ونمتنع عن تقديم خدمة الزواج لاخواتنا السعوديات (<<الله ياخذك كانك خليتها خدمه)..
2- اذا جيت تبي تعرس فاطبخه على نار هاديه.. حتى لاتنحرق الطبخه او ماتستوي او حتى يزيد ملحها..
3- كل واحد يركب قفل على جهازه.. هالايام مافيه أمان..
4- الله يعينكم ياأهل السعوديه باستثناء الشرقيه على غثا رنا القاسم..
5- بالله وش استفدتم يوم قريتوا هالموضوع؟ والله انكم مخفات << ماله خوي
برايفت لأمي ولمصدر الهامي: ان شفتوا هذا الموضوع او ماشفتوه فالعذر والسموحه .. تراني احبكم,,
يارب انكم ترفلون بثياب الصحه والعافيه وتزقحون.. أما انا فلا اشوف احد يسأل عني.. لاني انسان مقصر حتى النخاع.. بالاماريه حتى ابوي اللي هو أبوي مايناديني الا "القطوع"
من ناحية قطوع .. فما فيها كلام ..!!
لكن من حقك تقطع .. أبرك لك يا شيخ وش تبي فيهم من زينهم عاد
إقتباس
وحذرني من العبث بجوالي بغرض سدّ باب الذرائع المؤديه الى الترقيم!!
أنا اشهد أنه ذيب وعرف لك .. نسيت بلوتوث الاستراحة؟ وان كنت ناسي أفكرك
إقتباس
(لاتقولوا يتصنت هذول كفار مافيها شي)..
ـههههههههههههههههـ
أعجبتني هالكلمة .. ذكرتني بواحد في السكاي بي متعرف على أجنبية مدري من وين ..
المهم أنه يناظرها بالكام ويشوف مناظر بطّالة
يا ابن الحلال عيب عليك ... قال : عادي كافرة بنت كفار
إقتباس
ولم يكن يبدد هذا الهدوء الاّ شخير جاري البنقالي مصحوباً بانبعاثات سامه كانت محفزة للتفكير!!
كان سحبت السيفون طيب؟
إقتباس
والملاحظه الثانيه: يمه لاتاخذي اراء بنات الثانوي.. تجيك الوحده تقعد تمدح صديقتها شهرين.. ثمن ماتجيب سيرتها.. ويوم تسألها عنها تقول: فكنا منها المغروره.. تعرف وقتها انهم متطاقين
تبي الصراحة؟ والله بالنسبة لي ما أثق بذوق الحريم في الاختيار مهما كانت اللي تختار
لأن نظرة الحرمة للحرمة غير عن نظرتنا للبنات عشان كذا الله يعيننا بس على الاختيار بأنفسنا ..
أحس أني متوهق من جد بموضوع الزواج
إقتباس
قلت: والله مواليد حزيران وعيوني عسليه وبرجي الثور
وأنا أقول هالقرنين اللي طالعة براسك من وين؟
أجل ما يبي لك كل هالمواصفات اللي طلبتها .. عندي لك بقرة بمزرعة بالخرج يحبها قلبك أحس أن الصفات المشتركة
بينكم كثيرة
إقتباس
ن في مره كان دورها تقزّني وبالغلط قزّيتها وجات عيني بعينها.. وعلى طول صديت وهي صدت وبتلنا على كذا
ـهههههههههههههههههـ
ذكرتني برقية وأبومساعد في طاش ما طاش
أدوووخ أنا على هالرومانسية
إقتباس
لا تحسبنَّ الكـيـفَ ليــاً تمزمزه ×× لن تبلغ الكيفَ حتى تضرب الحجرا
فالكيفُ مجدٌ كمن عمّرَ ناطحةً ×× ولـيس كــمن أراد تسـلق الشـجـرا
وهـ يالمعسل
صح لسانك يا بعد خشة جرير والفرزدق
إقتباس
ياحبيبي ياحبيبي لاجراك ولا معسل ×× الشفايف لك جراك والبراطم لي معسل
ههههههههههههههههههههــ
تبي الجد؟
والله البنت الظاهر أنها تملك أسلوب اغرااااء خطير
يا شيخ أنا خقيت وأنا أقرأ هالبيت عجزت أصابعي تكتب .. أجل وشلون لو تقولها قدامي؟ والله لأنطرد من البيت
إقتباس
اثاريني عزّمت افاتحهم بالسالفه بس الظاهر راحت علي نومه من التعب وتركت اللاب توب مفتوح على صفحة موضوعي.. ولا هنا عروس ولاهم يحزنون
حسافة بس
كل ما حسينا الأمور بتزين .. تخرب في النهاية
قلت الحمد لله السلتوح الكبير والخروف العظيم بيهديه الله بعد الزواج ويترك دشرته لخليفته من بعده ( .....)
لكن للأسف خاب أملي ... وما زال للدشرة بقية
وتبقى الدشرة ما بقي هلالي الظهران
إقتباس
شوي سألني أبوي يقول: منهو "المشاغب" تعرفه انت؟ قلت: لا انا مااعرف الاعضاء.. المشاغب قوّم الله خشمه كاتب رد ينافي الاداب والذوق العام
ـهههههههههههههههههــ
يا حبي له أبووك
زين أنه قايل أنه رد بس ... زين ما قال ردود
متأكد أنه ما سمع بحارتنا ولا سمع باللاعب خالد التيماوي؟ <<< يا عيني على الرمزية
لأنه لو سمع فيهم .. عز الله اللي بأطيح من عينه للأبد
بس موب أنا بس .. بيطيح من عينه معي الأمرد حمودة راعي الدودة وعلي وعلى أعدائي
إقتباس
2- اذا جيت تبي تعرس فاطبخه على نار هاديه.. حتى لاتنحرق الطبخه او ماتستوي او حتى يزيد ملحها
وين أهلي يشوفون كلامك ويفكوني من فلانة وعلانة ما أبي أتزوج الحين
إقتباس
5- بالله وش استفدتم يوم قريتوا هالموضوع؟ والله انكم مخفات << ماله خوي
خخخخخخخخخخخخخخخــ
يلعن أم النذالة المشتركة بيننا
ويلوموني فيك أنت وبذاءتك ونذالتك وملحك وخفة دمك
ربي لا يحرمني منك
ولا تدري؟
عادي .. يحرمني منك .. مصيري أنساك مثل ما نسيت غيرك
إقتباس
واللي بينحاش بفك عليه المشاغب وانتم تعرفون المشاغب الله يكفيكم الشر..
اتعب انا مع سباستيان فاذر وين الناس ياراقل يعني نسحبك تسحيب علشان تجي حياك الله وتو ما نور المنتدى اليوم وانا داخل اشوف المجلس منور واقول وش ذا النور صار نورك يالظهراني --> نصبات ابو مقبل
إقتباس
ياحبيبي ياحبيبي لاجراك ولا معسل ×× الشفايف لك جراك والبراطم لي معسل
هذا شسمه تعرفه ايه هذا معسل شفايف شسمه هذا ---> انلخم مع الحيا
إقتباس
5- بالله وش استفدتم يوم قريتوا هالموضوع؟ والله انكم مخفات << ماله خوي
والله الشرهه مهيب عليك علينا يوم نقرا لك طس جعلك ما تتزوج إلا بكر تلاعبها وتلاعبك ---> وكل واحد وتفكيره يمكن حبشه !! موضوع رائع كعادتك مليء بالسخريه الاذعه مليء بالالفاظ السوقيه كعادتك ايضا اسقاطات رهيبه كأسقاط معسل البراطم هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه هههههههههههههههههههه الله يرجك قل امين
**
لا عمرك تقاطع تراك غالي وكثر من هالمواضيع لا العن الطيب في ابليسك ---> ما كنه يمون
قلت: أبسمع صوتي هو أحلى في الراديو ولا في التليفون.. قالت: صوتك يهبببببل.. قلت: وانتي أهبل..
هههههههههههههههههههههههههـ قسم انك كفووو.. عاد ذي المذيعه تحس انها تكرونيه مسترجله<<<بس ما تشجع روما
إقتباس
الا ان هذا الشوق الجارف العرمرم اصطدم بتأخير الرحلة كعادة الخطوط المبجله
تصدق رحمتك.. اكيد انك قلت في نفسك.....الله واعلم الماما وش طابخه لي اليوم.. عوايدهم وانا خوك...ومفروض نستغرب اذا اقلعت طايره في وقتها..<<يعني اني جاد
إقتباس
واذا جاء وقت الشوفه وشافها قال: ايه هذي اللي ابي .. تراني ماأخق بسرعه .. هذا اللي عندي يمه وكان الله مع المحسنين..
خخخخخخخخخخخخخخخخخـ ايه صادق ... خقيت مع صوت ما تبي تخق مع الكولا...
إقتباس
هواياتي فيها ..مره سجلت بمنتدى قبل 3 سنين وعبيت خانة الهوايات كالتالي: التحجير لأي واحد يبي يتجاوز من اليمين في الدايري الشرقي.. السكيتينق.. مراسلة الفتيات.. أحلام اليقظه.. ممارسة التنفس الاصطناعي..
ابي اعرف من اللي يفرفر بيوز الاستوديو... شكله يشجع البرشا وماله نفس ينزل الاهداف...
اخوي هلالي الظهران.. مبدع مبدع عليك اسم الله.. اسلوبك في غاية الجمال...اتمنى ان لا تقاطع المجلس مرة ثانيه واتمنى من الاكثار من هذي المواضيع اللي فيها شفايف وبراطم..
هلابك أخوي هلالي الظهران مرة ثانيه ورده << لاياشيخ مو كانك راعي الموضوع يوم تهلل وترحب
إقتباس
السلام عليكم أجمعين.. عازبين وعانسين..
شلونكم يالربع؟ وشلون الدنيا معكم؟!
وعليكم السلام ورحمة الله وبركاته احنا بخير يمال الخير .. وش عليك من الدنيا يوم تسأل عنها شكلها مسويه فيك منكح ملعون جدف
إقتباس
قلت: أبسمع صوتي هو أحلى في الراديو ولا في التليفون.. قالت: صوتك يهبببببل.. قلت: وانتي أهبل..
ــهههههههههههههههههههههههــ الله يعينها عليك عااد على هالصبح محدن رايق لك وبعدين من ويلك كل هالوقت يومنك تدق عليهم يااخي ودي لو مرة اسمع صوتي بالراديو زهقت من تسجيل صوتي بمسجل الجوال
إقتباس
اصلا راحت عليها من عقب ريما يالبى صوتها
ايييه ماتنلام مو انت لحالك الشيبان على هالصبحيه ساحبين على ابو مندوب إذاعة الرياض وتلقاهم مغيرين الموجة على الأف ام كله لعيون هالريما لكن اتوقع والعهده عالراوي إنها تكرونيه دائماً الأصوات الحلووة لايملكها إلا التكارنة
إقتباس
وخلفي مجموعة من العلوج الكفرة تقول كنهم بالعين مسجلات! وهؤلاء حشوا فينا وفي بلدنا الين دخت(لاتقولوا يتصنت هذول كفار مافيها شي)..
بخخخخخخخخخخخخخخخ لالا مافيها شي كمل حنا معك
إقتباس
وعن يميني بنقالي غلبه النعاس وترك العنان لفمه حتى حامت نفسي من رائحة الخياس.. وعن يساري آآآه ياقلبي وحده قرفانه مثلي.. معها زوجها سافهها وجالس يلعب سوليتير بجواله!! لكن ما أن رآني وحيدا الا وقد شبك يده بيدها واخذ يوشوشها نكايةً فيني..
ــهههههههههههههههههههــ طيب كان شبكت يدك بيد البنقالي وقعدت توشوش له نكاية بالرجال وحرمته بخخخخخخخخخخخخخخ
إقتباس
وياحبذا تكون من رواد محلات الهرم علشان ماتخسرني واجد ونستثني من هالقاعده ماركات نعومي وليسانزا وماكان في حكمها..
أيا البخيل ورى ماتكملها وتسدح محلات كل شي بريالين
إقتباس
لو تركت لك الخيار كان زوجتيني بنت حسن كراني
ــههههههههههههههههههههههههــ أحسن لك عشان يكون مهرها كتااب جغرافيا وخريطة للعالم الأسلامي
إقتباس
التحجير لأي واحد يبي يتجاوز من اليمين في الدايري الشرقي.. السكيتينق.. مراسلة الفتيات.. أحلام اليقظه.. ممارسة التنفس الاصطناعي..
طييب ابي اسألك التنفس الصناعي تمارسه مع أي كائن حي أو لأصناف محددة
إقتباس
قلت بكل حياء: يمه خلاص!! السكوت علامة الرضا
كل هالطلبات وتقوولي حياء ياشيخ اقص يدي إذا مو وقتها ماكنت مولع الرأس وماسك لي المعسل
إقتباس
لا تحسبنَّ الكـيـفَ ليــاً تمزمزه ×× لن تبلغ الكيفَ حتى تضرب الحجرا فالكيفُ مجدٌ كمن عمّرَ ناطحةً ×× ولـيس كــمن أراد تسـلق الشـجـرا
صح لسااانك اييه كذا طلعت هلالي الظهران اللي نعرفه
مو تقوولي حياء وماني عارف ايش
إقتباس
ياحبيبي ياحبيبي لاجراك ولا معسل ×× الشفايف لك جراك والبراطم لي معسل
صح لسانها انت متأكد إنها هي اللي قالته مو إلهام شاهين انشهد إنها راعية وااجب
إقتباس
- اذا جيت تبي تعرس فاطبخه على نار هاديه.. حتى لاتنحرق الطبخه او ماتستوي او حتى يزيد ملحها..
احسب 5 سنوات قدام عالزواج وعسانا
نلقى شي سنع ويبيض الوجه ويدسم الشارب
إقتباس
4- الله يعينكم ياأهل السعوديه باستثناء الشرقيه على غثا رنا القاسم..
يارجاال إن سمعت طاريها بالأف ام حولت على إذاعة
الرياض والأستمتاع ببثارة أبو حديجان
إقتباس
- بالله وش استفدتم يوم قريتوا هالموضوع؟ والله انكم مخفات << ماله خوي
ماستفدنا شي زي العاادة
نضيع وقت بمواضيعك اللي لو إني من وزير الأعلام كان بلغت الهيئة عشان يصادرونها مثل ماصادروا مواضيع غيرك لما تحمله من حث على الفتنة والفجور
هلالي الظهران تعبتنا معك الله يصلحك أعتقد إن هالموضوع يعتبر أقصر موضوع لك لو قارناه بمواضيعك السابقة
موضوع رائع جداً ولاتحرمنا من هالأبداااع ورده وأضم صوتي لصوت أخونا المشاغب وتستحق من يصكك بوسام وإلا لقب وإلاكنية المهم شي يدسم شاربك
يالقطووع ما تستحي على وجهك انت أحب كتاباتك وش أسوي
الا على طاري رنا القاسم اذكر واحد منهبل فيها كل يوم يتصل ويهديلها قصيدة ولك تحية من القصيم للرياض تاصلك ومدري ايش واخرتها يقول اسمي "طوني" ههههههههههههـ أي طوني بس أبصم بالعشرة ان ما كان اسمه شليويح خوي عبيط ما غيره ولا احلى شي مرة كان السؤال بالحلقة ماذا تتمنى وو طبعا طوني ماغيره ساحب على ام السؤال وطاق حنك معها طفشت منه قالتله طيب انت ايش تتمنى بحياتك قال أمنيتي أصير محلل نفسي واجتماعي ردت عليه " عشان تعالج مين فينا ؟؟ " ههههههههههههههههههههههههـ شليويح انبسط زيادة وكمل فلسفته قال ليه حنا يا رنا دايما نظرتنا للي يروح لمعالج نفسي انه مجنون
قال المفروض الواحد يروح يفضفض و و و وآخرتها كرشته قالت وقت البرنامج بيخلص والأخ منسجم فـ كلامه وما سمع الا الطوط طوط
بس خل عنك فلسفة خديجة الوعل مافي مثلها تسوي من الخبر قصة للساعة الاولى والثانية والثالثة ماعندها أي مشكلة
إقتباس
اصلا راحت عليها من عقب ريما يالبى صوتها..
من ريما ؟ وتجي الساعة كم ؟
إقتباس
لم أيأس فمطارتنا الشاهقة بها من المعالم مايأسر الألباب ومن المقاعد مايكفي لمرتاديها
ايه والله كراسيها مافي مثلها تكسر الظهر كيف أسرت لبك مدري !
إقتباس
لكن ما أن رآني وحيدا الا وقد شبك يده بيدها واخذ يوشوشها نكايةً فيني..
وانت يا عيني مظلوم فـ كل شي يبي يقهرك اجل شكله مرة من المرات كان فـ نفس مكانك وحالتك واحد سواها فيه ماقد سمعت بالكبت انت ؟
إقتباس
يالله رح دور لك مقعد فاضي لان مقعدك جالسين عليه عايله..
ههههههههههههههـ لأ فـ هذي من جد رحمتك
إقتباس
بانبعاثات سامه كانت محفزة للتفكير
قصدك محفزة لاستعمال الكيس البني
إقتباس
هيه انت وياه المقصود بـ ورع هنا هو الورَع المأخوذ من التقوى..ومنفتح يعني مثقف)..
وانا اقول من وين جايب هالحس الفكاهي الله يحفظها لك قل آمين وتختارلك فتاة الأحلام
إقتباس
وياحبذا تكون من رواد محلات الهرم علشان ماتخسرني واجد ونستثني من هالقاعده ماركات نعومي وليسانزا وماكان في حكمها..
ههههههههههههههههههههههههههههههههههههههـ أجل الهرم يا بخيل اما مع نعومي معك حق
إقتباس
تقول: فكنا منها المغروره.. تعرف وقتها انهم متطاقين,,
وجع شايفة نفسها على ايش مدري
إقتباس
مره سجلت بمنتدى قبل 3 سنين وعبيت خانة الهوايات كالتالي: التحجير لأي واحد يبي يتجاوز من اليمين في الدايري الشرقي.. السكيتينق.. مراسلة الفتيات.. أحلام اليقظه.. ممارسة التنفس الاصطناعي..
ههههههههههههههههههههههههههههههه الحمدلله طلع تفكيرك منفتح اكثر مب زي بعض الناس يقولك جمع الطوابع واذا تطور هوايته التعارف عن طريق مجلة ماجد
ياجعلك تطيح ببنغالي وتسويله تنفس اصطناعي عشان تعرف ان الله حق
إقتباس
جلست قد كذا "." وطلعت ..
مايمدييني ع ـالوصف يا مؤدب يا أمور
إقتباس
طالعت في أم البنت وابتسمت ابتسامه صفراء وخذيت القهوه حقها ( ماقلتلكم ياحليلي اذا حقدت على احد).. وعطيت أمي غمزه..
إقتباس
فقلت لها: تعرفين منصور البلوي..شالوه!
يقطع أبو افكارك اجل ذي سالفة بتكسر الجليد يعني
إقتباس
قالت: ههه ههههه أجل غزال عند المحطه!! قلت وانا ارتشف العصير: مهوب أي محطه.. المحطه اللي عند الخط
شكلك شايف فيلم ايس كيوب يوم صدم غزال بالاسكاليد عند المحطة ومو اي محطة اللي عند الخط
إقتباس
ياحبيبي ياحبيبي لاجراك ولا معسل ×× الشفايف لك جراك والبراطم لي معسل
أدوووووووخ مع الرومنسية
.
.
.
أبو سيباستيان خلاااص تعبت مب هذاك التعب لا قصدي من الرد اعذرني وان ماتبي تعذرني بكيفك
وتعبنا وحنا نقول لا تقطع وانا أؤيد كلام المشاغب عطوه اسم ولا صبغة عشان يستحي ويحس بتأنيب الضمير هذا ان كان يسمع لضميره
اما كفاااااار ههههههههههههههههههههههههههههههههههههههههههههههههههههههههه
إقتباس
من يومك صغير وانت انسان ورع ومنفتح (هيه انت وياه المقصود بـ ورع هنا هو الورَع المأخوذ من التقوى..ومنفتح يعني مثقف).
هههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههههههههههههههههههههه
زين انك فسرت الكلام خوفي يجيك واحد مدرعم ويقول قفلوا الموضوع
ومن بكره ما ندخل الزعيم الا ببروكسي
إقتباس
وياحبذا تكون من رواد محلات الهرم علشان ماتخسرني واجد ونستثني من هالقاعده ماركات نعومي وليسانزا وماكان في حكمها
لا عز الله قفلوا المنتدى بكبره هههههههههههههههههههههههههههههههههههههههه !!
هلالي تكفى دبر لنا من الحين كم بروكسي !!
إقتباس
وعقب ماخلصت تقليب طلعت من جيبي صوره لــ "اشوريا راي"
إقتباس
قالت: طيب يالثور وش هواياتك؟ قلت: والله الوهقه ياهالسؤال.. المره الوحيده اللي عرفت هواياتي فيها ..مره سجلت بمنتدى قبل 3 سنين وعبيت خانة الهوايات كالتالي: التحجير لأي واحد يبي يتجاوز من اليمين في الدايري الشرقي.. السكيتينق.. مراسلة الفتيات.. أحلام اليقظه.. ممارسة التنفس الاصطناعي..
وش جايك نعنبوا ابليسك اليوم بثك على القمر الاوروبي ههههههههههههههههههههههههههههه ؟؟
اما التنفس الاصطناعي
إقتباس
غسلت وجهي ورحت للصاله.. وألقى أبوي جالس يقرا الجريده ويناظرني بعين وهو كاتم الضحكه ويقول لي: هلا بالظهراني..>> انلخم .. استحيت وماقدرت احط عيني بعينه << ناتفه بكم ذبه في ذاك الموضوع.. شوي سألني أبوي يقول: منهو "المشاغب" تعرفه انت؟ قلت: لا انا مااعرف الاعضاء.. المشاغب قوّم الله خشمه كاتب رد ينافي الاداب والذوق العام.. بس اذا تبون الصدق والله ابوي رهيب وعن ألف رجال<< خايف يطيح الموضوع بيده..
هلالي الظهران الله يخرب بيت عدوك ..
لا تحرمنا هالطلة ..
ولو قطعت لا تخاف محنب مكوشين ولا مسجلين عليك شي .. نبي نخليك تاخذ راحتك ..
ومن المنبر هذا احب اسلم على ابوك واقوله الله يخلف عليك باللي يعوضك عن الخبل هذا
والله لو أقرأ موضوعك بيقولي الدكتور الجملة التالية :
" التحضير إنتهى تبي تدخل تستفيد بس ما أحضرك ولا اطلع "
وانت عارف زحمة الرياض ما شاء الله + مواضيعك القصيرة
لي عودة <<< وراه ما قلت هالكلمتين وخلصتنا
.....................
عدنا
أثر الواحد إذا تخرج تبدأ أفكار الزواج تراوده
عقبال ما تطبخ الطبخة صح وتتزوج
إقتباس
مادريت الا والخط يطنطن.. خلها تستاهل ليه تعيّ علي.. اصلا راحت عليها من عقب ريما يالبى صوتها..ما أتأخر كل يوم عن الدوام الابسببها .. خصوصا اذا قالت "برضو" يوووووووووووه والله اني اذا سمعتها اغوص بالمقعد..و شوي واحول جنب الفرامل
هــلالــي الــظـهــران : ملك القلم الساخر , أي إبداعٍ هذا ؟! , وأي قلب تحمله فيدعك تغيب عنا وتحرمنا من بنات أفكارك ؟! ونقائها ! , أخي لا أملك أمام إبداعك إلا أن أرفع لك الطاقية الشخال التي أستخدمها أحياناً لتقيني من حرارة البريق ( بيز ) ,
كل الشكر والتقدير على ماجدت به علينا آملاً ( أن لا يطول غيابك ثم ناخذ عليه ) ,,,
000
إقتباس:
ياحبيبي ياحبيبي لاجراك ولا معسل ×× الشفايف لك جراك والبراطم لي معسل
وهذي مشاركة أدري إنه ماله داعي بس يدي تحكن إلا أحطه :
بعنوان (أنــسى !! )
تقول أنسى وأقول ياريت لو أقدر ..رغم طول النوى انسى
تقول انسى و أقول اللي شرب من عينيك الأحساس ماينسى
احبك يابعد هالقلب
ابا اتأسف وانا ماخطيت لاني بالفعل حبيت
انا سمعتني الأيام ياريتك تسمعي ياريت
صعب اصبر على الحرمان صعب انسى ولو لحظة
لاني عاشق وانسان كفاية قسوة العالم
تعالي انا محتاجلك دايما اقبالي
تعالي من ورا حزني تعالي من خيالي
وتقول أنسى
انا لفيت حتى تعبت الدنيا من أسفاري
ولا لقيت في عز الشتا مثلك دفى واخلاص
يا ناري..
نهاري والسهر انتي واحلام العمر انتي
ولو بان لي صوتك عرفت السر بسكوتك
انا عشقك وانا موتك وانا بعدك
تقول انسي
هلالي الظهران يقص شريط افتتاح مشروع تقديم "خدمة " الزواج لاخواتنا السعوديات!! (اهداء خاص لأمي) 
.. هو كذا دايم يحطمني شكله منقهر مني بس ماعليه اعرفه من زمان ويمون علي
.. حتى الربع في الاستراحه من زود ماني قطوع يسموني شركة الاتصالات من كثر ماني أقطّع في البلوت
..ما أتأخر كل يوم عن الدوام الابسببها .. خصوصا اذا قالت "برضو" يوووووووووووه والله اني اذا سمعتها اغوص بالمقعد..و شوي واحول جنب الفرامل
).. وحذرني من العبث بجوالي بغرض سدّ باب الذرائع المؤديه الى الترقيم!!
.. 
(هيه انت وياه المقصود بـ ورع هنا هو الورَع المأخوذ من التقوى
عشان كذا الله يعيننا بس على الاختيار بأنفسنا ..
هذا شسمه تعرفه 
<<يعني اني جاد
أحب كتاباتك وش أسوي 
الوضع العادي
