السلام عليكم

الأول : وش عندك تضحك ياخوي ... والله إني سمعت صوتك من عند اللفه هناك ... ترانا زهقانين هاليومين ... ضايقة صدورنا ... وندور الضحك ... علمني وش يضحكك ...؟؟؟
الثاني : أولا وعليكم السلام ياخوي ... بعدين كل عام وأنت بخير بهالسنة الجديده ... الله يخليها سنه سعادة وأفراح
بعدين ... مسألة إني أضحك ... أبد زي ما تشوف ... أقرأ الجزيره ... وأضحك ...؟؟؟

الأول : إلا هاذي ياخوي ... إلا الجزيرة ... تراني أعزها ... وهي صحيفتي المفضله ... ؟؟؟
الثاني : لا يا خوي تراك رحت بعيد ... أنا ما أقول فيها شيء ... هي بعد جريدتي المفضله ... وفيها كتاب كبار ... لهم وزنهم ومكانتهم وقدرهم ... وكلنا نفتخر فيهم ... ونحترمهم ... الله يحفظهم ... لكن تراك رحت بعيد ...؟؟؟

الأول : أجل وش يضحك يا خوي ... الكاريكاتير ؟؟؟
الثاني : لا والله ... فيه عندهم كاتب نصراوي ... قاعد أقرأ مقالته ... وأضحك ... الله يهديه ... بين إنه إنسان طيب ومحترم ... لكن كتاباته دايم عن الهلال ... ما هوب راضي عنهم ... مثل عادة النصراويين ... يخافون يكتبون عن فريقهم ... يقومون يتكلمون في الهلال ... ما يدري وش يقول ... أظن عنده عقده ... من هالأزرق ؟؟؟

الأول : أوووووه ... كاتب نصراوي ... كثر منها ... هذولا مشجعين ... ماهم كتاب ... المهم وش قال ... ؟؟؟
الثاني : يقول إن الهلاليين ... هاجموا النصر ... ومنسوبيه ... وإتهموهم ... أنهم سبب خروجهم من كأس العرب ... ؟؟؟

الأول : وشو ... وشو ... تكفى ياخوي ... النصراويين ... يدورن أي شيء ... يحكون فيه ... يا حبهم للترزز ...؟؟؟
الثاني : المشكله إن عنوان عموده (الحقيقه)

الأول : وش حقيقته ... هو فيه حقيقه هالأيام ... ضعنا بالطوشه ... ما عاد نعرف وين الحقيقة ...؟؟؟ .. المهم خلنا في هالمحرر ... وش قال بعد ...؟؟؟
الثاني : يقول الهلاليين ساقوا التهم على النصر والنسبة المئوية ... ولا تجرؤا على انتقاد الإدارة وسياستها الخاطئة ...؟؟؟

الأول : بعد صاروا يحكون بالسياسه ... الله اكبر ... عشنا وشفنا ... وش يقول بعد ....؟؟؟
الثاني : يقول إن الهلال ما كان مقنع لمحبيه المخلصين .... وإنهم ما يرضون إنه يقحم اسم النصر للتضليل على الخسارة ... ومن الواجب عليهم الابتعاد عن مثل هذه الأمور ... ومناقشة سقوط الفريق وفق منهجيه واضحه وسليمه ... ؟؟؟

الأول : هه هه هه ها ها ها هه هه هه ها اه يا قلبي ... تقطع من الضحك ... الله يقطع شيطانك ... صحيح هالحكي مكتوب ... ؟؟؟
الثاني : ايوالله شف الجريده ... عشنا وشفنا ...؟؟؟

الأول : ايوالله عشنا وشفنا ... هالحين ما نفعوا ناديهم ... بهالمنهجيه اللي صارت همجيه ... جايين يعلمونا المنهجية الواضحه والسليمه ...؟؟؟
الثاني : أقول ... من شافك ياللي بالظلام تغمز ...؟؟؟

الأول : أقول ... تظن الرجال ييي شهره ... ولا وش عنده ...؟؟؟
الثاني : لا والله ... الرجال شكله محترم ... لكن لو يترك عنه هالتعصب ... وما يكتب عن الهلال ... ويكتب عن ناديه بس ... المشكله إن كل كلمه وكلمه قال الهلال ... الرجال عنده عقده هلاليه ... هذي عاده كتاب النصر ... ما يدرون وش يبون ... الله يهدينا وياهم ..:؟؟؟

الأول : تكفي ورني الجريده شوي
الثاني : لا ... إسمع بعد ... يقول تحت عنوان ...(مواقف يحفظها التاريخ) ... إسمع ... إسمع ...؟؟؟
يقول عدم السماح لمحمد سعد انه يلعب نهائي كأس الملك عام 1387 هـ

الأول : يا خوي أمي ما بعد جابتني ذاك الوقت ... وش هالغبار اللي طلع ...؟؟؟
الثاني : ويقول بعد ... السماح بإنتقال سعيد غراب للنادي الأهلي بعد قرار العفو عنه ...؟؟؟
الرجال يتكلم بعد دورة الخليج الأولى ... الرجال وينه فيه ... وبعدين غراب أصلا إتحادي ... أجل وش يقول في الهلال اللي أخذو منه سته لاعبين ونقلوهم للأهلي ذاك الوقت ... هاه ...؟؟؟

الأول : والله ياخوي أنا ما لحقت على كورة (طقها وإلحقها حقتكم ) ... بعد وش يقول ..؟؟؟
الثاني : يقول رفض قيد سمير عبد الشكور للنصر ... وإعتماد تسجيله للوحده ... ؟؟؟
الظاهر يا خوي ... الرجال ما لقى شيء ... قام يجتر التاريخ ... مع إن التاريخ يدينه ...

الأول : وشلون يدينه ...؟؟؟
الثاني : أنت ما قريت وش كتب حبيبنا ...لكاتب الكبير تركي السديري ... قبل كم سنه في المسائيه ...؟؟؟

الأول : وش كتب ...؟؟؟
الثاني : يومنهم يحطون خطاب رئيس النصر ذاك الوقت ... أبو ماجد عبدالله ... لرئيس الهلال (إبن سعيد) ... الله يطول بعمره ... يقول فيها ... إن النصر رازين صورة الهلال في الإدارة يفتخرون فيها... علشانه أخذ كاس الملك عام 1381هـ ... ويبون سلفه قام إبن سعيد ... وعطاهم ميتين ريال ... يمشون أمورهم ... ويقول بعد إن نادي النصر قام أساسا على باطل ... وصعد للدرجه الأولى بعد مسرحيه مضحكه ... صكوا باب معسكر فريق أظنه (المريخ) ... كان معسكر في مقره بشارع العطايف ... وصكوا بابه بتريله ... وأي واحد يطلع يطقونه ... ولا قدروا يروحون للمباراة ... وإعتبروهم منسحبين ... وبعدين صعد النصر للدرجة الأولى ... بعد ما كان مهزوم في المباراة الأولى اللي ألغوها ... وقرروا إعادتها ... ؟؟؟

الأول : أنت تقوله صادق ...؟؟؟
الثاني : ايوالله ... هذا تاريخهم ... وإسأل القدامى ... يعلمونك ...؟؟؟

الأول : وبعد وش يقول ... هالصحفي ...؟؟؟
الثاني : يقول إختيار (9) لاعبين من النصر عام 1408 هـ ... وبعد نهاية الدور الأول بعد ما كان النصر متصدر ... ؟؟؟

الأول : إيه ... قصده ... يوم جازع ... الله يذكره بالخير ... يبطهم بقولين ... ياخوي ... هذيك أيام (عمر أبو راس) ... لكنهم كانوا ماخذين من الهلال (8) لاعبين ... وبعدين ... كان الفرق بين الهلال والنصر ... نقطه وحده بس ... ؟؟؟
الثاني : عاد وش تقول ... أجل وش نقول حنا ... اللي كل سنه ياخذون مننا (8) لاعبين أو أكثر ... والا هذا شيء طبيعي ... ؟؟؟

الأول : ايوالله ... الموضوع يضحك ... بعد وش كتب ...؟؟؟
الثاني : إلغاء عقد المهاجم عبيد الدوسري وإعادته للوحدة رغم انه انتقل بموافقته وبمباركة رئيس الوحدة والنصر!!
وإعادة حسن العتيبي للهلال وإلغاء جميع العقود والاتفاقات التي تم التوقيع عليها بين العتيبي ونادي النصر!!

الأول : صدق ياخوي ... النصراويين ... ما يشوفون بغير عين وحده بس ... هالحين هو يتكلم بالتاريخ ... إسأله وشلون سجلوا المطلق ... وشلون غيروا النظام علشان ياخذون لعيبة الأندية الثانيه ... ياخوي لو تكلمنا بتاريخهم ... ما وسعت له هالمنتديات ... خلهم هالحين يسددون الديون اللي عليهم ... حقة اللاعبين اللي أخذوهم وعتزلوا ... ؟؟؟
الثاني : توك بعد ما قريت شيء

الأول : وشو بعد وش كتب ... الله يرضى عليك ...؟؟؟
الثاني : حفظ احتجاج النصر ضد مهاجم الاتحاد اسماعيل حكمي عام (1406) ووقتها كانت فرق الهلال والاتحاد والنصر والوحدة تتنافس على الحصول على درع الدوري.

الأول : ياخوي ... هذا وراه ما هوب يحكي ... الا قبل 20 سنه ...
الثاني : لا ويقول بعد ... هذا قليل من كثير دفع النصر ثمناً لها عبر تاريخه الطويل فهل يتم انصافه وإعطاؤه حقه الذي يطالب به أم يستمر في دفع ا لثمن الباهظ .

الأول : أف أف أف ... يطلب إنصافه ... وإعطاءه حقه بعد ... ها ها ها ها هاه اه ..آه ... تقطع قلبي من الضحك ... الله يقطع شيطانك ... ورني الجريده تكفي ... هالمقاله ...أبحطها في برواز
الثاني : توك كا بعد شفت شيء

الأول : تكفى عاد ... فيه زياده بعد ...؟؟؟
الثاني : إيه يقول تحت محطات ساخنه ...؟؟؟
في حالة حصول النصر على فريق القرن الآسيوي فإن ابن همام ستكون له قرابة أسرية بميزر أمان وناصر كرداش!!

الأول : فريق القرن ... كثر منها ... هالحين ماخذين بطوله وحده ... وبفارق هدف ... سجلوه بأرض الخصم ... ويبي بطولة القرن ... وبعدين منهم ... ميزر أمان وناصر كرداش ...

الثاني : ياخوي هذولا لاعبين للنصر يومنه درجه ثانيه ... يعني أكثر من 30 سنه ...؟؟؟

الأول : أوه ... إثر الرجال قديم ... وش يقول بعد ..؟؟؟
الثاني : إسمع إسمع ... يقول ... ذهب ماجد المولد للهلال من فريقه السابق الوحدة وبدون مقابل ومع هذا لم نسمع أصوات الوحداويين التي تنادي ببقائه وحفظ حقوق ناديه المادية كما فعلوا عند انتقال عبيد للنصر قبل عدة سنوات.

الأول : ياخوي هذا مسيكين ... خلهم يعطون الهلال والنجمه فلوسهم هالحين ...؟؟؟

الثاني : لا .. إسمع بعد وشهو كاتب ...
بعض الألقاب تعطى بدون حق مثل فارس الدهناء وهو يصارع على الهبوط والليث الذي يخاف ولايخوّف!!

الأول : ها ها ها ها ها ها بس ياخوي بس لا عاد يجي شيء ... هالحين الشباب في هالسبع سنوات اللي غاب فيها فريقه ... جاب الشباب أكثر من سبع بطولات ... ولعام الماضي بطل آسيا ... ياخوي وراه ما يتكلم عن فريقه بس ...؟؟؟

الثاني : تلومني يوم أضحك...؟؟؟

الأول : لا والله ما عليك لوم ... صراحه ... الله يخلي الجزيره ... اللي وسعت صدورنا
الثاني : ايوالله ... الله يخليها ... ما لنا عنها غناة

وتقبلوا تحيات أخوكم ... أزرق هلالي

اخوي ازرق هلالي.
مصدق ان هذا هو اليكتب مقالاته يكتبها له الرمز الله يحيك وذا اتحداه يجمع كلمتين على بعض .ولو كتب له احد مقال وماشفه الرمز والله ان يكفخه على وجه.
وصدقني هذا هو الصحيح

الرمز حقهم مايرضى شيء ينكتب عن النصر اللا لازم يمر عليه لأجل اضافة بعض التحسينات عليها وبعد ذلك يختم عليها للمرور .... وياويله وياسوادليله اللي يكتب من اكتاب النثراويين من غير ما يجمرك .

ومشكور يا ازرق يا هلالي على المجهود الطيب