اللي سألوا عني الله يجزاهم خير دايم مغطيني بكرم أخلاقهم وحسن تعاملهم الله يخليهم لعين ترجيهم ورده ,,,
بادئ ذي بدء << من أولها مصاله
يقولون ... ولّم العصابه قبل الفلقه و تغدى فيهم قبل لا يتعشون فيك وبعد ... قابل الهواش بالهواش تسلم
الحين يوم أن الواحد لاغاب قمتوا وقلبتوا المنتدى فوق تحت تعيينات جديدة ... ومباريات ... وتميز ... واستضافات ورده... وترقيات ...
يعني ماتحلى لكم إلا بالعطل بس وباقي الأيام نايمين طيب وش ذنب الضعوف اللي مسافرين ومحد جاب لهم خبر
طيب على الأقل بشويش مب كلهن مع بعض عشان يمدي الواحد يلحق على شي بس ماش قليلين خاتمه
الحمد لله خلصنا المقدمة << امحق مقدمة
في نفس هاليوم الخميس من الأسبوع الماضي الساعه الرابعة من فجر الجمعة << أبوك يالدقة في بيت أخوالي الكائن في حي طووووووووط شرق الرياض<< بتجيب العيد كنا قاعدين بجلسه عائليه وش حليلنا اللي ماسك لابتوبه واللي يتفرج على التي في واللي يسولف مع الثاني كنت أنا من اللي يطقطقون على الابتوب اشيك على الإيميل وكنت عادي خاشه معهم بالسوالف
فجأة
جتنا وحده من أخواتي متروعه تقول شكله فيه سرقه صارت لوحدة من سيارات أخوالي لأن واحد من أخوالي توه جاي من الإستراحه ودخلته للبيت مب طبيعيه وسمعته يقول انسرقت سيارتك بس ماتدري أي واحد منهم
طبعاً حنا انهبلنا ونزلنا كلنا نشوف وش السالفه وحنا نتحيسب ربنا أنا قلت أكيد أنها سيارة خالو الجديده توها مابعد كملت اسبوعين معه حتى مابعد ركبتها << هذا اللي همها وأختي تقول الظاهر سيارة واحد ثاني من أخوالي
يوم نزلنا ويصدق توقعي حسبنا الله ونعم الوكيل سرق كفرين مع الجنوط للكفرات اللي من جهة باب الفلة طبعاً خالي صاحب السيارة مصدوم مرة ومابعد استوعب السالفه وشكله ينرحم مرة ياعميري يوم يعلمه خالي كان نايم بفراشه ولا صدق كلامه وانقلب مع الجهة الثانيه وعطاه ظهرة يحسبه يمزح
يقول لي المشكلة أني اليوم بالوكالة رايح اشتري صواميل الأمان حقات الكفرات لأن السرقات كاثرة هاليومين بس لقيتهن مخلصات
طبعاً ماخلينا دعاء مادعيناه عليهم الله يشل ايدينهم يارب
قعدنا نهوّن عليه ونذكره يقول اللهم أجرني في مصيبتي و اخلفني خيراً منها وقعدوا يتناقشون معه ليش يحط سيارته بموقع سهّل عليهم السرقة >> طبعاً بتقولون ليش ماحطها بالقراش وبقول لكم أنهم مابعد وصلوله الكهرب عقب ماحاسوه ووسعوه ومتعيجز ينزل من السيارة ويرفعه ويركب السيارة ويدخلها وعقب ينزله >> ان شاء الله فهمتوا علي
واللي يقولون بلغ الشرطه ... واللي يقولون مهوب فايدينكم وعلى هالكلام
>>> كل هالأمور صايرة وحنا يالحريمات أووه قصدي يالحرمّا اللي هي مشرعين باب الفله وقاعدين نتابع المستجدات << ماهنا حيا
المهم ركبوا لها كفر الاستبنه وكفر من سيارة بالقراش ودخلوها بالقراش << بعد ايش
جا واحد من أخوالي من برى بعد هالحوسه ويوم سمع بالسالفه هاوشهم ليش مابلغوا ... دق بتلفونه وبلغ على طول وهم يتناقشون شافوا سيارة من بعيد وشكوا أنهم هم اللي سارقين لأن الرافعه اللي رافعين فيها السيارة نفس نوع السيارة وعلى طول ركب خالي (( اللي بلغ )) سيارته وقعد يتابعهم طبعاً هم مطفين النور ولا قدر خالي يقز لوحتهم ويوم حسوا أن خالي يتابعهم فحطوا ذيك الفحطه ومغير لفلفه بالحارة
حنا كنا بالحوش نسولف ومادرينا إلا ذيك البواري اللي من بعيد طمر خالي وفتح الباب ولاه خالو اللي يلاحقهم شاخط من باب البيت ويبيهم يساندونه ركب سيارته ووراهم
وحنا مغير ندعي ربنا لا يصير فيهم شي من المطارد الله يستر
نقزنا حنا يالبنات لواحد من أخوالي راح لغرفته بعد ما هدت السالفه وقلنا قم رح مع أخوانك وش تحتري لقط مفتاحه ونقز معهم يفزع
بعد كم دقيقة وحنا على أعصابنا خايفين عليهم نشوف أنوار دوريه من ورى الباب راحوا العيال الصغار وفتحوا الباب ... صاروا أخوالي كلهم ومعهم الدوريه يقولون له السالفه طبعاً اللي كانوا يلاحقونه هج منهم ولا قدروا يتبعونه يقولون أنه يسحب جلنط ويلف وهم مايقدرون لأن سياراتهم ماتسوي هالشي << ماتفهم بهالأمور في هالأثناء مرت من عندهم سيارة وشكلها شبهه وشك خالي فيها وقال للدوريه ألحقهم أكيد أنهم تبعهم وما عطاه وجه
المهم
أذن الفجر وراحوا يصلون ويوم جونا قالوا أن وحده من السيارات - نفس نوع سيارة خالي بس أقدم موديل (2007) - جمب المسجد مسروقه ثلاث كفرات منها ... وعافطين اللي تحت بالرافعه مدري وش تسمونه الظاهر الرفرف لا حول ولا قوة إلا بالله
بعد البحث والتحري عن سبب تركهم للكفر الرابع
اللي يقول أكيد صار بالشارع حركة وخافوا وهجوا ... واللي يقول يمكن أحد شافهم ...
بس طلع ماعندنا سالفه وصار الكفر الرابع مب جنط أصلي ( حديد ) عشان كذا مايبونه المشكلة مب هنا المشكلة أن هالسيارة المسروقه مب تبع الجار وصارت لواحد من أصحابه مسلفه أياها
المهم هدت الأمور ودخلنا جوا البيت ومغير نسولف وكلن حاط حيله بالدوريات وبرودهم وكن السرقه صارت شي عادي
بعد شوي
دخل خالي وهو يضحك ويقول فاتكم
وكلنا قلنا وشو
قال شفت السيارة الكامري وهي نفسها اللي مرت من عند الدوريه ومن شافني فحط وقعد يكبس لي حركه يمين وحركه يسار <<< اللي يفحطون بيعرفونها وماشفت إلا غباره
المصيبه ياجماعه
أنهم ناوين على كفرات سيارة خالي الأربعه كلهن بس شكلهم ماأمداهم وكشفناهم قبل لأن البلك مولم جمب البيت
والبليه بعد
أنهم وهم يسرقون الله يشل أيدينهم قولوا آمين أنواع الروقان قاعدين يدخنون ومابقوا ولا شي من زقارتهم ممزمزينها كلها ياجعلهم السل
بعد سوالف صلاة الجمعه اكتشفنا سرقه ست سيارات البارح مع سيارة خالو وكلهن في الحي نفسه وشايب الله يطول بعمره طالع يصلي الفجر ومادرى إلا اللي يسرقون سيارة ولده من قدام بيتهم << أنواع وساعه الوجه ومن شافوه تناقزوا وطاح كاب واحد منهم وركبوا سياراتهم وتصادموا مع بعض من الخبه وقدر ياخذ رقم وحده من السيارات بس من دون الأحرف << قهر وقال أنها من اللوحات الجديدة
دق واحد من أخوالي على الشرطه بيشوف وش صار ويعطيهم رقم اللوحه بس قالوا صعبه ومانقدر نطلعها <<< الحين السيارة ومعروفه ولونها معروف ورقمها معروف ومن اللوحات الجدد مابقى إلا الأحرف ويقولون صعبه والله أحسهم يستهبلون يعني من كثر اللوحات الجدد توها مابعد انتشرت كثير واتحدى بيطلع نفس الرقم لنفس نوع السيارة ولونها مرتين
في نفس المكالمه ذكر له الشرطي سالفه رجال شايل أهله بالسيارة وتجمهروا عليه شله شباب وحدوه الين خلوه يوقف وهجموا عليهم وهو مقفل بيبان سيارته كسروا القزاز وطلبوا جوالاتهم واللي معهم حسبنا الله ونعم الوكيل
** في هاليوم كان واضح تجمهر عدد من الدوريات بالشارع العام ...
الين هنا انتهى الفلم البوليسي وسافرنا راجعين لبيتنا ....
بس لحظه
تهقون وقفت على كذا !!!!
إيه هين
ومازال مسلسل السرقه مستمر بالحي وياقلب لاتحزن بوسط الأسبوع سرقوا سيارة نفس سيارة خالو هذا والبلاغات وش كثرها والمفروض مشددين على الأمن بس ماحولك أحد
1 / ضعف الوازع الديني من قبل السارق
2 / البطالة والفراغ ومحاكاة رفقة السوء
3 / غياب دور الرقابة من الأسرة
4 / غياب المسؤولية الاجتماعية وغياب الرقابة على محلات بيع قطع غيار السيارات المستعملة والتشليح وعدم تشديد العقوبات عليها وتهاونها في شراء القطع المستعملة دون التأكد من هوية بائعيها
5 / التهاون في العقوبة الصارمة فلابد من وجود لجنة قضائية تحكم على السارق بالسجن وتشهر به في الصحف وتكون عليه سابقة جنائية ويغرم غرامة مالية يدفعها " ليكون عبره لغيره "
6 /عدم تفاعل اجهزة الامن في هذا الموضوع حتى أصبح المواطن يتعامل مع المشكلة بطريقته الخاصة .. دون إبلاغ رجال الأمن بالمشكلة أو الواقعة.. وذلك للإحباط الذي يعيشه المواطن من اللامبالاة من المسئولين وأقسام الشرطة
* سرقة السيارات تمثل 14% من اجمالي الجرائم المسجلة في المدن السعوية * مرتكبي سرقة السيارات يقعون في الفئة العمرية بين 18_24سنة بالمرتبه الأولى وما بين 25 و31عاما في المرتبة الثانية. * أعلى نسبة لارتكاب جرائم سرقة السيارات كانت في محافظة جدة, تلتها منطقة الرياض وجاءت محافظة الدمام في المرتبة الثالثة ثم مكة وابها وتبوك والقصيم. * سجلت السعودية أعلى هوية مرتكبي سرقة السيارات بنسبة78% تلتها الجنسية اليمنية ثم التشادية والباكستانية ثم الجنسيتين الصومالية والسودانية
نعم..سرقه السيارات أصبحت ظاهره لدينا..والقائل بغير ذلك جانب الحقيقة ولكن طريقه تعامل المرور والشرطة مع هذه الظاهرة هو من أكبر أسباب إنتشارها !! نحن نعيش بفوضى عارمة من المرور وإهمال صارخ من الشرطة ..
عندما تتراخى الشرطة في وقف مسلسل سرقة السيارات فهذا يقود إلى مؤشر خطير هو أن هناك خلل ما .. وعندما يُبلِغ صاحب السيارة المسروقة عن سرقة سيارته يأتي الرد من رجال الشرطة بأنه بلاغ عادي ويتم التعامل معه بكل برود لأن هناك سرقات عديدة من هذا النوع فهذا أيضاَ ينم عن مؤشر خطر تجاه المحافظة على الأملاك وعلى الاستقرار العام. سرقة السيارات في بلادنا ليست حالة طارئة أو ظاهرة في طور النشوء بل حالة دائمة ولها تاريخ طويل تضر بسمعة المملكة في الداخل والخارج أما النظر لها كجريمة عادية وأنه سلوك صبياني وطيش مراهقين فهذه نظرة غير مسئولة وناقصة تجعل الناس يتشككون في كل ما حولهم ..
متى نشوف تنفيذ حد السارق ( قطع اليد ) ؟ بدون تنفيذ الحدود الشرعية لن تقف الجريمة وسوف تستمر.
انتهى ,,
قفلة أخيرة ...
اللي بيعرف كم عدد أخوالي من هالقصه الطويله العريضه له جائزة
عذراً على الإطاله بس فيني غبنه وقهر وحطيت الحرة هنا تحملوني عاد من زمان ماكتبت شي لاتحرموني ارائكم ورده
السلام عليكم ورحمة الله وبركاته
والله يا ليت السرقات وقفت على السيارات الحين حتى المحطات تنسرق ومساكين عمال الي في المحطه ينجلدون من الكفيل والله مساكين .اجل محطتين ورى بعض تنسرق خخخخ والله مهزله .
ويا الله يا رب لا توفق اللصوص والحراميه
وان شاء الله شرطتنا فيها الخير والبركه ويقدرون يقبظون على اللصوص <<< يحلم الولد
ويعطيك العافيه "فرصه ضايعه" وتسلم يدينك
كان الله بعون خالك , انا كذلك سُرقت سيارتي امام المسجد وانا متوقف لصلاة العشاء , وبعد عَناء البحث والتّبليغ وجدتها بعد مرور اسبوع مُهشمه ومُحطمه ومُحترقه !
اتمنى ان تكون هناك حلول من قبل الأمن هنا .
شكراً لكِ
ما ادري ليش لا صارت مشكلة لناس وانا عندهم.. احس اني أنا السبب بالله ما حسيتي بالذنب عند خوالك
الحمد لله على سلامة أخوالك وانها جت في الحديد << يحسبه حادث سيارة
لا أعتقد إني أقدر أضيف الكثير لموضوعك ختمتيه بالفوائد والدروس اللي ما تخلي الواحد يقدر يضيف شي عليها
على كل باذكر لك سالفة صارت لابوي قبل اكثر من 10 سنوات فيه واحد اختلس ابوي في هذيك الفترة مبلغا وقدره وابوي بلغ عليه وصار ابوي يتابع مع الشرطة أول بأول بعد فترة واحد من الضباط اللي نشب ابوي في حلقه قال له بالمختصر: يا خوي فكنا.. عندنا قضايا أمنية أهم من قضيتك هالكلام وما فيه ارهاب زي الحين
على كل نقول إن شاء الله إن الوضع يتحسن
..،
الله يعوض خالك أهم شي الحمد لله دامه هو خوالك كلهم بخير
نقول الله يهدي هالشباب يهديهم لما ينفعهم وينفع دينهم ووطنهم
..،
موضوع جميل أختي فرصة سرد لطيف لقصة حصلت.. واستخراج رائع للفوائد
اللي سألوا عني الله يجزاهم خير دايم مغطيني بكرم أخلاقهم وحسن تعاملهم الله يخليهم لعين ترجيهم ورده ,,,
. . إذا تبين الصدق . . ترانا ما جبنا خبرك . .
. .
إقتباس
في نفس هاليوم الخميس من الأسبوع الماضي الساعهالرابعة من فجر الجمعة << أبوك يالدقة
. . ما شاء الله عليكم . . وش مسهركم كلكم إلى الفجور . .
. .
إقتباس
في بيت أخوالي الكائن في حي طووووووووط شرق الرياض<< بتجيب العيد
. . ما يحتاج ( طووووووط ) . . واضح أنة يا بحي الربوة و لا الروابي
>> لأن هناك دايم تحصل السرقات !!
. .
إقتباس
يوم نزلنا ويصدق توقعي حسبنا الله ونعم الوكيل سرق كفرين مع الجنوط للكفرات اللي من جهة باب الفلة
أقول بس أحمدوا ربكم أنها جت على كفرين وكم جنط . .
. . أنا قلت أنسرقت السيارة كلها . . ولا قلت يمكن سرق أشياء خصوصية من داخل السيارة . .
مثل جوال أو لاب توب . . لاكن ما دام سرق إلا كفرين بس . . الله يحللة ويبيحة . .
>> هذا المستخدم يود أن ينجلد
. .
إقتباس
طبعاً خالي صاحب السيارة مصدوم مرة ومابعد استوعب السالفه وشكله ينرحم مرة ياعميري يوم يعلمه خالي كان نايم بفراشه
عاد إذا تبين الصدق . . والله ما ينلام خالك . . يعني حرام سيارة جديدة و ما لها إلا أسبوعين
وتنسرق . . . . صدق حسبي الله عليهم هالحرامية !!
. .
إقتباس
يقول لي المشكلة أني اليوم بالوكالة رايح اشتري صواميل الأمان حقات الكفرات لأن السرقات كاثرة هاليومين بس لقيتهن مخلصات
والله جبتيها يا فرصة . . فكرة إني أفتح محل لبع الصواميل تراها مهب شينة . .
خاصة بوجود هالشرطة إلي ما عندك أحد . . ووجود المجرمين بكثرة
. .
إقتباس
قعدنا نهوّن عليه ونذكره يقولاللهم أجرني في مصيبتي و اخلفني خيراً منها وقعدوا يتناقشون معه ليش يحط سيارته بموقع سهّل عليهم السرقة >> طبعاً بتقولون ليش ماحطها بالقراش وبقول لكم أنهم مابعد وصلوله الكهرب عقب ماحاسوه ووسعوه ومتعيجز ينزل من السيارة ويرفعه ويركب السيارة ويدخلها وعقب ينزله >> ان شاء الله فهمتوا علي
. . لا أبشرس إني فهمت . . بس بعد ما عدت الجملة ثلاث مرات . .
. . لكن في هذي الحالة ما تعتقدين أن بيت خوالك صار أسهل للسرقة . .
يعني بس أفتح القراش وادخل البيت و خذ ما تجود به نفسك !!
. .
إقتباس
وهم يتناقشون شافوا سيارة من بعيد وشكوا أنهم هم اللي سارقين لأن الرافعه اللي رافعين فيها السيارة نفس نوع السيارة
صدق من قال أن السارق دايمآ يحوم حول الجريمة . .
و أشوى أن خالك صار ذكي و لحقهم
. .
إقتباس
في هالأثناء مرت من عندهم سيارة وشكلها شبهه وشك خالي فيها وقال للدوريه ألحقهم أكيد أنهم تبعهم وما عطاه وجه
شكل خالك في ذاك الوقت كل ما يشوف سيارة يقول عنها شبهة !!
بعد سوالف صلاة الجمعه اكتشفنا سرقه ست سيارات البارح مع سيارة خالو وكلهن في الحي نفسه وشايب الله يطول بعمره طالع يصلي الفجر ومادرى إلا اللي يسرقون سيارة ولده من قدام بيتهم << أنواع وساعه الوجه ومن شافوه تناقزوا وطاح كاب واحد منهم وركبوا سياراتهم وتصادموا مع بعض من الخبه
ألحين معقولة قدروا يسرقون ست سيارات بليلة وحدة !!
طيب وين الحكومة عنهم إلى ألحين ؟؟
. .
إقتباس
الين هنا انتهى الفلم البوليسي وسافرنا راجعين لبيتنا ....
أقول بس أن شاء الله أنكم وصلتوا لبيتكم سالمين . .
تعرفون يعني يمكن يحصلكم مثل قصة الشايب المسيكين !!
. .
إقتباس
لا تكون هذي سيارة خالو المسروقة ؟ ؟
. .
إقتباس
نعم..سرقه السيارات أصبحت ظاهره لدينا..والقائل بغير ذلك جانب الحقيقة ولكن طريقه تعامل المرور والشرطة مع هذه الظاهرة هو من أكبر أسباب إنتشارها !! نحن نعيش بفوضى عارمة من المرور وإهمال صارخ من الشرطة ..
بالله فيه أحد يكتب بلون فضي على صفحة بيضاء تسمعين بالتنسيق إنتي قسم بالله أحاول أقرأ سطر وأترك خمسة
اللي فهمته من موضوعك إنهم سرقوا كفرات سيارات
يرحم والديك غيري لون الخط
______________________________
يعني كل اللي صار إنسرقت كفرات
يكون بعلمك ترا الشئ هذا عادي وطبيعي جدا ولو إنك ولد وتحضرين مباراة للهلال كان تعرفين إن الوضع طبيعي
كلها كفرات وإستبنه
خويي توه مطلع سيارة 2008 جديدة ما جلست معه إلا ثلاث أسابيع وكان جالس بالشقة ونايم دخلوا عليه الحرامية ولقوه نايم وشافوا مفتاح السيارة جنبه أخذوه ومشوا وبعد التبليغ خويي ما لقى سيارته إلا بعد شهر مفككة
______________________________
برايفت
لا عاد تنسقين مره ثانيه أو عطي موضوعك أيه أحد ثاني علشان ما تنجلدين
حنا قبل أمس (الأربعاء الظهر ) .. جاء ثلاثة وحاولوا يسرقون سيارتنا اللي واقفة برى البيت ,, والظاهر إنهم كانوا يهزونها وعشان كذا ولع الانذار.. ومن حسن الحظ سواقنا كان بالحوش بيشغل سيارة ,, ويطلع لهم وأول ما شافوه هجوا .. وهم ينحاشون صدموا راعي كورولا وكملوا طريقهم
سرقة ,, مشاعر مؤلمة ,, دوريات ,, مهازل ==> البقيه بالداخل 
>>> ماجابوا خبرك 
... ومباريات 
... وتميز 
...
...
وكن السرقه صارت شي عادي 
....
. .
. . صدق حسبي الله عليهم هالحرامية !! 
. .
!!
الوضع العادي
