على الشباب عيب والبنات عادي <<<متوهق مالقى اسم للموضوع هع - نادي الهلال السعودي - شبكة الزعيم

الزيرابوعزيز · #1 22/02/2008, 02:27 AM

حيى الله المجلساوية بموضوعي انا اليوم موضوعي عن النظر وابطرحه بطريقتي <<بدون جدية مرة
تروق عن انفسكم شوي <<(صورة واحد مايدري وشلون يكتب مقدمة لهيك موضوع )

قبل كل شيء السلام عليكم ورحمة الله وبركاته <<صح جت متأخرة بس اهم شيء سلمنا هع
كيفكم وكيفكم مع الروتين اليومي مليتوا من الروتين فيه حل انتحرو

<<نصائح اخر الليل

وانا اتمشى اليوم في مجلسكم العامر طلعت فوق لمقدمة المجلس واسير على مجلسكم ليوم الخميس
للعضو المتألق ابو

<<<انتبهو ترى الصقر يناظركم ويقول اللي مايرد بينقض عليه

ولقيت ابو

حاط من ضمن اخبار العالم كاركيترات<< يا لله طلعت صعبة

وفيها كاركتير عن بنتين يبحثون عن فارس الاحلام ومواصفاته للي ماشافه يشوفه تحت

ممكن الكركاتير يتكلم عن فكرة معينة عن احلام البنات بزوج المستقبل
بس انا ابتكلم عن موضوع ثاني غير الفكرة فوق

نمهد للموضوع شوي
لو قالت لك اختك يا صعفق

ابيك تركب كميرا بالمجلس علشان اذا جوا الرجال وعيال عمي وجلسوا يسولفون اتفرج عليكم

واشوف اشكالهم وسواليفهم
والا قالت لك ياصعفق <<ملزم على كلمة صعفق <<موضوعي وانا حر هع
قالت لك ابيك تخلين اطلع معك للشارع واتفرج على اللي يلعبون كورة من شباب الحارة
تقول ابتسلى مليت من قعدت البيت

انت وش بتقول ؟؟ اتوقع تقول افا

انحرفت اختي تبي تروح تتفرج على الشباب مابقى الا هي
طيب لو دخلت عليك امك وانت حاط برنامج ما الك الا هيفا <<

قديم نقول نفرض للي ما يذكرون هيفا
راعية التمارين الرياضية قبل هيفا المغنية الحين وش بتقول امك
بتقول عيب ياولد تتفرج على البنات
تجي انت تطلع وترجع للبيت وتلقى اختك <<طبعا افتراضات من الخيال

تلقاه جالسه تتفرج على قناة المجد <<انا استشهدت بالمجد لأنها تعتبر قناة دينية
وتدخل امك ولا تقول لأختك شيءوانت مستغرب

وتقول بنفسك طيب المجد كلهم رجال
وهذي بنت ليش هي تتفرج على الرجال وانا لا ما اتفرج على الحريم
وتجي امك تدخل وما تقول شيء لأختك <<<لأن المجد قناة دينية ومافيها خرابيط

طبعا كلنا متفقين على الحلال والحرام يعني انا مثلا اسمع اغاني بس ادري انها حرام
وما اقول انه مهيب حرام ولكن اطلب الهداية ومثلها اذا تفرجت على البنات بالتلفزيون
بتقولي هم مطاوعة ومافيهم خلاف اقولك على العين والراس بس منهم الحليق وحتى المطاوعة فيهم
هل الشرع حرم على البنات تشوف الدشير والمطاوعة تشوفهم حلال ؟؟
ومثل ماعلينا واجب غض البصر هم عليهم نفس الواجب قال تعالى{وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ )

قبل فترة قريت رسالة يتداولونها بعض الاوساط النسائية
وحدة تقول لوحدة الله يرزقك بواحد بجمال العريفي وصوت السديس وخفة دم الجبيلان
انا بعد ماقريتها طبعا

قلت الحين ماشافوا بالعريفي الا جمال وجهه ولا فهمو من الجبيلان الا خفة دمه ولا تدبرو القران وركزوا على صوت السديس
انا اتكلم عن المجتمعات المحافظة طبعا
والا المجتمعات المتفتحة رسايلهم تكون مثل خالد وراشد وما ودي اطول ولا افصل زيادة لأنكم
اكيد عارفين الوضع
الحين تلقى بعض المراهقين اذا شاف فنانة قال ياليت اتزوج مثل هذي والمشكله بعض المتزوجين
اذا شاف فنانة تضحك وتنطط وانواع خفة الدم قال شكلي استعجلت

مثلهم البنات اذا شافوا رجال مفتول العضلات او خفيف دم <<وياكثرهم بالمجد خفة الدم ببلاش

قالوا نبي مثل هذا او قالت المتزوجة ياحسرة زوجي قصير او ثقيل دم ياليت هذا زوجي اللي بالتلفزيون
خفيف دم <<<ماتدري انه يمثل وما تدري وش وضعه خارج التمثيل
غير الاعجاب بالاشخاص

زبدة الموضوع النظر للنساء محرم والنظر للرجال من النساء محرم
بس المشكلة ان النساء ينظرون للرجال بهالقنوات وما احد يقولهم شيء
والرجال اذا تفرجوا على النساء بالقنوات صارت مشكلة

وانا ماكتبت الموضوع الا بعد ماشفت تساهل كثير خصوصا من العائلات المحافظة اللتي كانت لاتدخل التلفزيون كله في بيوتها وادخلت قناة المجد بحجة مافيها حريم ولا اغاني
والمشكلة اكثر من تلقاهم مترززين عن المجد هم الحريم ليش ؟؟؟؟؟

عاد اليوم خميس واخر الليل يعني لا تؤاخذونا ان خربطنا الموضوع فوق تحت
المهم الفكرة وصلت
اشوف الردود واتأكد

وليد القحطاني · #2 22/02/2008, 02:49 AM

هلا اخوي

فيه فرق كبييير

مافي اي حرمه في التلفزيون بتجيك وتقول الصلاة يا شباب وطيعوا ابائكم

وامهاتكم

وتنصحكم عن التفحيط , ,

كل الحريم اللي في القنوات إما مقدمات واللبس الله يستر

مثل الحريم اللي واقفين 24 ساعة ووراهم لوحة مكتوب

ماهي الدولة التي لو قلبنا حروفها تطلع نفسها

( ليبيا )

وفيه قنوات فاضحة بصراحة ,, فعشان كذا حرام

,,,,

اما البنت تقول يطالعون المجد ع الاقل يطالعون شيوخ يعلمونهم دينهم

ويعلمونهم الاسلام

في الكليات فيه محاضرات لشيوخ يلقيها للبنات

وعند البنات بروجكتر للشيخ وهو يتكلم بالفيديو

يعني مافيها شئ ..

وإن شاء الله كل البنات فيهم خير

تحياتي

الميرنجي · #3 22/02/2008, 02:51 AM

وعليكم السلام ورحمة الله وبركاته

موضوعك حليو وانت زدته حلاوة

ماشاءالله عليك جبت الموضوع على الوتر الحساس

اولا نظر الحريم للرياجيل عند اكثر الناس صار عادي خاصه في التلفزيون لكن لو طالعت لرجال في الشارع على وجه الاعجاب كان توطا ببطن الحرمة لين تعرف ان الله حق

الحال نفسه عند الرياجيل

لكن في بعض الناس مرة تحس انه موسوس

لاشاف اهله يشوفون رجال قوم الدنيا وماقعدها

لكن الحريم لا شافت واحد من اخوانها والا اي واحد يقربلها يشوف الحريم مافرقت عندها الا الوالد والزوج
تشوف انواع الصياح والازعاج والبكاء وتلقى الحريم الباقيات يعزونها

طبعا انا اقصد نظرة الاعجاب ماقصد نظرة عاديه يعني لمن تحس ان النظرة ذي فيها اعجاب

الزيرابوعزيز · #4 22/02/2008, 03:14 AM

إقتباس

الرسالة الأصلية كتبت بواسطة وليد القحطاني


	هلا اخوي فيه فرق كبييير مافي اي حرمه في التلفزيون بتجيك وتقول الصلاة يا شباب وطيعوا ابائكم وامهاتكم وتنصحكم عن التفحيط , , كل الحريم اللي في القنوات إما مقدمات واللبس الله يستر مثل الحريم اللي واقفين 24 ساعة ووراهم لوحة مكتوب ماهي الدولة التي لو قلبنا حروفها تطلع نفسها ( ليبيا ) وفيه قنوات فاضحة بصراحة ,, فعشان كذا حرام ,,,, اما البنت تقول يطالعون المجد ع الاقل يطالعون شيوخ يعلمونهم دينهم ويعلمونهم الاسلام في الكليات فيه محاضرات لشيوخ يلقيها للبنات وعند البنات بروجكتر للشيخ وهو يتكلم بالفيديو يعني مافيها شئ .. وإن شاء الله كل البنات فيهم خير تحياتي

حي الله وليدوه <<صورة واحد قافلة معه

المجد فيها قنوات كثيرة والمحاضرات ماقلنا فيها شيء ولكن يقدرون يسمعون للمحاضرات بالاشرطة
<<اذا كانو يدورون المحاضرات
ولكن صيفنا مع اهلنا ايش احلى

مثل هالبرنامج وبرامج كثيرة يقدمونها الشباب وهم لابسين البدل الرياضية
مجمعين هالبزران ويوسعون صدورهم الله يجزاهم خير
غير برامج التمارين الرياضية
كل هذي ماله دخل بامحاضرات والحريم مترززين عندها
هنا سؤالي
اما بيجلسون 8 ساعات للمحاضرات ما اتوقع كلهم بيسويها
وبعدين ليش يشوفون اللي يلقي المحاضرة يعني اذا شافوه بيفهمون احسن ؟؟

الـــنـ الأزرق ـــاب · #5 22/02/2008, 03:49 AM

اخوي انت يأنك فاهم غلط يانك مافهمت صح >>> وش الفرق

اللحين الرجال ماله عوره الا من السرة الى الركبة

اما الحرمة فكلها عوورة يعني تخيل وحدة بقناة تقدم اخبار لابسة عباية وقفازات ومتبرقعة >> وشلون تفكر يالخبل

لاكن الرجال عورته قلتها يعني العريفي يوم يطلع بالتلفزيون يدري ان بعض الحريم بيشوفونه وعادي مو حرام

الا اذا كانت نية الحرمة مي زينه

وبعدين يوم تقول يتفرجون على صيفنا مع اهلنا احلى وبرامج التدريبات الرياضية والله من الطفش

انا ابتحداك الحين تجلس بالبيت يومين متتالين والله ماتقدر حتى نص يوم لكن الحرمة يمكن يوصل اسبوع وهي ماطلعت

من البيت ويتفرجون على اي برنامج خايش حتى لو انه برنامج سيرة > اخيس برنامج عرفته القنوات الرياضية

والف شكر على طرحك الخبل يؤ يؤ وش ذا الخطأ اقصد الرائع

هلالية من زمن آخر · #6 22/02/2008, 04:29 AM

موضوعك مهم صراحة بس ياليتك ماجبت المثال (قناة المجد ) أولا الحريم مترززات عندها لانهم حريم الرجال وش يبون بالتلفزيون الحريم فيه اشياء كثير تهمهم وبرامج بعد ..

أما البنات الي يحبون يناظرون الرجال مو في قناة المجد قل قنوات الشعر ومباريات كرة القدم ..وغيرها

هذا غير البنات الي يطلعون للأسواق بس عشان يتفرجون على الشباب ..,

انا وجهة نظري انه النظر للرجال لـ قصد الاستفادة مثلا من نصائح وبرامج وغيرها أو مشاهدة مباراة لأجل المباراة عادي جدا ً المشكلة تكون في نفس البـنت اذا كانت تفكر وتـدقق كثير بالرجل هنا يصير خطأ واحس انه يدخل ضمن الحرام اما النظر الطبيعي بدون تدقيق بزيادة وبدون تمعن احسـه شيء عادي يعني مستحيل يخلوا بيت من تلفزيون ..,خصوصا القنوات الدينية والقنوات المستقيمـه

مثل القنوات الحكوميـة وقنوات الأخبار وغيرها..,

الزير موضوعك حلو وتفكيرك جميل لكن أحس انك لو ماستعجلت وسدحت الموضوع بسرعه وجبت لـنا الأضرار الحقيقية من هالشـيء وبينت وعرفت الفرق بين النظر العادي والنظر الي مدري وش يبـي لان مثالك لقناة المجد مايخش المزاج أبد ..,

عافــآآك الله

وياليت تسدح لنا رأيك عن هـالموضوع ..ورده

واعذرني ودي لو اني اقول رأيـي بترتيب بس النوم له غلبه

هلالية من زمن آخر · #7 22/02/2008, 04:33 AM

إقتباس


	وبعدين ليش يشوفون اللي يلقي المحاضرة يعني اذا شافوه بيفهمون احسن ؟؟

الله يهديك

لا تخلط الحابل بالنابل الشرع حرم النظر الى العورات والنظر الي فيه تدقيق وتحس فيه اعجاب اما النظر الطبيعي فـمافيه شيء اجل ليـه مايتغطون الـرجال؟ ..

المـرأه كلهــا عورة والرجــال يتهاونون بهالــشيء خصوصا اذا كانوا هم الي يبحثون عنه في القنوات الهدامه ..
اما القنوات الأخــبارية الكبيـرة فـالله يهدينا هذا شي غصب على الشباب انهم يشوفون مرأة تلقي الأخبار اعتقد المشكلة تكون فقط فيمن يبحث عن النساء من الشباب سواء بالمسلسلات او البرامج او غيرهــا ..!!

شطحة

إقتباس


	حتى لو انه برنامج سيرة > اخيس برنامج عرفته القنوات الرياضية

هههههههههههههههه اضحك الله سنك

الزيرابوعزيز · #8 22/02/2008, 05:51 AM

الناب الازرق

إقتباس


	اللحين الرجال ماله عوره الا من السرة الى الركبة

هذا عندك انت يالرجل يعني الحين البنات اللي معجبهم خالد وفاقين معه

شافوا شيء تحت السرة والركبه من خالد

اكيد لا ماشافو الا وجهه بس واغانية
حتى الرجال اللي يطلعون بالمجد لا بسين البدل ووسيمين ويمزحون <<ترى فيه بنات فاقين معهم بس يمكن ماتدري عنهم

إقتباس


	الا اذا كانت نية الحرمة مي زينه

وأنا اسهل له المعصية واقول صفي النية يابنت

ما فيه حديث والا ايه تسمح للبنات يشوفون الرجال
ويتابعونهم ولكن اهم شيء يصفون النية <<الضرورات غير وانا اخوك

إقتباس


	وبعدين يوم تقول يتفرجون على صيفنا مع اهلنا احلى وبرامج التدريبات الرياضية والله من الطفش انا ابتحداك الحين تجلس بالبيت يومين متتالين والله ماتقدر حتى نص يوم لكن الحرمة يمكن يوصل اسبوع وهي ماطلعت من البيت ويتفرجون على اي برنامج خايش حتى لو انه برنامج سيرة > اخيس برنامج عرفته القنوات الرياضية

حلوة ذي من الطفش نحلل الحرام على شان سعادة سمو هالبنت ماتطفش

اجل انا ابتابع الفنانات اللي يرقصن واللي يطلعن بالتلفزيون واقول طفش

كل شيء للعوائل مالنا مكان يالشباب مالنا الا الاستراحات والقهاوي
وكلها فيها دشوش تعرض القنوات اللي فيها البنات اشكال والوان
بتقولي عاريات ابقولك حتى الشيبان يوم كانو شباب يخقون اذا غمزت

سميرة توفيق وهي متحشمة ما طلع الا وجهها ولا ترقص

إقتباس


	والف شكر على طرحك الخبل يؤ يؤ وش ذا الخطأ اقصد الرائع

شاكر مرورك الغبي يؤيؤ

قصدي الرائع <<وحده بوحده

البرنسيسه الزرقاء · #9 22/02/2008, 06:14 AM

اذكر شيخ مره تكلم عن هذي السالفه

وقال انه في بعض الناس ما يستوعبون اذا سمعو باشرطه وكذا

فاذا كان لمقصد خير مافيها شي !

وصح ان مايجوز النظر والتدقيق بالرجال بس الله يغفر لنا ويهدينا

برنسس

ورده

الزيرابوعزيز · #10 22/02/2008, 06:23 AM

هلالية من زمن اخر<<<الظاهر رؤوف خليف يوم يقول هدف من زمن اخر سارق الجملة منك

<<انت اقدم

إقتباس


	موضوعك مهم صراحة بس ياليتك ماجبت المثال (قناة المجد ) أولا الحريم مترززات عندها لانهم حريم الرجال وش يبون بالتلفزيون الحريم فيه اشياء كثير تهمهم وبرامج بعد ..

الرجال وش يبون بالرجال تمام انك اعترفتي ان الحريم مترززات عند المجد
يعني لو حطينا mbc بتلقين الرجال والحريم مترززين عندها
بس ليش الحريم ترززو<<تعب هالكلمة

عند المجد فيها برامج مهمة
هل هي ضرورية تجيز لهم النظر للرجال <<فالضرورات تبيح المحرمات

إقتباس


	أما البنات الي يحبون يناظرون الرجال مو في قناة المجد قل قنوات الشعر ومباريات كرة القدم ..وغيرها هذا غير البنات الي يطلعون للأسواق بس عشان يتفرجون على الشباب ..,

ليش وش فرق قناة المجد عن قناة الشعر كلها فيها رجال لا والرجال اللي بقناة المجد وسيمين اكثر من قنوات الشعر هم وشنباتهم اللي ما ادري وش تبي

يعني اللي يناظر الرجال هناك بيناظرهم هنا

إقتباس


	انا وجهة نظري انه النظر للرجال لـ قصد الاستفادة مثلا من نصائح وبرامج وغيرها أو مشاهدة مباراة لأجل المباراة عادي جدا ً المشكلة تكون في نفس البـنت اذا كانت تفكر وتـدقق كثير بالرجل هنا يصير خطأ واحس انه يدخل ضمن الحرام اما النظر الطبيعي بدون تدقيق بزيادة وبدون تمعن احسـه شيء عادي يعني مستحيل يخلوا بيت من تلفزيون ..,خصوصا القنوات الدينية والقنوات المستقيمـه مثل القنوات الحكوميـة وقنوات الأخبار وغيرها..,

كلام جميل بس انا ادخل عليهم قناة المجد بالبيت وهم كانوا ما عندهم تلفزيون اصلا <<انا اتكلم عن هالنوعية بالذات وتراها منتشرة عندنا بالرياض وانتشارها اكثر بالقصيم
وبعدين اجلس قدام وجيههم طول النهار واختبر نظراتهم

اذا حسيت انهم ناظرو بتدقيق قمت وطفيت التلفزيون

ليش انا احطه من الاصل هم كانوا عايشين بدونه من زمان انا اضرب لك مثال عن بعض هالعوائل انا عمي مثلا بحياته مادخل تلفزيون وحتى يوم جت المجد مادخلها البيت
وعندهم كمبيوترات شخصية بالبيت وفنانيين بالكمبيوتر مثلا بنتهم عمره 4 سنوات تشغل الكمبيوتر وتختار اللي تبي العاب واذا خلصت تطفيه وبنتهم الثانية عمرها 8 سنوات يوم حطوا دورة حاسب بالمدرسة عندهم سجلت واخذت الاولى عليهم وبناتهم الكبار 4 تخرجوا من الجامعه وتزوجوا وعندهم عيال ماضرهم ولا نقصهم لا يد ولا رجل من تصرف عمي
انا اضرب مثالي على مثل هالعوائل اللي تدخل المجد ببيوتها وتسمح لنسائها ان تشاهد الرجال

اما باقي كلامك عن الاضرار الظاهر وضحتها منها تكره المرأة زوجها وتتمنى غيره اذا شافت من احسن منه
غير نظرات الاعجاب والحب احيانا اللتي تصدر من البنات لبعض شباب هذه القنوات
اما ليش اخترت المجد فمثل ماقلتلك اعلاه عن العائلات اللي ماحطت تلفزيون اصلا

إقتباس


	الله يهديك لا تخلط الحابل بالنابل الشرع حرم النظر الى العورات والنظر الي فيه تدقيق وتحس فيه اعجاب اما النظر الطبيعي فـمافيه شيء اجل ليـه مايتغطون الـرجال؟ ..

طيب ليش الرجل يحرم عليه رؤية المرأة عموما النظرة الاولى لك والثانية عليك
وهذا مثل وضع المرأة النظرة الاولى العابرة لها والثانية عليها
ليش مايتغطون الرجال
المرأة وجب عليها تغطية وجهها كاملا <<اما البرقع والنقاب والاختراعات الجديدة لم ترد بالشرع
ليش المرأة تحتجب كامله لأنها ضعيفة تلتفت كثيرا وتناظر الرجال لو كانت متغطية غطاء كاملا حتى عيونها لما رأتهم بصورة واضحة ولم تنفتن بهم بسرعة

خلينا نسولف على بساط احمدي<<وش عنده جازت له السواليف

الحريم الحين يوم لبسوا براقع ونقاب ولثم بدينا نميز العيون

اللي هي من مفاتن المرأة اللتي كتب فيها الشعراء من عصر الجاهلية الى الان ابيات كثيرة
يعني اظهار المرأة لعيونها فتنة للرجل
غير كذا الرجل ثقل شوي اثقل من المرأة يعني لو فيه مجموعة من النساء بسوق ومجموعة من الرجال بسوق وجاك بزر طاير بالسيكل وطاح لقيتي الحريم كلهم التفتوا على البزر يشوفون وش السالفة<<لقافة

بس تلقين بعض الرجال التفت مع الحريم يتفرج يعني حكمة الصراحة البرقع والنقاب يوم انتشر كشف لنا بلاوي

عن لقافة الحريم من اول ماكنا ندري هي تناظر يمين والا يسار بس الحين صرنا سوى

والرجل دينه اقوى من المرأة يعني بيغض البصر الا ما ندر ولكن المرأة لن تغض البصر الا ماندر<<هذي حكمة طلعت مع السواليف

علشان كذا وجب على المرأة ان تغطي وجهها بالكامل مع عيونها والرجل لا

وشاكر مرورك واتمنى الفكرة وصلت <<<صورة واحد تعب وهو يحاول يوصلها

والاختلاف بالرأي لا يفسد بالود قضية

الزيرابوعزيز · #11 22/02/2008, 06:33 AM

الميرنجي
معليش طمرنا دورك <<بدون قصد

كلامك واقعي واضافة جميلة لموضوعي

اما بالنسبة ل

إقتباس


	طبعا انا اقصد نظرة الاعجاب ماقصد نظرة عاديه يعني لمن تحس ان النظرة ذي فيها اعجاب

وانا واخوك ابجلس قدام التلفزيون ارع وعشرين ساعة اتفحص نظراتهم

اذا حسيت انها اعجاب طفيت التلفزيون <<<ليش ادخله من الاساس بالبيت

شاكر مرورك وتعقيبك الجميل تقبل اعتذاري لتأخير تعقيبي على ردك

الزيرابوعزيز · #12 22/02/2008, 06:38 AM

إقتباس

الرسالة الأصلية كتبت بواسطة البرنسيسه الزرقاء


	اذكر شيخ مره تكلم عن هذي السالفه

إقتباس

الرسالة الأصلية كتبت بواسطة البرنسيسه الزرقاء


	وقال انه في بعض الناس ما يستوعبون اذا سمعو باشرطه وكذا فاذا كان لمقصد خير مافيها شي ! وصح ان مايجوز النظر والتدقيق بالرجال بس الله يغفر لنا ويهدينا برنسس ورده

برنسيسة <<اسم على مسمى

شرفتيني واختصرتي موضوعي بمرورك الكريم

اهم شيء مانقول حلال النظر <<بس للضرورة احكام

إقتباس


	وصح ان مايجوز النظر والتدقيق بالرجال بس الله يغفر لنا ويهدينا

هذا اهم شيء ان نعترف ونطلب الهداية

ومن منا يوسف عليه السلام يأمن نفسه الفتنة
ولكن نحاول ان نمنع مسبباتها

تحياتي لك

dal3_uae · #13 22/02/2008, 07:44 AM

ههههههه والله موضوع تحفه ...

عفوا موضوع رائع بطريقه فكاهي~

::

لا تروح بعيد ... أنا يوم اشوف قناة البدايه ... اللي كلهم شباب ... ويوعونهم على الزواج ... وما ادري شو ...
اول ما اشوف اخويه اجلب ع القاناة
لأنه مرة شافني ... وانا اشوفه قاللي غيري هالقناة ... شو تبينه ...؟؟؟ كله شباب ...؟؟؟!!!
جان اتفشل واجلب ع القناة الثانية ...

وااااااااااخزياااااااااااااااااااااااه

::

::

بالنسبة لمسئلة الحلال والحرام ... ما اقدر اقول شي ...
لأني ما اعرف افتي ...

وكل الشكر لك ... ع التطرق للموضوع ...

تحياتي :
دلووووووووووووعة الامارات
ورده