أسعد الله جميع أوقاتكم بكل خير
فيه أكثر من نقطة أود أني أتطرق لها أتمنى منكم أنكم تتحملوني شوي وأتمنى أني أستمع للآرائكم
أولاً أبارك لجميع الهلاليين الثلاث نقاط أمس وإن شاء الله أننا نستمر على هالمنوال لتحقيق بطولة الدوري بإذن الله.

ثانياً يومان فقط ونودع أسطورة الكورة السعودية وحاسم أغلب البطولات الهلالية وناثر الإبداعات بالملاعب على الطريقة الجابرية. والتي لا يتقنها إلا سامي بن عبدالله الجابر فقط.
يلزم على كل هلالي وفي ومحب ومشجع يلزمه الحضور بدرة الملاعب لتوديع الأسطورة يستاهل أبو عبدالله أننا نكرمه وخصوصاً أنه ما فيه عذر الآن بعد تكفل الأمير عبدالرحمن بن مساعد بنص القيمة الحين ما لأحد عذر أبد وعدنا بإذن الله يوم التكريم.

ثالثاً الحقيقة من زمان والهلال معروف بأنه مصنع النجوم والفضل يعود لله ثم للمدرسة الهلالية بقيادة الأمير بندر بن محمد والتي تنتج موهوبين على مستوى عالي من المهارة ومن ثم تعطيهم الفرصة للعب مع الفريق الأول وهم بأعمار صغيرة من أجل أنهم يعطون لفترة أطول والسبب الثاني معروف أن ركض ونشاط اللي عمره 18 أو 19 أو 20 سنه مو مثل ركض ونشاط اللي عمره 26 أو 27 أو 28 ومافوق. وإذا كان العمر الصغير ممزوج بالمهارة العالية والموهبة الفذة راح يشيل الفريق ويزيده نشاط وحيوية. الخلاصة يوجد بالهلال لاعبين على مستوى عالي من المهارة والموهبة والقدرة على صناعة اللعب ولعل أبرزهم من وجهة نظري اللاعب عبدالعزيز الدوسري فهو مستقبل الهلال وحاضره الآن والله أن اللاعب شعلة من النشاط (ما شاء الله عليه) وعنده قدرة على صناعة اللعب والله أعتقد أن وسط الهلال راح يكون غير لو أعطي الفرصة للعب خصوصا هذا الموسم اللي واضح فيه أن وسط الهلال يعاني في أغلب الفترات وأعتقد أن الجميع شاهده مع المنتخب الأولمبي أساسي ومع الهلال مو بس ما لعب أساسي ولا أحتياط ولكنه خارج التشكيل نهائياً حرام قتل مثل هالموهبة جميع المتابعين للكرة العالمية أكثر الاعبين أساسيين مع أنديتهم ومنتخباتهم وهم بسن صغير وما راح أضرب أمثلة لأن الكل عارفهم.
الهلال في فترة من الفترات كان يعطي فرصة للاعبيه وهم بسن صغيرة مثل الثنيان وسامي التمياط أخوان وأخيراً الشلهوب هذولا اللي تحضرني أسمائهم وإلا غيرهم كثير.
أقترح على إدارة الهلال والقائمين على الهلال أنها تشتري عبدالعزيز الدوسري من نفسها بمبلغ عشرين مليون ريال عشان تقتنع فيه وتعطيه الفرصه للبروز. والله لو كان هالاعب موجود بنادي ثاني كان يحاولون يشترونه بأي ثمن لكنه موجود بين أيدينهم ومو معطينه الفرصة.
الخلاصة يوجد بالهلال لاعبين صغار بالسن وموهوبين ينتظرون الفرصة على أحرمن الجمر نتمنى أننا نراهم بالقريب العاجل.
آآآآآآآآآآآسف جداً على الإطالة لكن والله الموضوع المهم جداً لمستقبل الهلال وأنا أتكلم بحرقة لما أشاهده بالنادي بالفترة الأخيرة والتي آخرها موضوع أسامة هوساوي والجدل القائم بين أعضاء الشرف وإدارة النادي على من يسدد قيمة الاعب.
نتمنى أننا نشوف هلال غير وزعيم غير بالموسم القادم بإذن الله.
أكرر أسفي على الإطالة ولكم مني كل التحية والتقدير.
أحمد الهلالي.