01/03/2002, 12:16 AM
|
عضو سابق بمجلس إدارة شبكة الزعيم | | تاريخ التسجيل: 18/10/2001 المكان: السعودية
مشاركات: 8,113
| |
يا أهل مكه .. خدمه الحاج شرف وليست قرف السلام عليكم ...
بما ان الله اكرمني وكنت من حجاج بيت الله هالسنة .. فلازم اكتب ذكرياتي كحاج علشان تعرفون حجم العز والنعيم اللي حنا فيه !! وبصراحة تحمست أكثر يومني شفت موضوع كايدهم بيك عن الحج وبغيت ادلي بدلوي ...
اول شي ابدأ فيه أهل مكه ( وبالتأكيد ليس كلهم )
أهل مكه للأسف ومن خلال حجتي اكتشفت ان شعارهم خدمة الحاج قرف وليست شرف ... وما العنوان اللي نسمعه ونقراه كثير الا كلام فاضي زي كلام التلفزيون عن نجاح خطة الحج هذا العام وان الحجاج ينعمون بأداء مناسكهم بكل يسر وسهولة!! ..
للأسف الظاهر أن اهل مكه ينامون طول السنه وينتظرون موسم الحج علشان يحصلون لهم كم قرش لين الموسم الجاي وهذا اللي خلاهم ينظرون للحاج على انه كيس فلوس يمشي على الأرض وجاي يصرف هالقرشين ويمشي وكلن يبي ينهبه... ناسين انه جاي يؤدي فريضة وركن من اركان الإسلام . بصراحة غلاء فاحش سواء بالمحلات او بالمواصلات .. وألأدهى والأمر منه اخلاق تجاريه بحته ... لا أدب ولا أحترام لكبير او صغير او مسلم جاي من ابعد مكان ومجمع له قرشين ويمكن بايع اللي وراه واللي قدامه علشان يرضي ربه و يقوم برحلة العمر وهم ولا همهم .
لكن ماحسرتي غير على من توه أسلم وجاي للحج وتفاجأ بهيك ناس .
أتحدى اذا في واحد من اهل مكه استضاف احد الحجاج ببيته والا عزمه لوجه الله والا قام بتوصيل شيخ والا عاجز مابين المشاعر لوجه الله والا تصدق علي مسكين او ضعيف لوجه الله ... بالعكس الظاهر ان التسول من الحجاج بعد غلب على اكثرهم بحيث اننا وين مانروح نلقى متسولين . حتى يوم عرفه دخلوا علينا ناس بالمخيم يتسولون !!
وثاني شي بذكره عن سوء التنظيم وسوء التخطيط ..
تخيلوا معي ان العشاء يطلع من المطعم بعد المغرب ( المشرف على الحمله عامل حسابه وطلب من العصر ) ولا يوصل لنا بالمخيم بمنى الا الساعه11 ونص يعني اكثر من خمس ساعات وهو بالطريق والسبب ... السبب موكب مدري مين ( وعساك ترمي بعد قبل لايجيك موكب ... ان جاك موكب وانت ترمي فاعتبر نفسك في عداد المفقودين ) .
يعني حتى بالحج في تفرقة !! ناس تمشي وناس توقف ماتمشي ... والغدى نفس الكلام، مايدري الواحد هو ينام والا ينتظر والا يروح يرمي للي مارمى ( وانتم عارفين الجوع وش يسوي ) .
وكماهو معروف ممنوع الطبخ بمنى !! والا فيه كم مطعم لكن الناس فوق بعضها من الزحمة عليه ولا يقدر يلبي احتياج حملة وحدة فما بالك بحملات .
اما اللي يبغى يروح للحرم يصلي فيه .. فأعانه الله ، اذا الله فكه من المواكب فيبغاله على أقل تقدير ساعتين بالروحه وثلاث ساعات بالرجعه رغم انه بالحاله العاديه مايستاهل مشوار ربع ساعه.
هذا بعد اذا مالقى من يسكر الطريق بوجهه ويقول ممنوع شف طريق ثاني . مايكفى يالله نلقى سيارة واذا لقينا يالله نلقاها بسعر زين الا يطلعلك هالعسكري اللي كأن مكه وحجاجها فوق راسه ويقول ممنوع !! ليه ممنوع مادري !!
والحل الأسلم انك تمشي على رجولك ... لكن المشكلة اننا ماندل الطريق .
يعني وين ماتروح مقفلة بوجهك . وانثبر واقعد على سقف هالباص واقرالك شي والا تفرج على خلق الله احسنلك .
اما مبنى مدري صالة الحجاج بمطار الملك عبدالعزيز بجدة ! علامة تعجب الا مالا نهاية !!!!!!!!!!!!!!!
انواع الفوضى ... واذا بغيت تدعي على أحد دابلن تسبدك قل يالله انك تسافر من مبنى الحجاج بجدة . ههههههههههههه
أمر غريب بصراحة ان مملكتنا تملك كل هالإمكانات المادية والبشرية ويصير الحج كذا !! مع العلم انه خمس ايام من 360 يوم. والحج يدخل على مملكتنا مشالله ملايين الملايين .
يعني وش فيها لو كان فيه سير كهربائي من أقصى منى لحد جمرة العقبة الكبرى .... والا قطار مابين منى وعرفات ومزدلفة ... والا اللي يسمونه مترو الأنفاق زي اللي بمصر تحت الأرض من منى الى الحرم !! ترى اهم شي المواصلات . واذا انحلت عقدة المواصلات انحل كل شي ... إلا متى وهالباصات وزحمتها وقرف هالديزل وهالروايح الكريهه موجودة !! والى متى وجشع وطمع هالسواقين موجود !! والا متى وهالمواكب وهالطرق المقفولة !! والا متى ونفس العسكري براس خشمه !!
من المواقف الطريفه :
# يوم 11 وحنا رايحين نرمي الجمرات ركبنا باص كشخه مرة وشكله موديل جديد ... دق جوال واحد من اللي معي الا السواق يوقف الباص يبي ينزلنا ويقول يا قفل الجوال والا انزل <<== صار طيارة ماصار باص ...
بصراحة ... كلنا قفلنا جولااتنا خفنا ينزلنا والا يطيح فينا الباص هههههههههه
# وحنا راجعين لمنى من الحرم بعد طواف الإفاضة ركبنا على سقف باص صغير... مافيه سيارات ، وش نسوي ومالقينا الا هالباص ( وبعدين اوفر اللي فوق بعشرة واللي تحت بعشرين )... المهم ركب معنا هندي فوق السقف ... ووصلنا لمنى ونزلنا الا هالهندي عيا ينزل ... يقول انا ابي شيطان ( قصده الجمرات ) هههههههههه يابن الناس شيطان يركب راسك .. الشيطان بالجمرات والجمرات بمنى عيا يقتنع .. انا يبغى شيطان خخخخخخخخخ صز هندي .
وكل عام وانتم بخير ،،، |