وقسم بالله أفضل لاعب بالكره الأرضيه

كل مباراة عن مباراة رونالدو يثبت انه من طينة الكبار وماشاء الله مكينة اهداف ان شاء الله ماتوقف ، وربي كبير يارونالدو أكبر رد وأسرع رد على فيفا المجاملات

المباراة بشكل عام كانت صعبه على اليونايتد والفوز كان صعب وجاء بعد شد وجذب ، إيفرتون مافقد الأمل بعد الهدف الاول واستطاع التعديل وفرض نفسه وقفل صح وللآسف خطورة مانشستر كانت شبه منعدمه والفريق بشكل عام ماكان بيومه

التوفيز لعبها صح واستغل الجهه اليمنى بتواجد سيمبسون قليل الخبره والتايه بمباراة اليوم بالاضافه لبراون اللي مايحتاج تعليق ، ولهذا كانت اغلب هجمات ايفرتون من الجهه اليمنى لمانشستر وحتى هجمة الهدف كانت من نفس الجهه ، وينك ياريو بس وينك

دفاع مانشستر اليوم مش ولابد وخاصه بغياب ريو واشراك براون قلب وهو متعود من سبعة شهور على الظهير الايمن ، فيديتش كان يتحمل عبء الدفاع كامل وحتى اوشي اللي يقاله خبره مع دخوله كان متلخبط وعليه بعض الهفوات لكن ربكم ستر

الوسط كان ممتاز نوعا ما وخاصه جيجز ماقصر ورونالدو مايبيله تعليق لو تكلمت الى بكرا مااوفيته حقه ، واندرسون اليوم يعني موب احسن من بعض المباريات الماضيه والظاهر انه متفاهم مع هاريجريفز اكثر وخاصه انه مالعب الا مباراتين مع كاريك بس

الهجوم هو اللي مستغربه اليوم روني من اول دقيقه وانا حاط ايدي على قلبي اخاف ينطرد مع ان كانت له بعض اللمسات واللعبات الخطره لكن بشكل عام كان متواضع والحال نفسه عند تيفيز اللي خطورته كانت شبه مختفيه وماقدموا شيء يذكر

المباراة بشكل عام كان لإيفرتون افضليه نوعا ما ومانشستر كان ماسك اللعب لكن بدون خطوره كبير والحمد لله الفوز جاء عن حق وجداره


بالنسبه لتشلسي الحقيقه مالحقت الا على الشوط الثاني وشفت سيطره كبيره للروفرز لكن البلوز خطف الاهم وهو الثلاث نقاط

لكن الامر المحزن والسيء اصابة بيتر تشيك موب معقول هالآدمي منحوس لكن اعتقد واتمنى اصابته خفيفه وممكن غيابه بيقتصر على مباراتين ثلاث

نيوكاسل وديربي ، الظاهر ديربي ملزمين الا يغثون الماكبايس فازوا عليهم ذهاب وتعادلوا اياب



يعطيكم العافيه جميعاً ، وبالاخص ابو حميد لاخلا ولاعدم يابعدي