تيسنا مصاب بإنفلوزا ورحلة البحث عن تيس قبل ساعات من الصباح ( أبو عبدالله يقتحم المجلس العام من مجلس الجمهور قادما بطائرة خاصة ) - نادي الهلال السعودي - شبكة الزعيم

algohmani · #1 18/12/2007, 11:31 PM

يوم امس لم يكن يوما عاديا في يومياتي

فقد صحيت من الصباح وانا رجال من عادتي ان لا أصحى الا بعد المغرب

وأن صحيت بينها صحيت

أصلي الفروض الواجبة ثم أعود للنوم

المهم صحيت واللي مني بالخير

ويالله صباح خير دايركت ياولد على سوق الغنم رحت أشتري تيس العيد وأنا رجال ماعندك ماعند جدتك

في الأمور هذي ماعرف الفرق بين التيس والثاني إلا بالرجول <<<<

لا واضح إنك فاهم

المهم مريت براعي ونيت مليان الوانيت حقة تيوس وخرفان والعالم من جنبة متجمهرة تفصحت عليهم

وقلت على كم التيس

<< طالع فيني مبين علية فاهم بقوة وكانه يقول يابو الشباب داخل بالغلط

راعي الوانيت مالتفتلي ولافكر حتى يلتفت قلت في نفسي أجل لو كنت رونالدينو وش بتسوي يابو

المهم شافني شايب يالله بحسن الخاتمه قال ياولدي تبي تشتري إنت << قلت تنكت غنت شايفني أبيع

ولا جاي أتصور معاكم

قال أقول لاتقعد تهذري وأنا ابوك تعال معاي وانا اتوسط لك عند واحد اعرفة ويعطيك تيس بسعر مناسب

قلت : احلا مسوين تخفيضات لايكون اشتري تيسين واحصل على الثالث مجانا

المهم ماطول الثقالة عليكم رحنا للرجال ويوم شفت الرجال تلعثمت بالحكي وماعرفت أتكلم وقلت أبغا

تيس بعد محاولات عديدة < قال تبي صدقة إنت ولا أيش مافهمت

قلت : لا ياطويل العمر أبي تيس بفلوسي

قال طيب عندي لك هالتيس وسماه لي بإسم نسيت منه دحين كنهم مسمين التيس على واحد صومالي

المهم سألته بكم

قال والله عندي هالتيس ب 1500 ريال

هنا عاد تلخبطت انا خارج على ان التيس اذا سوى تدبيلة سعرة راح يصل 1000 ريال بس الظاهر إن

الهوامير ماخلو شيء حتى بالتيوس

قلت مالها إلا أني احاول مني مناك قلت وآخر كلام

قال أقول وأنا عمك ب 1500 يارجال تشتري يارجال تنقلع

قلت : أفا والله هذا طردة شكلة مايعرف يحكم هذي بأوروبا بكرت أصفر

شليت خشيتي بعد مابرد وجهي ورحت أدور عن تيس ثاني

والحمد لله حصلت واحد بالسعر اللي راسم علية 1000 ريال عدا ونقدا

روحت بالتيس معاي البيت بعد ماركبته بالكامري حقتي الجديدة < تيس عايش ينعمه ركب بكامري والله ماحقة الأ من يركبة بهايلوكس 84

لا وبعد ماحطيتة ورا خفت يموت علي مكتوم بالشنطة ركبته قدام

وياكثر اللي ضحكوا علي وأنا عند الإشارة وخصوصا واحد مركب تيسة فوق شبك على سقف السيارة

( التندة حسب لهجة أهل منطقتي )

روحت البيت بعد عناء الجهد البحث عن تيس العيد وجينا للمشكلة الثانية وين احط التيس فية << وين ياخي بساحة البيت أو تحت شجرة ولا بتحطة في غرفة النوم

شلت التيس وربطته بحبل وشفت نظرات التيس كانه يقول ياغشيم ترا بكرة موعد الذبح مو اليوم وطالعت فية بنظرة واحد شديد أوي قلت داري يالمطنوخ

المهم ربطته ربطة لولا الله ثم فزعة جدتي كان التيس مات مخنوقا بفعل فاعل

وتمت إعادة ربط التيس بطريقة تضمن لنا عدم إختناقة المهم التيس جلس الين العصر بديت الأحظ عليه

ملاحظة غريبة انه يغمض ويفتح بشكل غريب وهذي العادة ماكانت فية من أول ماشريت

قلت في نفسي أكيد غزلنجي ذا لكن بسيطة بكرة موعدي معاه

شوي إلا وهو طايح مغشي علية بصراحة خفت علية وبالغلط دقيت على 998

<< رد علي الرجال :

تستهبل أنت ياخي حرام رح نام حسبي الله عليك يا بزر

قلت في نفسي هذي الأخلاق 27 سنه ويقولون بزر أجل لو كنت 15 سنه وش بيقول

رحت أشوف التيس لقيت حرارتة زائدة وسويت فيها دكتور نفسي حسيت أن السخونه اللي فية مرض

نفسي أدى الى إن التيس يغمى علية وبيني وبينكم شكيت ان فية إنفلونزا الحيوانات

المهم خذيت التيس على صدري وجلست أغني ضمني على صدرك وأبعدني عن هالناس وخل الخجل

والحب والنشوة والإحساس <<< قلت لازم ادلعه علشان يتعود على البيت

ودجت براسي فكرة أخبر زمان ان الحمام لما يجي البيت والدجاج يربطوه بحل ويلفوفونه سبع مرات

نفس المكان إلين يدج ومايدري وين الله حاطه

فكرت أربط التيس بس عجزت اني ماراح اقدر اشيلة بس هههاي ماتغيب عن فكر أبو الأفكار قلت ماله

إلا تطعيسة بالكامري بس حنيت علية قلت يارجال أعقل مالها داعي استعين بالله وتعوذ من الشيطان

عاد حتى اللحظة التيس تحت الشجرة والشجرة تحتها تيس ولا أعرف بالضبط هل تيسنا حي ام ميت

فإن كان حيا موعدكم غدا مع رحلة الذبح في المجلس العام وأن كان ميت فقدر الله وماشاء فعل

هذا العمل جزء من خيالات اخوكم أبو عبدالله

طامر على مجلسكم من مجلس الجمهور أتمنى ان اكون ضيفا خفيفا وكل عام وأنتم بخير