في نفس اليوم الي صارت فيه مباراة الهلال والنصر صارت مباراةالهلال السوداني والمريخ السوداني..
ماقدرت اشوف مباراتنا لان كان عندنا عزيمه في استراحه وهياط وسالفه ..
طبعن الاستراحه حقت افراح ومافيها tv ...شرايكم فيني
الزبده ابغى اشوف المباراه يعني ابغى اشوفها. رحت عند البواب طبعن البواب سوداني
دخلت عنده الا اسمع صوت جماهير وزحمه ومعلي صوت حده قلت بس حاط على المباراه
وصلنا خير سلمت عليه التفت على التلفزيون الا اشوف مباراة الهلال والمريخ
سألته عن مباراتنا جاوبني بكل برود وقال ما اتابع الدوري السعودي
انا هينا تحطمت ويافرحه ما تمت وتيتي تيتي متل مارحتي جيتي
ويكملها الوالد ويدق علي يقولي وينك بأسلوب شبه تعصيبي .. سامعها من دكتور نفساني
في هذا الوقت اتوقع الشوط الاول انتهى .المهم اني خلصت شغلت ابوي
ورجعت للسوداني قتله بكل ادب واحترام ممكن اشوف النتيجه بس. قالي استريح وعطاني الريموت
طبعن ماقالي كذا حبن فيني لا لان مبارات الهلال والمريخ السوداني انتهى الشوط الاول منها..
طيب استلمت الريموت بديت احوس وادور على السعوديه ولله الحمد
لقيتها بعد جهد جهيد .حط عليها الا شوط الثاني مار عليه 10 دقايق ونتيجه طبعن واح واحد
وطبعن المهله المحدده لي ربع ساعه يعني بين شوطين المباراه السودنيه.
وانا اتابع المباراه شد انتباهي الكلثم الله يوفقه. وشفت حركت ياسر الي بسبها خذ المطيري
كرت الاول. شوي الا نقز السوداني وقالي ممكن ترجع على المباراه انا هينا انحرجت وحسيت انا ثقيل عليه بس قلت مايهون علي الهلال ويقول الي قوله وبجلس معه . طبعن اكيد رجعت على مباراته.
اها هينا زبدت الموضوع كله عندهم لعب الله لا يوريك تكسير على كيف كيفك ولا شي الحكم عادي مشي والله لو عندهم محترف مش افريقي والله تروح عليه لو يحكم عندهم حكم سعودي مايبقا احد عندهم يلعب بس الصراحه الصراحه لعب حلو ومناولات فنيه بس الشوت عندهم صواريخ ارض جو
تروح الكوره برا سور الملعب مافي شي روح جيبها لقاط كور ولا شي تروح ماترجع .
الزبده خلاص قفلت معاي ابغى شوف اش صار علينا شوي مادري شفيه السوداني تكرم وقالي
حط على الهلال والنصر شوف نتيجتك حطيت عليها الا على حركت ياسر الثانيه بالمطيري
وطرد على طول. عاد انا هينا نقزت في وجه السوداني وقلت له لو عندكم مثل كذا كسره كان الحكم يمشي ولا شي .
قالي صحيح عادي مثل كذا شي مش مستغرب.
الزبده رجعت على مباراته وكملت معه على الدقيقه 85 من مباراتنا مسكت الريموت ستأذنت منه اني
افره قال مو مشكله طيب حطيت على المباراه ولاحظت ان الكلثم ماشاء الله عليه مسوي ربش في الوسط
ومرت هجمتين للهلال طيحت قلبي .الزبده انتهت المباراه الا يقولي السوداني تذكر المباراه بين الهلال
السعودي والسوداني الي انتهت 2-1 قتله ايه قال والله لو ان الهلال السوداني بلاعبينه الاساسين
كان شفت فريقكم مرقع بخمسه قلت افا وانا اخوها .. يمديك على الهياط
لالا ياحبيب معليش كان هذاك الوقت وقت الثنيان وسامي وتيماوي وباقي الحلوين معليش تبطي عظم..
....وبس وسلامتكم


مقتطافات من القصه
توقعت الحكم ماسك المباراه تمشي على العجين ماتلخبطهوش بس طلع خراط.
عجبني الكلثم واتوقع له المستقبل ان شاء الله.
عجبني لعب الهلال الراقي والعصري بالمناولات الحلوه والقطيات الصعبه
كان في معنا سوداني ثاني سأل عن الشلهوب وقال موجود الشهلوب
ياسر مشهور عندهم ومعروف ما شاء الله عليه ياسروكبير يابوسعيد



واسف على الاطاله