ياولدي تعال تغدى لا مابي تغديت ........ ! - نادي الهلال السعودي - شبكة الزعيم

هلالي وشقاوي · #1 08/12/2007, 12:27 AM

"مقدمة"

قال تعالى : إن الله لا يغير ما بي قوما حتي يغيروا ما بأنفسهم

ملاحظة : الموضوع طويل لكن شيق

الفصل الأول

مثل العادة كل ظهر أجلس قدام الباب ومعي كاس شاهي وأتفرج على الجاي واللي رايح ====> من عرابجة زمان .
مير أشوف شي غريب مادري وشو لابس أصفر قلت ياولد وشو ذا باص نادي النصر وافرك عيوني بليفة مع شوي فيري واقلب عيوني لا والله مو باص نادي النصر ، قلت يمكن سعد الحارثي جاء يستهبل عند بيتنا قرب العجراء ياولد وأناظر لا والله موب سعد الحارثي صح فيه شبه منه لكن طلع موب هو الظلم شين المهم قرب مني وقرب وقرب وبدأ يقرب وصار يقرب ======> اخلص علينا

وطلع هندي البلدية وقف عندي وسلم علي ياحبيله متواضع موب زير وزير التجارة يكلمك من طرف ضرس العقل . رديت السلام وقلت له :
وش يبغى صديق .؟
قال أنا ابغي شوي أكل == = = = > " ياحليل معي لغة هندي بس متكسرة "

قلت ابشر بعزك وأروح ادخل البيت وأقول للوالدة باقي شي من الغذاء قلت هو أنتم أكلتم عشان يخلص والله وطلعت لي ذاك القدر اللي يهبل وش زينه مليان مطازيز والمطازيز تطلق عند العرب سابقا " قبوط " ومعه كوسة وقرع والله أنواع الفله

المهم استأنس البلدي وبدأ يأكل . عاد انا ماصدقت خبر بديت اشكي له الحال قلت له ان هامور البورصه بس ينفخ علي من يوم مسك منصب في منتدى الزعيم والمشاغب صار متكبر من يوم اشترى المازدا وماجد مقبل عقد ويبي يتزوج وصار موب فاضي لأحد تقل أول مره يتزوج نسى المسيار هو وخشمه لكن يالله ياماجد سرك في بير " الله يوفقك "
وسالفة تجر سالفه السعوديه صارت موب مثل اول اللحين صعب تلقى وظيفه اللحين الرواتب قليلة ومن الكلام بشوف الهندي وش يقول وعلى قول المثل خذ الحكمه من أفواه الهنود .

قال لي الهندي : احم احم خلونا نتكلم مثل إمريكي :
" شوف صديقي انا شغل بلديه عشرة سنه أنت معلوم ليش كذا سعودي كربان مافي سم سم أول اللهين سعودي أكل كثير يرمي زباله أنا اول قبل عشره سنه حصل زباله قوطي فاضي حفاظه بامبرز علبه تونه فاضي بس اللهين أنا هصل كثير أكل طماطم كربان رز ، خبز ... . . . وذكر لي جميع الأطعمه وقال هذا كثير مشكلة بعدين الله زعلان "
المهم خلص المطازيز ابو الشباب وانا اشوته ذيك الخقله لين نقز في سطح جيرانا .
جلست أفكر في كلام الهندي وأخذتني الهواجيس وبديت اسرح وامرح وأتذكر أيام طفولتي لأحد يقول يا شايب توني صغير .

الفصل الثاني

أيام الطفولة وما أدراك ما أيام الطفولة رجعت للذاكرة للورى ولقيت الدنيا فعلا تغيرت من ناحية أشياء كثير لكن علق في ذهني كلام الهندي عن الأكل اللي يرمى وجلست أفسر الحالة تعرفون صديقي المحقق كونان جزمت إن السبب المطاعم .
أيام الطفولة ماكان في مطاعم الا مطاعم ابو يمن البخاري وبعض مخابز والفوالين ولا يهون الأخ طعمية الفلافل والمطبق .

وكنا نبسط ونستانس اذا قال الوالد : انه راح يجيب غداء من المطعم وكنا ناكل بكل شفاحة لأنه مايحصل بالسنه الا مره وكانت الوالده ذكيه وش تسوي لنا تسوي رز أحمر يعني تحط فيه صلصة وتقول هذا من المطعم تعالوا ونصدق وخذ طب في صحن الأكل تقل ماشفنا الاكل الف سنة .

في الماضي كان لنا نظام معروف ومميز مع أولاد الحارة والأقارب إذا قرب وقت الغداء ماتحصل أحد طالع في الشارع كلنا عندنا استعداد ناكل واذا جاء الصحن الله لايوريك جلست انا واخوي نويصر وصويلح وعبودي بغيت اقول اسامي خواتي يالله عشان نمشي على السياق وحصيصة ومزنه طزنه الصياحه ومنيرة أم شوشه والوالد

والوالده وصرنا ناكل من صحن واحد كان اخوي نويصر خبيث مايبي مزنه تاكل لأنها تمطرس علينا وش يسوي يقول لها شوفي المروحة واذا رفعت راسها فوق طحن الحبحر وفي لغة أهل المشرق الفلفل بحافتها أو شنقها أو المكان اللي تاكل منه اللي يعجبك ثم ماترجع تكمل اكلها الا وهي صاير مثل التنين تبخ نار " تبخ" يعني تطلع نار من فمها . وبصراحه احسن مافي الغداء او العشاء الجمعة لأن كنا نحس ان اقلوبنا قريبة من بعض .
وفي بعض الأحيان كان ولد جيرانا إبراهيم امه طباخه ماهره واحسن من الوالده بصراحه لأنها تعرف تسوي سمك وبطاطس مقلي وريحته تفقع الرأس من الزين وكنت أنا واخواني وبعض الحاره نتلزق في إبراهيم تعرفون مشافيح وأحيانا نقول له اعزمنا

أو اذا كان منا الواحد موب بجيح يعزم ابراهيم علشان إبراهيم يعزمه واذا تغدينا عندهم واااااو ياشيخ ولاتقل في الفورسيزن ===>

على بالي أعرفه
طبعا كان اول معروف أكلنا مايطلع عن الأشياء هاذي : كبسة لحم أو دجاج ، مرقه بطاطس ، شوربه ، جريش ، مرقوق واذا تطورنا مره نواشف على العشاء أو صحن فول وطماط .

الفصل الثالث

" من قدنا عندنا عزيمة "

الوالد في يوم من الأيام عزم أعمامي وخوالي وبدأنا في التجهيز للعزيمة طبعا تعرفون اول ماعندنا خدامه صرت انا واخواني نغسل الحوش وخواتي يكنسون البيت ويرتبون والوالد من الصبح في سوق الغنم وبعد سوق الغنم سوق الخضرة والفواكة وننكرف

ذاك اليوم كرف جاب الوالد الذبيحة وذبحها وقطعنا اللحم وبدأت تقطع معاه وشوي وتجينا خالتنا هيله وأميره وهند وزوجة عمي حصة الحسن وهيلة العزيز وعمشى الناصر ويساعدون الوالده وحده تطبخ الرز والثانيه تسوي القرصان والثالثة تقطع سلطات والرابع تزبط الجريش وبدأو يتساعدون لين جو الرجال كل واحد يهز كرشته يبي يأكلون طبعا انا كعادتي انا واخواني لازم نسوي او نذل البزارين هذا نطرده من

بيتنا والثاني يتلزق في ابوه ونهاوشه عشان مايدخل مع الرجال يتغذى والثالث نفلقه مع راسه علشان يوم عزيمتهم ضرب واحد من اخواني ودخلوا الرجال وجلسوا يتغدون واحنا فوق رؤسهم معنا الماء أي واحد يبي مويه نخليه يشرب من الطاسه والطاسه تعني الغضاره وفي العصر الحديث هو الشي الذي يوضع فيه الماء بكمية كبيرة اموت على اللغة العربية .
طبعا سعابيلنا تقاطر نبي نأكل لكن خايفين من الخيزرانه يقول انه احنا بزران وامعصي ناكل اذا خلصو الرجال نبدأ نهجم على الاكل المهم خلصوا الرجال وبدينا ناكل واللي يسرق موزه في مخباته والثاني تفاحه واحنا ماغير نكفخ فيهم علشان مايخلصون

الفواكه علينا طبعا دائما واحنا ناكل يجي دور الحريم ويخربون علينا وكنا نسرق رأس الخروف ونطلع في الشاعر عشان مااحد يشوفنا ونكسره عشان ناكل المخ الله من زين الامور

الفصل الرابع

طبعا أثناء الهواجيس والذكريات الحلوه شغلت سيارتي وجلست اتمشى في الشوارع وفي شارع واحد بس شوفو وش لقيت ....؟

أتركم مع الصور تعلقون عليها

http://upload.9q9q.net/image/371sroJ...-----.gif.html

http://upload.9q9q.net/image/bda53zj...-----.gif.html

الخلاصة

اليوم أكملت لكم دينكم وأتممت عليكم نعمتي ورضيت لكم الإسلام ديناً
. ومن النعم علينا نعمتا الأمن من الخوف ، والإطعام من الجوع ، ولا يعرف قدر هاتين النعمتين إلا من فقدهما .
اذا ذهبنا إلى الفقهاء نستفتيهم في حكم الإسراف في الطعام والشراب لأفتونا بالحرمة قطعا؛ لأن نهي الإسلام عن الإسراف واضح وصريح

س / هل تستطيع الاستغناء عن المطاعم ؟
س / لماذا نطبخ في بيوتنا وأولادنا يأكلون من المطاعم .؟
س / هل لكثرة المطاعم وتوفرها في كل مكان سبب في ارتفاع الاسعار .
س/ هل تثق في نظافة هذه المطاعم .؟
س / دائما نقول مافي أحسن من طبخ البيت هل المقوله هاذي في وقتنا اصبحت صحيحة .؟ وهل نطبقها .؟

ولكم خالص الشكر والتقدير وأنا آسف على الإطالة .