#1  
قديم 01/12/2007, 05:34 PM
زعيــم متواصــل
تاريخ التسجيل: 29/03/2007
مشاركات: 85
Icon18 اجمل ماقيل في ياسر ......!!!!

السلام عليكم ورحمه الله وبركاته



احتراما للحقوق القصيده بس منقوله




تقبلوها كما هي عفوية وكيبورديه حين رؤيتي للنجم ياسر القحطاني عبر شاشات التلفاز يتوج كافضل لاعب آسيوي عام 2007


الملاعب تكتسي الخضره ولكـن ماتـزال
تفتقد لأجمل عناصر تلعب الفـن الاصيـل
..
ومن عرفنا هالنوادي مارأينا مـن جمـال
الا من كم شخص متعنصر لناديه البخيـل
..
لكن الله تمم الأنسان في عقـل(ن) يقـال
انه يتنور على دربـه .. بمقياسـه يكيـل
..
وانا ماني شخص كامل يغلب الطبع انفعال
ترجمة لإحساس سائد في شعوري ياجَميل
..
الزعامة شي ثابت تنطبـع بإسـم الهـلال
والهلالي يابشر عالي مثل سعـف النخيـل
..
مايطولـة اي حاسـد لإن مافيهـا مجـال
قد سمعتوا يابشر شخص شرا القمرا بليل ؟
..
دام خلفه سادة السادات وشيـوخ الرجـال
قولهم بافعالهم وياجيـل خبّـر كـل جيـل
..
القصايد لو شدت بأفراحنا صـارت خيـال
لإنها تحكي بواقع وتمطر الاهـداف حيـل
..
من يوسف حد سامي وانت ياياسر لحـال
جائزتك اليوم حاجة مـن كثيـرك يانبيـل
..
ولايهون محمد الشلهوب فخـرك بالكمـال
كل سنه وحنا نتصدر آسيا بفعل(ن) يخيـل
..
كني اسمع كم كاس(ن) يتعب ينادي تعـال
يتشرف بإرتفاعـة بيـن اياديكـم بحيـل
..
والزعامة شي ثابت تنطبع بإسـم الهـلال
والهلالي يابشر عالي مثل سعـف النخيـل


ولاهوب قصور في جميع الأندية


بروح .. فهد المهوس





ماقصرت يافهد المهوس على المشاعر الطيبه


والكيبورديه الصادقه


فالف تحيه لك ياعزيزي







والعذر والسموحه يالزعماء اذا هالقصيده مكرره

مع ان القصيده جت بالوقت الضايع
بس حازتن بنفسي لي يومين ودي انزله بس المنتدى يعلق



عاد يوم فتح قلت والله مارد اللي بخاطرك يالرسمي


ودي اسولف جالس لحالي طفشان <<< ياكثر قرق هالولد

وابي اوسع صدري واصدورك قبل مبارات الاتي
عاد لاتفشلوننا بالردود <<< ذليتنا بالقصيده اخلص


الموهم اللي ابي منكم يالزعماء انكم تفزعون وتدبرون لي واسطه

بالبعثات


<<<< بدينا بالشحده

..................................

فيه احد منكم ماسوى هالحركه وهو صغير,, وكم مره انطق بسببها؟؟!





الله يذكرت بالخير يامنيف مثل لقافته


منيف هذا صديقي ايام سادس ابتدائى هو يشجع النصر وفنان كوره وكنا ماندعيه الا براهيم ماطر
دينمو منتخب مدرستنا ...

دايم انا وياه شيل وحط بسبب الهلال والنصر

اذا فاذ النصر... يومين ما اروح للمدرسه... واذا درست اتصدد عنوه



والعكس صحيح بس هو الله يهداه اذا غاب... يروح ينام بالمسجد



ودايم يقفشوه ابوه اذا جا... يذن لصلاه الظهر


اما انا اروح للمستوصف اللي بجنب المدرسه


واطق النومه... بانتظار النساء ....


وشلون اقابل منيف وحننا خسرانين من النصر
وشلون بالله شلون


كارثه ..



الله يالدنيا يازين اول ...



عاد كفشتن مرت جارنا ونا نيم بقسم النساء بالمستوصف

عاد ماعمرت نمت بالمستوصف الا مرتين يعني

هزيمتين ...


وهي رايحه لبيتة مرت بيتنا ...وعلمت امي وعلى طول الخبر باذن ابوي

يادي المصيبه

ومدنن مدن... ادب بي الحاره كل..ه بس اشواء منيف مهو بحارتنا


ولا تسان ما انسى فشيلته ..


خسران الهلال ومدبوغ ...



عاد بعد الدبغه جاء وقت التحقيق ...


وين انت رايح ؟؟
وكم مره نمت بالمستوصف ؟؟
وليش تهج من المدرسه؟؟؟
اذا فيه احد يضايقك علمنا ؟؟؟ عاد تخبرون دب واذا استحيت يسودن شدوقي لازم يخافون على الناس مني


زمن هالاسئله اللي انت خابرين



وانا اصيح من شي توطانن الشايب الله يطول بعمره

قلت لهم السالفه اني انا هلالي ومنيف نصراوي

واستحي اروح للمدرسه بعد هزيمه الهلال

وشلون اواجهه وحنا مهزومين


وشرحت لوه السالفه من الى

وبالماريه بعد علمته ان منيف ينام بالمسجد وطب عليه ابوه

طبعا كل شي ببراءه الاطفال


(( قال اشواء انك ماشجعت الجبلين تسان الى الحين مابديت دراسه ))


طبعا الوالد حتماوي متعصب ...

ودايم يقولي خل اسجلك بالطائي جودو


وبعد ماتقطع حلقي من شي حلفتوه

اخيرا اقتنع واصدر قرار .....!!!!!

اي مبارات ينهزم به الهلال من النصر لاتروح للمدرسه .



ديموقراطيه متاخره شوي بس تنفع



طبعا هالقرار هو اللي وقف دموعي


الموهم قبل مبارات الهلال والنصر



اللي انتهت اربعه اربعه



ذركرونه ولا اذكركم



يوم يقول المعلق الجابر



موبارات كوبار



وقام يمدح تركي العواد << تسان ماخانتن الذاكره



لين صكه بعين وجاء هدق النصر الرابع



من عقبه حقدت على المعلق الجابر



نرجع للموضوع



قبل المبارات صلينا العصر وجينا بالحاره



طقينا الكوره بالزفلت ونا معلق علم الهلال



على باب مدرسه البنات وكاتب



الفيلسوف 15

ابو يعقوب

ومن هالعبارات


طبعا بخاخ بويه



طبعا كل الحاره هلاليه الا واحد اتحادي الله يذكره بالخير

سوداني من سوادنه كرنتينا ..

عاد اكا الوقت الكوره الهلال والنصر والطائي والجبلين

بس وشو الاتي واللشباب خرابيط مجمعه


هذا اعتقادنا ويمكن يكون صحيح ...


نطق الكوره نلعب مواصير لين المغرب



طبعا كلن يقلد لاعبه المفضل



اذا ضرب الكوره بالماصوره



انا كنت اقلد ثنين ابويعقوب



واقلد ماجد عبدالله عاد ابو عبدالله اغليه غلاء
اذا رفع يده عقب الهدف وخاصه اذا صار لابس الشعار الاخضر

والمعلق ناصر الاحمد

ياااااااااااا الله اجدع عندي كيس فصفص وترمس شاهي واتركن


الموهم بعد صلاه المغرب ياتي الاستديو التحليلي



على عتبه كراج ابو سعود جارنا



نجلس نحلل لين يذن العشاء



نصلي واول مانطلع
من المسجد

على طول بقاله الحاره

اذا تخبرونه

والغريبه بقالات الحواري مايبيعون الا
عسكريم او ماجي مكعبات
ولا الفصفص المصري

القط لي كم كيس فصفص وللبيت
ادور الغرفه ...

والقط تلفزيون كمبيوتر العائله اذا تخبرونه
(( اللي تفر بيدك قناه 1 و 2 و3 الى 9 وكلهن قنوات نمل الا وحده تسان ماخانتن الذاكره رقم 5

الوان قوس قزح )))

والقط سيم ثياب عشان انتل (( اريل )) القط البث

ازبط الاريل لين يشنكل بستاره النافذه

ويصفي وتبدى الموسيقى للمبارات

مع الموسيقى تبدى تتوتر وتبرد رجليك

وتفرك يديك والحماس وتشوف اللعيبه

ينزلون وكان يعجبن مره محيسن الجمعان
كنت اتمنى انه بالهلال ...

بدت المبارت ومع كل هدف انزل من غرفتي

وافحط بالصاله ابي اقهر اخوي الكبير

نصراوي الله لا يبلانا

مع الهدف الثالث جيت طاير مع صراخ ولجه يحقلي فرحان

اول ماقربت لباب الصاله

الا كاسه الشاهي تمشي مليون <<< طنقر

ولحسن حظي تفاديت الكاسه وديورت لغرفتي

مابدهاش
العمر ياشامان ....



الموهم

بعد ماجابو التعادل قفلت معي

واكيد انه قفلت مع اي هلالي

هذاك الوقت ويعتبره هزيمه

وخصوصا انك متقدم 4 ويعادلونك

والله الى الحين بين عيوني تسديده محيسن الجمعان

من الطرف اليسار وماخذ زاويه منحرفه باتجاه العواد

لقطات كانها شريط ذكريات ..

الله والعالم تلخبطت اشرطه الذكريات عندي لاكن تحملونن وصححو لي

الكبر شين ...

بعد المبارات تصوت امي الله يطول بعمرها

تعال العشاء

ونا زعلان قلت مابيه

مع ان العشاء شي هذاك اليوم

تونا ذابحين خروف

ومسويته الوالده مرق لحم

مع حميسه مع كبده وكلاوي ........



دماااااار وانا مشتهيه بس خايف يتمهزابي اخوي الكبير .............



وهمن عاد ادموعي اربع اربع ...........




ترونن حساس بالحيل


قامت الوالده طول الله بعمرها



وخذت لي من العشاء بصحن وحطته عند الغرفه



قالت هذا عشاك



قلت مابيه مسوي نفسي زعلان



وهي تقول ياوليده تعش بكرا تفوزون انشالله


قلب الام الحنون



قلت مابيه ياميمتي ابي انام



قالت كيفك



وراحت



اول ماراحت تحسفت وانا ميت جوع


جلست بالغرفه الى الساعه 12 قلت الحين نامو خل انزل



ادور لي شي بالمطبخ




اول مافتحت باب الغرفه

ونا اتلفت يمين يسار


مابوه احد


واخذ نظره للطريق



والا الوالده حاطه لي



صحن العشا من ساعتين عند الغرفه



قلت جابك الله



واخذه واطقطه يوم خلصت



ونا اطلعه عند الباب



وادب النومه



مادريت الا ابوي يرفشن قم يالثور



قم تاخرت عن المدرسه



وانا اقوم يايبه صح حنا متفقين اذا انهزم الهلال اغيب



قال ايه اذا انهزم وامس تعادل



والله يايبه عده هزيمه والله



ومع علباي يتلن وبحركه ار بي جي برجله



الا انا برا الغرفه

ووسط تهديد من الوالد

اسمع تر ابي امر المدرسه بعد شوين اذا مالقيتك ابي ارميك

<<<كنه يقرا اللي براسي ...

قلت طيب ومنيف ؟؟؟؟

قال ..

اقول قدامي انا اللي ابي اوديك للمدرسه

دخلت للمدرسه ودخل ابوي عند المدير ونا رحت للفصل

وكل همي من منيف بالفسحه مع العلم انه مهو بفصلي ...

بس عندي حل ..

اذا قال لي شفت المبارات اقول لا وبكذا اقطع السالفه ..

صفرت الفسحه وصفينا طابور على المقصف

واحد فلافل وواحد عصير ...
منيف ماجاء الى الحين
قمنا نجمع صور سنتوب
ونلزق بفنايلنا عشان اذا رجعنا للبيت نلزق
بالكتيب .. هذا تخبرونه








ياليت ان الزمن يرجع ورى ولا الليالي تدور

ويرجع وقتنا الأول وننعم في بساطتنا





ااااااه ياليت



جاء منيف وبدت مشاده الكلام بالهلال والنصر

وبالاخير ارتفع ضغطي وانا اتلمس مخباي

ومنيف طارت عيونه يوم شافن افتش بمخباي
وانا اطلع يدي ويبعد منيف...

واقوله تلعب
معي بس طوابق ...

لعبه الطوابق (( طابق ببسي تعبي نصه اعزكم الله تراب وتحاول توقفه صح ))

اعتقد كلكم شيبان تعرفونه

وبهذا ينتهي خلافنا بنهايه الفسحه ....

انا الحين دخت واستدار راسي من الكتابه

ولاكن حبيت انقل لكم القصيده اللي اعجبتن لانكم اعجبتونن

وبالمناسبه نبي موقع ولا رابط باجماعه الخير نبي نشوف المبارات

والباقي من الموضوع حبيت اني استذكر معكم الماضي الجميل للرياضه

وكيف كنا نستمتع بها بكل روح رياضيه

والف تحيه لك يامنيف

اتمنى ان تكون بالف صحه واعافيه
واتمنى ان التقي بك في اقرب فرصه
لقد فرق الزمن في مابيننا
فاخر مره رايتك بها سنه ثاني متوسط
في المتوسطه السادسه
عسى الله ان يجمعنا بك في الدارين

........................................
بالتوفيق يالزعيم الكره والى الامام








اضافة رد مع اقتباس
  #2  
قديم 01/12/2007, 05:46 PM
موقوف
تاريخ التسجيل: 26/01/2006
المكان: المدينة المنورة ما اغيرها لو على موتي
مشاركات: 1,158
هههههههههههههههههههههههههههههههههههههههههههههههههههههههههههههههههههههههههه
موضوعك حلووووووووووووووووووووووووووووووو متلك
يسلموووووووووووووووووووووووووووووووو
اضافة رد مع اقتباس
  #3  
قديم 01/12/2007, 05:47 PM
زعيــم متواصــل
تاريخ التسجيل: 29/03/2007
مشاركات: 85
ما امدانن انزل الموضوع الا باخر الصفحه

ماشالله عليكم ..
اضافة رد مع اقتباس
  #4  
قديم 01/12/2007, 05:48 PM
زعيــم مميــز
تاريخ التسجيل: 08/09/2005
المكان: آلريـ k.s.a ـآض~..
مشاركات: 5,634
تسلم يالغلا
اضافة رد مع اقتباس
  #5  
قديم 01/12/2007, 05:48 PM
زعيــم متواصــل
تاريخ التسجيل: 29/03/2007
مشاركات: 85
إقتباس
الرسالة الأصلية كتبت بواسطة أسطـــ سامي ــــورة
هههههههههههههههههههههههههههههههههههههههههههههههههههههههههههههههههههههههههه
موضوعك حلووووووووووووووووووووووووووووووو متلك
يسلموووووووووووووووووووووووووووووووو



الله يحلي ايامك يالاسطوره

يو ار ولكم
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 01:04 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube