مرحبا ومسهلا أخوي الهاوي ..!!


لا ويلعبون علينا بعد يقولون الببسي مصنوع وطني اي هين

بصراحه ماعندي اضافة وخصوصا المواضيع اللي فيها ارقام كثيرة

لأن الدكتور مانعني من اني اسمع مبلغ اكثر من 5 الاف ولا بيغمى علي ..!!

لكن اذا تبينا نشارك في مشروع البربري وننزله كشركه مساهمه
ونعط بفلوس المساهمين ماعندك مشكله ..!!


اخوي الهاوي مشكور بعد الارقام التي في الموضوع على طرحك ..!!







.

ღ سيموღ


يا هلا والله سهلا

إقتباس ومن ثمَ تحاول تقليل هالشيء من خلال دراسات وأحصائيات يتم دراستها ..!

تتحداني بأننا من أحسن دول العالم في استقطاب أفضل الاستشاريين المختصين في جراء الدراسات بشتى أنواعها..

لكن المعضلة تكمن بأن هؤلاء الخبراء يأخذون رسوم إجراء هذه الدراسات إلى أوطانهم، ونحن نأخذ مخرجاتهم وتوصياتهم القيمة لتحفظ في الأرشيف الالكتروني المتطور!!


الله يعافيك وتشكرااتي لك


_______________________


تغريد

هلا وسهلا

إقتباس بفهم الموضوع وبسوي عليه دراسه وبرجع

ولا مره شاركتي بموضوع لي وفهمتي وش السالفة!!

أجل آخرتها صرت أسوّق لماركات بالمنتدى

الله يرحم ضعفك يالبربري! والله وصرت ماركه

ما علينا خلينا ننتظر نتائج دراستك

وأسألك للمره العشرطعش الخلل عندي ولا عندك


تشكرااتي لك
_______________________


الهنوووف

هلا وسهلا بالهنوف اللي ما عمرها غابت عن المنتدى أبد

إقتباس وصناعتنا هنا مو ذاك الزود اذا اهل البلد مايشترون منها تبي غيرنا يشتري مننا

صحيح أغلب منتجاتنا( القليلة) جودتها ضعيفة، لكن أشوف أنه مطلوب منا كمواطنين دعمها خصوصاً وأننا مازلنا في البدايات..

إذا طلعتي من بيتكم حاولي تتشوفين لسيارة اسمها TATA وشوفي من اللي يسوقها؟
أو روحي مع أخوك للمدرسة الهندية اللي بشرق الرياض فترة الصباح وحاولي تحصرين عدد السيارات من هذا النوع

السيارة هذي صناعه هندية 100% وتعتبر سيارة عاديه جداً لكن الهنود يشترونها كدعم لمنتجهم الوطني، وعندنا خبير هندي كاااش عنده سيارتين، مرسيدس وتاتا

كل شي يبي له صبر..

إقتباس >>>الا غلا الاسعار له دخل بالاقتصاد قوولوو ايه لو انه لا

لأ مهوب صحيح، غلاء الأسعار مرتبط بمستوى مباريات الديربي

إقتباس ويالله شد حيلك انت وشباب ديرتك واثبتووا كفاءتكم علشان نقدر نصدر للدول الثانيه

إن شاء الله سمّي بس أبي سلف مليون طال عمرك


الله يسلمك ويحفظك وتشكرااتي لك

_______________________

رااجح بإذن الله،،

قرقاص

هلا وغلا بالقديم

إقتباس لأني من فترة وهو يدور براسي خاصة لما رجعت من النمسا وشفت البربري اللي كبر الخروف النجدي مرتين من الخير اللي هو فيه هناك على جبال خضراء مثل جبال هايدي

أجل عندهم برابر ، أخاف إنك شايف كلاب بوليسية>> يمزح

عموماً اللي أعرفه أن الخروف البربري يستورد من دول إفريقيا المختلفة..

إقتباس فيه احد قد شاف بربري راسه ابيض وجسمه اسود

لا ، هذا فل كامل ما يجي إلا طلبيه..

استغفر الله العظيم.

إقتباس والسؤال الأخر هل للون الخروف البربري الأسود والأبيض علاقة بالماركة الشهيرة burberry من ناحية الخطوط البيضاء والسوداء

يحوّل السؤال إلى الأخت تغريد..

إقتباس ملاحظة : ترى اللي لابس بيجامة مهوب انا

أشوى إنك قلت لنا، تصدق فيه بوهه منك


تشكراات على ردك الوسيع الصدر


________________________

الماسه الزرقاء


هلا وسهلا ..

إقتباس اعتقد البيروقراطية والروتين القاتل هي أساس الفشل الذي يطال مؤسساتنا بمختلف أنواعها !! , أو ربما وضع أشخاص في المكان غير الملائم لهم !!

قد تكون هذه أحد الأسباب، لكني أتصور أن ذلك عائد لسببين رئيسيين، الأول كما ذكرت سابقاً قلة الأيدي العاملة وعدم فعالية الجهات المعنية بالتدريب الصناعي لشباب البلد، والثاني قلة الدعم الذي يلقاه أصحاب المشاريع التنموية الربحية من أرباب القطاع الخاص بل محاربتهم أحياناً بطرقٍ ملتويه!

إقتباس أو قد يكون للتطور السريع الذي رافق دولتنا السعودية سبب في عشوائية المؤسسات لدينا بشكل عام !!

ممكن أعرف منك كيف كان هذا التطور سبباً في عشوائية وتخبط المؤسسات الحكومية؟؟

وعموماً في حال بلدنا أُفضـّل استخدام عبارة " النهضة العمرانية " بدلاً من إطلاق كلمة تطور على عمومها..

إقتباس بالله أحد يتبرع لنا بثلاجته نفكها ونشوف كيف صنعوها ونصنع مثلها ,وبكذا تقل وارداتنا

متأكد أن بيننا الآلاف ممن يستمتعون بذلك، لكن وين الجهة اللي ترعاهم بفعالية وتأهلهم بكفاءة؟ و وين المصانع اللي تفتح لهم أبوابها؟

إقتباس سوق الغنم !!! و موقع بحث !! وانجليزي !! والله وتطورت الأغنام ,, إلا جد شيء غريب !! وش السالفة من صاحب الموقع

أما الرابط هذا فسالفته غريبه بالحيل !!

هالرابط ذا تأليف من دماغي دبليودبليودبليو دوت برابر دوت سوق الغنم دوت كم

وبعد ما نزلته حاولت أفتحه وطلعت لي رسالة مفادها إن الرابط غير صحيح وكذا قلت تمام ونزلت الموضوع ومشيت..

بعد ما قريت ردك هنا ومكتوب فيه محرك بحث!!! طارت عيوني واستغربت ورحت أفتحه من جديد وتفاجأت بالنتائج

وأنا هنا أخلي مسؤوليتي من النتائج المترتبة على استخدام الرابط المذكور، والله العالم أنه مسكون وفيه حموله من الجن اللهم عافنا منهم


الله يعافيكوتشكرااتي على إضافتك

________________________

f*y*d

هلا نوبتن ثانيه..

إقتباس قاايلك ما تحطمت من اول مرة بس انت بالك طويل

والله هه هه كني بديت أحبط شويتين

إقتباس هاوي ثاني مرة اكتب بالحركات

إن شاء الله إذا أخذت إجازه من العمل أبكتب لك إدغام بغنه بعد مهوب بس حركات كم عندنا من شايب فياض

تشكرااتي لتفهمك

________________________


عبث طفلة

هلا وسهلا ..

الله يرضى عليك ويحفظك

وهالمعلومات والأرقام ما هي من عندي ولا لي جهد فيها، ماقمت به هو مجرد اختصار ونقل لمعلومات اجتهد في حصرها المعنيون في مصلحة الإحصاءات العامة والمعلومات ، وهم من يستحقون الشكر..

تشكرااتي لك

________________________




راااجع إن الله شاء وأراد،،

لي عودةةةههه

اخوي اذا نجح معك مشروع البرابر ارسلى رساله على الايميل مفصله بالمشروع البرابر

لي رجعـة.!!

فرصه ضايعه


ياهلا والله وسهلا

إقتباس تقول أن مدينه تبوك ثاني مدينه بعد هولندا في انتاج الزهور وأنها تصدر سنويا ما يزيد على 19 مليون زهرة

أعرف أن تبوك مدينة مشهورة بمشاتل الورود، بس أنها تصدر 19 مليون زهره سنوياً وأنها ثاني مدينة بعد دولة هولندا! فهذا ما لا أعلمه، وأحس إن ودي أشجبه وأستنكره لكن التسرع مهوب زين..

إقتباس أبشركم فلحنا بشي بس مع ذلك نروح نستورد ورد

يمكن قصدك نستورد ورود صناعية ، وما أفتي لكن أشك في موضوع استيراد أزهار طبيعية!

إقتباس أجل نصدر نفطنا ويرجعون يصنعونه ويصدرون لنا ورانا مانصنعه حنا

تكلمت عن أبرز الأسباب من وجهة نظري، وعموماً حسب ما أدري به إن عندنا مصانع بلاستيك كثيره لكن مازالت جودتها لك عليها وأتمنى أن تُدعم لتتطور ويتحسن إنتاجها، وأتذكر مره طالعين للبر وصبيت شاهي بكاس بلاستك وماااع الكأس بطريقه غريبه وتعفط وغدا تقل ضرس عجوز! يوم قلبته أبشوف وين مصنوع طلع بالسعوديه والله إني استحيت من القهر وقتها..

إقتباس ياخي يازين الصين بس مايحقرون أعمارهم أبد كلش مقلدينه من أكبر شي لأصغر شي

مليار عددهم وإذا هم ما صنعوا كل شي أجل من يصنع!

وعلى فكرة قرأت في أحد الصحف أن الكثير من المصانع في الصين تحاول التقليل من استخدام آليات التصنيع بهدف توظيف أكبر عدد من الأيدي العاملة، والصراحة أعجبت بأسلوبهم فرغم أنهم استغنوا عن الآليات الحديثه إلا أنهم ضفوا شبابهم من الشوارع وخلوهم ناس منتجين

إقتباس وش السالفه ؟؟؟ أنا بسألك ليش أضفت هالفقرة

قلت لكم وشي سالفة الرابط المذكور

أما ليش أضفت هالفقره ، فبعد استعراض واردات المملكة بمختلف أنواعها بما فيها اللحوم، بغيت أقول أن أي تاجر أو صاحب نشاط بإمكانه استيراد ما يشاء من المتردية والنطيحة ( مع حفظي لحقوق البرابر) والحصول على تصريح بذلك بحجة أننا مقبلين على عيد الأضحى المبارك والطلب كاااثر، دون النظر إلى أي اعتبارات أخرى!

وكنت أنتظر أحد الأعضاء يقول لي ترى العيد قرب عشان أضمن نجاح المشروع


الله يعافيك وتشكرااتي لك


_______________________



leo messi


يا هلا والله وغلا ..

إقتباس لا ويلعبون علينا بعد يقولون الببسي مصنوع وطني

والله ما أدري أنت أبخص أخاف أقول شي وتزعل علينا، لكن الببس أخو السفن

إقتباس لكن اذا تبينا نشارك في مشروع البربري وننزله كشركه مساهمه ونعط بفلوس المساهمين ماعندك مشكله ..!!

أجل عجل تكفى نبي نطرحه للاكتتاب قبل العيد، عشان نقحش كروش الضعوف وننشأ بها مصنع سفن آب مستقل بحد ذاته


العفو ياغالي وتشكرااتي لك


_______________________


ابونوف الهلالى

هلا وسهلا

إقتباس اخوي اذا نجح معك مشروع البرابر ارسلى رساله على الايميل مفصله بالمشروع البرابر

ما فيه شي اسمه اذا نجح اقسموا لي تبي تشترك طب معنا من دي الوئتي

تشكراات


_______________________


هلالي في مانع


حياك الله ، وتشكراتي لمرورك