نستاهل كل اللي يصير لنا ليش نحب الهلال....فعلاً ماقصرتي ياإدارة رفعة الضغط
بسم الله الرحمن الرحيم
اليوم وكل يوم أدخل للشبكة أقول عل وعسى أشوف خبر إتمام التعاقد مع المحترف الجديد
اللي كلنا ننتظره ولكن للأسف أدخل وما أشوف ألا اجتهادات وأماني!!!!
كل يوم نقول انتهت القصة وخلاص وقعوا مع فلان وكل يوم اسم جديد
والمشكلة ماندري للحين وقعوا مع كالون والا لا
نشوف صور ومعلومات لكن خبر تعاقد أكيد أو اتفاق لاوالله ماشفنا
أنا ماأدري هل ذنبنا أننا جمهور هلالي لحد الجنون يعني نهتم كثير لنادينا
هل ذنبنا أننا نعشق هالنادي عشق أزلي
إذا الحب يتعب بهالشكل ولا أحد يقدره من إدارة النادي نبتعد أحسن
ماأقول ننسى الحب لأنه صعب هذا حب يجري في دم كل هلالي
لكن نبتعد ونكون سلبيين إذا شفنا الهلال يلعب شجعنا والا ماندور عنه ولا نهتم
لأمر معشوقنا.
إدارة النادي ترفع الضغط تشوف هاللغط وتشوف هالحوسة وساكته
ياأخي قدر جمهورك بين لهم وش قاعد يصير
لاتتركنا بهالشكل
ننتظر وكل يوم يطلع لنا واحد تعاقدو مع فلان وكنسلوا علان
على طاري التعاقد قبل أمس عضوة أكدت توقيع المنتشري لا وتقول بيتم الفجر
وانتظروا عاد الفجر والله لوهم بيطلعون منه جني وفيه ناس مصدقينها وهذي مشكلة
حتى اللي ماعندهم سالفة قاموا يصرحون وأنا ماأشره عليها هي أو غيرها
لاوالله الشرهة على إدارة ماتدري وش السالفة أصلاً إدارة بالاسم وعسى الله يستر
كنا مع الإدارة قلباً وقالباً يوم كان فيه عمل ولكن مادام الدعوى صارت خربطة
وصارت الإدارة بس موجودة للفرجة فلاوالله بنتكلم وبنصرخ
حب الهلال له سنين في قلوبنا مانبي يجينا من يمسح هالحب ويخلينا مثل
بعض الأندرية مابقى نادي ماشجعوه والبركة فينا كرهناهم في أنديتهم ويارب ماتنقلب
الآية.
أنا أطالب هالإدارة باسمي وباسم كل هلالي أن توضح لنا كل مايحدث من تعاقدات
من مفاوضات ولاتقولون تخاف أحد يخرب الصفقة ترى هذا كلام فاضي
كل فشل نعلقه في الأخرين كل غلطة نسويها نعلقها على غيرنا
الجمهور أول يمكن يمشي لكن الحين لا الجمهور واعي وماحد يقدر يضحك عليه
وإذا كان هذي حجة متمسكين فيها بنمشيها لايقولون ولايصرحون ولكن لابد من تكذيب
الأخبار اللي تقلب المخ وتخلي الجمهور يضيع بين مصدق ومكذب
يعني نبي نكون على بينه
ومن ناحية إدارة الأخبار فهي مطالبة أكثر بحذف كل موضوع فيه خبر تعاقد غير صحيح
والله ملينا ملينا ملييييييييييييييييييييييييييييييييييييييييييييييييييييينا
والله ماكتبت كل ماكتبت ألا لأني فعلاً أندبلت كبدي من الكذب والضحك على العقول
لا من إدارة ولا من بعض الأعضاء وياقلب لاتحزن.
تحياتي
الوضع الشجري
