السلام عليكم ورحمة الله وبركاته .

هذه قصة قديمة حصلت لي شخصياً .

مو قديمه مررره >>> قبل سنة تقريباً

طرحت هذه القصة في وقتها .

ولكن فيه واحد أزعجني وقال لي وقتها حرام ما تكتبها بمنتدى المجلس

تعرفون وقتها كنت ما أدخل المجلس العام نهائياً

ولكن بعد ما دخلت الآن وأحسب نفسي إن شاء الله إنني واحد من إخوان الصغار منكم .
وإبن من أبناء الكبار ما أقصد أبو طلال ورده .

المهم هذه القصة وللمعلومية فهي حدثت بعد مباراة الهلال والشباب 4/0 واللي كانت مسرحية أكثر من كونها مباراة

إقتباس السلام عليكم ورحمة الله وبركاته وشلونكم كلكم عساكم بخير ومرتاحين ,,, اليوم ما أدري وش فيني براسي إني أكتب موضوع مدري ليش ,,, مع إن الشباب باللجنة الإعلامية موصيني بشغلة لكن والله براسي إني أكتب موضوع ,,, المهم مالكم بالطويلة جاء على بالي إني أكتب موضوع عن قصة جريدة الرياضية تلك الجريدة الوردية اللون هذا يا طويلين العمر والسلامة أمس الجمعة وفي تمام الساعة حدعش صباحاً أطلقت صافرات الإنذار بالبيت إيذاناً بقرب صلاة الجمعة .... جميع أساليب الإيقاض من النوم أستخدموها أهلي طبعاً النومة كانت ثقيلة لأني سهران فرحان برباعية الهلال على الشباب . المهم يوم صحصحت من النوم وتروشت وطلعت للصلاة . وبعد الصلاة بدأت رحلة البحث عن جريدة الرياضية >>>> مو دعاية أبد أبد . دخلت البقالة الأولى وأخذت عصير وقلت لراعي البقالة صديق واحد رياضية رد علي مافيه رياضية كلاص . قلت له ليش سؤال ما أدري وش يبي ؟؟؟ طلعت للبقالة الثانية وكانوا فيه شباب يتسامرون >>> الكلمة مو محلها الظهر ولكن المعنى ببطن الشاعر قلت فيه رياضية ونفس الجواب الأول . مافيه كلاص قالي واحد من الشباب : هلالي الأخ. قلت الحمد لله. قال الله يخلف عليكم صدقوني الهندي جلس يضحك لكن تأكدت إن الهندي ما يضحك علي يضحك على هالمتخلف طلعت للبقالة الثالثة واللي يبيع فيها يماني . قلت صديق فيه رياضية . قال لا الرياضية خلصت من بدري . تفاجأت من اللهجة وجلست أتأسف له قلت معليش فكرت إنك هندي. قال لا عادي >>>>>>> شكله متعود أبو الشباب جلست أدردش معه : من متى خلصت الرياضية صدقوني قال : إذا فاز الهلال وبمباراة كبيرة وبإجازة الأسبوع نحرص نفتح البقالة بدري ونحط الرياضية برى تعرف يجي الواحد يبغى الرياضية ويشتري معها كم حاجة ونستفيد من فوز الهلال . المهم قلت له وش رايك بالهلال؟ قال أهم شي الفلوس شكل أبو يمن البقالة له وحنا ياغافل لك الله . قبل ما امشي قال ما تشتري حاجة قلت بس متقهوي الله يسلمك طلعت للبقالة اللي بعدها وأخيراً قلت أنتهت المشكلة شاهدت واحد واقف ويقرأ الرياضية الأخيرة جلست أنتظره يخلص والرجال منهمك بالقرائة . تصدقون أتوقع حتى اعلانات المفقودات قراها كلها وأنا جالس أنتظر وشريت عصير وأتأكد من عباراة ممنوع القرائة هي موجودة والا لا وسويت ذكي رحت عند الجرايد وأخذت جريدة الاقتصادية وأول ما فتحتها قلت للهندي صديق فيه مشكلة أنا يقرأ هذا جريدة قال ما في مشكل قلت طيب ليش أنت فيه يحط ممنوع قراءة >>> أبغى الدلخ اللي جنبي يفهم قال الهندي هذا كفيل ما في مخ شكله ما استلم الراتب وخربها الهندي المهم أتت ساعة الصفر وسكر الجريدة اخونا في الله ويصفطها ويا خذها معه ويحاسب عليها لعنبوك والله لو أنها 200 صفحة كا امداك تخلصها بس شكله عرف أني ناوي على الوردية قلت والله ما خليها له طلع من البقالة وأدار سلف سيارته ومشى في أمان الله وأمشي وراه وأحده على الرصيف علشان علشان يشرب من نفس الكأس التي ارتويت منها رحت للبقالة اللي بعدها وأسئل السؤال الصعب فيه رياضية قال لا . وألمح شي وردي قلت هذي مو الرياضية قال مهجوز يابو هنود حرام عليك صار مثل اللي يدخلون الملعب العصر ويحجزون ألف مكان قلت أنا فيه يشتري خمسة ريال >>>>>>>> أبوك يالمطنوخ قال مهجوز قلت عشرة ريال قال مهجوز قلت : 15 ريال قال مهجوز انقهرت من هالهندي وقلت هذي خمسة بس علمني من اللي حاجزها والولاء اللي عندك له قال هذا حق بيبي حق كفيل ط قلت معذور يالهندي الشرهة علي اللي وصلت قيمتها 15 وهي ما تسوى المهم قلت بلاش من الرياضية أصلاً شبكة الزعيم تنزلها لا ولهم موقع >>>> جالس أعزي نفسي أتصلت على أهلي قلت تبغون شي من برى قالوا ما شاء الله عليك كل هذا خشوع بالمسجد أو نمت بالمسجد قلت لا يكثر تبغون شي قالوا جب لك غدا لأن الغدا خلص رحت للرومانسية وطلبت مدفون لحم >>> أبكافأ نفسي على التعب اللي تعبته وبعد ما خلصت شفت الجلسة اللي جنبي وفيه ثلاثة واحد منهم يقرأ الرياضية عاد أنا ما أنعطى وجه قلت ما عليش يالشيخ ممكن الرياضية إذا خلصت قال تراها لي مو للمطعم قلت أدري والا متى الرومانسية يحطون الرياضية ماكدونالدز ما حطوها تحطها الرومانسية قال آسف أخوي مقدر أبخذها للبيت أبخلي أخوي يقراها جلست أترجأ فيه وهو يعتذر بإبتسامة والله لو اني أطلبك الجنة المهم رحت للبيت وكرهت الرياضية وكرهت اللون الوردي وقلت كله منك يالهلال وكله منك يا جمهور الهلال. عاد أبشركم في الليل طالع أشتري خبز للبيت وأدخل البقالة الوحيدة اللي ما دخلتها وحصلت الرياضية لكن آثرت على نفسي وحفظت كرامتي ولم آخذها ولم أقراها نهائياً