13/11/2007, 12:02 PM
|
| استشاري سابق للرياضه العربيه والعالميه | | تاريخ التسجيل: 04/08/2005 المكان: الظهران
مشاركات: 8,260
| |
السلام عليكم اخوي المشاغب
الحقيقة موضوع في الصميم , ودائما نعاني منها في الدوام او غيره
وما اخفيك ان تسبدي تلوع من اول ما اشم بخة واحد !! فيه واحد الله يستر عليه كان قدامي 6 شهور في الفصل ولا يفهم انجليزي ويسمع اني شكسبير بالانجليزي , فكل 5 دقائق يلتفت علي يسألني عن مصطلح بالانجليزي ومعه بخه من فمه
والله يا انا كنت انقرف منه لدرجة اني امر البقالة وانا جاي واشتري معي كومة علوك واول ما ادخل الفصل اعطي اللي على يميني واعطيه ( علشان ما اوضح له اني قاصده )
وماشاء الله عليك من ناحية البجاحه !! انك تطقها في وجه الواحد !!
انا ومهما كان ما اقدر اسويها , يمكن المح لكن اطقها في الوجه صعبة الا للي ريحة فمه دخان لاني ما ادخن ولله الحمد
وزي ما قال اخوي روح 10 الشلهوب ان النصيحة اذا صارت بين اكثر من 2 تصير فضيحه
واشين موقف يصير لك لما تكون في سيب ضيق ويجيك واحد يبخ عليك وانت تبعد عنه وهو يقرب , وهذي صارت لي يوم الاربعاء اللي راح لين وقعت له اللي يبغاه رغم ان مالي صلاح بس نطيت على صلاحية خويي علشان افتك منه وكلمت خويي بعدين وقلت له اعذرني تراني وقعت عنك لفلان لانه كان حاشرني بسلاحه الفتاك فاستسلمت ووقعت عنك علشان افتك منه
عموما انا استفدت صراحة من هالموضوع سالفة تنظيف اللسان , اول مرة اسمع فيها
بس المشكلة ما عندي فرشاة خاصة لذلك , فنظرا لذلك ابنضفها باظافري ( يععع )
وعلى طاري سالفة البخات والبخاخات ,
الخليفة الاموي عبدالملك بن مروان كان مشهور انه ( ابخر الفم ) ومرة من المرات اكل تفاحه وباقي فيها شوي , راح وعطى التفاحه احد زوجاته علشان يدلعها , اكيد تعرفون ان التفاح يتغير لونه الداخلي اول ما يتعرض للهواء فما بالكم ببخة قوية
المهم ان زوجته اخذت التفاحه ونظفتها بسكين !! او بالاحرى نظفت المكان اللي اكل منه عبدالملك , فسألها وقال لها ليش تسوين كذا ؟
قالت ( اميط عنها الاذى ) فطلقها !!! والله اعلم من رواية هالقصة لكني قريتها باحد كتب القصص
خلاصة الموضوع يا سيدي الفاضل ان ديننا الاسلامي الحنيف دائما يكون سباق لمثل هالامور , والنبي صلى الله عليه وسلم مربينا ومعلمنا وسيد البشر سبقنا كلنا بهالاستنتاجات لانه قال " لولا ان اشق على امتي لا اوصيتهم بالسواك "
وقال " السواك مطهرة للفم مرضاة للرب "
يعني لو اننا نتسوك ماكان بينا بخات تحوم التسبد وتسد النفس
اللهم صلي وسلم على سيدنا محمد
وشكرا لك يالمشاغب واسف جدا على الاطالة لكن موضوعك حلو وش نسوي |