هلا والله
وش أخباركم ؟؟
هاه ولمتو السنتوب والفش فاش
قبل مانبدأ الحلقة الرابعة هذي لنكات الحلقات اللي راحن
الحلقة الاولى ارعص هنـــــا الحلقــــة الثانيـــة أرعص هنــــا بعد الحلقــــة الثــــــالثــــة هنــــــــــــــــا ===============================
الحلقة الرابعة
في الحلقة الماضية وصلنا ان عدنان ولينا كانوا يتهاوشين ولينا كانت بقبضة
الرخمة علام بس علام يحب الشر علشان كذا أطلق لينا على عدنان ..
ويوم انطلقت لينا درعمت لعدنان وهي رافعتن يدها
مولمة الدبجة على وجه عدنان .
وعدنان طقته أم الركب و يبس بمكانه من الروعة .
يوم قربت لينا يدها لوجه عدنان اثرها هونت ونزلت يدها شوي == > اصبروا لاتفهمون غلط
واثرها سحبت عدنان مع فنيلته المتشققه وعدنان متنح مايدري وش الطبخة .
المهم سحبته وقالت : الهجة ياعدنان يالله هج ياعدنان .==> هج يعني انحش
ودعست لينا وتعدت عدنان وهي تناديه : يالله هج يادبشة وش تحتري .
عقبها توه يحس عدنان أن لينا ذهينه وانه ماتبي تضربه ولا شي .
بس كانت تبي تجر علام الصتيمة وتلعب عليه .
وفعلا لعبت عليه وهجت هي وعدنان لحقها ..
بس المطفوق علام ما أسكت وبدا يلاحقهم ويرمي بمسدسه .
طررررراخ طرررررراع والى عدنان جاك مجاوب
ايه والله علام رمى عدنان بالمسدس ====> طونييييين طوننننا دقة حزينة
ولاحتى وقف إبن الريح البواردي علام وبدا يرمي على لينا المسيكينة وهي ماغطة وشوشتها منتفشة .
وفجأة وقف علام عن الرمي .
يوم التفتت لينا تبي تشوف وراه وقف علام عن الرمي
لقته يامن الضربة ماسط على وجهة وفيه عمود خيمة متوسط راسه
يوم رفعت راسها شافت عبسي الذيب راكب خيل قطاع عشرة
وجايب معه فزعته وحبيبة قلبة أميرة أخت نمرو الداج .
أثر عبسي عطي الله هو اللي دبج علام النذل مع هامته قبل مايذبح لينا
وخلاه يترنح .
عاد لينا ياقليبي على طول تذكرت عدنان وقعدت تدور عليه
ومير تلقاه ماسط على خشته والدمان تخرخر من كتفه .
لينا بدت تصايح : عدنان حبيبي رد علي ياربيه
وش فيك يادافع البلا .
وبدت تنادي على عبسي وأميرة : تعالوا...تعالوا
عدنان فاطس الحقوا علينا ان لله وانا اليه راجعون .
عبسي انهبل وخنقته العبرة وبدا يصرخ : عدنان يابعدي قم لاتموت تكفى
تكفى لاتموت لاتخلين لحالي .
المهم قالت لينا : الحق ياعبسي عدنان قلبه يدق
يالله بسرعة نودية لأسعاف الشميسي .
قال عبسي : ويننا وين الشميسي ؟ خلينا نوديه لمستشفى خاص
وش رايتس نوديه مستشفى دلة .
لينا : أي شي يابن الحلال بس قم شله معي, الرجال يبي يفطس علينا وانت تبربر .
عبسي : بس تراي داج مامعي ولا قرش توي قاط مع الشباب بالاستراحة .
تدخلت أميرة وقالت : عبسي ياعمري ميخالف أنا أدفع حساب المستشفى بس خلنا نوديه .
المهم شالوا عدنان ووقفوا على الشارع العام يحترون ليموزين .
قعدوا ينتظرون ليموزين مافيه فايدة قالت لينا : يوم بغينا هالليموزينات مالقيناهم
وش السوات .
جاء عبسي وأشر لراعي ددسن غمارتين .
ووقف اشوا راعي الددسن .
ركبوا عدنان بصندوق الددسن ومعه لينا
وعبسي ركب بالغمارة قدام هو وأميرة .
وقال عبسي لراعي الددسن بالله أقرب مستشفى خاص.
قال راعي الددسن : ترى أخذ على الطلب ريالين للنفر
التفت عبسي على أميرة وقال : هاه وش رايك .؟
قالت أميرة : وشو اللي وش رايي أنت وكشرتك ؟ هذا مايبي لها راي
لو يبي خمسين عطيناه . ====> احلى يامطخطخه
قال عبسي : اوكي يااصطا توكل على الله .
قال راعي الددسن : سلامات وش فيه خويكم ؟
عبسي : أبد الله يسلمك بس خوينا تدربا مع الدرج ==> نصاب
المهم وهم رايحين للمستشفى مرو من عند نادي النصر بالعريجا==> حومت تسبودكم معليش .
المهم لينا وهي بالصندوق بدت تطبل على التنده وتقول : ياروحي يالاصفر
انهبل عبسي وقال : وجعععع لينا نصراوية ؟؟
قالت أميرة : ايه أنت ماتدري ؟
عبسي : لا والله توني ادري وبعدين ياويلها من عدنان لو يدري انها نصراوية
أميرة : أنت ماتدري أن جدها الدختور رامي كان ظهير ايسر بالنصر؟ .
عبسي : لاياشيخة وشلون طيب يلعب وعينه مبخوقة ؟.==> مبخوقه يعني مفقوعة
أميرة : أنت ماتدري من بخق عينه ؟
عبسي : لا ماادري؟؟!!! .
أميرة : أنا أقولك من بخق عينه .......في الحلقة القادمة نكمل
وعلى فكرة الحلقة الخامسة راح تكون يوم الاثنين ان شاء الله
أنتظروهــــــــــا.........
باااااااااي
ــــــــــــــــــــــــــــــــــــــــــــــــــــــــــــــــــــــــــ
جميع الحقوق مدفونــــة للجمجمـــة