1-تعرفني
2-وش تشرب
3-الأكلة المفضلة
4-وش اسمك
5-تشوف توم وجيري
6-تشوف يوغي
7-في اي مدرسة
8-عندك art
9-وش جوالك






10- اهم سؤال وش رايك بدلاختي اسئلة غبية صح انا ما ابي الا شيء واحد اشوف زعيمو فتش سابقا وسلامتكم يا احلى اعضاء

أول شئ هلا وغلا بأخوي الهاوي...
كل عام وأنت بخير قبل الزحمه>>لاياشيخه
وأنا أقول ورا المنتدى يأشرعندي اثرك منور المنتدى صار المنتدى عندي يكبس

ثاني شئ ماشاء الله الهنوف قشت أسئلتي كلها اللي كانت في مخيخي وحطتها مايحتاج>>كتبت عشر طعشر سؤال كل ماكتبت ونزلت أشوف الهنوف كاتبته قلت مافيه الابعصر مخي وأخرف لي سؤال

طلعت لي بعضا من الأسئله اللي تقرقع في بالي شوي:>>بدت تشتغل اللقافه
*ماهو أفضل كتاب قرأته..؟؟!!
*مارأيك بحال أمتنا وشبابنا في زمننا هذا..؟!
*برأيك اخي ماهو الفرق بين المثقف والفيلسوف..؟؟!!
*من هو الشخص الذي تعتبره الأخ الذي لم تلده أمك؟؟>>ياشين اللي يتسلفس على غير سنع
*منو العضو اللي توقعته يسالك أول سوال وكل ماحطيت موضوع ولاه رازن خشيشته أول واحد يعني بإختصار عكوز بكوزفي كل مكان مركوز..؟!!!
* تحب الفيمتو؟؟!!>>والله الفضوه

وتراي نشبه كل ماطق في بالي سؤال بجي كافخه وأسدحه هنا>>عز الله اللي ماشفتوا قرعة وجهي عقب الهنوف>>قضت الأسئله
ولي عوده إذا خطر في بالي سؤال لأني أحس مخي مشغول شوي ولابعد شترت وصحصحت زي الناس
شكرا للأداره على اتاحة الفرصه لنا لطرح الأسئله على أخينا الهاوي..
دام قلبك وقلمك...
دمت كما تريد ..

alhawey

ضيف مميز بكل ماتعنيه الكلمة من معنى ..
احب اقرأ له كل حرف يكتبه .. لدرجة اني مستعد اسوي بين كل فترة وفترة بحث عن مشاركاته ..
يعجبني بمواضيعه انه يجمع لك بين خفة الدم وسلاسة الاسلوب والفائدة .. << مبطي وانا ودي اكتبها (( سلاسة )) وجاء الوقت << تراه يقصد مهوب بس انت اللي عندك كلمات حلوه

مشكلتي ما اعرف ارتب الكلام والا في بالي كلام واجد وكثير (( لي ثلاث ايام وانا احاول اكتب اسئلة )) .. لكن كل اللي اقدر اقوله ..
انك مكسب لنا ولي شخصياً وشوفة يوزرك تفرح القلب ..


شئ يقهرك بالمنتدى .. وودك انه يختفي ..؟؟

ماتحس معي ان التشات من تالي كاثر بالمواضيع .؟
فيه امكانية ان العضو يشتت ويأخذ راحته بس على الاقل يحلها من تحت اكه ..
يعني يكتب له كم كلمه تخص الموضوع وباقي الرد تشات مهوب كل الرد تشات × تشات ؟؟
ووش السالفة اللي خلت الاعضاء تمسك معهم على الظاهره هذي ؟؟ << تحس اني كبرت الموضوع صح



تحب تشوف الاخبار ؟؟ ولك اهتمام فيها وبالبرامج السياسية ؟؟
وش هي قناتك المفضلة بعد غصب واحد وغصب اثنين << قديم ؟؟
وش البرنامج اللي تحرص عليه وماودك يفوتك ابد ؟؟ مهما كان نوع البرنامج ..


حياتك اليومية مرتبة والا كل يوم لك جدول ؟؟
تحب تخطط لكل شي في حياتك والا مثل ماتجي الامور تمشي عليها ؟؟


السفر وش يعني لك ؟؟ وانت من الناس اللي تقدر السفر والا لا ؟؟
وتحب تغير وتشوف كل مره ديرة جديدة والا اذا طحت بديرة محدده ماتغيرها ؟؟
مكان تبي تسافر له وتعتبر هالديرة هي امنيتك بالسفر ؟؟
تحب تسافر مع عدد كبير من الاشخاص والا عدد بسيط ؟؟

لو قالوا لك اختار لك ثلاث اعضاء وتبي تسافر معهم من هم ؟ واي ديرة تختار ؟؟ طبعاً انا واحد منهم هذا شي قاضي منه << مثل اللي يقول تكفى قل اسمي
طبعاً محفول مكفول اخاف باتسر تهون تحسب كل شي عليك

لو قالوا لك نبي نكشت واختار لنا 8 من الاعضاء برضوه غيري << يقاله واثق انك تبي تقول اسمه ؟؟



من يعجبك من الشعراء ؟؟
وعطني رأيك بـ محمد بن الذيب .. سعد بن علوش << لايهمك القلب قل الصدز عادي ..


وش رأيك بـ العزوبية .. الاستراحة ..


ما تحس اننا شعب يحب الزحمة والغثى ؟؟
الحين العالم تدري ان رمضان يبي يجي والعيد .. لكن ما يجوز لهم التسوق الا اذا قالوا ترى باتسر رمضان والا عيد ؟؟!!
وش رأيك بالاشكال هذي ؟؟ ماودك تفرشهم ؟؟


اكيد سمعت عن الاشياء اللي صارت باليوم الوطني والخرابيط اللي فيه واللي تضيق الصدر ؟؟
بالله مهوب يحز بالخاطر انك تسمع الاشياء هذي ؟؟ وفوق هذا كله برمضان ؟؟
ماتحس ان اليوم الوطني طلع بخساره علينا ؟؟ << تراه سؤال ملغم ناوي على ترقية على حسب اجابتك




alhawey .. الله لا يحرمنا من هالخشه يارب ..



ياليت اللقاء يستمر لـ اطوووووووووووول فترة ... طلبتكم يالمشرفين ..

ترانا ماشبعنا ولا نبي نشبع من الضيف ..

خالي من الهم


أول شي الحمد لله على سلامتك ، والله يحفظك من كل شر..

إقتباس س/لماذا أنت من الناس الي يكرهون المسنجر رغم أنك مهندس كيميائي ؟؟؟

لأنه في الغالب حيلة من يخشى الظهور ويخفي حقيقته ومرتع لعشاق الكذب والكلام الفاضي..

والظاهر إن لم تخني الذاكرة كانت آخر مره لعبت فيها بالمسنجر عام 2001..

وبعدين ياعبدالوهاب ما اخترت لي إلا كيمائي!! أو يمكن عشان تربط بين بعدي عنه وعن المسنجر..

إقتباس س/ أنت ممن عاصر الجيلين ولاحظت بعض الشلليه من البعض بل ويقللون من الأعضاء الجدد وثقافتهم رغم أن هنالك أعضاء جدد كبار بالسن وبالأدب والثقافه أتمنى ان ترد على هذا التساؤل بكل صراحه.

الشلليه بمفهومها العام موجوده في أي مجتمع يزيد عدد أفراده عن 2 ، وكل نفس تميل إلى ما تعرفه وتستنكر الجديد عند بداية ظهوره، وفي المنتديات وكلما زاد عدد الأعضاء زاد عدد المجموعات الشلليه لذلك لم تكن هذه النقطه بارزه في السابق..

اللي ودي أقوله أنها لن تشكل مشكله بالنسبة للعضو الجديد المجتهد في طرحه إلا في البدايات، وكل بدايةٍ صعبه، وإذا كنت تعتقد أن الهاوي عضو مميز يلقى الترحيب بين كثير من الأعضاء فسأقول لك أنه وبعد عودته للكتابة في المنتدى وجد أعضاءً لا يعرف منهم إلا 3 أو 4، وقام بطرحَ ثلاثة مواضيع(على ما أذكر) لا تختلف بأسلوبها عن ما يطرحه الآن ومع ذلك لم تلقى الصدى الذي كان يأمله، لم يهتم كثيراً ولم يحبط وطرح موضعاً رابعاً وخامساً وسادساً حتى أصبح اليوم ضيفاً على أعضاءٍ أخجلوه بجميل ثنائهم، وغير الهاوي من هم أفضل منه وواجهوا مثل ما واجهه حتى أصبحوا من أبرز كتاب المنتدى..

وأقول بصراحةٍ متناهية، شكراً لشللية التي تربي النفس على الصبر والثقة بها وعدم الاستعجال وتحث القلم على تطوير نفسه والبحث عن المفيد، ولا عزاء لمن يريد البروز فقط لأجل تلميع معرّفه..

أخيراً لم أفهم بالضبط ما قصدته في عبارة " التقليل من الأعضاء الجدد" ، و إن كنت تقصد القليل منهم بالنظر إلى عدد المشاركات في مواضيعهم فقد أجبتك، أما غير ذلك فلا ألمس وجوده في المنتدى ومن الممكن أن أكون جاهلاً بما يحدث من وراء السطور..

إقتباس س/ لو مريت بالشارع ولقيت واحد محتاج مساعده وإنت ما تعرفه وساعدته وصدقته وصاحبته ووثقت به وفجأه طلع هالإنسان ما يستاهل وش يكون موقفك؟؟؟

لو كنت ممن لا يرجو الأجر والمثوبة من الله على مساعدته، ولو كان هدفي منها هو الحصول على شكره وعرفانه، لندمت أشد الندم على كل ما فعلته معه، و إن كان لا ، فلا أروع من عمل الجميل و نساينه..

إقتباس س/ القهوه يوم الأثنين عليك ولا على ماجد مقبل وأي كوفي تبون نجتمع به ترا أزعجتوني وإنتوا تقولون تعال تعال وهذاني جيت وإنتوا مقفلين جوالاتكم

حق ابومقبل وحقك علي بس أنت آمر ومابه إلا حلالك..



تشكرااتي لك،،


_________________________________




بريماكس!!

إقتباس وش اخبارك اخوي (عبدالرحمن) ان شاء بخير وتمام التمام

بخير ونعمه يامال الخير..

إقتباس اولاً انا احبك في الله

أحبك الله الذي أحببتني فيه..

لخبطت كياني يارجل وعساك تسلم

إقتباس س1 / مارأيك ببرنامج شاعر المليون ؟

هو برنامج جميل ووسيع صدر وفكنا من برامج المبزره والسخافات وقلة الحياء..

لكني لا أُخفيك بأني أخشى أن يكون وراءه -ووراء مسابقات من نوعه- من يسعى لبث الفتنه ودب الصراعات والنزاعات الداخلية بين فئة معينة من المجتمع واستغلال الثقافة المحدودة لبعضهم للوصول بهذا التنافس إلى ما لا تحمد عقباه..

إقتباس س2 / اتهم البعض مشاركة ياسر التويجري وانسحابه وتعذره من الشيخ محمد بن زايد عن اكمال البرنامج لتدبر امور زواجه بانه طراره وشحاذه ؟ ماتعليقك !

من قديم الزمان وقصور العظماء والوجهاء تعج بشعراء المدح والثناء، وسبق لمن هو أقوى شاعريةً منه أن اكتسبوا ما اكتسبوه من جميل مدحهم وثنائهم، لذلك لا أُنكر عليه ، ولا أُنكر على من وصفه بذلك ..

وعموماً ياسر ما شاء الله عليه شاعر بالفطره ومتمكن ومبدع ، لكنه أفسد روعة شعره ببحثه عن الإثارة ولفت النظر بأسلوبٍ غير متعقل، وربما عاد ذلك لصغر سنه، ولهذا أحب أن أقرأ أشعاره لا أن أسمعها منه..

إقتباس س3 / هل يستحق ابن فطيس المري لقب شاعر المليون ؟

في تلك المسابقة ، نعم وبكل جدارة ..



تشكرااتي لك،،


_________________________________



جرح يشكي

إقتباس أكثر هواية يفضلها الهاوي ويمارسها ؟

مؤخراً أصبحت أهوى السفر واستكشاف الحضارات المختلفة..

إقتباس من مِن الشعراء العرب في الوقت المعاصر تقرا له ؟ وتعجبك قصائده ؟ [ نبطي وفصيح ]

من شعراء النبط المعاصرين مساعد الرشيدي ونايف صقر وقليل لبدر بن عبدالمحسن ، وأحب تذوق شعر الأستاذ المبدع/عبدالرحمن العشماوي كشاعرٍ فصيح..

إقتباس س / " ببتعد عن سؤال اخواني الاعضاء عن المجلس العام وحاله " اول ما تسجل دخول وتتجه لـ المجلس العام : أ - تبحث في العناوين او عن اسماء كتاب المواضيع .

غالباً أبحث عن جديد الكتاب المميزين ومن ثم أبحث في العناوين، أما إذا كان لدي وقت كافٍ لتصفح المنتدى فأذهب إلى أول ما تقع عيني عليه ويشدني عنوانه وتجبرني مقدمته على قراءته..

إقتباس ب - لو دخلت وحصلت موضوع سياسي وموضوع اجتماعي وموضوع فكاهي ايها بتقراه قبل

للموضوع السياسي بلا شك..

إقتباس س/ هل تؤمن بـ ان المنتدى لا يقف على عضو او عضوين وان كانوا من اعمدة المجلس العام ؟ اذا كان لايتوقف فماذا تقول لـمن ابتعد عنه ؟؟

نعم أؤمن بذلك ، وبما أننا في شبكةٍ رياضية ، فسأقول لمن ابتعد عنه ترى حتى مارادونا جاء بعده زيدان وفي وقت تعقدت فيه خطط اللعب، ولو كان عمر نجم الأرجنتين وصحته تسمح له بالعودة لمنافسة زيدان (قبل اعتزاله) منافسة ً شريفة لما تردد في العودة مجدداً..

إقتباس س / ما حولك نية زواج ؟

هاااه ، اصبر علي شوي فأنا مشغول بطلب العلم

إقتباس اخوي الهاوي هذا الجزء الثاني من الاسئله باقي ثالث ورابع الخ

بغض النظر عن حومةِ تسبدي من سؤالك الأخير، فان أسئلتك جميله وخفيفه وأرحب بـ 100 مثلها>>> بس الله يرحم والديك لا تنفعل وتجيب 100 صدز


تشكرااتي لك،،


_________________________________


المشاكس

إقتباس لازم تستضيفون الهنوف قبل لا توقفون هالسلسلة .. لأنه بصراحة من حق كل عضو انه يصكها بثلاثين الى خمسين سؤال

واقترح تكون استضافتها وقت الحج وهي بمزدلفة

ولو شكلنا كثرنا على اختنا الهنوف ولكن في هذا مصداقيةٌ لمقولة أنها عضوه مقبوله من الجميع

إقتباس في البداية ابي اسألك عن توقيعك .. انت من جدك تبي تصبر الفين عام ؟ والا تورطت لأن بيت الشعر كذا ؟

بيني وبينك أنا متورط من زمااان والله ييسر الأمر ويكتب لي و لك ولمن انتظر ه كل ما فيه خير لنا جميعاً..

إقتباس ليش تواصلك مع المجلس متقطع .. تستلم يوم وتسلم يومين ؟

عموماً ما أتصفح النت إلا ساعات قليله، ومشكلتي إني كثير وارتباطاتي الأسريه والعملية كثيره ، وبالمناسبة أتوقع وابتداءً من السبت القادم –بإذن الله- أن أكون من أكثر المتواجدين في المنتدى ولمدة شهر لأني أبصير عزوبي صدقي، وادعوا لي إن الله ييسر علي ويحفظني من المغثه لأني أكره مفارقة الأهل والشلل..



تشكرااتي لك،،


_________________________________



راااجع بإذن الواحد الأحد للتواصل مع من أحب أن أكون بينهم

بدايةً أعتذر من الجميع إن كنت قد تأخرت في الإجابة على الأسئلة، وأعد بإذن الله أن أتواصل معكم بشكل أكبر خلال الأيام القليلة القادمة حيث سأتحرر من المسئوليات المتراكمة على الدميجه هاليومين..



________________________________________


abo sager

إقتباس 1-ظهر دعاة في الفترة الأخيرة.. سماهم البعض الدعاة الجدد على وزن المحافظين الجدد، وسماهم آخرون المجددين.. انت وش رايك فيهم؟

تعلمنا منذ كنا صغاراً أن الدين الإسلامي هو دينٌ ثابت وصالحٌ لكل زمانٍ ومكان ، والمفترض بنا كمسلمين أن نسلّم بذلك وأن لا نسوّق لتلك الفلسفة التي تقول بأن كثيراً من الأحكام الشرعية يجب أن تصاغ لتواكب اختلاف الأزمنة، وأقول هذا الكلام حتى أضمن عدم الخلط اللي يحصل عند البعض بين أصحاب هذه الفلسفة وبين من يُطلق عليهم بالدعاة الجدد أو المجددين..

نختلف كثيراً في تعريفنا للدعاة الجدد، ولا ملامة علينا في هذا الاختلاف لعدم وجود مرجعٍ واضح يعرّف هؤلاء الدعاة، ولكن سأنطلق من تصورٍ يقول بأن هؤلاء الدعاة هم ممن طوروا أسلوب الدعوة الذي كان في فترة من الزمن محصوراً في المساجد والمحاضرات والأشرطة والكتيبات، عن طريق استغلال الوسائل الحديثة في الدعوة سواء من خلال الظهور على الفضائيات المختلفة أو عن طريق الانترنت والمنتديات والملتقيات ، أي أنهم جددوا في أسلوب عرض مبادئ ديننا الحنيف ولم يقوموا بتحريفه وتأويله أو التنازل عن مبادئه، وهنا أعتبر نفسي ممن يشجعهم على ذلك وان كنت أرفض واستنكر على بعضهم مبدأ الترويج والتسامح المبالغ فيه مع القنوات التي يخرجون من خلالها، والحديث يطول هنا.

عموماً أعود لأقول بأن البعض منا يطلق عبارة الدعاة الجدد أو المجددين على دعاة العلمانية والليبرالية وأذناب الغرب، وفي هذه الحالة سيختلف رأيي فيهم تماماً..

أخيراً، هذا ما أعرفه ولعل عند غيري ما هو أفضل ليفيدنا فيه.

إقتباس 1- شعر التفعيلة أو الشعر الحر لقي هجمة كبيرة عند ظهوره في السعودية في السبعينات تقريبا.. والآن يواجه هجمة أقل من تلك القديمة بكثير.. فهل تحب هالنوع من الشعر والا انت ضده؟

باختصار ، لا أحب أن يوصف كاتب الشعر الحر بالشاعر، ولا أقلل إطلاقا من إبداعه في رسم الكلمات وتوظيفها لتخرج بشكل يجعل القارئ متذوقاً لحلاوتها، وأجهل ما إذا كان ظهور هذا النوع في السبعينات، وهي معلومةٌ أستفيدها منك، ولو كنت من أبناء السبعينات لهاجمت مع من هاجم رغم أنهم لن يشيلوا همي ولن يعطونني وجه

إقتباس 1-الهلال يمر بأزمات أحيانا.. وفيه اللي ينقد وفيه اللي يشوف اننا نصبر.. صراحة من أي النوعين أنت؟ تصبر على الإدارة والا تنقد أخطاءها؟

أعتبر نفسي من الناس اللي يطوّلون بالهم قبل إصدار حكم معين ، لكن ما أتردد في نقد أي خطأ واضح ولا يحتمل تأويل، يعني تقدر تقول إني بين بين...

إقتباس 4-الهاوي.. صراحة.. قلبك يشيل وإلا ما يشيل على أحد؟

لأ ، لأني من اللي يرد الصاع في وقته صاعين وبالتالي ما يبقى بقلبي شي، ولا أفتخر بهذا الشيء أبداً لأنه المفترض أن الإنسان المسلم ما يقابل الإساءة بالإساءة، لكنك طلبت صراحتي، وعسى الله يهدينا و يجمّلنا بمكارم الأخلاق..



تشكرااتي لك،،


________________________________________


عاشق فن الموهوب

إقتباس موقف مضحك صارلك ؟

والله على كثرها ما أذكر منها شي هالحين، فاعذرني رحم الله والديك، وإذا ذكرت شي يستاهل أبرجع أحطه لك..


تشكرااتي لك،،


________________________________________


بنت عز ماتنهز

إقتباس كم نسبتك بالثاانوي احسك كنت مصري تأكل الكتب

بسم الله علي ما شاء الله علي، كانت نسبتي 94 فاصلة ما أدري كم%


تشكرااتي لك،،

________________________________________


بوجاسم الهلالي

إقتباس حبيت اهنئيك على حظك التعيس اللى انت فيها الان انا يالله قريت ثلاث صفحات و عيوني راحت فيها عاد كيف انت

بالعكس أنا محظوظ ، ولو كنت مكاني كان استمتعت مثلي بالتواصل مع الأعضاء والقرب منهم، وترى حتى لو أرهقتك الكتابه تقدر تريح شوي والأعضاء ما فيه أكرم منهم ولا راح يتشرهون عليك>> يلمح


تشكرااتي لك،،

________________________________________



nor alshams

إقتباس << على فكرة بما اني مااترك شي بالمجلس الا اقراه ترا انت اول من ذكرت في احد ردودك اسمك قبل جرح يشكي << طيب وش دخلتس

صحيح؟؟ ، والله إني ناسي ، وان كانك متأكده ، فارجاك يامحمد لا تزعل علينا

لحظه بس ولو !!، ترى جرح كب عشاي عند أعضاء وااجدون، وأنتي يا أختي لماذا ما تتركين شي إلا وتقرينه؟؟ بعض الاشياء ما تنقري و لا تدققين وااجد واستري ما واجهتي

إقتباس لكن الملاحظ عليك الان غيابك في الفترة الاخيرة عن الكتابة ..!! في الصيف لم نرا لك الا موضوعين على ما اعتقد ..

برمضان كنت موجود وكثير بعد حتى اسألوا كل الفن هلالي عن كثرتي
وبأول الصيف بعد كنت موجود، لكن في أوسطه سافرت لفتره مهيب قصيره وعادتي في السفر أنسى من أنا ولدن له..
وعموماً أحب أترك وقت كافي جداً بين كل موضوع وآخر..

إقتباس اما في الشتاء تكثر المواضيع ماشاء الله سوءاً منك او من غيرك .. الي ابي اوصل له .. * ليش ماتحلى الموضيع وتكثر الا في الشتاء ؟؟

البرد في الشتاء يخلي الناس تنكمش ولا تكثر الروحات و الجيات وحتى طلعات البر المعتمده بالشتاء ما تزيد في الغالب عن أسبوع غير أن فترة الشتاء عندنا قصير فيكون الغياب فيها غير ملموس، أما الصيف فهو موسم الإجازات المعتبر عند أغلب الناس وكثير منهم يسافر ويغيّر جو ويلهى عن النت، و فترة الصيف طويله وبعض الناس تسافر بأوله وبعضهم بنصه وبعضهم بآخره فما يكون بين الأعضاء نقطة تلاقي ويظهر لكل واحد أن العضو الفلاني غاب الصيف بأكمله..


تشكرااتي لك،،

________________________________________


الفارس-5

إقتباس تحبني

مادمت من اللي يقولون لا اله الا الله ومحمد رسول الله ، ايه أحبك ويابعدي وياواحشنن


________________________________________


بنت فهد

إقتباس ما رايك بالعضوه بنت فهد هل تغيرمستواي بالمجلس ام لا وما هي النصيحه التي توجهها اليها؟

للأسف أني لست من المحظوظين بمصادفة كتاباتك، ولا أعرف عنك إلا كل خير و انك كريمه وسمحه وخليتي بنت عبدالله( على ما اذكر) تكتب بيوزرك إلى أن صار لها يوزر خاص.. و تأكدي ان من يبحث عن النصيحه لابد وان يكون في داخله مايميزه عن غيره..

تشكرااتي لك ،،

________________________________________

انشغلت هالحزه وسأعود ان شاء الله

السلام عليكم والرحمه،،

معليشات قسم بالله توي أستقر وأقر و أفضى..

لا علينا ها أنا بذا بوه


_______________________________


فرصه ضايعه

إقتباس 1-ماذا تعني لك هذه المدن الرياض ,, مكه ,, لندن ,, زيلامسي ,, ماربيا ,, مونتريال ,, امستردام

الرياض : أقسم بالذي رفع السماء بلا عمد إني أحب الرياض>> مهوب عاقل عبدالرحمن اللادن
ولا أقدر أعبر بأحسن من كذا بالذات هالايام

مكة : المكرمة

لندن: الغلااااء الفاااحش

زيلامسي: تذكرني بآل مهدي اللي رشح نفسه بالانتخابات البلديه، حيث نشدوه يوماً عن أجمل مدينه زارها فقال مدينة زيلامسي بالنمسا >> ابومهدي ما عنده قروش أبد >> ماشاء الله

مربيا: لا أعرف عنها سوى أنها في دولة كانت ذات يوم تقع ضمن خارطة العالم الاسلامي!

مونتريال: اسمها يصلح يصير ماركة مكيفات

أمستردام: تذكرني بسالفه صارت لي بمحل لبيع التمور اشتغلت فيه يوم إني بالثانوي ، وأحلى تحيه لأبوسليمان اللي يذكر ماجرالي، فيما لو وقعت عينه على هذه السطور..

إقتباس 2- لو أن الحياه كائن حي متمثل امامك ، كيف يمكنك وصف هذا الكائن وما هي شخصيته ؟

إقتباس 3- ماذا تعـني لك الدمـــــوع و هل هي عـار عندما تسكـب من جـفــــون الرجـــل ؟

تعني أن غداً سيكون مختلفاً تماماً ، وستكون عارً على رجلٍ سمح لغيره بأن يراها..
وعموماً ترى الدموع أفضل غسول للعين..

إقتباس 4- كثيرا ما يقال ( سبقت عبراته عبـارته ) متى أحس الهاوي (عبدالرحمن) بأن عبراته كانت أبلغ من عبارته ؟

عندما كنت في الثالثة والعشرين من عمري وأردت إخبار والدي(أمد الله بعمره ورزقني بره) بأني بذلت ما بوسعي وأُثقـِل كاهني ولم أعد أحتمل المزيد..
أتذكر حينها أنه كانت لي عبرات صعُب علي إخفائها..

إقتباس 5- الفرح والحزن طرفي نقيض في حياة البشر يتجلى كل منهما في مواقف عديدة بعيداً عن شخصية عبدالرحمن الخارجية وانتقالاً إلى أعماق قلبه هل يسيطر الفرح على الحزن في قلبك أم العكس ؟ وهل تؤثر الظروف المحيطة بك في شخصيتك ؟

أسعى جاهداً لأن أعكس صورة الفرح الظاهر على حقيقة الكَبَد الباطن ..

وأنا جزء من هذا المحيط ولا بد أن أتأثر بما يتأثر به ..

إقتباس 6- لو ُطلــــب منك أختيــار إحـــدى الأمـاكـــن فأيــها يفضلها قلبك ولماذا ؟!...: 1\ بــــحر في ليلة حالكة شتــوية بارده .؟ 2\ بســــتــــــان يمتلــــئ بالورد وعطــره الفواح .؟ 3\ غـــــرفه معتمة اللون ممتلئه بالصور والذكريات القديمه .؟

أختار البحر في ليلةٍ بارده >>> اخس يا حسين فهمي

أما لماذا، فلأن الغرفة الممتلئة بالذكريات ستفقدني شخصيتي، والبستان المملوء بالورود سيجعلني أشعر بأني لا أريد أكثر مما أنا فيه، لكن أمواج البحر ستكون بأمر مجريها مقبلةً علي بالأمل ، وبرد تلك الليلة يجعل مني شخصاً يؤمن بأنه لا حياة لمن يستغني عن أحبابه..

إقتباس 7- ليـل ,, هـدووء ,, عيـوون الهاوي على السمـا والنجـوووم ,, فكـرك ويـن يـوصـل ..؟

روضة الخفس

إقتباس 8-انت بصفتك عضو لك قدر كبير بالمنتدى هل رأيت بأن أحد المشرفين أو الاستشاريين لايستحق أن يكون مشرف أو متخاذل ومتكاسل عن أداء واجبه >>> احرجتك صح بس جاوب بصراحه

كلام كبير ذا

أمتلك حق جحد هذا السؤال

إقتباس 9- آخر سؤال بهالرد بس يهمني كثير لو ماقدرت ترد على اسئلتي رد على ذا السؤال لو كنت أنا أختك وش راح تنصحني فيه ، وراح تخليني اقعد بالمنتدى ذا والمنتديات المختلطة ولا لا ؟؟!!

سؤال جميل ..

سأثق بنضج عقل أختي قبل كل شي، وأنصحها بتقوى من يطلع عليها بالسر والعلن، وسأقول لها استمتعي باحترام الآخرين لكي من خلال عدم التجاوب مع كثير مما يُقال في حقك وان أعجبك ظاهره..

وأسأل الله العلي القدير أن يهدينا ويصحلنا ويحفظنا من كل شر..

إقتباس إذا فيه إمكانيه أجي عطني الضوء الأخضر بردك الجاي

الضوء دايم خضر


تشكرااتي لك ،،


_______________________________



حزش

إقتباس س1: من متى وانت هنا؟

مبطي جاي ، ليش هل كنت تدوّر أنا؟؟

إقتباس س2: ايهم اطول رقبة الزرافه ولا النمر اسرع ؟

اصبر شوي وتجيك مسابقة مزايين الزرافات بساحل العاج ، وحينها تبي تعرف الجواب الله يخلط مخ أنت كما خلطت مخي

إقتباس س3:وش القلم الي تكتب فيه بالمنتدى ومن وين شاريه؟

قلم من نوع كتكاتي وشاريه من محلات سعيد باخشوين للمجوهرات


تشكرااتي لك،،


_______________________________



صدى الأمس


ياليت يسمحون لي الأعضاء أخالف القاعده اللي قلتها في أول رد لي وأقول هلا باللي وصل عطره قبل توصل مراسيله ، ودي أقول أكثر بس أخاف يقال بأن الهاوي لحس العسل كله >> تكفون اسمحو لي تراه عميد وكبير سن ولا ناااب أشوفه وااجد

إقتباس شئ يقهرك بالمنتدى .. وودك انه يختفي ..؟؟

والله اني قلت من زمان( ويذكر كلامي ابومقبل) وقبل لا أقرأ كلامك ، أن السواليف الفاضيه والمبالغ فيها والشتشته الزايده، هي أكثر شي مضيق صدري بالمنتدى..>> يحلف عشان ماتقول انه غش منك

إقتباس فيه امكانية ان العضو يشتت ويأخذ راحته بس على الاقل يحلها من تحت اكه يعني يكتب له كم كلمه تخص الموضوع وباقي الرد تشات مهوب كل الرد تشات × تشات ؟؟

أما " يحلها من تحت اكه " هذي بلحاها مدرسه خاصه في كيفية توصيل المعلومة لا تلقينها..

إقتباس ووش السالفة اللي خلت الاعضاء تمسك معهم على الظاهره هذي ؟؟

في دمجتي واحد من الأسباب الرئيسية جداً لكن المصلحة العامة تقتضي عدم نشره >> ياشين اللي يمن بالهرج

إقتباس تحب تشوف الاخبار ؟؟ ولك اهتمام فيها وبالبرامج السياسية ؟؟

ايه بالحيل

إقتباس وش هي قناتك المفضلة بعد غصب واحد وغصب اثنين << قديم ؟؟

الجزيرة بالنسبة للأخبار، والعربية بالنسبة للبرامج ، وكلاهما تفضيله نسبي ، بمعنى أنها أفضل الموجود..

وعموماً فان أخبار التاسعة (أو التاسعة والنصف) في غصب 1 غالباً لا تفوتني ، ولا تنشد عن السبب فقد أصبحت عاده..

إقتباس وش البرنامج اللي تحرص عليه وماودك يفوتك ابد ؟؟ مهما كان نوع البرنامج ..

برنامج اضاءات، وخصوصاً أن بداياته كانت بمواضيع سياسيه لم يسبق وأن نوقشت بالطرقة التي يقدمها تركي الدخيل..

أحب أتابع برنامج آدم وحواء، كبرنامج اجتماعي

برامج الإفتاء عموماً على قناة المجد..

بعض برامج ام بي سي فور اللي تعرض قضايا الشعب الأمريكي..

وإذا وقع الريموت على قناة تعرض توم وجيري أو بيب بيب ، فأحتاج لمن يلفعني كي أغير..

إقتباس حياتك اليومية مرتبة والا كل يوم لك جدول ؟؟

غالباً مرتبه على نهج واحد ، لكن هذا مهوب معناه أنها مرتبه بشكل جيد

إقتباس تحب تخطط لكل شي في حياتك والا مثل ماتجي الامور تمشي عليها ؟؟

حياتي العمليه أخطط لها بشتى وسائل التخطيط، أما حياتي الخاصه فغالباً أجتهد فيها بدون تخطيط..

إقتباس السفر وش يعني لك ؟؟ وانت من الناس اللي تقدر السفر والا لا ؟؟

السفر هو الجانب الأكثر متعه في حياتي شريطة أن يكون خارج حدود خريطتنا وان كان لأوربا فأزين وأزين..

وأكثر شي حببني فيه هو أن السؤال اللي يقول وش هوايتك؟ صار من أسهل الاسئلة عقب ما كان يذبح قلبي..

إقتباس وتحب تغير وتشوف كل مره ديرة جديدة والا اذا طحت بديرة محدده ماتغيرها ؟؟

أحب أغير

إقتباس مكان تبي تسافر له وتعتبر هالديرة هي امنيتك بالسفر ؟؟

ما ودي أقول انها أمنيه ، لكن ودي أزور ولاية سياتل بأمريكا..

إقتباس تحب تسافر مع عدد كبير من الاشخاص والا عدد بسيط ؟؟

غالباً أسافر مع شخص واحد ، وأحياناً نكون ثلاثة ، و لا ودي أبد نزيد عن 3 وعلى قولته اذا كثرت دبرت

إقتباس لو قالوا لك اختار لك ثلاث اعضاء وتبي تسافر معهم من هم ؟ واي ديرة تختار ؟؟ طبعاً انا واحد منهم هذا شي قاضي منه << مثل اللي يقول تكفى قل اسمي طبعاً محفول مكفول اخاف باتسر تهون تحسب كل شي عليك

أختارك أنت ومعك واحد تختاره أنت بعد ، لأن ألزم ما علي وناستك بس لا تجيب لنا واحد متزوج الله يرحم والديك أخاف أن زوجته تحسبها رحله سربتيه وتدعي علينا وتقلب بنا الطياره على بحر قزوين..

نفر دول أوربا الوسطى سلوفاكيا ، أوكرانيا، التشيك ، والأخيره نبي نروح لها علشانك وعلشان ثالثنا والا أنا عبيت عيني من روعتها، وترى أهم ميزه بهالديار انك ما تشوف بزارين لندن وباريس والطقه..


وأنا أتكفل بمصاريفك وأنت تكفل بمصاريف اللي تختاره >>> لسان حال العميد يقول ما سوينا شي

إقتباس لو قالوا لك نبي نكشت واختار لنا 8 من الاعضاء برضوه غيري << يقاله واثق انك تبي تقول اسمه ؟؟

ياحبك للتوريط والاحراجات..

صراحه إني عديت اللي ودي بهم ووصلوا 12 واذا ساق الله لنا مطرة خير وربّعت الأرض أبصلح أنا واياك كروت دعوه للمكشات ونوزعها عليهم..

إقتباس من يعجبك من الشعراء ؟؟ وعطني رأيك بـ محمد بن الذيب .. سعد بن علوش

جاوبت على الجزء الأول من السؤال

ويعجبني ابن الذيب زمن شعراء الفطره على قولتهم ، أما سعد علوش مهوب يجوز لي قوه..

إقتباس وش رأيك بـ العزوبية .. الاستراحة

فيه ألفيه كتبتها وقلت عند حرف الشين :

والشين شانت نفسي عليهن .. وعفت عيشتهن ياكود مسيار
وبابعد عنهن وشقى ايدهن .. وبابني بدربهن عالي جدار



أما الاستراحه ففي رموز أبوبدر ما يؤكد ادماني عليها

إقتباس ما تحس اننا شعب يحب الزحمة والغثى ؟؟ الحين العالم تدري ان رمضان يبي يجي والعيد .. لكن ما يجوز لهم التسوق الا اذا قالوا ترى باتسر رمضان والا عيد ؟؟!! وش رأيك بالاشكال هذي ؟؟ ماودك تفرشهم ؟؟

يارجل هذولا مثل اللي ما يذاكرون الا قبل الاختبار بساعتين، وبعده يقولون الاسئله صعبه ومعقده..

ومن جانب ثاني صارت تسليه عند كثير من الناس وفيها أكشن يحرك حياتهم ..

ما أقول الا الله يطول بعمر أميمتي اللي من يدخل رمضان لين يقضي ماتطلع الا للمسجد..

إقتباس بالله مهوب يحز بالخاطر انك تسمع الاشياء هذي ؟؟ وفوق هذا كله برمضان ؟؟ ماتحس ان اليوم الوطني طلع بخساره علينا ؟؟ << تراه سؤال ملغم ناوي على ترقية على حسب اجابتك

الله يرحم الحال وانا اخوك..

بس قسم بالله ماحزت بخاطري كثر ما رفع ضغطي كلام واحد من المفتين بعدها ، خصوصاً وان اللي بربسوا بذيك الليله أغلبهم أطفال، لكن هذا الله يخلف رجل كبير والمفترض انه عاقل..

على فكره يالعميد ياخي رجع أشرطتي حقت فوق هام السحب وكل سعودي بهالبلد، بسرعه يارجل تراهن أبطن عندك >>> والله ما تاخذ الترقيه على ظهري


تشكرااتي لك،،


_______________________________



نجمة الابداع

إقتباس ْ في رحلة الحياة أين يكمن جمال الدنيا ؟

في رضا الله ثم رضا الوالدين

إقتباس ْ تختلف الظروف بين فرحة عارمة وحزن قاتل وسعادة مطلقة وجرح نازف بين تلك وذاك مواقف تبرز وعلى شخصية الإنسان تبرز متى وجد ضيفنا الكريم الظروف قادته نحو الأفضل ؟؟

عندنا مثل بالعاميه يقول : ما تصتك الا وتنفرج

وسبحان الله العظيم، كل ما ازدادت الظروف صعوبة، كل ما أعقبها فرجٌ ونجاح يوازي شدة قسوتها وإحباطها..

أكثر الظروف صعوبة ً كانت تلك التي أحاطتني أيام دراستي الجامعية، حينها كان ذهني مرهقاً جداً بظروفي الأسرية ، ووضعي المادي محبطٌ لأبسط طموحاتي، حتى عافيتي لم تكن على ما يرام، وحين بلغت هذه الظروف نقطة الذروة بفقدي لمن كان يقف دوماً بجانبي، شاء المولى عز وجل أن تكون هذه النقطة بداية تحدٍ مع النفس وسباقٍ مع الوقت واقتناع داخلي بأن عاقبة الصبر الفرج ، فتحقق لي جل ما أريد، و أمسيت كما أصبحت أحمد الله في كل حين..


تشكرااتي لك،،


ومن قليل معرفتي أقول بأن هنا مثال لكل عضوه تسأل عن الطريقٍ الأجدى لتسلكه عبر هذا المنتدى..


_______________________________



هلالي _11

إقتباس أولاً : وش لونك عساك طيب ؟؟؟

بخير يامال الخير..

إقتباس ثالثاً: وش أزين في رأيك الزعيم ألحين 2007 و لا في 2001 و بصراحه بلا مجاملات خخخخ ؟؟

2001 ، وبغض النظر عن أني أميل لكل ما هو قديم..




تشكرااتي لك،،


_______________________________


طفيت ياجماعه، وابرجع إن شاء الله

the bast

إقتباس تسمع دائما قول الجاهلون أذا سمعوا فتوى لشيخ بتحريم أو تحليل يكون غير مقتنع وعندما تسأله عن السبب يقولكـ بالعامية (مزاج( .. مارأيكـ بهذا ؟

هذا شخص جاهل ومكابر بنفس الوقت ، وأمور الدين ما فيها مجال للعب والتساهل، والمفروض مادام انه جاهل بأمور دينه أن يأخذ العلم من أهله..

وكون أنه ينسب ذلك لعدم قناعته معناه أنه يفتي ! ، والتحريم والتحليل شي مهوب سهل ، والرسول اللهم صلي وسلم عليه يقول : ((أجرأكم على الفتيه أجرأكم على النار)) أو كما قال صلى الله عليه وسلم..

إقتباس مارأيكـ بالردود الساخرة بمنتدى الجمهور الهلالي ..؟

توي أدري منك إن فيه شي اسمه ردود ساخرة بمنتدى الجمهور..

إقتباس من يملكـ عضوي بشبكة الزعيم يحق له الفخر .. هل تحس بالفخر هذا ..؟

والله ياخي أنا سعيد ومسرور بأن لي يوزر في شبكة الزعيم وأني أشارك فيه وأتواصل مع أعضائه..

إقتباس مارأيك بأخواننا الصغار : أبو طلال .. الكلاسيكي...كل الفن هلالي

قلت رأيي بأصدقائي ابوطلال والكلاسيكي..

أما كل الفن هلالي فهو من أنشط الأعضاء بالفترة الأخيرة ما شاء الله عليه، ويكفي أنه بدع بتنزيل الأخبار اليومية ، وهو مكسب لمجلة عالم الزعماء..

تشكرااتي لك،، وفواصلك ذكرتني بربع أبو حته


__________________________________




الغريب


هلا وغلا بمن هو زي الأخ الذي ولدته أمي>> المشرف لازم نحييه مرتين لزوم التضبيط

إقتباس .. وتحس بمرن بصدرك .. وتسنك قاعدن تناظر مباراة بين الوحدة والقادسية يوم الجمعة بالليل والمعلق حافظ جمعة الله يرحمه وأنت عندك بكرة واجب ( فقه ) وحفظ ( مطالعة ) ولا حليت ولاحفظت .. وبك نومن عظيم .. وودك تصيح

والله يابوبدر كنك توصف حالتي يوم هبطت الطياره بهالديره ، بس على العموم دق لي ولد يمكن أرجع بأي لحظه..

إقتباس 1-وش أبرز 3 عيوب تشوفها في شخصيتك وتتمنى تتخلص منها ؟!!

والله ياخي عيوبي كثيره ، لكن الحراره والعجله في بعض الأوقات ، إضافة إلى الجرأه الغير محسوبه في بعض المواقف، هي أبرز العيوب اللي ودي أتخلص منها، وأكيد عندك غيرهن بس أرسلهن لي وسائط..

إقتباس 2- ماالذي كنت تتمنى أن تكونه لو لم تكن مهندسا كيميائيا ؟!!

مهندساً مدنياً

إقتباس 3-هل تسمح لي بأن أطلق عليك لقب ( الباشا ) في المنتدى ؟ ومارأيك بهذا اللقب ؟

اسمح لك بعد ما تجيب موافقه خطيه من ابوصالح..معي.

وهو لقب جميل وأحسن بكثير من لقب ملك السوني..

إقتباس 4- لمن تقول الكلمات التالية :

- زين زين ! : لملك الريموت
- ياذيب ! : لأقرب واحد لزمزمية الشاهي
- الكبير كبير !: لملك الألعاب المختلفه
- هنا ذبيحة !: لأسقم لاعب واعد
- يامغرور ! : لنصير شما
- يا أرعن !: للخباز

والله يوسع صدرك على هالسؤال

إقتباس 6- ماهو رأيك الصريح بالذيب سامي الجابر ؟ واحلف إنك ماصحت يوم أعلن اعتزاله !! ( وجه شرير جدا )

كان صرحاً من خيالٍ فهوى، وأكيد أبصيح بحفل اعتزاله إذا شفت دموعك..

أصرح من كدا ايه يابوبدر ، وألزم ما علي إسعادك بإشباع رغبات الشر في داخلك

تشكرااتي لحضورك الونيس



__________________________________



المشاغب

إقتباس أجل ما لقيت إلا أنا تغلط علي؟

ودك أحب خشمك ، أو ما ينسيـّك الخطا حب الخشوم

إقتباس وبالنسبة للأسئلة فإن شاء الله لي عودة متى أراد الله .. ولكن قبل ذلك أريد أن أسألك : أنّى لك هذا؟

هو من عند الله ثم من أنّى ابومقبل ، والله يوسع صدرك وصدره بالرضى والعافيه كما جعلتموني أكركر عليها كلما قزيتها مكتوبه..

إقتباس س1) حسب خبرتي وموهبتي في قراءة شخصيات الآخرين وجدت أنك من النوع الذي يثق في الناس كثيراً ولا يحذر في تعامله معهم ..!! السؤال هنا : ألم تتعرض لخيانات لهذه الثقة جعلك تندم عليها؟

حصل ياصديقي ، وصدز أني أشغلتكم بألفيـّتي لكن الحاصل أن فيها أجوبه لكثير مما أُسأل عنه ، كيف لا وهي تصف تفاصيل حياة مشخبطها >> بالله وش رايكم بـ " كيف لا "


قلت عند حرف الظاد واصفاً ذاك الآدمي الذي خدعني :

والظا ظنيت بالردي خير ... غرني شكله يمشي بوقار
أثره رخمةٍ نذل ٍ حقير ... بمدحه لو قلت انه حمااار


لكني ولله الحمد لست بقاصر كي لا أتعلم وأستفيد من تلك التجربه..

وعموماً يظل حسن الظن بالناس منهجاً قائماً بالنسبة لي..

إقتباس س2) أيضاً من خبرتي اكتشفت أنك تحب.. ولا أريد الخوض في التفاصيل والخصوصيات.. ولكن هل ترى أن الزواج قد يكون الحل المناسب لينسى الحبيب حبيبه؟

خبرتك خانتك هالمره فأنا لا أحب بل أعشق إن كنت تريدها من فمي..

و لا علاقة بذلك لا من قريب ولا من بعيد بأمر الزواج ، بل لا علاقة للأنثى به..

إقتباس س3) عطني رايك بهالأسماء:

أ- ماجد مقبل..

لم أغير نظرتي في موضوع نشأة الصداقة من خلال المنتديات إلا من خلال لقائي به أول مره..


ب- كلي هلالي..

أنا بس اللي محيرني وما خلانيش أنام ... ازاي أنا بأدر أسهر وازاي يئدر ينام

قلت لك قبل إن سالم أحبوش وانا ما اعرفهوش..


ج- الفيروسة الزرقاء..

مدين ٌ لها بأن كانت من أول من رحب بمعرف الهاوي ودعم كتاباته بعد انقطاعه ..


د- أبو ريمان ..

كلماتٌ تنقلت بيني وبينه جعلتني أقول بأنه رجل ٌ من فئة الكبار وله كل معزة وتقدير..


هـ - القاضي..

قلت رأيي بابوعبدالله في أول رد لي على هذا الموضوع.


و- الغريب..

عشر سنوات أو ما يزيد من الصداقة معه تجعل شهادتي فيه مجروحه، وهو بالنسبة لي أكثر من أخ..


ز- خالي من الهم..

إن كان لشبكة الزعيم عشاق فهو أميرهم ، وما شاء الله عليه يجمع بين طموح لا محدود وروح مرحه لدرجة أني أتقبل منه ما لا يعجبني من غيره..

إقتباس س4) وش موقفك لو اكتشف أن أحد الأشخاص دخل لرسائلك الخاصة وفتش فيها بدون علمك؟

أبسأله عن آخر رساله جتني ، من مرسلها وما هو محتواها ..

إقتباس س5) آخر سؤال .. بما أنك صريح كما أعرفك .. أتمنى تعطيني أبرز عيوبي بكل صراحة .. وتعطيني معها الحلول حسب وجهة نظرك ... مع العلم أني غير ملزم بتطبيق هذه الحلول أو الاقتناع بوجهة نظرك بس أبي أعطيك جوك وأخليك تتفلسف شوي

لو لم يكن المشاغب من الأعضاء الذين تعجبني فيه صراحته وقوة ردوده بالحق ،وجمال اختياره لمواقع هذه الردود، لما قلت بأن مستواه انخفض عن ما كان عليه ، ولعل لشعبيته سبب مباشر في ما أراه من تركيزه على سؤال العضو عن أحواله لا عن أحوال كتابته ، مع أني ممن يحب الجمع بين الاثنين ..


ويا صاحبي، إن كان أحدهم يظن أنه استطاع استغلال صراحتي (في هذه النقطة بالذات) ليوقعني في الحرج، فلا أطلب منه سوى العودة لتصفح الردود..





تشكرااتي لك،، وترى ريكي ورايس وجهان لعملة واحده


__________________________________



leo messi

إقتباس وسؤالي وش كنتوا تقولون يوم تقابلتوا انت وماجد وخالي <--- ابوك يالفضول

كنا نقول ليش الناس تحب الببس أكثر من السفن آب مع أن السفن يغني أحياناً عن الشاهي

إقتباس 1-لو قُدر لك ان تكون وزيرا للعمل لمدة 24 ساعه ما أهم القرارات التي ستتخذها خلال هذه المدة ؟؟!!

قلت وش اللي راح أسويه، بس تكفى خل هالـ24 ساعه ذي تكون في يوم أثنين ..

إقتباس 2-عندما تريد ان تعبر او تتحدث لشخص وعندما تواجهه لتُعبر فجأة طار جميع الكلام اللي براسك كيف تعالج هالموقف ؟؟!!

أقول له ياخي وراك مكشر؟؟ وأول ما يصقعني بابتسامه سأتذكر ما كنت أريد قوله..

إقتباس 2-لو طلبوا منك تقييم شخص ... وش هي مواصفات ومقاييس تقييمك له ؟؟!!

سؤالك عام جداً، وبالنسبة لي تستحيل الإجابة عليه دون معرفة طبيعة عمله التي أستقي منها تقييمه..

ولو كنت تقصد تقييم عضو في المنتدى فأنا أقيمه من خلال أطروحاته ونوعية مشاركاته..

مع تركيزي على أن تقييم العضو يختلف تماماً عن إبداء رأيي في شخصه( ان حصل وتعرفت على شخصه)..

إقتباس -متى ودك تبطل الهواية وتدخل عالم الاحتراف

متى ما قالوا لي ترى الحياة مهيب ساعةً وساعة ، فسأذلف إلى عالم الاحتراف ..


تشكرااتي لك،،



__________________________________




خالي من الهم

إقتباس ما هو السبب في عدم حبك لمدينة جده عروس البحر الأحمر؟؟

لأني أحب الرياض جدا وجدا وبالحيل ، واستر ما واجهت الله يرضى عليك..

إقتباس ما هو السبب في كرهك للسفر بالطيارات لدرجة أنك تقول لو الأمر بيدك لسافرت على الحمير أكرمك الله واكرم الحاضرين لكلامي ؟؟

ما عمري خفت من ركوب الطياره وأسافر بها كثيراً لدرجة أني مره رحت للقصيم بطياره وما أمدانا نربط الحزم إلا والطيار يقول انزلوا ولا تنسون حقائبكم وسندويشاتكم!

لكن الطيران التركي – الله لا يكثر من عينته- علمني أن أصرخ بعالي الصوت "يازين الأرض"

إقتباس أبيك ترد لي ببيتن على هالبيتين إذا ممكن يعني . ترا هالبيتين قلتها هنا من موقف وصرت اكررها دايم الوفا طبعي على مر السنين****والغدر ماله على قلبي مكان ياشينها لو صاحبك عضد اليمين**** إنتسى ودك وحبك ثم خان

لا تلتفت تكفى لغدر البايقين ... ولو كان واحدهم عالي الشان
طبع البشر بكل يومٍ مقفـّين ... ويجازون الوفا بظلم ٍو نكران

إقتباس أخيرا / كلمه توجهها لسامي الجابر

وش السالفه ؟؟ شكلك منسق مع الغريب

تشكرااتي لك،،



__________________________________


ملـــ الهلال ـــك

إقتباس س1 - ماذا رائيك في المفرج ..؟

مع تقديري لشخصه ، مهوب لاعب كرة قدم

إقتباس س2- ماهو أفضل سيـاره لديكـ ..؟

هايلكس 88 و بي ام دبل يو 2007 >> اصطباتها اللي ورا تذكرني بعيون ليلى حقت قيس..


__________________________________


أبوقف عند صاحبي المواصل لعل الله يقر عينه بالنوم


وراااجع للغالين ان شاء الله،،

جرح يشكي

إقتباس موب استضافتي انا ويسلم لـ الهاوي ذاك اليوم <<<<<< عبدالجليل ان قلت السالفه بـ اذبحك

أبقول بيض الله وجهك ووجه وما جاء منكم قصور وتكفيني شوفتكم مع رشفة سفن أب

إقتباس موضوع لازلت تتذكره من مواضيع المجلس العام ؟؟ او بـ الاصح ترك بصمه في اخوي عبدالجليل

حقيقةً فيه أكثر من موضوع مميز لفت انتباهي وما زلت أذكره ،لكن ان كان هناك موضوع له أثر في نفسي فهو للماسة الزرقاء استخدمت فيه لغة الصور لتتحدث عن استجابة المسلمين لصوت الأذان تحت جميع الظروف، لا أتذكر عنوانه بالضبط لكني أحتفظ بجميع الصور التي تضمنته وأحدها يقبع على سطح المكتب في هذه الحزّه( أي الآن).
وبعدين يابعدي ذبحك الترقيع! بعبدالجليل وعبدالغفور شف لي غيرهم جرّب كمال أو حسام.

إقتباس اخوي الهاوي سمعت انك شاعر فـ نتمنى ان تتحفنا بـ اخر ما كتبت <<< لا تردني

يمكنك سمعت أني شويعر ولست بشاعر
عموماً ماراح أردك يا غالي رغم إني ما سبق ونشرت لنفسي أي قصيدة بالمنتدى لكن مثلك يستاهل أغيّر قناعاتي لأجله، لكن الحين مامعي وقت أقعد أكتبتها وأنسق وخبرك أخوك ساقط بالتنسيق ، ان شاء الله تكون بردي القادم.


تشكراااتي لك،،

___________________________________



الفارس-5

إقتباس 1-تعرفني

ايه الحين عرفتك..

إقتباس 2-وش تشرب

لبـــن

إقتباس 3-الأكلة المفضلة

رز بلحم أو مكرونه بالجبن

إقتباس 4-وش اسمك

أنا من عباد الرحمن

إقتباس 5-تشوف توم وجيري

نعم وأكره تصرفات جيري الغير محسوبه

إقتباس 6-تشوف يوغي

ايه شفته كم مره وتراه يسلم عليك كثير السلام وقال لي قل للفارس يرسل لي مصاقيل وحنيني زيادة كتشب..

إقتباس 7-في اي مدرسة

المشاغبين

إقتباس 8-عندك art

إيه

إقتباس 9-وش جوالك

N 90

إقتباس 10- اهم سؤال وش رايك بدلاختي اسئلة غبية صح

بالعكس أسئلتك حلوه و تنبأ بقدوم مذيع برنامج جيد بأحد قنوات السعودية


تشكرااتي لك،،

___________________________________

الهنووف


وأنا أخوتس بعض الضيوف إذا قُدم له شاهي حالي شرب شوي وقال بس أنا أشرب الشاهي من دون سكر..
وأنا على ما قالوا ضيف ، وأسئلتك حلوه مثل السكر، عشان كذا اسمحي لي أتناول سكر وسط منها (لاحظي إن الوسط مهوب شوي)، ويعلم الله إن وقتي حالياً ضيّق وان شاء الرحمن وحصل لي فرصة فسأجيب عن ما قمزته وتجاوزته..

إقتباس من الهاوي في ثلاث كلمات ؟؟ )ابي جواب شاعري مو فكاهي (

شمسه تُحرق طموحه >>> عساه جاز لتس ترى جلست أتعصر لين جت معي هالثلاث كلمات

إقتباس اذكر موقف غير شي من شخصيتك او اثر فيك ؟؟

يوم طلع قلبي وشفت عزيز على نفسي أخذ منه المرض ما أخذ وقررت حينها أن لا أمنية لي سوى أن أراه سليماً معافى ومازلت أعيش هذه الأمنية من سنواتٍ ليست بالقصيرة وأحمد الله أن متابعة علاجه وصلت إلى مراحلها الأخيره، وأسأل الرحيم المنان أن يمن عليه وكافة مرضى المسلمين بالشفاء العاجل..

إقتباس *عضو-- عضوه : تراجع مستواه عن السابق من الاعضاء من هو بنظرك ؟؟

المشاغب ، الهنوف

إقتباس * من هو العضو الغامض في الزعيم ؟

Some one

إقتباس * عضو او عضوه تهنئة إلى ما وصل إليه ؟

الكلاسيكي ، شذى(ع)

إقتباس عضــواو عضوه تحس انـه قريب جدا لنوعيه تفكيرك ؟؟

صدى الأمس

إقتباس عضو تستمتتع لكتابتة وردودة..؟؟

القاضي

إقتباس عضو يحمل قلب طيب وبريء..؟؟

f*y*d

إقتباس س::.. لمن تقول هالعبارات من الاعضاء..بعيدا عن المجاملة

الله يسامحك لعضو أساء بي الظن

كل يوم تكبر بعيني لماجد مقبل

إقتباس حكمـة لاتومن بها .. واخرى تومن بها ..؟؟

أؤمن بها : حكم كثيرة وأغلبها من ثقافتنا العاميه ويمر على بالي الحين الحكمة اللي تقول "الزين مكفول"

لا أؤمن بها: أيضاً أكثر من مره أسمع حكمة ولا أقتنع فيها وأتذكر من بين ما يقال " القوي يأكل الضعيف"

إقتباس كلمة تريد سماعها ولم تسمعها الى الان ...؟؟...>>>>( غير احبك

مبروك ، سمعتها من كثير من الأحباب ومازلت أتمنى سماعها من شخصٍ بعينه..

إقتباس امنية تمنيتها وتحققت ...!!! وامنية مازلت تتمنينها ولم تتحقق..؟؟

أمنيةٌ سعيت إليها وتحققت وهي أن أكون قادراً مادياً على استكمال ومواصلة علاج من يهمني أمره، وأحمد الله على ذلك ، و مازلت أتمنى أن ييسر الله أمر علاجه..

إقتباس ...اذا سنحت لك الفرصة لتلتقي بشخصيات معروفه وتحبها..بمن تتمنى ان تلتقي..

إسلاميه: الشيخ العلامة ابن جبرين

سياسية: شيراك ( لا أحبه ولكن أتمنى لقائه)

رياضية: بعد الثنيان والشلهوب أتمنى لقاء طارق التويجري وهو شخصية عرفناها من خلال الرياضه..

شخصية في المنتدى: هناك أكثر من عضو قديم في المنتدى أود لقائه ولكن سأبدأ بصدى الأمس

إقتباس لوكنت على سفح الجبل , طموحك.. ان تصل لقمته ووصلـــــــت...!! بعد تلك اللــ ح ـــظه.. ماذا سيكونٍ طموحك. ...؟؟!!

أن لا أتزحزح عنه

إقتباس ..شخصية كلما رايتها تتمنى انك تكون مثلها ..؟؟

جدي رحمة الله عليه وكان عالماً زاهداً في زمنه وشاعراً فصيحاً وله مؤلفاتٌ عديدة ، لا أزكيه على أحد ولكن أتمنى لو كان عندي جزء مما عنده..

إقتباس وش شعورك عندما وصلك مسج باختيارك ضيف للقاء..هل ترددت بالموافقة ..؟؟

انبسطت واسفهليّت وشكرت، ولم أتردد عن الموافقة ولكن كنت مهتماً بأمر التوقيت..

إقتباس من هي الهنووف من وجهه نظرك وما ابرز عيوب الهنووف ونصيحة توجها لي

عضوة نشيطة ما شاء الله تبارك الله ومقبولةٌ من الجميع ، أغبطها عندما أرى كيفية تنسيقها وترتيبها للمواضيع..
ومن عيوبها أنها أحياناً أن لا تحسن صياغة ما تريد قوله( وأرى أنها تعترف بذلك لذا ستتمكن من معالجته بإذن الله)، كما أنها تكثر -وبحسن نية- من الحوارات الجانبية الخارجة عن هدف الموضوع..

إقتباس في زمن البحث عن المادة ... عن ماذا يبحث الهاوي ؟

عن المادة في ظل رضا الله ثم والداي ..

إقتباس وش الفرق بين الغرور والثقه بالنفس . وكيف حكمك لهالصفتين ..؟

أعتقد أن الثقة الزائدة في النفس هي أحد تعاريف الغرور، والذي يثق في نفسه وقدراته هو الشخص الذي يتقن عمله ويتطلع للأفضل..
غالباً أجد أنه بإمكاني وغيري معرفة الشخص المغرور من خلال حديثٍ بسيط أو نقاشٍ عام ولا أعتقد أن في ذلك صعوبة، فقمة المتعة لدى المغرور هو إظهار ما يؤكد غروره..

إقتباس في الفتره الاخيره نلاحظ اقبال شديد ورغبه ذاتيه من شبابنا وقد يكون بناتنا ايضا بالزواج العاطفي بعيدا عن الزواج التقليدي وش رايكـ وهل انت ضدهم او نوبروبلم ؟؟؟

أقول الله لا يعاقبنا بس! منوّل الواحد يستحي يجيب طاري الزواج والحين صاروا يسولفون عن زواج عاطفي ووزواج بزراني وما أدري وشو؟؟
الخطأ يظل خطأ وكثرة الوقوع فيه وانتشاره لا يعني بأي حال من الأحوال أنه بات أمراً مقبولاً لدى أصحاب العقول..

إقتباس في زمن مضى كنا نستمتع للاطفال بـ ايات القران او الاناشيد الطفولية والحين للاسف اول مايمسكـ الطفل المايكـ او نسمتع لاصوات اطفال عبر مقاطع البلوتوث نستمع لـ آه ونصف وتوابعهاا

الله يصلح الحال وأنا أخوك، والله انه شي يضيق الصدر وإذا شفت مثل هالمواقف أقول بنفسي ياليت الغرب غزانا بطائراته ودباباته ولا غزانا بالفضائيات اللي ما عاد فيه بيت يخلو منها، ووش نرجي من طفل يقضي نص يومه وهو مقابل التلفزيون غير أطب طب وأدلع!
والله يرحم الشيخين ابن باز وابن عثيمين يوم كانوا يتكلمون عن خطر الدشوش في كل مناسبة وحنا صاكين آذننا بعجين!


تشكرااتي لك،،

___________________________________


آآي وِل كوم باك أقين إن الله أراد واعذروني ان كان فيه أخطاء املائيه، انشغلت ولا أمداني أرااجع