مــــذكـــرات موظف مفصــول + ومعرفتي بمواصل من عام 1413هـ - صفحة رقم 3 - نادي الهلال السعودي - شبكة الزعيم

الفارس1515 · #31 14/10/2007, 09:02 PM

يا هلابك والله

G o L d E s T · #32 14/10/2007, 09:16 PM

هذي الدنيا ما تدوم على حال

وأقرب مثال صدام حسين

أمس كان يرعب القاصي والداني واخر شي شنقوه اللي كان مرعبهم

بانتظار البقية

ربطـه و شبـاصه · #33 14/10/2007, 09:29 PM

السـلآمـ عليـكم..

لاتطــول عليـنا ,, بانتظـآرك ^_^

مانشتر الزيداني · #34 14/10/2007, 10:00 PM

هلا والله

اخوي والله اني متحمس معك بس كمل الجزء ولا ...........

قصة تكشكر عليها خيوو

سلم لم

القيصر رهيب · #35 15/10/2007, 12:55 AM

نزل لاتنجلد

YASEER.S · #36 15/10/2007, 01:13 AM

تكفى نزل ولا تقعد تقهرني

يله اخلص علينا ونزل الجزء الثاني

abo_nasser · #37 15/10/2007, 01:25 AM

ارحمني يا مشلم

ونزل الحلقه الثانيه بسرعه الله لا يهينك

ولي عوده مع الحلقات الغادمه

<<<<كويتي

سلاااااااااااااااااااااااام

ابوعبدالمجيد الهلالي · #38 15/10/2007, 01:30 AM

شــــــــــــكر والــــــــــــــــــله يعطيك الـعافيــــة

saudi’s heart · #39 15/10/2007, 01:48 AM

اخي الكريم
جزاك الله خير على كتابتة قصتكـ

بأنتظار تكمله الجزء الثانيـ .....

Hictar · #40 15/10/2007, 02:19 AM

اتصلت عليه ووافق على إنه ما أطلع عليها

كبرياء إنسان · #41 15/10/2007, 02:21 AM

بسم الله الرحمن الرحيم

الحلقة الثانيةبعد دخولي للمكتب بعد ساعة تقريباً جاء عندي نائب مدير قسم المحاسبة واسمه ( محمد ) اللي كنت أبشتغل عنده بنفس القسم وقال لي: ترا بنحطك في قسم ثاني غير المحاسبة إسمه قسم شؤون المرضى ( والقسم هذا خاص بعلاج المرضى على حساب الأمير عبدالعزيز بن فهد ) لحد ما تفهم وتعرف أصول الشغل.قلت له : مو مشكلة انت تامرني أمر ورحت أنا وياه لمدير قسم شؤون المرضى وأسمه ( عبدالرحمن ) الله يذكرة بالخير وكان وقتها رجله مكسورة ، وكان يمشي بعكازات ( كأني أشوفه الحين

) المهم قال له (محمد ) نائب مدير قسم المحاسبة ترا بناخذ منك موظف النسخ اللي عندك وكان اسمه( منصور ) الله يذكرة بالخير وبنعطيك ( كبرياء إنسان

) تدربه لنا لين يعرف اصول الشغل. في البداية رفض مدير قسم شؤون المرضى الاخ (عبدالرحمن ) بس بعد تهديد خاص من الاخ( محمد ) نائب مدير قسم المحاسبة وافق الاخ عبدالرحمن

المهم قال لي الاخ ( عبدالرحمن ) رح يا ( كبرياء إنسان ) للاخ علي خله يعلمك على شغلنا في المكتب ، وكان الاخ علي اول موظف اجلس معه وأسولف معه عن الشغل وعن طبيعة وعن قوانين العمل بالمكتب ، وكانت وظيفة ( علي ) الله يذكره بالخير موظف ناسخ في بداية شغله في المكتب وكان يكتب أوامر العلاج اللي يأمر بها الامير عبدالعزيز بن فهد واما الان ما شاء الله صار مدير شؤون المرضى إلى يومنا هذا

وبصراحه كنت في هذه الفترة اسمع عن مدير المكتب وهو الشيخ ( خالد العساف ) وكانت سمعته مرعبه مررره وكان مسبب رعب للموظفين والمدراء وانا كنت في بداية الأمر مستغرب الشي هذا لأني انا من يوم ولدت وأنا لي علاقة مع بعض الأمراء وكنت اشوفهم عباره عن ناس عاديين بس الشيخ خالد على شخصيتة هذي بصراحه كان مرعبه وانا ما جاني الرعب الا بعد ما أخذ جولة على الموظفين في اول اسبوع اشتغلت فيه في المكتب والرعب اللي جاني هذا بسبب مديرنا لما شفته يكلم ( الشيخ خالد ) وهو خايف

قسماً بالله ان سرعتي في الكتابه نزلت من 35 كلمة في الدقيقة إلى 5 او 6 كلمات

المهم صار( الشيخ خالد ) يمر على كل موظف ويسأله عن طبيعة عمله وبعد نص ساعة من دخوله علينا جانيوقال لي : وش شغلتك انت

قلت له : طال عمرك انا ناسخقال لي : طيب ورنا وشلون تنسخأنا بوقتها قمت اخربط في الكتابة من الرعب والخوف من شخصيته القوية

وبصراحه بعدها صرت ما الوم الموظفين لما يسكتون اذا جاء( الشيخ خالد العساف ) وصرت لما أشوف سواقه الخاص أكون مؤدب ولا اقوم من مكاني مهما صار

شخصيته مرعبه بصوره ما أحد يتخيلها إلا اللي يعاشره

المهم جسلت في قسم النسخ لمدة اربعة شهور تقريباً وبعدها نقلني مدير قسم شؤون المرضى الاخ( عبدالرحمن ) إلى مكتب ثاني وإسمه مكتب الاستفسار علشان ابعد عن وجهه لأنع مرتفع الضغط عنده علشاني متوظف عنده بالقوة

وبصراحه كان مكتب الاستفسار هذا بعيد عن باقي الاقسام وكان عبارة عن قسمين قسم خاص لشؤون المرضى وقسم خاص للمساعدات المالية اللي يأمر بها الامير وكان زميلي اللي في قسم المساعدات اسمه عبدالله( مو مواصل من عام 1413هـ )

، ( الكللام هذا قبل ما يتوظف مواصل من عام 1413هـ بالمكتب )

وكان الموظف عبدالله لعاب شوي الله يهديه وكان يجي للدوام متأخر ويخليني ادق له كرت الدخول لأني انا بصراحه احب احضر للدوام قبل ما يبدأ بنصف ساعه

وهذه العاده معي من إولى ابتدائي

وكان في واحد من الموظفين يستهزء فيني ويقول شكل ( كبرياء إنسان )معه مفاتيح المكتب وهو اللي يفتحه من الصباح

المهم بعدها قال لي زميلي عبدالله يا ( كبرياء إنسان ) كل يوم ابيك تدق كرت الدخول حقي بدون ما أقولك

ومن كثر ما تعودت على دقت الكرت له بكم اسبوع دقيت كرت الدخول حقه يوم من الأيام وكان الاخ ماخذ اجازه

وبعدها كفشنا مدير شؤون الموظفين وعاقب الاخ عبدالله

وكانت طبيعة عملي في قسم الاستفسار الخاص بشؤون المرضى هو أن ارد على المكالمات الهاتفيه وإستقبال المراجعين وأفيدهم عن معاملاتهم اللي قدموها على سمو الامير وأقول لهم عن حالة معاملاتهم سواءً كانت في العرض او صدر فيها امر او حفظتوكان المراجعين اللي استقبلهم في المكتب عبارة عن مرافقين الملك الخاصين والعاملين بقصر الملك وبعض ضباط وافراد الحرس الملكي وكان القسم هذا يكوّن لي علاقات قوية مع بعض اللي يشتغلون مع الملك أو الأمير.واذكر واحد كان يزعجني كل يومين يجي مره وكان يسأل عن معاملته ومعاملات اخوياه وجيرانه وكل من يعز عليه وكان عسكري في الحرس الملكي اسمه ( صلاح ) الله يشفيه ويفرج همه لأنه اخر مره شفته فيها كان مشلولالمهم جلست في هذا القسم تقريباً ثمانية اشهر وبعدها جاني مدير قسم المساعدات المادية وهو الاستاذ( زياد ) الله يذكره بالخير ويكثر من أمثاله لأنه بصراحه كان مدير يقدر الموظف المجتهد وكان يمزح مع الموظف المجتهد اما الموظف المقصر في شغله كان يعامله معامله غير لائقه.المهم قالي الاستاذ زياد : يا ( كبرياء إنسان )تراني باخذك لقسمي بالساعدات المالية وبخليك تفيد المراجعين على معاملات الخاصة بالمساعدات المادية في مكتب الإستفسار.بصراحه انبسطت وفرحت علشاني بنقل عنده لأنه بصراحه يعاملني بنفس طيبه الله يجزاه خير اما مديري السابق ( عبدالرحمن )كان يعاملني معامله سيئه ، على إني قايم بشغلي على أكمل وجه.كأني مسلفه فلوس وهو يبي يتهرب مني ولا يبي يشوفني

لانه ما يبغى يشوفني أبدا.

المهم في القسم هذا شفت فيه بعض المواقف الطريفة ومنها أن بعض الناس الله يفرج همّهم كان على بالهم أني اجلس مع الأمير وأشوفه وأكلمه وأنا بصراحه طوال فترة عملي في المكتب وهي خمس سنوات وشهرين ما سلمت على الأمير غير مره واحده فقط

ولا اشوفه الا في التلفزيون أو في بعض أوقات الصلاة

ومره من المرات اتصلت علي واحده الله يفرج همّه وكانت تقول لي يا ( كبرياء إنسان )تكفى ياولدي إذا جلست مع الأمير في الليل وسهرت معه قل له اني انا حرمه محتاجه وفقيره وتكفى لا تخليه الا إذا اعطاك شي

وانا بصراحه كنت إذا كلمت أي احد احب اطيب خاطره باللي اقدر عليه ولا اخليه يقفل السماعة الا وهو مبسوط لدرجة انه في شخص قال لي مره من المرات والله لو الامير ما يصدر امر على معاملتي يكفيني كلامك الحلو هذا

وبصراحه كان في بعض المراجعين على بالهم أن اوراقهم موجوده عندي على المكتب وانا كنت اشوفه في شاشة الكمبيوتر منسوخة في ارشيف خاص بالكمبيوتر عن طريق إدخال المعاملات بالإسكنر.وبعضهم كان يتهمني بأني ما ارفع الاوراق للأمير علشاني كنت اذكر له جميع الأوراق المرفقه في المعامله

الله يفرج همهم ويرزقهم بإذنه عز وجلللحديث بقيه

وين رايح · #42 15/10/2007, 02:52 AM

طيب وش رايك تكمل قبل لا تخرب الاخلاق:@

غــــــلا روحــــــي · #43 15/10/2007, 03:03 AM

إقتباس


	وانا بصراحه كنت إذا كلمت أي احد احب اطيب خاطره باللي اقدر عليه ولا اخليه يقفل السماعة الا وهو مبسوط لدرجة انه في شخص قال لي مره من المرات والله لو الامير ما يصدر امر على معاملتي يكفيني كلامك الحلو هذا