السلام عليكم ...
كيف الحال .؟؟

أكيد منقهرين مني بسبة بربرتي على قولة بعض الناس..
بس انتم أصبروا علي وشوفوا ... ومالكم الا ولدا يقرأ

اللي ماشاف المقدمة الأولى ووده يتابع معي يضغط تحت
المقدمة الأولــى ارررررعص

=======================================

وصلنا معكم إني كنت أدور جراهام بل مخترع التلفون المكنى بأبو أحمد
علشان أسأله عن إكتشافي ...
ا
لمهم اني دقيت على جواله وطلع لي واحد يقول :
عفوا لقد تعثر مرور مكالمتك ...

لاحول ولاقوة وش اللي تعثر المفروض يحطون واحد يقول :
{ لقد تأثرت نفسية مكالمتك وضاق صدرها وزعلت
وهونت المكالمة ورجعت لبيت اهلها .}

حتى اللي يقولها مالاحظتوا صوته يخوف تحس انه وكيل ثانوية إذا بدأ يزاعق على الطلاب بعد الفسحة .

المهم اني كلمت أبو أحمد ولقيته بمكتبه العقاري الداج وسألته عن إكتشافي
قال : مالك لوا أول مرة أسمع بهالاكتشاف .

سكرت من أبو أحمد وقلت الحمدلله كويس
كويس الواحد يرتاح الحين
ويقدر يقول انه اكتشاف بالفعل .

بس قبل ما أقولكم وشو هالاكتشاف ====> شكلي زودتها حبتين
انتم أصبرو كل شي بوقته حلو .

على طاري الوكيل
انا شبهت صوت اللي بالتلفون اللي يقول
{عفوا لقد تعثر مرور مكالمتك ..} شبهته بصوت وكيل مدرسة ..

ليه كل وكلاء المدارس لازم يكون يخوف
ويضرب بيدا من حديد ويدا من خشب

وكل حياته مع هالطلاب ترهيب فيهم وترويع وسياسة القمع والتنكيل

خلوني الزخ لكم مثال :

الواحد من الطلاب إذا كان يمشي باسياب المدرسة مثلا رايح يغسل يدينه
عقب مسح السبورة....
طبعا قديمة هالحركة من بعض الطلاب كقدامة السبورة..

المهم تلقاه أول من يفز اذا دخل الاستاذ الفصل وقام يمسح السبورة
مسوي فيها مخلص وكل هاللي يسوية علشان يطلع من الفصل
ويحس انه انتصر على باقي الطلاب

وفاز بجائزة الخروج من الفصل وحقق مبتغاه .

وبعد مايطلع تلقاه يسحب رجلينه والزبيرية ماسكها
بطرف اصبع رجله مسوي فيها بطل وأنه ضحك على الاستاذ .

وتلقاه يمشي شوي شوي ويتلفت ويشوف جيرانهم بالفصول الثانية
ويستعرض عندهم لسانه حاله يقول:
شوفوني ياطلاب يارخوم أنا برا أتمتع بالحرية المطلقة
وانتم لازلتم تحت رحمة هالمدرس..

ويظهر لهم ابتسامة الانتصار ممزوجة بشيء من الخبث والاحتقار .
ويظل عاشق السبورة المنتصر يتمشى بالاسياب

تلقاه مايخلي بلاطة بالمدرسة الا عدها ولا صحيفة بالجدارالا جرها

ويظل حال هالطالب السبوري على كذا حتى يمر من زمن الحصة
أكثر من نص ساعة وهو لازال يوزع ابتسامات مجده الذي صنعته يدينه .

ويقوم بالمرور على باقي الفصول ليسخر بأكبر عدد من الطلاب ويوريهم
شيء من بطولته...

بس فجــــأة

تختفي هالابتسامة وترتخي عضلات البطل المغوار بمجرد أن يكفشة الوكيل
المتسلط بأحد الاسياب .

وبقدرة قادر تتحول هالابتسامة الى بلعة ريق طويلة المدى مع صوت لمسطة القلب بالبطن...

ويتغير حال هذا الطالب من أسد كان مغرورالى حال قطو إذا كان في الزبالة يدور .
نرجع لللطالب المغلوب على أمرة بعد أن قبض عليه الوكيل بالجرم المشهود .

ويرسل الوكيل المتهور من عصاه السحرية المزركشة
بشيء من الشطرطون يرسل ضربة محترفة ممزوجة بخبرة سنين طوال

وسبحان الله هذه الضربة تدل طريقها
للأماكن الحساسة بالجسم {لاتفهمون غلط }
قصد ي مثل العين والصدر والراس ..

واي شي ثاني حساس { الحين أفهموني غلط بكيفكم } :p

وتلقى الطالب خوينا يطلق ساقيه للريح ليلوذ بفصله
ويدخل الفصل وهو يجر أذيال الهزيمة بعد أن كان خارجا منه منتصرا .

وبمجرد جلوسة يرن الجرس وتنتهي الحصة .

ولازال هذا الطالب على هالحال يعشق السبورة فأن لم تجده يمسح السبورة
فـتأكد انه غائب عن المدرسة ..
وكل سبورة تبكية وتفتقد خياله البليد .

واذا جاء وقت الحصاد ووزعت النتائج فتلقاه يدري وين يلقى نتيجته
أكيد مع الراسبين الداجين مثله .

بس قبل لازم يتأكد من شيء..
وهو هل له دور ثاني ؟؟
.
طبعا لا .

وعلى فكرة أنا لست ضد سياسة وكلاء المدارس التعسفية مع الطلاب

ولست مع عشاق السبورة مثل خوينا هذا ..

ولكن لاإفراط ولاتفريط ..



انتظروا الجزء الأخير ..... وشوفوا الإكتشاف الخطير




مع السلامة

===================================

جميـــع الحقوق مدفونـــة للــجمـــجمــــة

===================================

مشكور اخوي جمجمة الهلال اقول قصة عدنان ولينا الجزء الرابع عساك خلصت من تأليفه ومتى نراه في المنتدى والله يعطيك الصحة والعافية.

أما السبورة .. يا سلاااام ..

أحلى طريقة للفكة من أسئلة الدرس الماضي .. لدرجة انا نتهاوش عليها , وخليناها بالدور


أما انك واصفهم بشكل صححححح .. شكلك منهم p:p




بعدين هالحين هذا كله مقدمة.. عجل علينا بالجزء الثالث .. نبي نشوف وش آخرتها


ويعطيك العافية ..