مقدمــة إبن جمجوم في الإكتشاف الخطير لــسر البنات المزعوم - نادي الهلال السعودي - شبكة الزعيم

جمجمة الهلال · #1 21/01/2002, 08:37 AM

السلام عليكم ...

لكل إكتشاف مقدمة أو قصة

وكل إكتشاف يأتي غالبا بالصدفة

شوفوا المقدمة وراح تعرفو القصة اني اكتشفتها بالصدفة

منيب قايل يا بنـــــات

كيف حالكم يا شباب وشابات ..... منيب قايل بنات قولو لي ليه ؟؟
قلتو لي ليه ؟؟

طبعا تلاحظون اني ركزت على البنات بس

وعنوان موضوعي ايضا عن البنات وايضا قلت بأول كلامي اني
منيب قايل بنات مع اني سلمت على الجميع من شباب وشابات
برضه منيب قايل بنات وش السالفة أجل ؟؟!!!!

طيب ماسألتوني ليه قلت شابات ؟ مع ان كلمة شابات تدل على اني اتكلم عن الانثى طيب ليه قلت انثى ؟

لان كلمة انثى تعني تحديدالجنس الانثوي لأي كائن حي على وجه الارض ===>

كنياشوفكم مليتو تبون تدرون وش ابغى باالضبط .

ابي ريال وأسكت خخخخخخخخخخخ

يعني بصراحة... بصراحة مرررة
اكتشفت شي خطير بخصوص الشابات
شي خطير مرررررة تبتل تقول خطيرررررر

ياويلكم مني يأيها الشابات.. اكتشافي راح يوريكم انكم دعايات
كل شيء راح يبان لنا حنا الشباب.. بعد هالاكتشاف المهاب

وعلى فكرة حطيت لوحة تنبيهية.. على إكتشافي للحيطة و السرية
مثل اللوحات التحذيرية اللي بالمفاعلات النووية

لانه هالاكتشاف فيه اختلاف

فهو أخطر من إكتشاف ماري كوري لليورانيوم المخصب
وأخطر من إكتشافات أديسون للكهرب

وجراهام بل للتلفون والخياط للشيفون

وانيشتاين للنسبية ودالتون للذرية

وكلها اكتشافات ذات أهمية
كل هالمكتشفين زملائي وتراني قاط معهم في جمعية

المهم وش كتبت على اللوحة المملوحــة؟؟ كتبت التالي :

انتبة ايها الشاب.. ممنوع الاقتراب

قابل للاشتعال لأنه بصراحة خطير مرة وأحذر الاهمال

وراح يخلي كل الشابات من الزعل منفخات .. وللانفجار جاهزات

بسبب هذا الاكتشاف اللي راح لهن يبان ..... مانيب قايل لكم الآن

وتراني طرزت هذه اللوحة بكل فخر واقتدار وتشريف
لهذه اللوحة الرائعة بروعة مايتوسطهــا .
حطيت صورة لي

وهي صورة لجمجمتي الخطيرة برسمتها المثيرة

لتجذب الجميع لهذا الاكتشاف الغائب البديع

اللي مايحتاج لا شهادة أو تلميع

وأتوقع ما حد اكتشفة قبلي لانه يحمل اسمي والتوقيع .===} .واحد واثق

وراح اقولكم وشو هالاكتشاف بس اصبروا علي وتحملوني .. اوكي

لاني ما اقدر أقوله الا إذا تأكدت انه مافيه أحد قبلي أكتشفة
والا ماراح يكون إكتشاف راح يكون تقليد .
ل
ذلك اتخذت الاجراء التالي السديد :

دقيت على أكثر الشباب من زملائي المكتشفين المعروفين
وأولهم توماس اديسون

أنـــــــا وأديســون ـ أبو راشـــد ـ
رد أديسون يقول : ياجمجمة وش تبي , تراني بسوق الغنم
ابشتري نعيمي عازم رجاجيل الليلة لاتبلشني
قلت له : هلا ابو راشد ( سمى اديسون ولده البكر راشد تقديرا
لشخص توسط له بشركة الكهرب علشان يلقى لولده راشد
وظيفة بالشركة )
نسيت اقول لكم من هو اديسون ؟ تراه مخترع الكهرب
المهم سألت ابوراشد عن اكتشافي وعلمته تفاصيل الاكتشاف
وهل مر عليه مرة من المرارير .
قال : لا ابداً . ماكد سمعت فيه بعدين ياجمجمة ماتدري اني بطلت الاكتشافات { صار دخان ذا توه يبطله خخخخخخخ}

قلت له : اوكيه مع السلامة نشوفك بكرا بالاستراحة

بعدها دقيت على المكتشف جراهام بل قلت أتأكد أكثر ....

أنـــــــا وجراهـــام ـ أبو أحمـــد ـ
دقيت على تلفون بيته وكان صراحة مميز مرررة كل رقم يتميز عن الرقم الثاني
يعني مختلف بصراحة مافيه ولا رقم متشابه بس يظل مميز بالاختلافات
مثل بعض رؤساء الاندية مميز بسبب اختلافاته وتصريحاتة
المتخلفة وقراراته المدحدرة .

تعرفون جراهام بل هو مخترع التلفون واسطة يعني .. إمحق واسطة
قاطعين الاختراع عنه .

المهم يوم دقيت على بيته طلع لي واحد يقول :
{..عفوا ان الرقم الذي طلبته غير موجود بالخدمة مؤقتا . وي سوري ... هذا بالاعنجليزي ..}

قلت في نفسي : أفااااا يأبو أحمد { سمى جراهام بل ولده البكر أحمد
تيمنا بأسم شريكة بالمكتب العقاري
اللي فاتحة هو وياه بوادي لبن خلف حجزالمرور المركزي للسيارات
اللي هالايام نزلو نص السيارات بمزاد علني وكل اللي حضرو المزاد تراهم شريطية المعارض
يعني ما استفدنا
صب وأحقن }=={ انواع الدجة

قلت أقاااااا مسوي زحمة ومخترع التلفون وآخر شي يقطعون اختراعك عنك هزلت .

والمفروض هالرسالة اللي بالتلفون يغيرونهــا والا وش رايكم ؟؟

TEL & TV

بعدين هالواحد اللي كل مرة ينط لنا بالتلفون إذا كانأحد لخطه مقطوع
مثل ماينط علينا المذيع بالتلفزيون ويقول :
{ بأمكانكم متابعة ماتبقى من المباراة عبر القناة الثانية }

وإذا غيرت للقناة الثانية تلقى مذيع ثاني بالقناة الثانية مغطي الشاشة ولا ومن الزين الطبايع هالمذيع سمين يعني مافيه أمل تشوف شي ..

المهم هالمذيع يعلمك ان المباراة انتقلت من الاولى الى الثانية
وانه ترى النتيجة بين الفريق الفلاني والفريق العلاني لازال تقدم الفريق العلاني
بنتيجة كذا ويعلمك من سجل الاهداف ..

مابقى الا يقول اسماء الجمهور ....

طيب ياحبيبي يامذيع يابعد الدببه كلهم تدري أن هذي مبارة وتدري اننا محترقين ومتحمسين وتجي انت ووجهك تغطي علينا وش هالنذالة ؟؟؟!!!!.

المهم نرجع للي نط علي بالتلفون أنا اقول مثلا لو يحطون بدال الرسالة القديمة واحد يقول :
{{عفوا ان الرقم الذي طلبته انت وجهك مافيه أمل أحد يرد عليك الا إذا راعي الرقم جاب واسطة علشان نرجع له الخط وهذيك الساعة إذا جاب الواسطة
يصير خير واذا ماعنده واسطة قله يقشر بصل وماللبلاوي الا الصبر .. شكرا }}

ياليت كل واحد منكم يقترح رسالة بدل الموجودة الحين ..اوكي

نرجع لابو أحمد ...............................

مــهرجــــان وادي لبــــــــــن غيــــــــر ...

صح نسيت اقولكم
ياشباب اللي يبغى أراضي منح ترى ابو أحمد جاهز ولا وبالتقسيط بعد وعليها عروض رهيبة بسرررررعة لاتفوتكم شوفو العروض وشي

يعني مثلا إذا شريت قطعة أرض مساحتها كالتالي :

5,000 {متر متقشع مهوب مربع} فما فوق تحصل على كرتون مناديل سمايل

10,000 م فما فوق تحصل على غسيل بستم مجاني

15,000 م فما فوق تحصل على تذكرة دخول لملاهي عتيقة

20,000م فما فوق تحصل على كنادر جبلية تعرفون وادي لبن يبي له.

30,000 م الى مالانهاية حتى لو تشتري الوادي واللبــن
تحصل على اشتراك مجاني بجريدة الندوة لمدة لك الى مايقفلن كل مخابز التميز ولا تلقى أحد يبي الجريدة يشيل فيها الخبز .

وفيه قطعة أرض بعد اسمها الأرض الخفية تدرون ليه ؟
لانه محد يدري وينها الا ابو احمد وشريكة ..

يعني مخفية بالمخطط بس الحظيظ اللي يشتريها لانه سوف يحصل على الجائزة الكبرى وهي المكتب العقاري ,
< حركة قديمة يابو أحمد تلعب على العالم داري محد فايز فيها لانه لو فاز أحد قعدت تشحذ أنت وخشتك >

يوووووووووووه والله يانا مسكت بكم خط ونسيت الموضوع

لا مانسيته بس هذي المقدمة لإكتشافي العجيب

بس خلوني أقولكم كيف لقيت ابو أحمد .

يوووووووووووووووووووووه وش هالحظ الشين

يؤ يؤ يؤ معليش ياشباب هذا اللي ماكنت حاسب حسابه

بصراحة يا شباب وشابات ما أقدر أكمل الموضوع اليوم تدرون ليه ؟؟

لانه بصراحة خلص الحبر ولا عندي قلم ولا أقدر أروح البقالة الحين

لأن الساعة الحين ثنعش ودقيقة من الليل وتعرفون البقالات تصك ثنعش

ولا أقدر اروح بالسيارة لأنها مبنشرة
بسب مسمارمنسدح بجنب ملاين المسامير المتسدحة بالشوارع والسبة أنا أكيد أنا والا وشلون ما قدرت اتفادى هالمسمار .....

أعذروني قريبا نكمل