سلام عليكم ورحمة الله وبركاته
هذه من اجمل القصائد اهديها لكل عضو وزائر في منتديات تحدي الرمال
نبدأ ..
(( الجيب الربــــع ))

فوق جيب اخر موديلات الربع=فيه خفت دم وفيه خفت ظلال
خطه بجنبه تقل ممخش سبع=ولا توقيع الوليد بن طلال
لا تمقلته تقل غارب ضبع=وان نطحته تقل برق في خيال
تقل بالهويات يقبع به قبع=شوت الدعيع يوم المنديال
يسبع الطلعات بعيونه سبع=لا عطاه اثنين سواقه خيال
هو نعده نادر وغيره تبع=طير شرق جاذبه من راس عال
للمواتر ينتله يطق صبع=ما يرده لا جبال ولا رمال
طابعين العز في خشمه طبع=قوم فوجي لعنبوا هاك الخوال
قيمته بالكاش سبعين وسبع=الف بالدرهم ولا بالريال
يجبع المايع لياوصله جبع=الصلابة بمركبه ماهي خمال
ميزته اخذ من الفز طبع=نمرٍ مرنقط ويلحق له غزال
سايقه ما حط على راسه قبع=ولا رمى طاقيته هي والعقال
ولا مطالعهم بعكاش وضبع=ولا طلعوا نقبين ولا راحوا شمال
بالعلا يشون من رمي الصبع=اربع مطنخ زحازيحٍ رجال
ضابطين الشاي من مي النبع=مع مهاديف الذهب حدب الدلال
ها قولوا رايكم يا هالربع=اسمعو بالله ابسألكم سؤال
هو بأحسن جيب من جيب الربع=جربوا والتجربه خير ومثال

(((((( قصيده في جيب الشاص للشاعر حمود نايف العنزي ))))))

يا لعنبوه الشاص الألفين وأثنين=عز الله أن المبدعين أبدعو به
تساعدو في صنعه أطلق خبيرين=باشراف عالم مبتداه أبتدو به
بروفسور مخترعلة براهين=فعله حصانة عن خطاه ورسوبه
حصل شهادة علم مع خبرة سنين=ولة جائزة نوبل زمان محسوبة
من عائلة بالعلم دايم ملمين=تاريخهم بالعلم توارثو به
أبوه ياباني سياسي قوانين=في دولته يصدر نظام العقوبه
والأم نازية مواليد برلين=وخوال خاله من مواريث كوبه
صحيح ناقص لأن ماهو على الدين=عالم وعلمة ما يكفر ذنوبه
أهم أختراعاته على الراس والعين=يشكر على أفكارة ودقة أسلوبه
أسخر بصنع الجيب من قبل عامين=بالسر حتى دولته ما درو به
لين أنتجه وأنتاجه أزين من الزين=رغم أختراع الغرب تفاجأو به
من جودته له بالصحافه عناوين=بالسوق ربح كل من تاجرو به
رجح موازين وهبط موازين=كل الدول بالبورصة ساهمو به
نزل من الدولار بالسعر ثلثين=ودعم رصيد الين نوبه ونوبه
لاند الكروز اللي تعشقه ملايين=قبل يجي للشرق تباشرو به
من دولته جابه وكيله بتأمين=لدولة آل سعود ما الفاهدو به
أسعد نفوس اللي لروياه شفقين=كل دعا له بالجزا والمثوبه
أباصفه كله من يسار ويمين=لو أن في وصفه عليّا صعوبه
بين كما أبو الهول مبنى الفراعين=كله حجر مابه حديد وطوبه
وبين المواتر سكبته تجلي البين=سكبه زعيم ومحتفل في خطوبه
واللون بيج وبويته من بلاتين=ضد الحرارة والهوا والرطوبه
وحَمَار خطه مثل سيل البراكين=والا حَمَار الشمس حزه غروبه
وكبوته أنحف من حجم بديَه شوين=ورفارفه متناسقه مع جنوبه
ونظام دفع الحركة دفع تربين=فريد من نوعه وهم طورو به
وماطور صماماته أربع وعشرين=وبخاخ مصروفه يقلل شروبه
وتحظيرتين أمام وخلاف عكسين=وستة عشر جنطة على قد هوبه
ومساعدات أربع وقدام يايين=ودفرنس وفريول يحرك كعوبه
وكوابح آي بي أس تعمل نظامين=وبكل هوب للكوابح أنبوبه
وونشين سحب ويسحبن وزن طنين=وهزاز يمنع بالصحاري نشوبه
وحمولته بالكيلو ألفين وألفين=على الشدايد فيه عزم وصلوبه
من قوته يصبر على الزين والشين=الطقس ما همه جليده وشوبه
متعدد الأغراض للأتجاهين=ما فيه عيب أقول ذا من عيوبه
لأقفى مكوك كل طقمه مغادين=علم الكواكب والفضا كلفو به
لأقبل كما الجاكوار والا السقستين=في وقت غاره والعدو ولعو به
لأعرض شهاب مرسل لشياطين=ظرب غلاف الجو وأحدث شبوبه
منوة غريب شف باله بعيدين=الدرب لو طول بسرعة يلوبه
ما يمنعه لا رمل لا أحجار لا طين=غريب ما تمشي المواتر دروبه
وأن قلت للسواق يا الأخو من وين=يعطيك علم أرض قفر ما وطو به
ما هو زماله عايلات ووراعين=ولاهو زماله للعفون وجلوبه
سلعة ثمينة للرجال الثمينين=راع الولع يشريه لو باع ثوبه
لوأملكه لو قيمته كلها دين=أهديه للي بالكرم مجدو به


(((((( قصيدة بالسفاري ))))))

وهمي يالي همني حيل واغرق=حالي وفرح العين مني سرقيا
وقفت تال الليل والخيط ما شق=والدمع من عين المولع غرقيا
اللي تأمل في حياتي وبرق=وشاف الامل في دنيتي ما برقيا
يلقا وشوم الحزن في مهجتي دق=وقليل من عمري هو الي عتقيا
ما بين علم الطافي نق في نق=وما بين علم بالزفير وشهقيا
وما بين سم في حشا الروح يشلق=وحطم خلايا بالوريد ومحقيا
وما بين حزن لاصق الروح والصق=ومن كثر ماهو لاصقن به سحقيا
اجتاحني حزني وغرب وشرق=وانا الاسير الي من العام شقيا
فرقا الونيس اللي فلق حالتي فلق=علمه هدم حالي وموجه صفقيا
بالشدة القصوى وباليوم الامحق=هو العضيد الي له الروح تقيا
عزاه يا قلب بك الهم طبق=وارهش عليك الحزن فوقه نعقيا
وسريت في ليلي مع الجيب الازرق=اللي زراق الليل معهن زرقيا
جيب زرق بالبيد معها تمزلق=اللي لمتاهات الفيافي عشقيا
عشق العشوق الي تعاشق وتعشق=تلقا الرضم من حدر بديه رشقيا
شقاق رشاق الفيافي ليا شق=يشبهن رشاش النياشن مطقيا
جيب على حلو الفيافي تمطق=مع الفجوج الي تعقد نطقيا
جيب سفاري للمساري تدلق=مشيه على غيره بدابها فرقيا
سميته الوافي وهو وافي حق=حقق وانا حققت فيه الحققيا
دايم على خوض الصعيبات يشفق=لا شاف صعبٍ قال ربي رزقيا
عزمه قوي ما عمر يومٍ تعلق=يا شاف حمر النفود فاع انطلقيا
يشبه لشيهان بالجو حلق=يا جاك مهو بشايفن له سمقيا
لا شم راس الطعس ارقب ودنق=والقمه نمره وانتهض وانصلقيا
يكسر عناد النفود حين يتزحلق=في سكته تسفي رمال الحمقيا
لا جا مع الضلعان وقام يتسلق=تقول هذا ما براسه علقيا
يفرح اذا شاف الوعض ويتشقق=قلبه حديد وقلب غيره مزقيا
لا مر طلعات الشباب يتعنفق=يقفى ولا يقفى شبيه الفشقيا
عذروبه انه دايم الدوم يسبق=يبدع جديد يقول منهو لحقيا
حب الوفي مني تملك وغلق=كامل وصوف الكنق فيه انطبقيا
من يركب البترول ما راح يزهق=ولا يعرف التهميز هو والزقيا
في خوة البترول تقسم وتنطق=خوة وفى خوة صويب الشلقيا
ارتسي على كبد المواتر وحرق=من بينهن يشدى لميع البرقيا
الجمس والتايوت والفرد الاخرق=كله مع البترول خاق وخقيا
كنق الصحاري دقدق خشومها دق=دقدق خشوم الي تريد السبقيا
خلاني الجى للخلا واتملق=لان الخلا من واقعي هو نفقيا
حاولت اقاوم لكن الهم حرق=كل الامل واخرس جميع النطقيا



(((((( هذه قصيدة للامير خالد السديري في مدح النيسان )))))


لاوالله اللي قعد عماش=وجيوب نيسان خلنه
ينخا خوي النشاما شلاش=يشري له الزيت ويحنه
اللاند روفر تنك وخياش=انظار الاجواد عافنة
قرنبع والعيون غراش=الي سرى مايقدنه
ليته يبيعه ولو ببلاش=ويقعد مع الربع بالعنه
احذرك تركب الانترناش=اللى يطبل تقل شنه
من صحبته راكبه ينداش=ومن داخن الزيت يعمنه
والاالتيوتاركوبه لاش=والي مشى صارله حنه
يمشي وكنه بوسط قراش=مكروه مايخلي الونه
ركابه اللي بغير فراش=اصابع الفقر عافنه
الي مشى صابه الهشهاش=ياالله لك الحمد والمنه
والفلفو الجيب بارد جاش=ذنوب راعيه يرمنه
موتر ردي كنه الخفاش=تبطي عيونك يراعنه
مايوالمك والنطاش نطاش=والليل ماهن بيسرنه
وجيوب نيسان خوش قماش=ان ابعد المي يردنه
اسبق من العين بالارماش=بالقيظ في لاهب الكنه
يفرح بهااللي يبي المطراش=الي اوحش القاع يطونه
يصخرن بالهوى الاوحاش=ماطاله الشوف طالنه
اللي عليهن ماينهاش=طريدهن يخلفن ظنه
مشى بنا والكبود عطاش=ماناشت الهجن ناشنه
زارن حماد جنوب خباش=كواسر الطير ماجنه
مضامي ماوطاها اللاش=نباته الريم يرعنه
خليطهن والقطا منحاش=جوازين كنهن هنه
من شاف هاك المها ماعاش=ذبوه مرحوم للجنه
مادوجن في طريب وجاش=مجاهل الرمل داجنه
يوم الصواريخ والرشاش=مراكب الميج يرمنه
اتواجه الهوش بالهواش=يامخلف الدين والسنه
ننبها ماعليها قشاش=مابعّّداليوم يدننه
اصايل مابهن اكداش=ما ذبه الطير ذبنه




((((((مرثية السفاري ))))))

يادمعة هليتها تحت الاغصان=أبكي على فرقا عشير غدا لي
شهرين مرن صاحبي ما بعد بان=من يوم قفّل ما لقيته قبالي
ياشين حالي صرت وحدي وزهقان=تحت الشجر واقف وأرثي لحالي
في الليل وحشه ما يجيني ولا انسان=وعز الظهر يصلى على القلب صالي
يارفقة قضيتها طول الازمان=مع صاحب يرخص علي كل غالي
لا من ذكرت اللي مضى والذي كان=يزيد فيني الهم ويحتاس بالي
مشوارنا نقطعه في حب واحسان=كم قد مشينا من دروب طوالي
وكم قد رقينا من طعوس وكثبان=في سرعتي من شافني قال رالي
وكم مرة يوم المعاشيب تزدان=اجلس معه الين وقت الزوالي
والله من وداي نزلته وشعبان=ماهمني في الدرب طامن وعالي
عقب المحبه باعني بارخص اثمان=باع الرفاقه والأمل والدلالي
اول يجي يمي شفوق وولهان=لي غاب عني ما يدوّر بدالي
يطرب الى من شاف موتره نيسان=ويمشي معه دايم وكنه ظلالي
ياهل العقول المنصفه سايقي خان=كنت احسب انه لي رفيق موالي
ما يدري انه لي رفيق بيابان=يحرص على ممشاي اول وتالي
وان كان قلبه قاسي ما بعد لان=فالله يصبرني على ماجرالي



وهذه قصيده في مدح الجمس

قالوا البيم قلت البيم للسلاطين=قالوا الشبح القار قلت حلاياه
ماشقح قلت الشبح خاطره شين=لغاب مس بطن العرق يوما ولاجاه
قالوا الهمر قلت الهمر للشياطين=لكن لا جا السهل كلا تعداه
والشاص قلت الشاص جافيه عيبين=فيه الشخر ضيق ولجة زواياه
والجمس قلت الجمس مافيه ثنتين=منجا يعدرب فيه لاتسع احكاه
اربع ميه حجم المكينه وخمسين=كمل صفاته صانعه يوم سواه
في البر عند الحر في العسر والين=في البرد عند الطرد تعرف سواياه
قلته لأنه فيه من داعج العين=عدة مزايا واول الوصف ممشاه
حتى الرفارف شابهت مردف الزين=والبويه الي شابهت مبسم اشفاه
واليوم انا خلي اناديه بسمين=البهبهاني واسمه الي عرفناه


وسلامتكم يالذيابه