السلام عليكم كيف الحال ياشباب وياشابات

سبق ان قام أحد الأعضاء بنشر هذه القصة هنــا قبل مدة طويلة وقد نقلها من منتدى الاقلاع
ولكن اليوم انا اقوم بنشرهــا..

بصفتي مؤلف القصة وقد كتبت منها حلقات قليلة ..
وسأحاول أن أكمل الباقي من الحلقات

واليوم أحب أن اضعها بين ايديكم واتمنى تعجبكم ..

ملاحظة القصة سردتهــا بلهجتي واللي ما يفهم شي يقول لي .....اوكي

الحلقة الأولى

انتم تعرفون عدنان ولينا زين بس نسيتوهم....

انا عندي آخر اخبارهم عدنان تزوج لينا بعد المسلسلة على طول وعاشوا في الجزيرة المفقودة جزيرة جد عدنان بس قبل ما يتزوج لينا صارت أحداث....

كان الدكتور رامي الله يرحمه موصي لينا انها ماتتزوج عدنان الا لما يلبس ثوب وشماغ ويصير رجال ويترك عنه الشطانة ولا يطق احد ويصلي بالمسيد وخاصة الفجر.

يوم جاء عدنان يبي يخطب لينا من عمته اللي بجزيرة الأمل تذكرونها اللي طاحت على بيتها قذيفة من مركب الرماية حق القلعة اللي تسوقها سميرة.

المهم يوم جاء يخطبها قالت له لينا: اني ياعدنان احبك بس جدي رامي الله يرحمه موصيني انك لازم تلبس ثوب وتغدي رجال , قالها عدنان يابنت الحلال انتي تبين تزوجيني والا تبي تزوجين ثوبي أهم شي الجوهر- مهو ناصر الجوهر مدرب منخبنا الله يوفقه -
المهم قالها ان الرجال بأخلاقه مو بمظهره ومن هالكلام . المهم لينا مااقتنعت قالت : بس ياعدنان جدي رامي الله يتغمد روحة الينه (على قولت الكويتيين) موصيني بهالوصايا وأنا آسفة ياعدنان إذا قلت لك اني ارفض الزواج منك الا لما تحقق وصية جدي .
المهم عدنان تعرفونه راسه يابس وهو بنفس الوقت يحب لينا مشى وطلع من بيت عمتة لينا حتى القهوة ماشربها طلع وهو معصب يوم جاء يبي يركب قاربه يبي يرجع لجزيرة جده قابلة القبطان نامق وعبسي وقالوا له :
وش فيك ياعدنان ليش معصب قال ابد مافيه شي بس لينا ما ودها تتزوجني وعلمهم بالقصة,
جاء نامق وبدأ يقنع عدنان وقاله: ان الزمن تغير وبنات هاليومين مالهن الا رايهن فأنت البس ثوب وتزوجها وبعد ماتتزوجها افصخة قال عدنان:
معصي انت تعرف يابو طلال -(( نامق جاه ولد من سميرة وسماه طلال تيمنا بأحد بحارته اللي ماتوا وتخليدا لذكراه))
المهم قال عدنان : يابو طلال انت تعرف اني مأحب الثوب انا راعي كشتات وصيد وسعة صدر وفلة حجاج والثوب يضايقني .

و بنفس الوقت كان عبسي مشغول معه ضفدع يعرمشه جاء وقال لعدنان:
اسمع يابعد عمري ياعدنان - عاد انتم تعرفون عدنان يعز عبسي- قاله اسمع انت لازم تتزوج لينا لا بكرا تروح عليك البنية ترا نمرو هالخبيث يخطط عليها - طبعا عبسي منقهر من نمرو أعلمكم بعدين ليش- المهم بدأ عدنان يلين شوي وقعد يفكر وحسبها زين قال ايه والله باتسر تروح البنية واتوهق انا وابتل عزوبي .

جاء ابوطلال وعبسي وقالواله: امش يارجال ارجع خلنا نخطبها لك قال عدنان : اوكي يالله .

ولما كانوا رايحيين لبيت عمة لينا علشان يخطبونهــا فجأة قابلهم من تتوقعون..............

في الحلقة القادمة نكمل

حقوق التأليف مدفونة للجمجمة