|
,, هذرة ,,
السلام عليكم ورحمة اللّه وبركاته أخواتي ,, إخواني ,,  ما لكم بالطويلة ,, أمس صحيت الساعة 9 صباحاً على غير العادة  , وحسيت إن غرفتي مر عليها إعصار , خصوصاً بعد عودتي من السفر  ,, وقلت يبيلها نفض هالغرفة  ,, وفعلاً .. وتصير الساعة 11 وأربط شال الزعيم على كشتي ,,  وأبدأ باسم الله ,, وأول ما بديت, بديت بالمكتب.. وما أدراك ما لقيت ,, بعد التصنيف طلّعت مجموعة من الأشياء اللي ما عدت أحتاجها وحطيتها بكرتون <<< ليه؟؟! اصبروا وتعرفون ,,  بعدين سيّرت على المول اللي تحت السرير, وطلّعت كرتون ثاني ,, وأخيراً انتهيت بمحبوبتي التسريحة, وطلّعت منها كرتون ثالث بعد صراع نفسي عميق وصياح ,,  وش باقي؟؟ باقي الأرض..  ناديت الشغالة وقلت لها جيبي المكنسة لا هنتي ,, جابتها ,,  قلت لها خليها وروحي,, المسكينة قعدت تطالع وفي رواية "تحدق", وأول مرة أدري إن عندها عيون!!  فهمت إنها مصدومة,, قلت لها ايه خليها وظفي ,, وراحت ,,  مسكت المكنسة "لونها عنابي يجنن" وشبكتها بالكهرب, وأول ما شغلتها طاحت ,,  قلت حتى هي ما صدقت!!  وسويت المعجزة الثامنة وكنست الغرفة  ,, وحسيت لو أمي شافتني بتقول كلمتها المعتادة عند حدوث المعجزات: بيموت يهودي!!  حسيت الغرفة طلعت أكبر بعد ما خلصت ,, وبس ,, ,, ,, ,, ,, طيب! طيب! أدري! تبون تعرفون وش بأسوي بالكراتين,, لا ما راح أرميها,, بأرسلها لأحدى الجمعيات المختصة اللي توزعها على الناس المحتاجين,,  ويا كثرهم عندنا,, :sad: ,, ,, ,, ,, ,, الغرض من الهذرة اللي فوق,, غداً بإذن اللّه سأبدأ بالملابس بما إن اليوم إجازة عشان أكتب الموضوع ,,  وأبيكم تبدون معي وتشاركوني الأجر ,,  يعني بإختصار أبي نسوي حملة التخلص من كل شيء لا نرغب فيه ولا نحتاجه, ويمكن الإستفادة منه من قبل أشخاص يحتاجونها عن طريق الجمعيات المختصة وأتمنى من الجميع المشاركة ولو بدعوة ,, وتخيلوا الأجر اللي ممكن تحصّلونه مقابل تي شيرت قديم أو بنطلون مثقوب.... إلخ <<< يمديكم على "مثقوب"؟؟! حسنة واحدة ممكن تثقل ميزانك ,, قال عليه الصلاة والسلام  لا تحقِرنّ منَ المعروفِ شيئاً ولو أنْ تلقى أخاكَ بوجهٍ طليقٍ) ,, ,, ,, ,, ,, استراحة أخيرة في يوم من أيام الأسبوع قبل الماضي ,, وفي أرض بعيدة ,, كنت مع الوالد وأختي وأخوي نلعب بالورق,, <<< مب بلوت!!  وكانت أختي الصغيرة ذات ال6 سنوات والطبع الشيطاني تلعب بالأرض وتطارد الحشرات,,  أمسكت أختي بحشرة صغيرة جداً تشبه النمله ,,  وفي خضم تفكيري باللعبة دار الحوار التالي بين أختي والحشرة ,, أختي: السلام عليكم يا حشرة ,, الحشرة: ............ ,, أختي: أنا اسمي ........ ,, الحشرة: ............ ,, أختي: ما عندك اسم؟؟!  الحشرة: ............ ,, أختي: خلاص بأسميك كورن فليكس!!! ومن يومها كل نمله صرنا نسميها كورن فليكس ,, بعدها بكم يوم بالطيارة سألتها: جبتي كورن فليكس؟! أختي: وش أبي فيها؟! عندنا كثير بالسعودية ,, ,, ,, ,, أخيراً العذر والسموحة عن الأسلوب العامي وبليز لا أحد يدقق,, لأني كتبت وأنا مستعجلة ,, وأتمنى ما أكون ثقلّتها عليكم ,, عندي طلب أخير وهو اللي عنده اختبار IQ بالعربي ينشره مشكوراً هنا ,, سلامـــ,,ـ |
الوضع الشجري
