مسائكم اسيا مسائكم بطولات مسائكم تفائل (لا تصدقون استهبل متعود اكتب للجمهور )


صبحكم الله بالخير اخواني اخواتي مرتادي المجلس العام.


تلقيت دعوه طيبه وكريمه من الاخ ابو طلال وما كنت بوافق ابتغلى بس حلف علي طلو وطلال يامر امر.


حقيقة مليت من منتدى اسيا وخلاص خلصت البطوله رحت قلت اشوف خوينا اللاعب باسكال طلع اللاعب مجدد مع ناديه ابوك يالهم قلت اروح للمجلس العام اطلع ما في خاطري شوي.


طبعا موضوعي مو ذاك الموضوع هو نقاش عام اتمنى يفيد الجميع واتمنى اني ما اتيميلح زياده لجل ما انكرش من اول موضوع عندكم .



الموضوع طرا على بالي بمناسبة الصيف وبعض اخوانا الخريجين الي يدور وظيفه والي يدور كليه والي يدور جامعه وهذا شيء طيب.


بس انا مستغرب شيء ليه الكل يبي وظيفه حكوميه وتحديدا عسكريه ليه الواحد يدور على الربح الوقتي والدخل الشهري.


ما ابي اتفلسف عليكم بس اامانة القطاع الخاص ممتاز يفتح لك مجالات رائعه جدا وانا اتكلم من واقع خبره عمل 6 سنين في القطاع الخاص بين الرياض والشرقيه وجده والكويت حتى .


صدقوني يا أخواني القطاع الخاص هو المستقبل الحقيقي للفرد وخاصه في هذا الزمن .


جدا مستغرب من امر شبابنا واحس شيبانا اثروا عليهم بالله رتبة عريف في الجيش ولا وظيفه براتب محترم في قطاع خاص ومستقبل مؤمن لك.


أخواني انا ما اقول لكم الوظائف العسكريه فيها عيب بس الواحد يجلس ينام عند ابوه ويقول اذا فيه وظيفه عسكريه ولا حكوميه ولا بنام .


ابو الواحد ما يدري هو يهتم بزوجته وبناته ولا بولده العاطل جد اتكلم يا اخوان وربي شيبانا بيض الله وجيهم وربي الواحد ينبسط اذا توظف ولده يعزم ويفرح وكانه هو الي توظف.


ياشباب ادري الواحد وده انه يكون ظابط ومن هالكلام بس وربي ما هي قمة الطموح هالنجمه وحنا عارفين اليوم اغلب الظباط واسطه نفسي اجلس مع احد يقول طموحي اكون مدير شركه ولا كبير محاسبين الشركه الفلانيه ولا مسؤول تسويق او مدير علاقات .


ادري يمكن الواحد يقول وش هالفلسفه آخر الليل ولكن وربي موضوع من زمان ودي اقوله لكم ومالقيت احسن من اخواني الزعماء اسدحه عندهم.


ياجماعة اغزوا القطاع الخاص فالمستقبل فيه وربي اللهم اني البغت اللهم فاشهد

(قلبتها حرب البسوس )

فلسفة آخر الليل

*كان عندنا غدا قبل اسبوع المهم زوج عمتي يبارك لواحد سالته وش تبارك له قال ولده توظف قلت وين قال عريف في الجيش قلت كم نسبته قال 94
قلت ليه ماسجل في الطب قال ابوه رفض قلت وش الحجه قال ما يبي يشتغل مع نسوان قلت طيب ليه ما سجل هندسه قال يقول المهندس كنه عامل بنقالي .


*ابو طلال ياليت هالرجال ابوك لجل يفصلك من المستشفى لا جد متى تختفي هالعقول او تتطور الله يهديهم انشاء الله.


*اتمنى من كل شاب عاطل مهما كانت النتايج لا يروح مكان الا وهو متاكد انه بيبدع فيه ولا تحرق مواهبك وطموحك عشان فكر رجعي وخل نظرك دائم فوق وصدقني بتوصل للي تبي وصدقني ابوك مهما كان معترض مصيره يوم يرضا لانه با اختصار ابوك.



*متى اسمع ان الواسطه انشالت من الدوائر الحكوميه والجامعات فوالله الي يحصل لاولادنا وبناتنا حرام حرام حرام.


*متى يأتي ذلك اليوم الذي اسمع بالمخترع السعودي الفلاني ومصنع السيارات السعودي والكيميائي السعودي (تخيل يبو طلال انك راعي مصنع تيوتا ولا نيسان والله فله كان بتوظف عندك ) ومتى ارى ذلك اليوم الذي يدعم فيه رجال اعمال هذا البلد المعطاء شباب الوطن بدل من ان ندعم المقيمين والاجانب.



*قبل الختام اتمنى اكون اطليت عليكم بأول موضوع في هالمجلس العامر يكون فيه الفائده وزي ما قلت هو موضوع للنقاش وشاكر لابو طلال دعوته الكريمه.


خــــــاتمه خاصه جدا

سألني بكل غباء تحبها قلت وربي اعشقها
رجع وسألني من جدك تحبها قلت وربي اموت في ترابها
قال طيب وش حببك فيها قلت ياليل ما اطولك وشتبي انت؟؟
قال ابي اعرف وش الي محببك فيها بس ياليت تجاوبني؟؟
قلت وش هالسؤال وربي انت غبي؟؟؟ قال صح غبي بس اشوفك تحبها بجنون مشفت احد يحب زيك؟؟؟
قلت هي الصديقه وهي الاخت وهي الحبيبه وهي مصدر سعادتي هي سبب وجودي وبقائي بهالدنيا بعد الله هي من يخليني اضحك ومافيه غيرها يبكيني لما تضحك تضحك لي الدنيا كلها ولما تزعل اكره اني انولدت بهالدنيا.....

أقولك ليه أحبها باختصار وتريح عمرك وتريحني...

لأنهـــــــا أمـــــــــــــــــــــــــــــــــــــــــي فديتها وفديت التراب الي تمشي عليه .


عرفت ليه احبها ولا اوضح اكثر ....


قال الله يخليها لك قلت ويخلي كل ام لعيالها فديت كل ام سوت لعيالها مثل ماسوت امي لي فديتك يا أمي....


اكيد تبون تعرفون من هالغبي لا تخافون ترا ما هو ابو طلال هذا واحد باختصار غبي............

وعلى دروب الزعامة والانتصارات ملتقانا.