السلام عليكم ورحمة الله وبركاته .....

يصبحكم / يمسيكم بالخير كلن حسب نكه

جايبه لكم .. مجموعة نصايح ذهبيه فولاذيه بمثابة القنابل العنقودية

و خصوصاً مخصوصاً لبنااااات اللي على وش قواااااااااز

عشان تسيطرون على الأوضاع..ويصير سبع البرمبا خاتم بأصباعك ..

نتوكل على الله ونبدأ.!

[ 1 ]

إذا جاب لك السبع هديه عطر مثلا لا تفرحين وتقعدين بهبالة تشكرينه

وتقولين حلو يهبل يعطيك العافية حياتي لأنك كذا بتصيرين كأنك ما شفتى خير....

أنتِ بكل بساطه ناظري الهدية ببرود وابتسمي ببرود وقولي: يووووه يا حليلك يا محمد (مثلا)

هذا كأنه العطر اللي حاطته أختك بدريه على مغسلة اليدين حقتهم !

ترى يتحطم بقوه وبيطيح وجهه وبيقول وأنا وش دراني شفت ريحته حلوه

قلت أجيبه

قولي خلاص مو مشكله نحطه على المغسلة حقتنا .

صدقيني بعد هذي المرة بيحرص يجيب لك هديه عليها القيمة مو يلعب عليك بقارورة عطر...




[ 2 ]

إذا شفتيه فرحان مبسوط وهو راجع من برى ...

معناها في شي باسطه ومخليه فرحان وأنتِ ما تعرفينه....

عاد لا أوصيك ابدئي في تنفيذ عملياتك التنكيدية

وأول قنبلة ممكن ترسلينها على قواعد سعادته هو طاري أمه !

قولي له: مدرى وش فيها أمك على آخر مره زرناهم...

هو بيقول: وش صار قولي: مدرى نفسها شينه على وتقول ليه حمودي ولدنا ضعيف

وكل شوي تقول أنتِ تاكلين غداه وش قصدها هاااااه

يعنى انا مقصرة في حقك وإلا قصدها إني دباااااااااا..

وإذا شفتي انه لازال للسعادة اثر بوجهه اتخذي الإجراء الثاني....

وابدئي في عزف سنفونيتك العذبة عايريه بآي شي عندكم...

قولى مثلا:

متى بنغير هالسيارة القرنبع اللي تفشل والله إني استحى عند اهلى من سيارتك ...

اشتر سيارة بالتقسيط بس نفتك من قرنبعك هذى :017:

أو قولى له: الله يخلف على بالجنة....

الناس عايشين عيشه حلوه وفي بيوت تفتح النفس ويسافرون كل سنه....

وأنا يا حسره مدفونة بهذي الشقة الخايسه !

صدقينى بـ تنهار سعادته في الحال ..




[ 3 ]

إذا رحتي سوق خليه هو اللي يشيل الأكياس

لا تسوين حبوبه وتشيلين الأكياس معه....

وإذا هو قال لك شيلي بعض الأكياس ما يخالف شيليها....

بس لا أوصيك إذا رجعتوا للبيت اقلبي ليله طنطنه وونونه وصياح

وقولى له: اااااااااه يا كتوفي حسبي الله عليك يا محمد ( موب لازم تدلعينه الله لا يفشلنا شحط طول بعرض ويبي أحد يدلعه )

حسبي الله عليك يا محمد خليتني أشيل أثقل الأكياس مصعتني

أبى أروح لأمي تدهن مصوعي ..

وأنتِ بعد هالفاصل العذب من الشكوى اعتمدي ما راح يخليك تشيلين أكياس في السوق..

( على فكره إذا رحتي عند اهلك نامي عندهم أسبوع وان قال لك قومي نروح لبيتنا قولى لا مصوعى بعد ما طابت




[ 4 ]

إذا عزم أهله لا تطبخين حتى لو مد بوزه وزعل عليك..

قولي له أكثر ما كثر الله المطاعم وان غلبك ولزم انك تطبخين ...

عاد لا أوصيك كثرى الملح بالأكل ترى دايم الكبار عندهم ضغط ومانعينهم من الملح .....

عاد هو بعد هذي المرة ما راح يعزمهم وان تلقف وعزمهم طبخ الأكل برااا




[ 5 ]

إذا طلبتي فلوس عشان تشترين فستان أو آى غرض..

وأعطاك طفسه يبيك تتعودين على التقشف ..

لا تقعدين تطلبينه.. وتقولين ما تكفيني....

تكفى الله يخليك أبى زيادة أنتِ بس اخذي الفلوس وناظريها بازدراء وارميها في ألأرض .!

وقولي خل فلوسك لك وش قالوا لك طرا ره ....

الله يسلم راس ابوى

وإذا كان أبوك طفران أو بخيل .. فلا تجيبين سيرته لأنها بتكون فرصته و راح يفشلك

أو متوفي لا سمح الله قولى أبيع ذهبي ولا منتك..

ترى بعد ها لموقف ما راح يبخل عليك وآي مبلغ تحددينه بيجيك




[ 6 ]

إذا قعد قدام التلفزيون وطلعت نانسي مجرم وفتح فمه وعيونه جحظت ..

وقعد يقول هذا الزين هذولا الحريم هذي الأجسام..

لا تزعلين وتقولين: وععععععع والله انك ما تعرف الزين..

أحذري تسوينها أما مسألة إنه ما يعرف الزين فهذا شيء مفروغ منه

لالالالالا خليك عادي وقولى: والله انك صادق البنت حلوه ومملوحة..

وبعد ما تنتهي وصلة بنت مجرم خذي لك لفتين على القنوات الفضائية

أكيد راح يطلع لك سعد الدين ولد رفيق الحريري

تعرفون صاير متسندر هذي الأيام بالقنوات الفضائيه وكأنه بطل قومي ...!!!

عاد فرصتك وجات لين حدك فلا تفوتينها

اقهريه وقولي سبحان اللي أعطاك الزين والرزه ياسعد ونزعها من بعض الناس

عاد ياهو بتنفقع مرارته وينفجر انفجار داخلي ما راح تتضررين منه صدقيني

ولا عاد هو متعودها ابد .




[ 7 ]

إذا رحتوا تتمشون طبعا بيحاول سبع البرمبا يفرض رأيه واختياره...

ولو سألك وش تبين وقلتي أبى المطعم الفلاني هو طبيعي ومليون في الميه أكيد بيخالفك

ويقول لا المطعم الثاني أحلى عاد أنتِ روحي ولا تعاندين !

وإذا جات الطلبات وبدأ يفترس دون رحمه ويرعى رعياً جائراً في الأطباق

..أنتي طنشيه ولا تاكلين ..

هو بيسالك ليه ماتاكلين قولي : ما احب أكل هذا المطعم....

هو بيقول: ليش ما قلتي من الأول..؟؟؟

انتى ردى ببرود: قلت لك بس أنت تقول هذا أحلى وما سمعت كلامي يعنى وش أسوى أغصبك:017: .

وانا أأكد لك نجاح هذه الطريقه...وما عاد يفرض رأيه عليك ابد ....




[ 8 ]

فيه طريقه فعاااله إذا بغيتي اى شى مهما كان غالى أو صعب...

اطلبيه دائما ليلة الخميس..

عاد تعرفون ليلة الخميس من أحب الليالي لـ الرجال

فيها يدورون على الراحة والهدوء بعد أسبوع من المشقة والتعب ...!!!


وان سولت له نفسه وقال لا عاد لا أوصيك خلي هذي الليلة من الليالي المشهودة في حياته

لا هدوء ولا راحة ولا أكل ولا ابتسامة ولا اهتمام يعني بالعربي اسفهيه

وثقي تماما بهذي الطريقه....تراها انجح طريقه .!




[ 9 ]

لو قمتي يوم مشكورة وطبختي الغدى وجا سبع البرمبا معصب ...

وقال بكل استهتار وعدم مباله ما أبغى غدى...

عادي يا بعد الدنيا كلها ولا تزعلين نفسك

روحي المطبخ وحطي غدا لجاراتك واذا كان بالحي اللي تسكنونه عمال الله يأجرك لا تنسينهم

وخذي الزايد مع كاسة شاهي منعنع وتغدي وانبسطي ولا همك في احد

{اللي ياكل في بطنه واللي يقعد يا غبنه}

وفي رواية أخرى

{ اللي ياكل على ضرسه ينفع نفسه}

واذا صحي من نومته وقال وين الغدى؟؟؟

عاد أنتي ردي عليه بكل ثقة وعين قويه وقولي آي غدى !!!

أنت قلت ما تبي وأنا أشوف انه حرام ارميه

فقلت أوزعه على اللي يستاهلون !!!! واللي هم في حاجه

وما خليت إلا اللي يكفيني وعليّه بالعافيه اكلته

صدقيني بيكون له درس ما ينساه ولا عاد

بيكررها وبياكل غصب عنه..



أنتهــــــــــــــــــى .



وبكذه نحصل يا بنات على الهدف المنشود....

وهوالحصول على حمل وديع برتبة زوج

ملاحظه:مصوعي التي ذكرت في النصيحة الثالثة

هي كنايه عن التمزق العضلي لغير الناطقين بالسعودية



خلاص فتكم بعافيـة

وتراااااااااااه منقوووووول .