هـلا ..
لقد اني عدت إليكم من جديد ..;)
رغم انه في موضوعي الاول الذي كتبته فيذا ما احد عطان وجه ..
وكلكم عطيتونن اشكـل ..
بس اني حبيتـكم ..

حتى اني كتبت فيكم بيتين :
كذا من ربي حبيتـه .. حبن ما حبـه احد

يا ناس والله قهـر المليون تروح لأبن فطيـس ..
وانا ما مليت عينهـم ..
في القريب العـاجل سأكتب قصيده اهجـي فيها الشيخ محمد بن زايد ..
انتــظروها ..


دقيقه جوالي يرن ..

الشيـخ محمد : السـلام عليكم
انـا : وعليكم السـلام
الشيـخ محمد : صدق الي سمعنـاه ..؟
انـا : وش سمعت ترا النـاس يحتسون واجد هالايام ..
الشيـخ محمد : يقولون انك بـ تهجيني
انـا : ليش من زينك ..<- فاهم الهجاء غلط ..;)
الشيخ محمد : لا بس واحد قالي انك تفكـر تهجيني ..
انـا : شف بقولك شي انا فكرت بس للحين ما جزمت ..
الشيـخ محمد : طيب ليـش ..
انـا : وش حيث ان بن فطيس ياخذ جائزة المليون وانا لا ..
الشيـخ محمد : ياخي عشان يصلح فيها سنونه ..
انـا : طيب اوكي خلاص هونت موب هاجيك ..
الشيـخ محمد : الله ميـر يسلمك ..
انـا : طيب يالله رح نم ورانا طلعـه للمقناص بكـرا موب تأخرنا زي كل مره ..
الشيـخ محمد : خلاص هذاي منسدح بفراشي ..
انـا : فمآن الله ..
الشيـخ محمد : فمـآن الله ..

خـلاص يا شباب ترا هونت عن القصيده ..
كنت نـآوي بس طلبني الغالي ..;)


ملاحظ اني اشطـح يمنتن ويسره ..
عشـان كذا نخش في الموضوع على طـول احسن ..

في يوم من الايـام وهي على خبري قبل اسبـوع ..
كنت قاعد في الحديقة التي خارج منزلنا ..
وبجانبي كوب من القهـوه وجالسن اقـرا روايه لـ دان براون ..

اسف فيه خطأ في الموضوع المشهد الي فوق شـآيفه بفلم ..:p

والصـدز انه في ذاك اليوم الي هو قبل اسبـوع ..
وكان في فترة الظهـر ان كاني منب واهم ..
كنت ماخذن وضعية الانبـطاح وخامن الجهاز وقاعد اهجـول في النت ..
دخلت علي امي الله يحفظه ان شاء الله ويحفظ امهاتكم ..
قالت يا وليدي خوالك اليوم بـيروحون منتزه بالثمامه ..
ونبي نروح معهم تسـان تبي تخاوينا ألحقنـا هناك ..
انا سمّي يمه يصير خير ان شاء الله ..

وهي طالعه الوالده التفتت علي قالت يا وليدي عندك ايميل ..
انا ..
يمه وش عرفتس بالايميـل ..
قالت والله اسمع خالاتك يقولونه ما ادري وشو ..

طلغت اميمتي من الغـرفه وانا افكر اروح ولا ما اروح ..
واخيـراً قررت اني اذهب ..
خصوصا اني مليت من اخوياي الجحلـط ..
وفـرصه اسلم على خوالي من زمان ما شفتهـم ..

بعد صـلاة العشاء رحت لهم هنـاك ..
بس نصيحـه اخويه لا تخلي شايب يوصف لك ..
<- موديه خاله قلعة وادرين ..

المهم اننـا قعدنا في ذاك ..
ورحت وسلمت على خوالي وسلمت على جدتي نوره والفزت بمخباتي قريشـات ..
<- راعي طويله الي عنده شغـل لا يكمل ..;)

جلسنـا وسولفنا وما احد قدنا وحركتـات ..;)
المهم يوم تعشينا وغسلت الحمد الله ..
نغزت ولد خالي وقلت له يالله قم قوه جـاء وقت التميلح عند البنيات ..;)
<- هذا الشخص سعودي لا احد يشـره ..

رحنا ندور انا ويّـاه بالمنتزه ..
والله يا هو زحمه الله لا يوريكم ..
لفينـا لفينـا واكتشفنا انه الموجود موب طلبنـا ..
يبدو ان كلهن صلب ..
عباة ع الكتـف وكشخه ومن داخل قميص منكب عليه شاهي ..
قنا يا ولد مالنا الا نروح ناخذ موكـا بارد ..
اعشقـك ايها الموكا البـارد ..
المهم دخلنا الكـافي وما اذكر اسمه بالظبط ولا كان سدحته ..
لأني راعي طويله وما وراي شي ..
يوم دخلنا رحت انا وجلست وقلت لولد خالي يطلب ..
لأني عجـاز ما اذكر اني خدمت نفسي ابد ..
حتى امي تقول كنك شايب متقـاعد ..:p
وهو يطلب كان فيه رجال ومرته واقفين ومعهم ولد صغيـر يجي عمره يمكن 5 سنيـن ..
قال الرجل لمرته روحي اقعدي وانا اجيك بعد شوي ..
راحت المـره جاء الرجل التفت على الولد قال [ انقلـع لأمك لألعن امـك ] ..
انا ودي اقوم اكوفنه ..
بس انه جثـه والله ان يدفنن ..

الشـاهد من الموضوع وراه الشعب السعودي كذا ..
وراه اخلاقهم تجـاريه ..
هذا وولده ما سـوى شي قاله تسذا ..
اجل لو اني مرقم مرته وش بيسوي لي ..
<- كان مفكرن به ..:p

ودي مره اشوف سعودي مروق الصبـح ..
دايم طفشانين ودايم الواحد نفسه بخشمـه ..
وراه ما نصير زي الاجانب يقوم من النوم فـآهقن خشته ..

يا ربي ليش السعوديين كذا ..
<- كل تبن ..

دقيقه بتثـاوب ..
<- تصريفته بالمسن يعني بروح انام ..;)

يالله تصبحـون على خيـر ..
وعطونا رايكم في الموضوع الي ما ادري وش يبي ..


مع السـلامه ..

إقتباس رغم انه في موضوعي الاول الذي كتبته فيذا ما احد عطان وجه ..

.

ما أحد أعطاك وجه
أنا الحين بعطيك وجهين لو تبي أنت أمر بس ..

إقتباس يا ربي ليش السعوديين كذا

ما أدري ليش
أذا دريت بعلمك

إقتباس وعطونا رايكم في الموضوع الي ما ادري وش يبي ..

صراحــه ما أدري ايش اللّي في موضوعكـ

لأنه كــل سطر في وادي ..

اخوي احب ياسر ... كل هذا الابداع ولا احد عطاك وجه في موضوعك السابق افاااااااااا

بالنسبة للقصة فالضحية هو الطفل الصغير ..مسكين .. طاح في أب أقرب مايكون الى المريض .. الله يعينه

وبعدين اشوفك قسوت على السعودي ياخي لاتناضر الناس التعبانيين ناظر الناس الكويسين مثلي انا ....خخخخخخخخخخخخخ

وياسلام على جدتك نورة خخخخخخخخخخخ اجل قريشات

ياحظك ماشاء الله

انا عساي احصل بطاطس او بسكوت ابو نص ريال

خخخخخخخخخخخخ

شهد شاهد من أهلها ..


والله كفو السعوديين .. أخلاق وذووق .. ما تتخيله .. مع الأم مع الأخت مع


الزوجة>>>>عاد هاذي لحاله .. من كثر ما أشوف المتزوجات متهنيات صار نفسي


أتزوج .. ماشاء الله عليهم والله لوتطلبين الواحد أي شي لباه لك .. وأن قبستي ع قلبه


مثل العسل ..

ياحظــنا برجالنا ياعالــم..

الله يرزقن بواحد مثلي راعي خواطر وكتابات رومانسيه >>>>> يعني اخطبوا ..

أمزح ترى عاد من يفكني من الهامور يقول لك موضوعين تتكلمين عن العرس واللحين

أعلنه رسمي >>>>من جد نمزح

عوافي ع الموضوع ... غديك ما تصير مثله ..

حجز لاني عندي محاضرة وابي انااااااااااااااااااااااااااااااااامولا تنتظر مني رد قبل الساعة 11 ونص

إقتباس وهي طالعه الوالده التفتت علي قالت يا وليدي عندك ايميل ..

والله يا امك مهب طبيعيه ايميلات وحركات اصير ولدكم

إقتباس ورحت وسلمت على خوالي وسلمت على جدتي نوره والفزت بمخباتي قريشـات ..

كم لفزت بمخباتك عساه شين محرز

إقتباس الشـاهد من الموضوع وراه الشعب السعودي كذا .. وراه اخلاقهم تجـاريه .. هذا وولده ما سـوى شي قاله تسذا .. اجل لو اني مرقم مرته وش بيسوي لي .. <- كان مفكرن به ..

موب كل الشعب السعودي كذا بس يمكن كان الرجال منرفز ولا انه بايع بخساره


يعطيك العافيه على الموضوع اللي كله مقدمه

<- يقول طول عمـرك ما تعرف تكتب عناوين ..
شكـراً على تعديل العنوان ..


الفيـروسه الزرقـاء ..

ن وس 077

عبدالرحمن

اليزابيث هيرلي

والنهـايه ..

kaka-22


راجع لكم ان شاء الله ..
بس بروح اناظر مبـاراة البحرين واندنوسيـا ..
مواعدتن الشغـاله بجائزه منتنازه اذا فازوا اندنوسيـا ..;)

هلابك احب ياسر ..

قصيدة حلووة..المليون جاية لك بالطريق ..

يعطيك العافية .. المواضيع الجاية زوارها اكثر بإذن الله ..

...the bast...

كتبــت هنــا وذهبــت.

رجاء اي موضوع تسدحه مثل هالسوالف الخاثره .. عطني دقه وسكر

إقتباس ورحت وسلمت على خوالي وسلمت على جدتي نوره والفزت بمخباتي قريشـات ..

واكيد لافتهن بمنديل ... وقالت لك دوك اشتر فصفص .. او اشتر ببسي ولايدري احد ( وهي تتلفت يمين ويسار )

إقتباس راحت المـره جاء الرجل التفت على الولد قال [ انقلـع لأمك لألعن امـك ] ..

ذكرتني بموقف مثل هالموقف .. بس عاد الضحيه كانت بنيه مثل القمر الله يخليها لعين ترجيها .. بنوووته وش حليلها ونعووومه ومزيونه ماشالله .. عمرها ست ست .. سبع ها ها بين الست والسبع سنوات قالها ابوها الوحششش بصراخ وش تبييييييييييين ؟؟؟ وكان الفلبيني اللى بالطلبات حق ماكدونالدز يقولها فيه لعبه مجانا مع الوجبه
قطع ابوها كلام الفلبيني .. وقال مرة ثانيه وش تبيييييييين اخلصي ؟؟ قالت .. بابا وشي اللعبه ؟؟ والمسكينه فرحانه ..

مادريت الا اللى ينافخ عليها تقول ينافخ على واحد كبره .. يقول اخلصي اطلبي والا طسي قسم بالله رحمت البنيه المسكينه وهي تناظر الزباين وابوها ينفخ عليها .. فيها الصيحه ممزوجه مع فرحه اللعبه الى مع الوجبه !!
ياخي فيه ناس والله مافيهم رحمه وقلوبهم قاسيه ... ذاك الوقت تمنيت والله اصطره بس ماباليد حيله

شكرا ياباشا على موضوعك الحلو والجميل ...
وتقبل مرور اخيك الصغير ابو طلال

..


هلا خيوو
وش محد عاطك وجه بموضوعك الاول يكفي انا رديت يالشين
وانت ماعطيتنا وجه ومارديت علينا

إقتباس عباة ع الكتـف وكشخه ومن داخل قميص منكب عليه شاهي .. قنا يا ولد مالنا الا نروح ناخذ موكـا بارد ..

........


بخصوص الاسلوب عندنا
للاسف مدري وش يبي
وهاللعن اعوذ بالله كانه السلام عليكم
اول مير بس الشباب الحين حتى البنات اعوذ بالله تناديك تقول الله يلعنك تعالي عسى ماشر تطرديي من رحمه الله بكل سهولة على كيفك هو

للاسف ان الكبار اسلوبهم كذا مانلوم الصغار
الي يسمع ابوه يقول لامه الله يلعنك وين الغداء ماتيه يقول لاخته الله يلعنك جيبي موية

الله يهديهم ولايبلانـا
والحمد للله ان هالشي مو في بيتنا

وعموما الاسلوب زفت عندنـا الله يهديهم
ماغير هواش وصراخ حتى بالشوارع لو واحد يضرب بوري للي قدامه تلاقي الي قدام ينزل وبالعصا ماعندهم وقت ياحبي لنا عصبين مره

مثل ماقلت بموضوعك الاول واضح انكـ قلم
ونتمنى تشد حيلك معانا وتتفاعل اكثر
لانك ماشاء الله تملك اسلوب متميز

ود يليق بقلمك

الهنوووف
كانت
هنا
ورحلت

ياخي لا تلومه درجه الحراره 50
اكيد نفسه بخشمه
لا والمدام مشغله اهله شكلها من طلع من الدوام يالله خلنا نروح اهلي طالعين للمنتزه انت حاشرنا بالبيت ، وقبل يومين مشغله اهله بالسوق علشان عرس واحد من اهلها
انا ما ادري عنه بس ما الومه من الحين اعطيه الاعذار
طلبات السعوديات واجد وما تخلص
<<<< عزوبي الى الابد