مالي ومال الاردن انا لم كتبتها ما اخذت راي الناس ...!!!

لي عوده بعد الصلاااااة
بررررررب


-----------------------------------------------------------

باك

هلابك يالهاوي

عزفت على وتر حساس

يمكن انك سمعت قصة الشيخ زايد الله يغفر له اللي احتفل باخر اماراتي يفتك من الايجار ..!!

سؤال بريئ

الاردن تابعه للسعوديه؟؟؟

والله يا في جيزان عوايل ساكنه في (( والله ما ادري وش اسميها ))



مالي ومال الاردن ..!!

والله اخوي الهاوي شي يقهر ايه والله ..

والي يقهرك زود اذا سمعت ان المملكة متبرعة بــ حي سكني للاردن ..!! ومدينة تعليمية كاملة ومجهزة لــ لبنان ..

من زين مدارسنا الحيين يوم انكم تتبرعون لــ لبنان .. حسب الي قريته في احد الصحف قبل كم يوم ان 60 % من المدارس في المملكة اغلبها مستاجرة ..!!

يعني شي طبيعي تلقى طلاب يدرسون في المطبخ بعذر ان المدرسة مستاجرة ..!!


ويطلعون لك من بكرة ويقولون ليه طلابنا ما يصيرون علماء ..!!


وهذا اخر خبر سمعناه الي هو حي سكني لــ الاردن ..

ما نقول لا تتبرعون .. لكن سدوا حاجات الضعوف الي عدنا الي ما لقوا لهم بيوت ..

والي يغبنك زود ان 22% من سكان الممكلة هم الي يملكون مساكن خاصة ..

و الــ 78 % الباقية من سكان المملكة على هــ الايجار ..




بالله شباب احد قد سمع ان فيه شخص قدم على برنامج مساكن و يوم قراء الشروط انبسط ..!!

كل من قراء شروطهم شوي ويبكي من القهر ..

ياسلااام عليك يالهاااوي والله موضوع مهم

ياخي من جد والله اغنى دوله نفط
بالعالم والشعب مطفرين 22 بالميه
بس اللي ساكنين بيوت ملك والباقي
الله يعينهم .

لا والقروض اذا قدمت عليها يبيلك
20 سنه والا ثلاثين وانت تنتظر
لين مايجيك القرض وافلقني ان كان
جاء بعد .

ان شاء الله انه يتغير الوضع
في قاادم الايام بإذن الله ونشوف
المواطنين يسكنون بيوت ملك خاص


عوااااااااااافي يالهاااااوي

عليكم السلام ورحمة الله وبركاته

مسيك بالنوور

والله يالهااوي اني ودي انزل موضوع عن هالموضوع بس خاايف

لاني اذا تكلمت بنفجر قسم بالله شي يقهر شعبنا مطفر وكلهم مستاجرين شقق

ونروح نتبرع للاردن سبع مية الف وحده سكنيه قسم بالله شي يقهررر وكان مافي

السعووديه فقراء مهوب لاقين يااكلوون وقبلها 11 مليار دولار للبنان ولا وزد عليها مية مليون دولار بعد

ولا قبلها متبرعين للسعوديه بمية مليون ريال للفقراء ولا شفناهم عطوهم شي

انا مانقول لا تتبرعون بالعكس الله يجزاهم خير لكن لما يكوون شعبك مطفر وتروحون تتبرعون للهاشاامين والله هذا الي يقهررر

الهااوي والله اني مثلك مغير اكتب وامسح

بقولك قصة تو سمعتها كنت مسير على خالي وقالولي هالسالفه الي من جد تسد النفس وودك تصيح من القهر

هذا يا طويل العمر جاارهم كان حالته المااديه كويسه ومتوسطه وكان مبسووط ومرتااح

دخل بفلوسه في الاسهم وعلطوول طاحت وخسر كل شي وجته حاله نفسيه انفصل من شغله

صارت حالتهم لا تسر لا عدو ولا صاحب قسم بالله صارو على الحديده لدرجة ان عيالهم الصغاار

يجون عند بيت خالي يقلوون عندكم شي نااكله انا لنا فتره ماكلنا شي ومره خالي قال للولده

رح لبيتهم وافتح ثلاجتهم يبي يشووف فيها شي لانهم من فتره ماجو يطلبون لما رااح ولده الصغير وفتح

الثلاجه لقاء فيها سطل موويه بس ورجع وقال لبووه لقيت فيها سطل مويه بس بالله مهوب هذول اولى من هالشامين

مرت جاارهم عندها فسااتين وتيورات على قولتهم كانت تشتريهن بالف وبالفين و.....الخ تجي عند مرت خالي تقولها

تشترينها بخمسين ريال ترى والله شاريتها بالفين شوفو القهرر وشوفو وش وصلت له حالتهم

وهذي القصه نقطه في بحر لو الحدعش مليار دولار توزعت على فقراء السعووديه مهوب افضل ومن الاحق فيها

لو السبع مية الف وحده سكنيه بنيت للي ساكنين بشقق مهوب افضل ومهوب هم احق بها !!..

والحين مسلسل لبنان رجع مره ثاانيه لكن بمكان ثااني بدال ماكان بالجنووب هم الحين قعدين يدمرون الشمال

لانهم خلااص قالو جنووب لبنان بيصير تحفه من هالي تبرعو لان كلن تبرع لهم قالو اجل الحين انا نروح وندفن شمال لبنان

عشان بعد يتبرعون مره ثاانيه ويصير شمال لبنان مثل جنووبه !!..

صراحه شي يقهر ودك تصيح من القهر وكل ملك رااح يسال عن شعبه ماراح يساله الله عن الشعووب الثاانيه

وانا بكلامي الي فووق مانقول شي في ملكنا لا السعوديه انتظروها في الفين وثنعش

السعووديه رااح تكون مدينه اقتصااديه وهذا رااح يرفع الدخل المتوسط للشعب السعوودي لكن انا نقول انا احق بالفلووس الي رااحت للبنان وللاردن وللمغرب

والله يخلي لنا ملكنا ويعز حكومتنا

والله يعطيك العاافيه يالهااوي وتشكرااتي لك

المقارنة غير صحيحة و غير عادلة مع دول الخليج و المفترض أن نقارن أنفسنا بما نحن قادرون عليه إلا النتيجة تكاد تكون واحدة في الحالتين.

من المسؤول عن تدني هذه النسبة عن ما يفترض أن تكون عليه ؟

كنا فيما سبق نتندر بمصر و ما تعانيه من بطالةٍ و ندرة - بل استحالة - وجود مسكنٍ لائقٍ بالبشر و تعثر الزواج لغلاء المعيشة. اصبحنا الآن في المملكة نحث الخطا في هذ االطريق لنسبق مصر لكن إلى القاع.

الله المستعان

موضوع مهم وحساس .... مساكن برنامج جميل كفكره .. لكن تنفيذه للأسف صدمنا بالفائده والشروط !! مايفرق عن القروض البنكيه شي ..

سمعت والعهده على الراوي ان وضع برنامج مساكن راح يتعدل .. خصوصا انه برنامج جديد علينا .. وهو تحت التجربه الفعليه .. بعدها سوف يتم التعديل في كثير من العيوب والثغرات اللى فيه ...
مشكلت السعوديين مايقولون لا .. وماعندهم موقف واحد .. اول ماسمحو بالتقديم على هالشروط الصعبه تلقى العالم تقدم عليه وهي مقهوره .. استنو شوي واتركوا الاعلام والناس تعبر .. وتشتكي وتعترض شوي .. يمكن يكون فيه نتيجه

والله يا شباب كلامكم جزء منه صحيح
اما الباقي فأنا لا اتفق معكم
خصوصا الاخ هامور

انا اللي اشوفه ان الموضوع بالعكس

تعال طالع في العالم كلهم مديونين للبنوك في قروض اقلهم على مية ومية وخمسين الف ريال

على ايش ؟؟؟؟

سيارات (للفشخرة لا اكثر ) , رحلات سياحية وغيرها من الامور التافهة
قليل اللي تحصلهم ما خذينها على فايدة

تعال للموضوع من جهة ثانية

القروض اللي تعطيها الدولة للناس اللي يبنون
والعالم تبني وتسدد سنة سنتين وبعدين تسحب عليهم
على بالهم انهم ذيابة يوم نصبوا على الدولة
ما يدرون انها فلوس في ذممهم

لو هذولي انتظموا في التسديد كان مشت الشغلة حلاوة ..

انا والله مستعجل بس اذا حصلت تفاعل او نقاش لوجهة نظري راح اكمل

إقتباس المقارنة غير صحيحة و غير عادلة مع دول الخليج

عدد سكانهم مايوصل 2مليون بكل دوله
احنا اعتقد 22 مليون او اكثر
غير الاعانات الي تقدم عندهم في السكن...

برضو مو مبرر..
مو احسن مننا هما

لكن
الله يعين كل محتاج..!

ويرزق الجميع دنيا واخره

::

::

يافشيلتاه اقل نسبه تملك

شي يفشل والله
بس وش نقول والله الاراضي عندنا نار نار كنت ابي اشتري لي ارض وابنيها للزمن يعني >>> خنفشاريه مهيب اخت ماجد ابد:p

والله الاراضي نار والفلل نار والشقق نار والايجار نار وكل شي نار والرياض نار وحر
والناس صارو نار مايبون احد يحاتسيهم
والاسهم صارت دمار (خبرك كل حلالي في الاسهم )


صحيح اننا دولتنا كبيرة وعدد السكان مايقارن بالدول الثانيه وطبيعي بيكون فرق
بس الي يقهر لما فلوسنا (حلوة فلوسنا )تروح للدول الثانيه وفي ناس عندنا محتاجه

الواحد يفكر بعد كم سنه كيف بيتزوجون الشباب وين بيسكنون
الشقق كم اجارها الحين اتوقع العزوبيه والعنوووسه بتكثر الله يستر

والي الحين بشقق كيف بيستقلون في بيووت بعدين
عيالهم كثروو ويبون فلـة تضفهم وين يجيبون منه الراتب مايتجاوز 6 الاف

ماتوقع اوضاع الفقراء تخفى على احد
يعني حنـا نعرف حال الفقراء معقولة المسؤلين مايعرفون;)
(ترى مو انا الي كاتبه الكلام الي فوق )


بدل هالمبالغ الي تصرف على لبنان ليه مانعطيها للي عندنا الاقربون اولى بالمعروف
حنا مو ضد تقديم يد المساعده للدول المحتاجه بس حنا احوج فيهاا
ماشاء الله السعوديه فيها بركه وش كثر سكانها واكيد الدول بتعذرنا وش نبدي وش نخلي ماشاء الله اللهم زد وبارك


الهـاوي
جلست ساعه اكتب وامسح ابي اقول ان قلمكـ يعجبني سواء المواضيع او الردود
ماعرفت اعبر ماجامل تراني حتى لو بعد الفين سنه راي هو رايي
بس مدري وش فيني هالايام بدت بعض الاقلام تشدني

حضــووورك متميز

ربي يحفظكـ ويرزقكـ من حيث لاتحتسب
تطيح على كنـز يعيشك انت ومرتك(بالسوري اقولها ترى ) وحمودي ابنكـ ربي يحفظه

ود يليق بقلمك

حجز إلى أن أنتهي من الموكا البارد
-----------------------

انتهينا من الموكا <<< أدمن عليه يا ريكي من بعدك

هلا وغلا أخو قلبي

والله يالغلا مدري وش أقول أنت ووجهك؟

أخاف أتكلم بصراحة وأجيب العيد .. ومعاد تنفعني أنت وموضوعك

لكن بأكتفي بكلام الأعضاء اللي قبلي.. عز الله أنهم ما قصروا.. قالوا أغلب اللي بقلبي ..!!

عوافي يا الهاوي أبو ألفين عام على الموضوع الهام .. وأسلوبك المميز ..!!

قفلة:

رح شف رد كلي هلالي بموضوع حياة @ نت .. تراه ذكرك فيه

الله يديم المحبة بينكم يا رب

قفلة القفلة:

تصدق؟ والله أني حبيت حمود ولدك.؟؟ أحس أنه بيطلع بثر وخروف كبير

تبي نصيحتي؟ خله مكانه بصلبك ولا تطلعه

ما بزينا أبو حمود عشان نبزا حمود وأبوه

تحياتي لكـ ولحمود صديقي