:: عـــلاقتي مــع بــــوش !! - نادي الهلال السعودي - شبكة الزعيم

الكلاسيكي · #1 25/06/2007, 02:01 AM

أهـــلاً بكــم أحبتي ..
أهـــلاً بكم يا صحبتي ..

مساء الورد المعطر ..
مســــاء العود المبخـر ..
مســـــــاء الملح والسكـــــر ..

اشقنــا لكمـ ..
فعدنــا من جديد لنضع بعضاً من "كُتيباتنا " بين ايديكم ..
عدنــــا لنسايركم في الحديث .. وفي الحوار .. ونسير معكم مع عبق حروفكم ..

:: بــدايــه ::

وأي بدايه .. من العنــوان ..

الموضوع خنفشاري !!<<كلمة خنفاشري منسوبه لاحد الاعضاء ومن كبار الخنفشاريين هنـا .. :p ..
نسير بدنيانا ونرى .. نعيش ايامنا ونرى .. نقدم على خطى ونرى .. ندرس ونرى

كلما رأيت كنت أصمت لاني اعتقد ان الصمت حكمه .. وحتى لا يبتليني الله بما أرى ..

والآن جاء وقت الفضفضه .. والتعبير عن ما نسمع ونرى

:: مــا بعـد البدايــه ::

بالأمس .. اتصل بي رئيس الولايات المتحده الامريكيه بــوش ..

فحبيت اني اطنش لعدى اسباب .. لعل اهمها كثرة اتصالاته

..
ولأن آخرها نواياه الخبيثه

.. واهدافه التي يعتريها التضليل

..

ولكنه اصر بالاتصال .. احببت ان أرد رداً عنيفاً عليه بسبب الازعاج ..

وبالاخص كونه قد يحتاجيني كثيراً ,, لان نصف نييويورك اصبحت من املاكي

والنصف الآخر من شيكاغو ملكي الخاص .. وشركاتي كلها تجدونها في شكاغو :p

رديت ..ودار بيننا الحديث التالي .. :

بوش : الوووو ..

انا :: هــلا بوش ..

بوش : كيف الحال !

أنا: بخير .. بس وش دخلك في حالي

بوش: : وش فيك ماترد .. مسوي ثقل

انا: .. احمد ربك رديت اصلاً

..ماني فاضي لك

بوش: طيب .. باختصار وينك فيه !

أنا .. في شركتي اللي في شيكاغو .. ;)

بوش : كويس .. مرني ابغاك ضروري في البيت الابيض :p

أنا :مشوار .. انا مشغول .. بس تدري بجي نفسي اغير جو :p

بوش حياك : ومن يعز عليك جبوووه معك <<بوش قصمنجي

انا : طيب ياسعادة الريس

.. بس العشا الله يهينك كبسه :p

بوش : عارف لك .. لو مو كبسه قرصان :p

=+=+=+=+=+=+=+=+=+=+=+=+=+=+=+=+=++=+=+=+=+

بعد مازرت بوش .. ضيفني وبدا بيننا الحوار. .
وتناقشنا في امور ماليه .. وتم الاتفاق .. وانحلت المشاكل ..

وتناقشنا في امور الامه العربيه والاسلاميه .. لكن ما توصلنا لحلول ..

بعدها انتيهنا ..
لكن استوقفني وقال .. عادل .. !!

كيف شبابكم .. وكيف طموحاتهم ؟
قلت بخير .. بس بحاجه لرعايه وتوعيه .. وتطوير اكثر لذواتهم ..

قال وش اهدافهم.. وش احلامهم ؟
قلت سياره آخر مديل .. سفرات .. طلعات .. !!

قلت بوش.. لاتجيبها على الجرح .. يكفيني اللي فيني

انت ابعد واحنا بخير

بعدين وش فيك على شبابنا الله يآخذك <<لاتتهور تراك في بيته

وانتهى كل شي بيني وبيني بوش لحد الآن ..

/-/-/-/-/-/-/-/-/-/-//-/-/-/-/-/-/-/-/-/

الآن .. هــل شعرتوا بأني صادق زرت بوش في البيت لابيض .. ؟
بالتأكيد لأ .. ولو صدق احد ولو بنسبة 1% ففي عقله مس !!
وإلا كل الردود ستتهمني باني الخنفشاري الكبير

ماداعاني لذكر ماسبق .. !!
كان احد اصدقائي يحدثني عن احد الطلبه معهم في الجامعه ..
كان من اكبر الخنفشاريين على مستوى المملكه !!:p

سالته .. وش دراكـ ؟
قال : يجلس معنا كثير .. وينصب علينا كثير. . واحنا نضحك كثير . لاننا مو مصدقين

..

قلت مثل ايش سوالفه !!
قال يقول .. كل سنه اصيف بأوروبا .. قلت جايز

يقول كل سنه لي سياره ..قلت جايز ..
يقول انا وحيد الماما والبابا .. قلت جايز ..
يقول .. لو ابغى اترك الدراسه تركتها بس انا ادرس تسليه.. قلت جايز ..

قال لي .. لاتستعجل على رزقك .. بتجيك العلوم .. ودليل على ان كلامه السابق "فقش "

*يقول في مره يقول نفسي اطلع جواز

<<كذبه 1

وفي احد الايام لقيته يوقف ليمزوين بيروح معه .. واستمر الحال اسبوعين ..
لو يوم قلت يمكن سيارته متعطله <<كذبه 2

قال في حديثه رحت اودي اختي للجامعه .. واخوي للمدرسه <<كذبه 3

قال هالدراسه قرف .. ياليت اقدر اتركها واخش عسكريه بس الوالد ناشب لي <<كذبه 4

يقول المتحدث لي .. بعدها صرنا نزبد في وجهه انه كذاب وملينا واكتشفنا اكتشافات كثيره ..
ولما شافنا كذا محجرين له بالادله والبراهين هج منا:p . ولا جلس معنا .. شاف له ناس يصدقون

قت له: وينه ودي اتعرف عليه .. علشان لما اسافر يقطع وقتي :p ..
ترى هالنوعيه كثيرة الكلام .. وقليلة الفائده كثيره بيننا .. ولكن عزائنا انهم منا وفينا ..

مايستفــــاد ؟

أن الشباب اهدافهم وآمالهم سياره .. و حب المظاهره .. وياليته يحصلها صدق ..

طبعا مو الجميع .. فيه شباب يشار لهم بالبنان .. يمتلكون عقليه رائعه .. وفكر راقي .. وطموح عالي ..

قال الرسول صلى الله عليه وسلم : " المتشبع بما لم يعطي كلابس ثوب زور " .
اعتقد ان الشاب اللي ذكرته سابقاً احد المتشبعين بما لم يعطى ..

اعتذر عن الاطاله والاسهاب بالحديث ..
ولكن لامور كثيره .. احببت اطرح بين ايدكم هذا الموضوع ..
ونفس الشي مشتاق لكم .. حبيت افضفض بعض من سوالفنا ..

وتحيه كبيره للرائع ماجد .. ترى منت خنفشاري .. بس موضوعك سبب لك المسمى

وكان ودي اجي معكم اليوم انت و ...... و ...... والجلسه معكم تنشرى

بس كنت مشغول .. ووقتي مو معي <<مع ولد الجيران :p

قريبــاً في الأسواق " أمواة على قيد الحيـــأة "

تقبلوا ارق التحايا ..
ودمتم أحبتي بكل الود وعبير الورد ..

عــــادل
CLASSIC

Hilali88 · #2 25/06/2007, 02:30 AM

مراحب أخي عادل

موضوعك شيق ومثير >>> فيلم موب موضوع

حقيقةً الموضوع رائع مفيد

تصدق ذاك اليوم كلمني رونالدينيو وقال تكفى سجلني بالهلال قلتله انقلع مانبيك يالفاشل

ولا ذاك اليوم واحد يقول لأبوي أنا رحت البحرين سباحة

ما أقول إلا الله يهدي الشباب وخاصة ً الشلاخين وجعلهم يرتقون بأفكارهم وطموحاتهم

تحياتي

فيديو خربان · #3 25/06/2007, 02:35 AM

ههههههه

موضوعك ذكرني بواحد يقول لي ابوي جاب لي هدية فيل من اندونيسيا....

ولا ذاك اليوم يقول انه ينطل بدبابه على جدار بيته....

وفقك الله ....

تحياتي,,,,,

هامور البورصه · #4 25/06/2007, 02:43 AM

محجووووز

لميس الهلالية · #5 25/06/2007, 02:49 AM

حب المظاهر صار سمة من سمات العصر !!

العالم أصبح مادياً بعيداً عن الروحانيات و الكذب لم يعد شيئاً نادراً كما كان من قبل !!

لا أتمنى شيئاً بقدر ما أتمنى أن أعود لأعيش في عصر الصحابة رضوان الله عليهم هناك الصدق حقاً و حسُن أولئك رفيقاً.....

يعطيك العافية عادل على طرحك الراقي دائماً

" بس بالله إسأل بوش عن رقم كوندليزا و عطني إياه إذا ممكن بأطلع حرتي فيها

"

Faisl - 5 · #6 25/06/2007, 03:08 AM

اخوي عادل لا تستغرب من شئ كل شئ في الدنيا يمكن يصير
الكذب صار شئ سهل الواحد يكذب ولا كانه سوى شئ
وبعد الحلف بالله صار بعد شئ سهل احلف باي شئ وامشئ
ولاكاني سويت شئ...........
واشكرك على موضوعك

فرانشيسكا · #7 25/06/2007, 03:32 AM

هالأشكال كثير .. أذكر كانت معنا وحدة تقول إن هي كانت في الطيارة اللي حطوا فيها
جثة (ديانا ) خخخخخخ .. وقالت لهم : ممكن أشوف تابوتها .. قالوا: لا .. حاولت فيهم
ورضوا . وحطت وردة على التابوت >> شفت الخيال بس خخخخخخخخ .

طيب بتكذبين كذبي بشي معقول .. ع العموم ناس كثير تهتم بالمظهر وتنسى الجوهر ..
أنا بعد كنت أنصب بس يوم كنت بزر يعني 6_ 7 سنوات .. خخخخخخخ

مشكور ع الموضوع الجميل ..

ملـــــ الهلال ــــك · #8 25/06/2007, 03:36 AM

لي رجعه لموضوعكـ

خالد×خالد · #9 25/06/2007, 05:26 AM

يعطيك العافيه على الموضوع

بس تبي الصراحه مثل الاشخاص هذي تحب تكون

معاهم تسمع سوالفهم وتضحك عليها

يعني مثل الاشخاص هذي ماتمل منهم

وشكرا

leo messi · #10 25/06/2007, 05:28 AM

هلا وغلا كلاسيكوووووووووو

بصراحه الخنفشار مقطع بعضه

بس والله انك جبتها الجرح وانت تدري

إقتباس


	.. اتصل بي رئيس الولايات المتحده الامريكيه بــوش

غريـــــــبــــه !!!!!!!!!!!!!

بالعــــاده يرســــل كـــول مــــي

إقتباس


	ونفس الشي مشتاق لكم .. حبيت افضفض بعض من سوالفنا ..

وحنا بعد مشتااقين لمواضيعك المميزه يابعــــــدي

كلاسيكو .. لاهنت على الطرح المميز وبإنتـــظار جديـــدك

leo messi

الهنوووف · #11 25/06/2007, 05:47 AM

>>

<<

وعليكم السلام ورحمة الله وبركاتة

وش له تصمت ياخوي اطلق للسانك وقلمك العنان >>

مدري يدك

بقول لك شي اذا تبي تسوي مثلي

لما اجي واشوف موقف اذهلني

او اسمع شي ادهشني >>>يقالك فيه اختلاف بين اذهلني وادهشني

المهم ماعليك بالطويلة الزبده اذا شفت شي اكتب كانك بتنزلة موضووع وبالاخير سو حفظ وانساه

وتصير عبرت عن رايك حلو يشاركونك الاخرين بس احيانا يكون الموضوع مو يستاهل للنشر

إقتباس


	بالأمس .. اتصل بي رئيس الولايات المتحده الامريكيه بــوش ..

بوش مره وحده

عسى ماقلت انك بالزعيم

ماودنا حروب الواحد يالله يمدد رجليه

وش لنا بالشقى عسى ماخربطت عليه تراهم بسم الله مايرحمون >>>تحس اني صدقت هالمكالمه

إقتباس


	قال وش اهدافهم.. وش احلامهم ؟ قلت سياره آخر مديل .. سفرات .. طلعات .. !!

صدقت والله ياخوي
وياحبهم للفشخره رحت للمكان الفلاني زرت الدولة الفلانيه هذا التي شيرت من المحل الفلاني
ساعاتي

هذي هديه من خطيبي جابها لي من الدولة الفلانيه

المشكله الحين ياليتها صدق تلاقيها تلعب على عمرها وتصدق

وحدث ولاحرج
وللاسف ان الواحد يبدا ينجرف معاهم ويبدا يماشي جيلة حتى لو مو راضي بالي يصير ويمكن يبدا يسوي اشياء مو مقتنع فيهاا بس متطلبات العصر

وين جيل منول ........>>خنفارشيه مالحقت عليهم بس اسمع فيهم

المشكله مو بهالجيل واهدافهم
المشكله ان هالجيل ينبني عليه اجيال
وش تنتظر ذريه من اب كل يوم بديرة وسهرات وامور الله يعلم بها
وام من سوق لسوق ومن زواج لزواج

الله يستـر من القادم

ومن وجهة نظري مايقول انا وانا وعندي وماعندي الا الي يحس بنقص وفاقد هالشي

اهم شي القنــاعه في هالزمــن علشان نعيش ولاماراح نرتاح اذا عيونا على غيرنـا
والانسان بطبعه مايرضى بالشي يبي الي افضل
ومطالبه ماتقف عند شي محدد
شوف الاسهم مثلا

تلاقيه كسبان بس يبي اكثر واكثر واكثر بالاخير شوف طمعـة وين بيوديه

ترى ادري اني بوادي وموضوعك بوادي بس بفضفض جيزنا جيزك

تدري وش اشين شي في العالم
انك تجلس مع احد وتسمع له وانت عارف انه خنفشاري

وماودك تحرجه

دمتـ متالقااا

برايفت للكلاسيكي وماجد بس

اقول من و...و....>>>>

اللقافه ومادراك ماللقافه

ود يليق بقلمك

الهنوووف
كانت
هان
ورحلت

الكلاسيكي · #12 25/06/2007, 07:15 AM

إقتباس

الرسالة الأصلية كتبت بواسطة Hilali88


	مراحب أخي عادل موضوعك شيق ومثير >>> فيلم موب موضوع حقيقةً الموضوع رائع مفيد تصدق ذاك اليوم كلمني رونالدينيو وقال تكفى سجلني بالهلال قلتله انقلع مانبيك يالفاشل ولا ذاك اليوم واحد يقول لأبوي أنا رحت البحرين سباحة ما أقول إلا الله يهدي الشباب وخاصة ً الشلاخين وجعلهم يرتقون بأفكارهم وطموحاتهم تحياتي

هلا فيك اخوي هلالي ..
نورتي الموضوع ..

ايه وش نبغى برونالدينهو .. ]اكثر الخنفشاريين

والله يهدي الشباب كلهم ..

شكرا لك على المرور العطر ..
دمت بخير

إقتباس

الرسالة الأصلية كتبت بواسطة فيديو خربان


	ههههههه موضوعك ذكرني بواحد يقول لي ابوي جاب لي هدية فيل من اندونيسيا.... ولا ذاك اليوم يقول انه ينطل بدبابه على جدار بيته.... وفقك الله .... تحياتي,,,,,

هلا فيك اخوي فديو ..
نورت المجلس ..

حلوه فيل .. وين حاطه .. !! كان تطيح الطياره

ما راعي الدباب .. الظاهر ينطل ارانب

شكرا لك .. تقبل ارق التحايا..
دمت بخير

نـــــــ15ــــــمر · #13 25/06/2007, 07:27 AM

هلا
عادل عدوووللي تستاهل ندلعك

عرض حلو وعلى فكره تنسيقك مره مره بيجنن

نروح لموضوعك

الطموووح

الدين ثم الوطن

سلم على بوش وقله يقول لاسرائيل تخفف علينا شوي ترى والله تعبنا

تشـــــــــــــــــــــــــــاو

الكلاسيكي · #14 25/06/2007, 07:29 AM

إقتباس

الرسالة الأصلية كتبت بواسطة هامور البورصه


	محجووووز

حياك .. الموضوع موضوعك ..

إقتباس

الرسالة الأصلية كتبت بواسطة لميس الهلالية


	حب المظاهر صار سمة من سمات العصر !! العالم أصبح مادياً بعيداً عن الروحانيات و الكذب لم يعد شيئاً نادراً كما كان من قبل !! لا أتمنى شيئاً بقدر ما أتمنى أن أعود لأعيش في عصر الصحابة رضوان الله عليهم هناك الصدق حقاً و حسُن أولئك رفيقاً..... يعطيك العافية عادل على طرحك الراقي دائماً " بس بالله إسأل بوش عن رقم كوندليزا و عطني إياه إذا ممكن بأطلع حرتي فيها "

هــلا فيك اختي لميس ..
نورتي الموضوع ..

اتفق معك .. حب المظاهر اصبح في وقتنا الحاضر بالنسبه للكثير امر لابد منه ..
حتى وان ضحى باشياء .. كثيره .. سواء كان بماله .. او بدينه .. !!

للأسف ان الزمن لم يتغير كثيراً .. ولكن من به من أناس هم الذيت تغيروا ..
اصبحت اهدافهم وامالهم مجرد تفاهات ..

ولن يعود زمن الصحابه وعدهم ابداً .. او كما قال الرسول .. صلى الله عليهم وسلم ..
سيعود الزمن غريباً كم كان غريباً . يمعنى الحديث ..

اشكرك اختي على المرور العطر ..
والمشاركه الجميله ..

اما رقم رايس .. عندي في النوتعه بدوره وبعطيك اياها ..

دمتي بخير

الكلاسيكي · #15 25/06/2007, 07:41 AM

إقتباس

الرسالة الأصلية كتبت بواسطة Faisl - 5


	اخوي عادل لا تستغرب من شئ كل شئ في الدنيا يمكن يصير الكذب صار شئ سهل الواحد يكذب ولا كانه سوى شئ وبعد الحلف بالله صار بعد شئ سهل احلف باي شئ وامشئ ولاكاني سويت شئ........... واشكرك على موضوعك

هــلا وغلا فيك اخوي فيصل ..
نورت الموضوع ..

للاسف مثل ماقلت صار لاكذب مثل شرب الماء ..
اما الحلف .. قالله الله تعالي " ولا تطع كل حلاف مهين "
يعني من المعروف اي حلاف كذاب ..

شكرا لك على المرور العطر .. ..
تقبل ارق التحايا ..
دمت بخير ..

إقتباس

الرسالة الأصلية كتبت بواسطة فرانشيسكا


	هالأشكال كثير .. أذكر كانت معنا وحدة تقول إن هي كانت في الطيارة اللي حطوا فيها جثة (ديانا ) خخخخخخ .. وقالت لهم : ممكن أشوف تابوتها .. قالوا: لا .. حاولت فيهم ورضوا . وحطت وردة على التابوت >> شفت الخيال بس خخخخخخخخ . طيب بتكذبين كذبي بشي معقول .. ع العموم ناس كثير تهتم بالمظهر وتنسى الجوهر .. أنا بعد كنت أنصب بس يوم كنت بزر يعني 6_ 7 سنوات .. خخخخخخخ مشكور ع الموضوع الجميل ..

هلا فيك اختي فرانشيسكا ..
نورتي الموضوع ..

اما ديانا مره وحده .. لو قالت فنانه ممكن .. بس اميره مستحيل :p
ومن زين الاخلاق حاطه ورده

بالتاكيد الاساس وهو الجمهر منسي هالايام ..
اما الكذب وانت صغير مقبول .. ولو ان الخوفه ان الطفل يتعود ..
لكن في امكانيه يتعدل ..

شكرا لك على المرور العطر ..
دمتي بخير