10/06/2007, 08:27 AM
|
 | مشرف منتدى الجمهور الهلالي | | تاريخ التسجيل: 20/01/2002 المكان: وسط المعمعه
مشاركات: 12,893
| |
|
" ياحظكم " عندكم اختبارات .. !!
بسم الله الرحمن الرحيم
" ياحظكم " عندكم اختبارات .. !!
1/3
" تسليك "
لاتعذل المشتاق في أشواقه ** حتى يكون حشاك في أحشائه ;)
أيام الاختبارات لها وقع خاص في القلوب .. وهي من أجمل أيام الطلاب ..
ففيها تختلط الأحزان بالأفراح والسعادة مع الخوف والاجتهاد مع الرهبة .. 
وتظل ذكرياتها عالقة في الأذهان رغم تقادم العهد .. ;)
وكل منا له مع تلك الأيام قصة وموقف ..
قد يكون في حينها صعباً ومؤلماً .. لكنه بعد ذلك يصبح طريفاً وذكرى جميلة ...
بالأمس لمت زماني في تعاسته ** واليوم .. أبكي على أمسي الذي ذهبا ..!!
" الزبدة "
في هذه الأيام تذكرت يوم كنت طالب مثلكم .. وحنيت لأيام الاختبارات وهبالها :p
فقررت أن اكتب مواقف متعددة .. في مراحل مختلفة حدثت لي ايام الاختبارات
وسأبدأ بقصة في المرحلة الابتدائية .. 
فإلى هناكـــ ...
,
’
,
’
«¤¶حديقتي .. والفطور المشؤووم !! ``¶¤»
عند بيتنا في حديقة صغيرة كنت مسيطر عليها ومعتبرها من ضمن أملاك الوالد الله يحفظه ;)
وكنت كل ما انزل من باص المدرسة أوري اصدقاي في الباص الحديقة وأقول هذي حديقتي
وكانوا يقولون لي : نبي نلعب في حديقتك ..
المهم في آخر يوم من الاختبارات في سادس ابتدائي قلت لهم وشارايكم تفطرون عندي في البيت ونروح لحديقتي نلعب..؟ البزارين ما صدقوا وقالو تكفى تكفى .. 
من زود الثقة والدلاخة دخلت غرفة المدير وقلت له أبي اتصل على بيتنا !!
ويعطيني التلفون أدق .. وترد أختي وأقولها جهزوا فطور لعشرين بزر .. (اصدقاي ) بيفطرون عندي
قالت وش نسوي ؟ قلت فول وشكشوكة وكثري شطة ههههههه 
سكرت السماعة وقلت للمدير يعطيك العافية يا مدير خخخخخخخخ
ويوم بغيت امشي ناداني وقال تبي تعزم الطلاب عندك ؟؟
قلت ايه وحياك انت بعد على الحاصل وماهن كلافة >>> نصاب :p
عاد كان المدير عصبي ويهاوشني ويقول اتصل على اهلك
وقلهم لا يسوون شي ولو اسمع انكم تجمعتوا ياويلك ويل ..!؟
>>> ينعن ابو ابلسك آخر يوم لي في مدرستك وناشب لي 
واتصلت مرتن ثانية وقلت لاختي الغي الفكرة خلاص "الذيب في القليب " ..
وارجع للعيال وأقولهم السالفة لكنهم أصروا انهم يجوون عندي ويشرفون حديقتي ..
وعلى قولة المثل مايرد الكرام إلا اللئام .. قلت : قدام قدام قدام ... ;) ;) ;)
انتهينا من الاختبار وركبوا كل اصدقاي في الباص اللي يوصلني ورحنا لبيتنا
وكلمت الأهل يجهزون الفول والشكشوكة على وجه السرعة ويزيدون تونه نكاية بالمدير..
عقب ما افطرنا .. ويالله من فضلك .. اخذت البزارين ورحنا لحديقتي اللي كانت تقفل الصبح
ودخلنا من تحت الباب أما الدببة فكانوا ينقزون من فوق الباب ماله داعي ينشبون خخخخخخ
في نص اللعب والمرح واللهو .. رجعت للبيت ابي اجيب ماء للبزارين اصدقاي
وما ادري الا انهم مداهميني في البيت ..
وعامل الحديقة يلحقهم بعد ما تطاقوا معه !!
دخلتهم وقفلت الباب ..
وقلت ينعن ابو ابليسكم كلها دقيقة بس تركتكم وسويتو مشكلة الشرهة علي يوم اجيبكم حديقتنا
وفي هذه الأثناء دق جرس البيت رحت فتحت الباب بسرعة لايكون في بزر مضيع دربه خخخخخ:p
والا اشوف العامل معه جارنا العسكري ( عقيد ) وهو طاق البذلة 
>>> ابو هنود مايمزح ;)
ويقولي جارنا على طول من دون تفاهم وين ابوك ياورع ؟؟
قلت ما هوموجود ..
وانا مطرف الباب ومطلع راسي بس والبزارين حولي .. من اللقافة كلهم جوا عند الباب
يبون يشوفون العسكري !! قال من ذولا ؟؟ قلت اصدقاي .. بعدها عطاني بعض الأوامر والتهديدات
وراح .. وعدت على خير ولله الحمد .. 
جلست مع خوياي في البيت الى وقت صلاة الظهر بعد كذا صرفتهم
وأنا أوصيهم لايعلمون أحد باللي صار ورحت المسجد أصلي الظهر ..
بعد صلاة الظهر جاو عيال الحارة وقالو لي نبيك في حوش المسجد !!
على نيتي طلعت لهم وأثرهم حاقدين لاني عزمت اصدقاي في المدرسة وسحبت عليهم
وشكلهم ما افطروا ذاك اليوم وعتبروني خاين خخخخخخخخخ ;)
وبدا شغل رفع الضغط واحد يدف والثاني يهاوش والثالث يشوت وكانوا حدود الخمسة
باختصار كانوا ناوين شر ( مطاقة )
انا جيتهم من الآخر وقلت تبون تضاربون .. قالو ايه ..
قلت اجل خلنا ندخل المسجد ونتضارب خخخخخخخخ
وانا كنت مخطط على عصاة خطيب الجمعه اخذها واطقهم فيها
ودخلنا المسجد وكان فاضي واركض ناصي المنبر وهم ما يدرون وش السالفة
وأخذ العصا وألحقهم في المسجد أنواع الطق ويروحون ياخذون كراسي المصاحف ;)
واجي انصى كبيرهم " اللي شب الشر " واطقه الى ان صرخ صرخة أليمة وأحلت العصا عليه
واهج للبيت والقى أبوي عند الباب ووقف معه كأن شيئاً لم يكن ;)
شوي ويجون عيال الحارة ويقول واحد منهم للوالد ترى ماجد كسر رجل اخوي ..
والوالد بدا يهاوشني .. !؟ انا ما قدرت أقول شي غير أني خربتها وبديت اصيح .. :p
المهم انتهيت من عيال الحارة وتصالحت معهم اليوم الثاني لكن مشكلة الفطور ماخلصت !!
بعد اسبوع رحت للمدرسة مع اخوي الكبير أبي أخذ الشهادة ويوم شافني المدير اشطف مكتبه
صرخ باسمي صرخة سمعها الثقلين الى درجة ان اخوي الكبير ارتاع فما بالكم بالطفل الوديع
دخلت عنده مرتعد الفرائص وقلت نعم .. قال انا ماقلتلك لا تعزم الطلاب ؟؟
قلت له : ايه.. قال : ليش عزمتهم طيب ..أنا قررت اني أجحد وقلت ما عزمت أحد !!قال لي : كذااااااب !!
في طالب تأخر عن بيتهم وأهله اتصلوا يدورون عليه ويوم رجع قال انه كان معزوم عندك .. ؟
في تلك اللحظة قلت : 
ياليل .. على المدير النشبة .. وياليل على البزارين النكبة ..
وياليل على الابتدائية .. اللي ما ودها تخرجني..
وياليل .. على ها الفطور المنيل بستين نيلة ,,,
انتهى ,,,
في الحلقة القادمة غداُ إن شاء الله
أنتم مع موقفان من المتوسطة والثانوية في نفس الموضوع .. ؟؟
إلى ذلك الحين أترككم في رعاية الله متمنياً أن تتحفونا بمواقفكم وذكرياتكم,,, |
الوضع الشجري
