أولا أحب أشكر كل اللي مروا وتكرموا علي بتعليقاتهم وذباتهم خاصة الكناري
واهديهم الحلقة الأخيرة من المواقف (( والتي تثبت أنني غير داج ))
ولي عودة إلى جميع الردود ان شاء الله ;)
وأما الآن فسنبحر سوياً إلى قصتي العجيبة في المرحلة الجامعية ..
فإلى هناكــ ,,,
,
’
بداية ودي أقول إني في الجامعة تغيرت وعقلت إلى درجة كبيرة
مع وجود بعض الحالات الشاذة من نفحات الماضي .. ;)
المهم كانت علاقتي بالجميع من دكاترة وطلاب منتازة ..
وبحكم أن طلاب دفعتي في الكلية داجين
صرت أنا ولله الحمد اعتبر دافور ومثال للطالب المجتهد ..
وكان في دكتور يقدرني بزيادة لان ما في احد يتفاعل معه ويشارك إلا أنا ..
وماعنده الا ماجد وين ماجد تعال ياماجد والنعم بماجد
إلى درجة ان بعض الطلاب حقدوا وبدو يغيرون مني اما انا فأنواع الإحراج !!
وفي نهاية الفصل حدد لي الدكتور المطلوب من المادة في الاختبار
وقال للطلاب اللي عنده استفسار يكلم ماجد هو عارف كل شي ..
ويوم الاختبار النهائي لمادته مرضت وكانت حالتي حاله
إلى درجة ما قدرت أرد على الجوال اللي حولته على واحد من الشباب
وعطيته المطلوب في الاختبار يوصله للزملاء وأنا حطيت راسي ..
وما قمت إلا الفجر وما ذاكرت أبد .. وروح لبيت صديقي وأنقنق معه شوية مذاكرة
بعدها رحنا للجامعة سوا ..
دخلت الاختبار وحليت ولله الحمد بس كان حلي مش ولا بد وكان واضح إني فاهم بس مش مذاكر
وبعد الاختبار رجعت البيت وحطيت راسي إلى الظهر
ويوم قمت لصلاة الظهر فتحت الجوال لقيت رسالة من رقم غريب مكتوب فيها:
" اتصلت عليك ولم ترد المرسل : أخوك / فلان الفلاني (دكتور المادة ) "
وبعدها رسالة ثانية من نفس الرقم مكتوب فيها:
"عطيناك اقل من حقك100من 100 ألف مبروك وعقبال الدكتوراه "
أنا انلحست وتوقعت انه مقلب من واحد من العيال لأن الدكتور ما يعرف رقمي ولا عمري عطيته اياه !!
فتصلت على واحد من الشباب مشهور بانه ينشب للدكاترة
وقلت له عندك رقم الدكتور فلان قال ايه وعطاني نفس الرقم ..
وكلمت واحد ثاني وعطاني نفس الرقم ..
عاد انا قسم بالله أنواع الإحراج وبالتأكيد مافي حل إلا إني اتصل عليه
واشكره .. وبعد صلاة العصر من نفس اليوم دقيت على الدكتور ولا رد
وبعد ساعة دق علي ورديت عليه على استحياء ...
طبعاً في البداية اعتذرت له عن سوء الحل بسب مرضي فقالي : صحيح إجاباتك ما كانت نصاً
لكن كلها صحيحة وأنت تستاهل 100 واكثر ...
وفي نهاية المكالمة قالي في احد من اصدقائك تبي اعطيك درجته ..
قلت لا ابد والله ماودي اكلف عليك .. لكنه لزم علي وهو يدري ان في واحد
من الطلاب أنا وياه أكثر من أخوان (قلب).. فعطيته اسمه ( عبد الله ) ..
فقالي الدكتور اللحين بصحح ورقته وأرسلك الدرجة ..
بعد نص ساعة تقريباً وصلتني رسالة من الدكتور تقول عبد الله 95 درجة ..
طبعاً ابو عابد ماقد اخذ 95 وانا ماعمري اخذت 100
وعلى العموم كانت هذي اول مرة وآخرة مرة اجيب فيها هيك درجة .:p :p
وفي ختام هذه الحلقات اعتذر للطلاب والطالبات ألي يختبرون وغثيتهم
بها الموضوع في هذا الوقت .. بس قسم بالله في هالايام كلش له طعم خاص
حتى النشرة الجوية في القناة الأولى
سواء عند الطلاب أو غيرهم .. ولا تسألوني ليه ..
وفق الله جميع أعزائنا الطلاب والطالبات في اختباراتهم
وأسأله عز وجل أن يرزق الجميع النجاح والتوفيق في حياتهم العلمية والعملية ,,,
هههههههههههههههههه اجل حديقتكم ماتحس ان وجهك مغسول بمرق لما كلمت اختك من مكتب المدير تمووون عسى ماكسرت راس واحد منهم مجرم
ماشاء الله احس انكـ فله لما كنت صغير وذكي ونشبة :p
بخصوص التاخير انا ماشاء الله علي حريصتن اركد كم جوال عندي واروح من 6 ونصف واختباري مايبدا الافوق 8 مع السواق فاضي اي وقت يوديني
سالفه الشبشب دايم احلم واتخيل هالموقف مدري ليه بس وش سويت وين اخذت منه من المسجد >>>>>> عادها مطيع الهميمي:p
موقف الجامعه ماشاء الله الله يرزقنــا وشلون تتميلحون عند الدكاترة مشاركة مستحيل اشارك من عقب الثانوي طلعت طاقتي كلها هناك الحين مستمعه جيده فقط:p انا يقالك بطبق كتبت بنهايه ورقة الاجابه للدكتور دعاء :p هههههههههههههه
مووووووقفي انا مو وقت اختبارات طبعاااا الظاهر ذكرته قبل هالمره هنا لما كنت بالابتدائي كنتمن النوع الي لازم اغير شنطتي كل يوم >>>>كشخه :p المهم لما اغير الي في الشنطة اخذ الكتب بس الي علينا بكره واحطها بشنطه ثانيه والكتب الي كانت علي اليوم تظل بالشنطة الاولى
جا اليوم الثاني وصلت المدرسه افتح شنطتي الاقيها كتبي حقت يوم امس واجلس اصيح وكنت جايبه حلاو معااااي لي وللبنات وصديقاتي لما كانو يواسوني ويفتشون بشنطتي لقوة بس استحو يقولون عيطنا وانا جالسه اصيح المهم اتصلت على ابوي وجاب لي شنطتي
اعتقد من اجمل الايام في السنوات الدراسيه هي ايام الامتحانات ,, وفي كل المراحل ,, مواقفكـَ الثلاثه تدل ان هنالكـَ شخص تعشقه ( الطيبه ) فـ احبت ان يكون قلبه موطنا لها ,, ورحلة الذكريات هذه حملتني انا شخصيا لـ عدة مواقف ,, ولكن يظل السؤال دوما ,, انه غالبا ماتحدث المصائب في اوقات الامتحانات .. فـ لا اعلم السر وراء اجتماع الطلاب والذهاب لـ ارتياد الاماكن المفضله لديهم وكل حسب ميوله ,, في وقت من الاوقات ولا اعلم هل الان مثلما كان في السابق ام لا .. ان ظاهرة التفحيط لا تنتشر بـ شكل اكبر الا في اوقات الامتحانات .. اذكر ذات حين في ايام المتوسط .. اقلني احدهم الى منزلي مع السائق وفي الطريق اقنعني ان نذهب لـ احدى الشوارع ( شارع التربيه ) هناكـ حيث الاجتماع ومن ثم التفحيط ... لم استغرب ذلكـ حقيقة لكن مااثار استغرابي هو ان السائق معتاد على مثل هذه الفرجه والدليل انه لحظة تواجد سيارة الشرطه في نفس المكان اخبرنا بـ الحرف الواحد ( ياالله حكومه حكومه ) حينها لم ارتعب من الموقف بقدر ماكنت اضحكـ على الاسلوب الذي قالها فيه .. وحتى هذه اللحظه كل ماتذكرت ذلكـَ الموقف ازداد ضحكي عن المرة السابقه ,, لكن في نهاية الامر اذكر ان ذلكـَ الشارع انتهى بـ قصة مأساويه لـ اربعة شباب ,, ولـ مثل هذه الامور لا تروق لي لكن لـ الظروف احكام فـ اجر ( التوصيله مشاهدة شوط تفحيط ) ومنذ ذلكـ الحين وتوافق هذه الحادثه لم استطع ان اقف في مثل هذه الشوارع او مشاهدة مثلها في مقاطع الفيديو .. فـ كانت وبشكل غريب منتشره في ذلكـَ الحين خصوصا في ايام الامتحانات ,, لكـَ التحيه عزيزي ,, والمواقف كثيره لكن يكفي ان سعادة ابتسامة حرفكـ ذكرنا بـ مرحلة لن تنسى فـ اسلوبكـَ الممتع وجمالية اطلالتكـ التي طالما تأسرنا بـ سحر عذوبتها ,, فـ اقبل مني التحية الصادقه والامنية بدوام التوفيق ,,
أنا أول ما سمعت إن ماجد مقبل كاتب موضوع جيت ركض للبيت بعد الإختبار بس ما أمداني أرد عليك
و على طاري المواقف أيام المتوسط صار لي موقف لا أحسد عليه
و أنا في ثالث متوسط كنت مذاكر جغرافيا و أصلا بكرة ما علي جغرافيا كان علينا فقه و أجي المدرسة إلا أشوف العالم تراجع فقه إلا أنا أراجع جغرافيا
إلا و أنقز خوف و أروح لمدرس الفقه الله يذكره بالخير و قال لي رح مكتبي و ذاكر لك نص ساعة بس و بعدها أشوفك بالقاعة و دخلت الإختبار و جبت 28من 30 <<< ما شاء الله علي كانت أوقات دفرة
الوضع العادي
