«¤¶` خنفشاري المجلس العام " ماجد مقبل " ضيفاً على "حياة @ نت" `¶¤» - صفحة رقم 3 - نادي الهلال السعودي - شبكة الزعيم

المنتدى الاستشاري · #1 23/05/2007, 02:48 AM

فكرة و إعداد / الماسه الزرقاء

نعود إليكم أحبتي أعضاء وعضوات شبكة الزعيم من جديد مع
(حياة @ نت ) قبل الدخول في معمعة الإختبارات
وكما تعلمون فهي عبارة عن سلسلة ستستمر معنا بإذن الله لفترة ما في مجلسنا العام إعتماداً على تفاعلكم الكريم,
يحكي فيها ضيفنا عن سيرته وحياته في العالم الافتراضي , عالم الشبكة العنكبوتية وعالمه في شبكة الزعيم .

ضيفنا الثالث عرفناه من خلال منتدى المجلس العام متنوع الكتابات ,
فنرى كتابته ذات طابع ثقافي وأخرى فكاهية وغيرها أدبية وتتخللها الكتابات الإجتماعية ,
تتميز بعض كتاباته بوجود صدى لها في مجلسنا وتتداولها الأقلام كثيراً ,
حيث عُرف بالخنفشاري نسبة لإحدى كتاباته عن هذا الموضوع , ولا ننسى موضوع البرادايم وما فعله بالأعضاء

ضيفنا لثالث عدد من هذه السلسلة هو الخنفشاري الكبير

وأديب المجلس العام

«¤¶`ماجد مقبل `¶¤»

نترككم مع كاتبنا وضيفنا الغالي .. ليُبحر بكم في عالمه الافتراضي ..

حين هممت أن اكتب هذا الموضوع انتابني شعور غريب !! ارتميت إثره بجسدي المنهك على كرسيي العتيق لأتنهد بعمق ..
وأنا أتذكر أياما مضت بحلوها ومرها وخيرها وشرها تراءت أمامي كسراب يحسبه الظمآن ماءا..

سنين سبع فيها الرخاء وفيها العجاف ..عشتها في عالم الانترنت المخفي الذي حوا كل الأشكال والأجناس فوجدت فيه النافع والصالح كما وجدت المتردي والطالح ..
عالم ليس به خوف إلا من الله عزوجل .. ولا قانون غير الضمير الحي .. ولا رادع إلا الحياء ..كسبت منه الكثير وخسرت الكثير أيضاً ..
أعتقد أن اصدق ما يقال عن تلك الأيام وتلك الحياة انها ..

حياة@ نت ..

[[البــــدايـــــة ...]]

كانت انطلاقتي في عالم الانترنت بعدما نشبنت للوالدة الله يحفظها أنا واخواني لكي تتوسط لنا عند الوالد اللي كان ماخذ صورة سيئة عن الانترنت
وصدر قراره بالموافقة ولله الحمد في عام 2000م برقم 1÷ 2 / ك خ هـ

بعد قرار البابا الله يحفظه رحت أنا واخوي اللي اكبر مني وشرينا جهاز كمبيوتر أحلى مواصفات لزوم الشغل >>> أنواع الحماس

وطبعاً حنا ما نعرف شي بس قلنا لراعي المحل نبي مواقع صح توسع الصدر وتفك الخشة وتخلي اللي ما يفهي يفهي ..

أبو الشباب قال ابشروا وحط لنا موقع (أين) على الصفحة الرئيسية وقال من هون بتشوف الدنيا منيح ..
انا واخوي سعابيلنا سالت كنهر جاري وبدت الأحلام والآمال على ضفاف النهر كحديقة غناء تظله وتمده بالحياة ههههههه

ودخلنا عالم النت من بوابة (أين) ومنها صرنا ندخل المواقع ونفتح المنتديات وسويت في أين ايميل وفي أين كتبت الهلال وطلعت لي شبكة الزعيم
وسجلت فيها ودام هذا الحب بيننا وبين أين إلى ان أتى قوقل وقلب الطاولة رأساً على عقب ..;)

(( أول موضوع لي ))

طبعا في هذه الفترة سجلت في منتديات كثيرة وكنت اقرأ كثيراً وما كانت أشارك ولا قدرت استوعب فكرة إني أشارك إلى أن كتبت أول موضوع لي في منتدى اسمه شباب
طبعاً تجمعت العائلة الكريمة كلها أمام الكمبيوتر وانتشر الخبر في الحارة انتشار النار في الهشيم إن ماجد شارك في منتدى وفي اثنين ردو عليه !!

أنا كبر راسي وصراحة بديت أحس بالشهرة وضغوطها ومن هنا بدأت أحاول اثبت نفسي وانطلق في هذا المضمار الرهيب هههههه

ومع مرور الأيام تعرفت على الشات وبديت ادخله فترة قصير وكنت ادخل مع مجموعة اعرفهم نتنقل من شات الى شات لانبغي الا الفساد في الأرض
وصراحة الشات ما عجبني فلذلك تركته الا غير رجعة إلا رجعة صغينونة في شات الزعيم وبرضوا ما عجبني ..!!

وكنت غالباً اسنتر في المنتديات خاصة شبكة الزعيم والهلال والمواقع الشعرية والرياضية والاخبارية ومنتدى الجامعة الا ان دخلت عالم البالتوك وما ادراك ما البالتوك ...

(( عالم البالتوك ))

في البالتوك كانت بداية الانحراف ههههه >> لا احد يصدق ..

صراحة البالتوك اخذ وقتي وجهدي ومالي وحبي هههه;) وكنت اسنتر فيه وتعرفت على مجموعة من الشباب وبرضوا صرنا نتنقل من روم الى روم مافي الا هبال وضحك وقليل من التسحيب
وميزة البالتوك انه فيه فوائد ويعود الشخص على النقاشات والبربرة وفيه ثقافة والبالتوك ماهو أي واحد يدخله لكن المشكلة ان البرنامج كله فيروسات وياكل وقت الواحد حبة حبة اكل البرشومي ..
والحين ما صرت ادخل الا نادراً بسبب التقدم في العمر ..;)

((قصتي مع الزعيم ...))

في الزعيم وجدت ضالتي بصراحة ارتحت لها المنتدى كثير وانا سجلت فيه باسم ماجد مقبل لاني كنت متحمس ومطفي الانوار واخاف احط اسم ثاني يعرفون اني نصاب

ويطردوني لكن اشتراكي ماتفعل

فسجلت باسم ثاني فتفعل الاول وبديت اشارك فيه بمنتدى الجماهير الهلالية ثم انتقلت الى منتدى الاعضاء
وكان ذيك الفترة الحاتمي والعرفج وكيفي كويتيه هم اول من عرفتهم هناك ثم توالت المشاركات في منتدى المجلس العام وبقية المنتديات ..

][ماســنجــريــــات][

((ماجد مقبل الهكرز الذي لايرحم ..))

كان حلم طفولتي إني أكون هكرز >>> امحق حلم

ولتحقيق هذا الحلم اخترت اثنين من أعضاء الزعيم وهما هلالي الظهران والفارس الحائر وأضفتهم في ماسنجري للتهكرز عليهم
والآن مع قصتي مع الضحية الأول هلالي الظهران ..

انا : الوووووووو>>> ملاحظين مافي سلام عليكم شغل مرتب

هلا لي : هلا وغلا وحاط ابتسامة ..

انا : اجل هلالي الظهران ؟؟
هلالي : ايه من معي ..
انا : اسمع أنت ووجهك انت من زمان قاهرني وأنا حطيتك في راسي ..

هلالي : طيب من معي !!
انا : هكرز نصراوي تخصص ايميلات;)
هلالي : هلا وغلا وحياك الله اخوي >>> بلع العافية عموري

انا : لا حياك ولا بياك اقرى السلام على ماسنجرك واللي فيه ..
هلالي : ياخي ليش ترانا اخوان ..

انا : بل اخوان بلا بطيخ انت حاقد على النصر ودواك عندي

هلالي : ياخي كل شي بالتفاهم

انا : تفاهم معك مافيه ورحمة فيك بعطيك دقيقتين تاخذ الايميلات المهمة اللي عندك وتودع الماسنجر لان هذي اخر نظرة لك ..

هلالي : صدقني مايمديك >>> بدى يتحدى

انا : اجل سلام ونشوف من اللي مايمديه ياحلو;)
هلالي : لحظة الله يرحم والديك تراني مااعرف في ها السوالف وانا وش مسوي لك ..

انا : رحمته وتقطع بطني من الضحك وقلتله معك ماجد مقبل يالفاهي ..

((الضحية الثانية كان الفارس الحائر

))

انا : هلا وغلا
الفارس : هلابك
انا : من معي
الفارس : انت معي ..
انا : من أولها مشاكل انت مضيفني ياشيخ

الفارس : عفواً انا ما اضفت احد >> محترم

انا : ايييه انت الهلالي الحائرفي منتدى الزعيم عرفتك ..

الفارس : وانت مين ..
انا : انا هكرز نصراوي شفت ايميلك في توقيعك وعجبني وقررت اني اخذه عشان كذا اضفتك ..

الفارس : بدري عليك
انا : هههههههههههه ضحكتني ياشيخ >>> ثقة عمياء

الفارس : لا انت ولا عشرة من امثالك يقدرون ياخذونه
انا : اقول اقصرها بس ولا يكثر الحق عمرك وسوي نسخ ولصق للايملات اللي عندك لانها خلاص بتصير بح ..

الفارس : ابشرك كل اللي في الايميل عندي أرقام جوالاتهم !!:p
انا : اجل دق عليهم الله لا يهينك وقلهم ان ايميلك انسرق وخلهم يرسلون لك ايميلاتهم ههههههههههههههههههه

الفارس : عادي بس برضوا ماتقدر ..

انا : ياشيخ روح تراك غثيتني خلاص انقشع من ايميلي ههه>> بجيح

الفارس :

انا : وقد اشفقت عليه قلت معك ماجد مقبل يالغالي هههههههههههههه

الفارس : الله يرجك ياشيخ ..هههههههههههه

انا : ماشاء الله عليك اخوي سعد كل اللي بالماسنجر معك ارقامهم

الفارس : مصدق انت والله ما معي الا رقم اثنين بس ;)
انا :هههههههههههه اه منك يا يافقاش

((أعضاء على ماسنجري)).

يزخر ماسنجري بعدد من الأعضاء الرائعين وهم مابين أعضاء قديمين ويرأسهم ديك الجن
وأعضاء جديدين ويرأسهم M e T o O o ..

[الاعضاء القديمين ..]

قائدهم ديك الجن وهو انسان حبوب دب واصلع ماشفته بس قلبي يقولي كذا

شعاره في الماسنجر علينا الذب وعليك الضحك

ممتع للغاية له بعض الحكم كان احد المترجمين المعتمدين لي على الماسنجر دايم كنت اكسر راسه بلعبة X O ;) استفدت منه الكثير منها ايميل مميز سواه لي ..

بس هذا الكلام مبطي يوم كان زعيم جديد الحين ديك الجن صار تقني مميز في منتدى الكمبيوتر وحاط علي بلوووك قد الدنيا وكبر راسه ومن هنا ادعوه الى فك هذا البلووك والا ...

ومن الاعضاء القديمين الوجه الازرق وهو انسان هادي وحبوب ومتزن مثقف هلالي متعصب قضيت معه فترات جميلة على الماسنجر
وهو له فترة غايب عن المنتدى وبيني وبينه اتصالات ..

ومن الأعضاء الرائعين الذين تعرفت عليهم في المنتدى الصقر الهلالي واللي كان منور ماسنجري بطلاته البهية وأحاديثه الجميلة
وطبعا اخوي الصقر تشرفت بان أشارك معه في منتدى رائع جداً غير الزعيم وهو برق الشمال الذي مازلت أزوره بين حين وآخر
وكانت تلك الأيام الفترة الذهبية لماجد مقبل هههه

لأني بعدها طفيت بقوة ومع الطفية انقطعت أخبار صديقي الصقر الهلالي .؟

وكذلك تعرفت في المنتدى على الفيصل وهو رجل اعمال من الدرجة الاولى وصار بينا بزنس استفدت من نصايحه كثيراً خاصة توصياته في الاسهم اللي ودتني في خبر كان

طبعاً اخوي فيصل انقطعت بينا الاتصالات لاني ضيعت ايميله ورقمه مع الاسف الشديد .

[الاعضاء الجديدين ..]

وشيخهم M e T o O o

وهوشاب في ريعان شبابه كالوردة المتفتقة بالحياة > لاعمرك تمدح

شعاره في الماسنجر مع ميتو مش حتقدر تفتح عينيك ;) لانه انسان مخربها اذا كان متواجد احط حالة الاتصال مشغووول جداً الى درجة الانسداح من الضحك
عشان الحق عليه وعلى أرانبه الصاروخية اللي تجي من كل حدب وصوب هههههه

كلام ميتو درر وشوفه شجر وما يعرف لا مبتدأ ولا خبر ..

بصراحة ميتو اونايف شاب سبقه عصره .. ساعات احس انه من عهد الدولة العباسية وساعات اقول ان فيه عرق أندلسي ..
طبعاً ما حصل لي الشرف واقابل ميتو بس انا مواعده اذا نجح وتخرج بتقدير ممتاز بقابله إن شاء الله وغير كذا ماعندي >>> والله لو انه بيقابل طويل العمرابو متعب

بس انتبهو تراه حقنه وأنواع القلق >> نذل ما يبي احد يضيفه هههههه

ومن الاعضاء اللي معي في الماسنجر وافتخر بمعرفتهم الهلالي المدريدي الرائع سيمو

والشاعر الكبير المتميز جرح يشكي

و مشكلتي ان تواجدي صار قليل تالي الايام وما افتح الماسنجر الا للضرورة .. وكذلك في أعضاء غاليين أضفتهم ولم يحصل لي شرف لقاءهم على الماسنجر او لقيتهم للحظات ولم نتجاذب اطراف الحديث .. ;)
وفي اعضاء قابلتهم فبذكرهم في قسم المقابلات اختصار للبربرة ههههه

وعلى فكرةً في واحد من المنتدى تعرفت عليه دايركت من دون ماسنجر ولا رسائل خاصة ولا حاجة واحتفظ باسمه لظروف إستراتيجية وأمنية ..

][مع الأعضاء وجهاً لوجه × فيس تو فيس

][

الأعضاء اللي تعرفت عليهم في منتدى الزعيم وقابلتهم أربعة كل واحد أحلى من الثاني
واليكم التفاصيل

أول عضو قابلته هو نــ15ــمــرطبعاً عرفته من خلال مشاركاته وردوده ثم كانت الرسائل الخاصة هي بداية التعمق وبعدين الماسنجر و الجوال ثم كان اللقاء الكبير ...

كان موعدنا في كوفي شوب على طريق الملك عبد الله (بون صوار ) الساعة 9,30 تقريباً دق علي وقال انا عم بنتظرك >>> ترا فيه عرق لبناني

واجيه ماشي مليون ووصلت الساعة 10 الكوفي ودخلت لكن المشكلة اني ما اعرف شكله طبعا هو قال لي انه معه لاب توب وأثر كل اللي في المقهى معهم لاب توب
وادق عليه ونبضات قلبي تدق معي وانا التفت يمنة ويسرة ابحث عنه :p واشوف واحد كاشخ ومرسم وآخر اتيكيت يرد على الجوال انا اسقط في يدي لاني حتى شماغي ما لبسته وحالتي حاله

سلمت على متعب وجلسنا نتجاذب أطراف الحديث لين شققناه من شدة التجاذب ..

وكنت متوقع اننا نجلس ساعة ساعتين لكن اللقاء امتد الى اربع ساعات تقريباً

طبعاً اللاب توب ساعدنا اننا ندخل المنتدى ونسترجع بعض الردود والمواضيع وما خلينا عضو او عضوة اومشرف الا تكلمنا عنه فياليت تحللونا الله لا يسيئكم ..

وفي منتصف اللقاء انضم الي الجلسة احد زملائي وهوأخصائي نفسي وانقلبت الجلسة تحليل نفسي واستشارات ولعل كل واحد بدا يكب عشاه ههههههههه

ومن ذالك اللقاء توالت اللقاءات والاجتماعات مع الغالي نــ15ــمر ومتعب جوه غير يعني كل يوم يطلع بسالفة يوم مسوي فلم هندي ويوم يصير رومانسي ويوم يجيك مواصل ومفهي :p و بختصار متعب أكشن

.

العضو الثاني كان مرسول الهلال ( عاشق السوفلييه )

عرفته في المنتدى ثم تعارفنا اكثر في الماسنجر وكان اللقاء الاول في حارتنا ومن هناك انطلقنا سوياً الى كوفي شوب
واحتسينا الكابتشينو واكلنا السوفلييه ومن يوم ماعرفته وزني زاد 3 كيلو من كثر ما ناكل سوفلييه هههههه

ومرسول صراحة حارس عملاق تعاقدنا معه في احدى المباريات ولكن للاسف فشلنا ههههه واكل كم قول يحبه قلبك

ونمر15 ومرسول قريبين مني في الحارة فلذلك صرنا نجتمع ثلاثة نفر بعد ما عرفتهم على بعض ..

العضوالثالث هو الهلالي الثقفي تعرفت عليه في المنتدى من خلال ردوده ومواضيعه المميزة واستمرت العلاقة الى ان كان لقائي مع ياسر في ارض مكة المكرمة

في حي العزيزية
وكان لقاء سريع وجميل تعرفت فيه الى ثلاثة من ابناء اخته خالد والوليد ومهند

وهم صغار في السن لكنهم مبدعين ومشروع شعراء ناجحين باذن الله

احدهم وعمره 6 سنوات يحفظ قصيدة الاصمعي صوت صفير البلبل وألقاها أمامي بكل شجاعة وثقة ماشاء الله عليه

وكان هذا هو لقائي الاول بالهلالي الثقفي الذي استمتعت به كثيراً.

العضو الرابع عزوز الأزرق في جدة وقبل موعد عودتي إلى الرياض بساعة كنت مع بعض الأصحاب في احد مقاهي جدة نشوف احدى المباريات

واتصلت بعزوز وقدمت له دعوه للحضور ;)
وما قصر والله وجاء عندنا وعرفته على الشباب وجلسنا نسولف وتعشينا مضغوط على كيفك

ثم أصرعزوز انه يوصلني المطار مشكوراً
طبعاً انا كنت قاص بطاقة صعود الطائرة من بدري فلذلك نزلت على الطيارة مباشرة وحقيقة كان لقاء عزوز رائعا ومميزاً رغم قصر مدته .

احبتي ...

ان تروا عيباً فسدوا الخلالا ** جل من لاعيب فيه وعلا ..
بالعربي .. لا احد يدقق ..

تمضي سنين طوال عام ورا عام ** وتبقى المحبة لك يامجلسي العام
أعضائك النخبة انا فيهم انلام ** مابين وافي وصافي وصادق وهمام
اخوان واكثر لكن دون ارحام ** في الله محبتنا وعلى دين الاسلام
رسولنا القدوة محمد عليه السلام ** خير البشر وخير من صلى وصام
الله يديم الود دوم ويكفينا الخصام ** في منتدى الزعماء و ( بالمجلس العام )

وفي ختام هذه الحياة الانترنتية أقف عاجزاً عن الشكر لكم جميعاً
يا من منحتموني وقتكم وحرفكم وودكم ..
يا أعضاء منتدى المجلس العام واستشارييه ومشرفيه الكرام ...
وأدعو الله عز وجل أن يوفقنا جميعا لكل ما يحبه ويرضاه وان يجمعنا في جنته ومستقر رحمته في مقعد صدق عند مليك مقتدر

بقلم الخنفشاري : ماجد مقبل
أديب المجلس العام

ونحن بدورنا نشكر أديبنا الغالي لإٍستجابته لدعوتنا

ولا ننسى أن نشكر المصمم المبدع عاشق بو يعقوب على تصاميمه الخاصة بالموضوع

علماً بأن سلسلة ( حياة @ نت )
ستقف مؤقتاً وستُستأنف في الإجازة القادمة

, فانتظرووونا

تقبلوا أرق التحايا وأطيبها

من مشرفي واستشاري المجلس العام