جرائة اسوار في مسلسل ( حسن عسيري ) - نادي الهلال السعودي - شبكة الزعيم

ابو طـــــلال · #1 20/05/2007, 03:41 PM

تحية للاعضاء الكرام ...

عانينا ومانزال نعاني من هبوط شديد في ماتقدمة القنوات الفضائيه العربية من مسلسلات سخيفه .. او مكرره
خصوصا المصرية منها .. واصبنا بالاحباط بعدم تقديم اي عمل جميل .. مفيد للمشاهد العربي ...
ولكن الدراما السوريه انقذت الموقف .. وقدمت اعمالا جميله.. وتحترم مشاهديها من خلال ماتقدمه.. واصبحت في المقدمه عربيا بعد انحطاط الاعمال المصريه وتراجع الاعمال الكويتيه ....... وتدريجيا ومع التنافس الشديد ( السوري السوري )
اصبحت المسلسلات والقصص والفكره مكرره .. فتجد مسلسلين تم تصويرهما بنفس المنطقه .. ونفس الشخصيات تقريبا مع
اختلاف اسامي اصحاب الادوار .. يعني تلقى المسلسل السوري يدور حول ( حاره + زعيم حاره + حلاق عنده اسرار كل
الحاره + رجوله وابضايات مبالغ فيها جدا ... وهنالك صنف اخر ومتكرر ايضا وهو ( عشاق نزار قباني + مدير ويومياته ..
مغامرات سوريه على الطريقه الامريكيه السينمائيه ... و و و...
لااطيل عليكم اكثر ... اعطوا مسلسل اسوار اللذي يعرض الان على mbc فرصه .. بصراحه اعجبني هالمسلسل .. تطرق
لمواضيع جدا مهمله .. وغافلين عنها

....وبحكم انه سعودي .. واحترمني كمشاهد من خلال هالقصه .. ارفع
قبعتي احتراما له .

. واتمنى من شاهد هذا المسلسل ان يعطينا رائيه وتعليقاته ...
* عندي ملاحظه على هالسلسل ساذكرها لاحقا .. ابي اشوف احد يجيب هالملاحظه او لا

تحياتي للجميع

هلالي شمر · #2 20/05/2007, 05:37 PM

بصراحه المسلسل ممتااز وجيد لكن فيه بعض الشغلات

ماتحااكي حاال المجتمع السعودي بشكل الموضوع

اضربلك مثاال البنت اللي حبت السوواق هل هاذي موجوده عندنا حتى لو انها موجوده لكن بنسبه قليله

لكن المسسل والله رووعه لامناخرااج يعني افضل مسلسل موجود على الساحه العربيه والخليجيه الا الان

وجهة نظر

تغريد · #3 20/05/2007, 07:35 PM

والله مني فاهمتو لاني ماشفت الا حلقتين

ماما واختي يتابعونو وكل يوم اجلس معاهم بنص المسلسل
وهذا مين ؟ وهذي مين

؟ هذا طيب ولا شرير؟ :p
ويعيدون لي نفس الكلام

اقهرهم

بس انا حسن عسيري مااهضمو مادري ليش

ابونايف الطايف · #4 20/05/2007, 07:40 PM

انا معك اخوي ابوطلال والله مسلسل اجتماعي جميل

تقبل مرور اخوك ابو نايف

][ عيون الزعيم ][ · #5 20/05/2007, 07:47 PM

هلابك يا طلال المسلسل يتكلم عن الواقع اللي عايشينه يعني في بنات مثل هاللي في المسلسل بس مو بكثرة
الله يستر علي وعلى خواتي واهلي والمسلمين اجمعين
بس قهرني
كذا خل الكوايتا والباقي الدول تنظر الينا بنظرة غيير
<<<<<<< ماقهرها الا الكوييتيين
لانهم حاطين ان السعوديه فيها الستر والعفه وما عندهم اللف والدوران
فهذا الله يجزاه خير خرب الدعوه
بس يضل فئة قليله من اللي يتكلم عنهم عسيري
مع اني ما اطيق ذا الممثل
ماهضمته هو وشعره اللي مطوله مدري من اللي لاعب عليه وقال ان الشعر عليك فله
المهم ماعلينا منه
موضوعك رائع
وهذي وجة نظري دمت يا ابو المقلاب

هامور البورصه · #6 20/05/2007, 11:33 PM

^^^^^^^^^^^^^^^

يرحم امك لوونك اعمانا غيريه

سبب لي عماء اللوان ..

اول شي انا ماحب اتاابع المسلسلات وناارد ماتابعها

لكن صرااحه شدني مسلسل اسواار تدري ليه ..

عشان فيه شيماء مغربي

.. وصرااحه انا للحين ماني عاارف المسلسل سعودي ولا كويتي اجل مخلين اسواار تسووق!!..

ولا وصرااحه وقااااحه اجل يجيبوون الهندي وهو قاعد يبووس وينا فييييه

.. ولا تدخل عليه بغرفته صرااحه بدت المسلسلات السعووديه بالانحطاط ..

خلاص من اليوم وراايح مانيب مخلي بالدش الا قناة المجد ..

حتى السعوديه بشيلها خايف انهم يجيبون هالمسلسل :p

صرااحه يعجبني تمثيل حسن عسيري .. تحس انه مايمثل كانه صوودق

على العموم والله انا مهوب من النوع اللي يتسدح عند التلفزيون عشان مسلسلات صح كوره ايه لكن مسلسل واقعد كل يوم اتاابع مشواار على الفااضي

للحين منقهر من مسلسل روبي .. نعنبووهم كل حلقه طالعين بقصه جديده وترى المسلسل يعرض على ام بي سي الاياام هذي بس نصيحه لحد يتاابعه قسم بالله يملل

ولا وكل قصه تشدك اكثر واحدااااث بطيئة خلاص نبي نهااية .. والمشكله اخر شي يصير في جزء ثاااني

على العموم تشكراتي لك ولاعدمنااااااااك

الـمـشـاغـب · #7 21/05/2007, 12:12 AM

حسن عسيري.؟؟؟؟؟؟؟؟

أنا غاسل يدي منه من أكثر من 8 سنوات لما كان في مسلسل فوازير في الـ mbc

تخيلوا كان الممثلين السعوديين وحتى المطربين قبل 8 سنين لا يظهرون بمثل هذه المظاهر التي يظهرون

عليها هذه الأيام...!! ولكن حسن عسيري كان قد سبقهم منذ 8 سنوات بظهوره مع ممثلات لابسات ملابس غير لائقة في الـ mbc ...!!

ممثل لا أحمل له في نفسي ذرة احترام...!!

يا صبر الأرض ...!!!

قائد قوات العشق · #8 21/05/2007, 12:17 AM

^
^
^

أزيدك من الشعر بيت أخوي المشاغب ..

تدري إن حسن عسيري كان طالب في الكلية الحربية

وقبل تخرجه من الكلية بحوالي أسبوعين فصل من الكلية

ورفض يكمل الدراسة والتخرج ضابط

..

وش رأيك بالتفكير أخوي ..؟

هلالي القرعاء · #9 21/05/2007, 12:29 AM

موجود عندنا هذهـ الأشياء .. لكن في مُبالغات غير مقبوله ..!

المسلسل كله مشاكل وبلاوي من أوله لآخرهـ ..!!!
الله أكبر ...!! وش دعوه ..!!!

يعني صح عندنا الضرب والمشاكل ..

لكن ما توصل لـ دفن البنت وهي حيّـه ..!
مثل ما شفنا في المُـسلسل ..

عندنا في المُسلسلات الخليجيه أغلبها "للأسف"
ضرب وموت ومُـخدرات وسجن وقتل وظلم وسرقة ..

صح عندنا مثل هذهـ الأشياء .. في كل العالم هذا الشيء ..

لكن أن الأخ يدفن أخته .. والثاني يمنع زوجته من التواصل مع أهلها ..
ويضربها في أتفه الأمور ..

معقول يعني عندنا عوائل ما تعرف السعادة والفرحة ..

معقول في ناس كل حياتهم حزن وبكاء .. ومشاكل وبلاوي ..!

الحياة فيها السعادة وفيها الحزن ..

لكن المُسلسلات الخليجية فيها مُبالغة في الحزن والمآسي والآلام ..

أظن في مسلسل أسوار .. بالغوا في بعض اللقطات حتى وصلت إلى السخافة ..

معقول تعرض لقطات مثل لقطة دفن البنت وعندنا الصغار قبل الكبار يتابعونه ..!

فيها من الواقع ..
لكن فيها الكثير الكثير من المُبالغة ..

بالإضافة إلى انهم مخلين البنت عندنا عبء على الأهل .. ويبون يتخلصون منها ..

والرجل وحش يبي يعذبه وبس ..!

وبعدين ذاك اللي مرته متسلطه عليه .. وشلون رجعت للبيت وصارت تحبه وتخدمه بعيونه

سبحان الله ..!

صح لازم يحذرون من السواق ..
لكن أنت تتوقع ان في بنت سعوديه بتحب السواق وتعشقه !!

معروفين بناتنا يبون زوج أو حبيب مواصفاته زينه .. لكن سواااق !!

وبعدين هذا يشيل الجوال من أخته ويخليه تطلع مع السواق لحاله !
والثاني يشدد على التلفون ويخلي مرته ما تغطى ! ما ينفع تغطى لأن المخرج عاوز كده :p

في مبالغه وتناقض بالمسلسل ..

مع اني ما أتابعه لكن أشوف بعض الحلقات إذا جلست مع ناس مبتلين بـ متابعته ..

يعطيك العافيه ..

الكلاسيكي · #10 21/05/2007, 12:32 AM

الصراحه ماني متابع بشكل كبير للمسلسل ..

ولكن اعتقد انه في مبالغه كبيره جداً جداً من خلال الكم حلقه اللي شفتها ..

فيه ملاحضات كثيره ع المسلسل وبالاخص ان مافيه اخ يكره اخواته بهذا الكره ..
او تصل لدرجة هذا التعامل وبالاخص انه انسان عادي ولا يستخدم مسكرات او غيرها ..
وايضاً ما افقتد بمجتمعنا فتاة مغرمه بسواقهم !!

عموماً المسلسل بالنسبه لي في مبالغه كبيره ..
تظل وجهة نظري ..

دمت بخير .. ننتظر جديدك ..

][ عيون الزعيم ][ · #11 21/05/2007, 12:45 AM

إقتباس

الرسالة الأصلية كتبت بواسطة هامور البورصه


	^^^^^^^^^^^^^^^ يرحم امك لوونك اعمانا غيريه سبب لي عماء اللوان .. عشان فيه شيماء مغربي .. وصرااحه انا للحين ماني عاارف المسلسل سعودي ولا كويتي اجل مخلين اسواار تسووق!!.. [/COLOR][/SIZE]

اول اللون عاجبني

ثانيا
ميساء مو شيماء

LBa your heart · #12 21/05/2007, 12:47 AM

ماشاء الله الاعضاء متابعين للمسلسل

كل اللي بالمسلسل من مشاكل ومن سلوكيات سيئه موجودهـ بمجتمعنا,,

ميساء مغربي

وسسسلام عليكم

انسان عادي · #13 21/05/2007, 12:53 AM

صراحة المسلسل طرح جريئ جدا ومبالغ فية بشكل غير طبيعي
بس صراحة انا معجبني

هلالي في جده · #14 21/05/2007, 01:15 AM

والله المسلسل حلـوو ..

لكن فيـه مبالغـه .. ( أجـل يدفن اختـه وهي حيّـه

) .. ويقتـل زوجتـه كـذا بـدون مـا يتـأكد من الخبر اللي جـاه ، ويـرمي ولـده في الشـارع .. !!

إقتباس


	عشان فيه شيماء مغربي

Al Qahtani 20 · #15 21/05/2007, 02:35 AM

إقتباس

الرسالة الأصلية كتبت بواسطة هلالي شمر


	اضربلك مثاال البنت اللي حبت السوواق هل هاذي موجوده عندنا حتى لو انها موجوده لكن بنسبه قليله

ترى فيه حريم يفضلون السواق على ازواجهم كل شوي تقول بانو (هذا اسم السواق) وبانو لدرجة انه يمكن يطلقها

وتلقى السواق له سنين معهم والا جابه ابوهم عشان المدارس وتطول خطاهم يطلعون ويجون على مزاجهم ولا احد يقول لهم لا والا وين لأن الابو معتمد عليه دايم