#1  
قديم 19/05/2007, 08:28 AM
عضو استشاري سابق لمنتدى الجمهور الهلالي
تاريخ التسجيل: 18/01/2006
مشاركات: 66
حــــشً ,,,, بس يحبه قلبك ,,,, لا يفوتك

بسم الله والصلاة والسلام على رسول الله ,,,,,

اليوم غير ... ابقول اللي عندي بالعاميه ,,,, بلهجتي ولهجتك ولهجة لاعبين الهلال اللي يعرفونها زين ... زين ما زين... اللي ما تكذب ,,, واللي همها بس المصلحه العامه .. وعلى طاري العامه ترى الموضوع للجميع الخاصه والعامه وافهم يا فهيم.............

فيه نقطه مهمه جدا جدا جدا ,,,,,, لا بد الجميع يفهمهما ويعرف كيف يخدمها ماهو ينتقدها !!!!!!!!

اولا الهلال وثانيا الهلال وثالثا الهلال ورابعا انت ايا كنت .. ياسر... نواف .... الشلهوب... عمر... عزيز....تفاريس... او حتى سامي ....الدعيع....الجمهور....أيا تكون,,,,اي واحد ,,,, الهلال وبعدين انت .. هذي حطها في بالك.... لأنك اول مانشوف هذا في شخصيتك نحبك .....واذا حبيناك..... صرت فوق الناس وتحت الله... تدري ليه ؟؟؟ على العموم اذا ما تدري ليه ترى يبيلك تفكر بوجودك مع الهلال . وتسأل سامي ويوسف والنعيمه... تدري عاد ,,, عندك تفاريس ,,, مانعرفه ولا يعرفنا ,,, لكن حبيناه ولا نسمع فيه ويسوى عندنا كثير ... ليه ؟؟؟؟ لأنه يلعب كل مباراة من قلب ... وحط تحت من قلب خطين... ويلعب بفن ,,, "وانت فنان ..." بس نبيك كل مبارياتك تلعب من قلب... بس.

ترى الهلال الوان مانشوف الا هي ,,, حنا السعوديين ... نعم السعوديين ,,, كلهم,,,,,,, والا تدري يالله لعيونك وعيون الحق ثلاثة ارباعهم ... نعم هلاليين ,,, غصب عن الراضين والزعلانين .... ومالها له داعي نثبت لأننا ابخص وثقتنا بأنفسنا اكبر من جعجعة الخبول,,,,,,, على العموم ما ودي اطول عليك ... خلنا في الموضوع ..

حنا مقبلين على مفترق طرق ... بطولة اسيا وبطولة الدوري وبأذن الله ناخذهن الثنتين,, وانا اقول الكلام هذا لأن مسؤليتكم كبيره ويبي لها رجال ينشد الظهر فيهم وانتم كفو ... والكامل وجه الله ,,, لكن لا يجي في تفكيركم يوم من الأيام اننا بنعتمد على زعيط ومعيط ,,, مالنا الا الله ثم انتم...

المحترفين لو جبنا ما نقدر نجيب الا ثلاثه ,, ولو يكونون من افضل لاعبين العالم اللي طبعا ما نقدر عليهم يبي لهم من يساعدهم ,,, يعني وش الفايده اجيب لي راس حربه غير طبيعي في ظربات الراس وعندي ظهير ايمن او ايسر ما يعرف يرفع ,,,

ليه ما عاد نشوف رفعات زي الناس الا من عمر والشلهوب وبعض المرات بعد.... هذي مهيب شغلة الأظهره خصوصا اذا امتحنك الظهير وتعب نفسه وطلع في هجمه ... الى متى يعني ؟؟؟ ينتظر ان المدرب يخصص له هو بلحاله من بد اللاعبين تمرين مخصص ,,, يبتعد فيه عن التمرين الأساسي ,,, او ما ودك يا ظهير تقعد عقب التمرين لو ربع ساعه تمرّن على الرفعات ... وش فيها ؟؟؟ لا تكون مستحي يشوفك احد تمرّن على الرفعات ؟؟؟ والله مشكله .. أما اذا قلت لي اللي ما يلعب يقول الملعب وسيع .. اقول ايه هين ,,, تمرين وزيادة جرعات من الثقه بالنفس تخليك يا ياسر الياس... اللي الناس عليك بين مؤيد ومحتاس ..... اقول تخليك من افضل لاعبين المملكه............ نعم ياسر الياس يستطيع ان يصبح من افضل لاعبين المملكه... فرصه غير طبيعيه... نادي كبير ... جمهور ... اعلام ,, وش يبي بعد ؟؟؟ ياسر الياس مدافع كويس .. توقيته كويس ... شجاعته ممتازه ,,,, وحتى لو ما عند مهارات في الهجوم المدرب يقدر ينقله الى المنطقه الهجوميه بتحرك معين,,,, بس فيه شي واحد حنا نبيه منه ... وشو؟؟؟؟ ياخي ارفع صح .. ما تعرف؟؟؟؟ تعلم ... انت او غيرك حتى انت يالخثران ,, ولا يهون العبدالسلام ولا العنقري ,,, وش هالكلام اظهره كلكم يالله الواحد منكم يعرف يرفع ؟؟؟ بالله هذا من يرضي ؟؟ قايل لكم ساكت لي فتره ... فخلوني افضفض.....

نواف حبيب قلبي ,,, العاقل ,,, اللي ما اقدر اتكلم معه الا بالأحترام والتقدير لأنه محترم ,,, نواف ,,,,
يعني وشي الأدوار اللي صارت تطلب مني تغيرت ؟؟؟؟ طيب وشي الأدوار الجديده؟؟؟؟ وليه ما تسويها ؟؟؟ ونشوفك ثابت في التشكيله ؟؟؟ ليه ما تمسك المدرب وتقول له ... تعال يا خي .. وش تبي مني بالظبط ما تشوفه فيني .... لا تقولي قناعات لأن فيه لاعبين كثير على مستوى العالم احرجو مدربينهم ... عندك "بلمي" مثلا تبهذل لين اثبت نفسه وهو فوقه وتحته ... يعني وشلون انت لو بغيت... على العموم انا استغرب للاعب السعودي بشكل عام..... يزعل لو ما لعب ... ويزعل لو قلنا له ناقصك تكتيك معين ما تسويه وحاول تطور نفسك من هالناحيه...وانا اعرف عقلية نواف وان المهم عنده هو الهلال لكن يا نواف تأكد انك وحسب توقعي ماخذ الأمور بحساسيه شوي وكنك تبي ترجع نواف اول بين يوم وليله ترى كل اللي نبيه منك في المباراة كورتين او ثلاث تصنع فيها اهداف بس اذا جتك الكوره نبيها تصير خطيره بس لأنها معك ولعلك فاهمني وانت تقدر تختصر المسافات وانا احس انك قاعد تبعدها عن نفسك

الشلهوب المحبوب ؟؟ ليه ما يستفيد من جسمه مثل ما يستفيد السمكه قوارو طالما انه ما فيه امل يتبع تمارين بناء اجسام .. عندك الحسيني ,,, جابه الله وفيه عيادة يقولون ان شاء الله بتفتتح في الهلال تتعلق بالصحه التغذويه ,,, ما ودك ؟؟؟ كله واحد ... استفد من جسمك ... ترى على فكره ,,, اللي من الجمهور يقول وش فيه هذا ؟؟؟ يعتبرني ابنهبل لو ضاعت بطولة اسيا والدوري فيعيطيني فرصه اقول اخر كلام العقل ...

تخيل يا خالد العنقري انك رفعت اربع اوفرات في كل مباراة ويجي من وحده منهم بعد توفيق الله هدف وش موقف الجمهور الهلالي منك ... تدري ان هذا المطلوب ,,,, ليه ما تدرب عليه ... ارجع للأظهره لأنهم ترى فعلا مسببين لأنفسهم مشكله وهو حلها بسيط.. والمشكله هم اللي مسببينها لأنفسهم ... واتكلم مع العنقري بالذات ,,, لأنه من وجهة نظري المتواضعه , أعطيه خمسه من عشره دفاعيا ويمكن سته من عشره هجوميا وهذا معدل مرضي جدا جدا جدا في عالم المدربين المظطرين وحط تحت المظطرين خط... فلو تبي تزيد المعدل الى اعلى ما عليك الا ترفع كورتين ثلاث كور صح في كل شوط .... صعبه هذي.....................

تأكد يا لاعب الهلال اننا نعرفك ونعرف مهارتك وثقتنا فيك مالها حدود .... بس انت اللي خفف عن نفسك شوي واعرف حنا وش نبي ... حنا يا عقّال جماهير الهلال.... ما عليك من اللي يصفقون عشان سحبه او كبري,,, او تنقيز للكوره من فوق نور او من تحت رجول المنتشري .... او هالكلام .. لا حنا نتكلم عن الناس اللي يبون لعب صح زي ماهو قدام الأتحاد قدام الحزم وغيرهم ...


المهم والمقصد كل اللي نقوله يا لاعب الهلال أن عليك بعض النواقص ولا بد تنتبه لها وتعدلها وتحاول تطور من نفسك واهم شي ثقتك بنفسك وهذي ما تجي الا بالتمرين ثم التمرين ثم التمرين وبعدين يجي العامل الأهم ......................... كني بغيت اقلب فصحى ؟؟؟؟

يعني بالمختصر المفيد .... ليه تجبر المدرب يشوف قدراتك ياللاعب واللي للأسف ما تحاول تطورها وتخليه يسوي على اساسها الخطه ؟؟؟؟؟؟؟ ليه ما انت تشوف خطة المدرب وتحاول تصير جزء منها.... بتنفيذ ماهو بس ما يطلب منك الا وبتطوير نفسك في اللي ينقصك ؟؟؟؟؟؟ فهمتني ... اكيد فاهمني .....

كل الكلام اللي اقوله ويمكن للواحد انه يقوله في مثل هالمواقف ,,, ان الموضوع موضع " خلنا نسميه ,,, ألعب من قلب" وهذا اكيد يعتمد على شخصية الواحد فينا يكون مقاتل ومتحمس واهم شي مقدر للمسؤوليه ... واذا كان مع هذا موهبه فخير على خير .... واذا اتفقنا على ان الموضوع نفسي .. فأكيد انه يحتاج الى المتخصص ,,, ما هو انا ولا اي احد ,,, ولا حتى عضو الشرف اللي يمكن يجي قبل المناسبات المهمه ويبث الحماس في اللاعبين ... ولا حتى الأداري ... لأن الأداري اداري... مفروض عليه بعض المرات انه يتعامل مع اللاعبين بالقانون والنظام وهذا يختلف عن التعامل النفسي ... وبكثير ... للمعلوميه .. بعض المرات يكون الأداري عامل مضاد نفسيا لطموح اللاعب ... كيف ؟؟؟ اذا قلت لللاعب ان المستوى ماهو مهم ,,, المهم الفوز .... كيف تبيه يدخل الملعب ... يتمشى يعني ويفوز ؟؟؟؟ الفوز ما يبي له مستوى؟؟؟؟ .... ايه يمكن يقصد انه اهم شي شخصيتك ما تفقدها في الملعب؟؟؟؟ ... طيب التعبير يختلف وبكثير .... انت ترسخ مسألة التهاون بالمسؤوليه مع المطالبه بأقصى النتائج وهذا يتنافى مع ابسط مبادى العقل والمنطق ... رجعنا للفصيح ... عموما عشان النفسيه ... خلوها على الله ...

عشان كذا يا ادارة الهلال ,,,, انا اطالب وكل عقلاء الهلال يطالبون بأن يكون هناك من هو متخصص في هذا المجال ... يكون قريب من اللاعبين ... واذا خايفين من المجتمع ,,, ياخي قولو أداري .. مسؤول شؤون توظيفيه ,,, اي شي ..... المهم يكون موجود.... وارجع واقول الكلام هذا ,,,لأنه هو اللي فعلا ناقص الهلال في الفتره الجايه ... نبي نظمن ان الهلال يشرفنا بالأسيويه .. وهو كفو ويقدر ... اصلا الهلاليين كلهم ... يبون يثبتون للعالم كله .. اللي عندنا ,, واللي جنبنا ,,, وكل العالم ... ان السعوديه بخير ,,, وكورتها بخير,,, وحنا في نظرنا ولاهو غرور ,,, نقدر .. نعم نقدر ,,, لأننا الهلال ... لأننا ببساطه زعماء اسيا... ومعلوم وش معنى زعيم اسيا...

كلمتين يا جماهيرنا الهلاليه ,,,,, طبعا فيكم اللي يقول هذا قصده ينقص من لاعبين الهلال واللي بيقول هذا ما عنده سالفه واطيبكم بيقول شايب وخلوه يحتسي ينفه عن نفسه شوي,,,, وعلى العموم اللي منكم فهم القصد ترى السؤال مهوب منهو اللاعب اللي يحتاجه الهلال ؟ السؤال الحقيقي هل لاعبين الهلال الحاليين يقدًرون مسؤولية القادم من البطولات وصعوبتها او لا؟؟ وبعدين انتم يامدربين الغفله اللي عندهم ان محد مثلهم في انتقاء الصالح للهلال وطبعا اقصد بعض الجماهير الهلاليه اللي مع الخيل يا شقراء. ترى صجيتونا نبي اللاعب الفلاني وما نبي اللاعب الفلاني واغلب اللاعبين اللي تطالبون فيهم ما يبدعون الا قدام الهلال وعلى هالأساس طالبتوا فيهم ولو سألت الجماهير هذي هل تابعتو هاللاعب ولو ما يكابر انه ما يشوفه الا في مباريات الهلال,, او معجب بلاعب شخصيا ويبي يفرضه على الناس. خلني ابسألكم اربع اسأله وارجو الجواب عليها بينك وبين نفسك بس بصراحه:
1- لو سويت استفتاء على اللاعب اللي انت تبيه كم تتوقع يكون معك اصوات مؤيده وبعدين هل الأصوات هذي تمثل نسبه مقبوله من الجمهور الهلالي او لايعني كم بيصوت معك الف الفين ثلاثه ؟؟؟؟؟؟ طيب جماهير الهلال فوق ستة ملايين على اقل تقدير . وين راحو الباقين؟؟. والقصد ان كل واحد بيطلع بلاعب على كيفه ولو تم الأتفاق على لاعب واحد صدقني ما راح تغفل عنه الأداره والدليل ياسر القحطاني والغنام على عزه.
2- على اي اساس بنيت مقاراناتك بين اللاعبين بحيث تقول جازما بفشل اللاعب الفلاني ونجاح الأخر يعني اذا بتقارن بين ياسر القحطاني والفن بتقول على الفرص اللي يضيعها ياسر ضاعت بسبب التوفيق واللي ضيعها الفن بسبب جهله في كرة القدم بس عشانك تحب ياسر او ان التقييم بيكون عادل؟؟؟؟
3- فيه جماهير تقول اللاعب الفلاني لازم يلعب واللاعب الفلاني لازم نجيبه واذا لعب او جبناه ترى اللاعب هذا بيسوي ويسوي وبيجيب اللي ما ينجاب,,,,,, طيب انت وش دراك ؟؟ هل تعلم الغيب؟؟؟ طيب انا او غيري اذا قلنا لك عط اللاعب الفلاني اللي ينافس اختيارك على الخانه فرصه وبيسوي الهوايل ليه تقول لا لايهمك ما عنده سالفه كيف تحللها لنفسك وتحرمها على غيرك؟؟؟؟ يعني التوقع بالأفضل من حقك ولا هو من حق غيرك؟؟؟؟؟؟
4- الى اي مدى انت قريب من المعلومه الصحيحه عشان تقدر تصدر حكمك ؟؟؟ يعني مثلا لو اسألك عن شخص معين تقولي والله ونعم رجال وتحطه على الجرح يبرى واذا سألتك من متى تعرفه تقول شفته مره او مرتين. فيه لاعبين مثلا يطالبون الجمهور فيهم بدون ما يعرفون الخلفيات وراء عدم مشاركتهم يمكن يكون السبب اداري,, يمكن اللاعب عشان مطالبات ماليه معينه ما يبغى يلعب,, او ناديه الأصلي يطالب ,,, او اللاعب نفسه ممكن يكون ما عندك احد من ناحية تحمل المسؤوليه ,,, المقصد ان فيه امور كثيره لازم الواحد يكون على اطلاع عليها قبل يحكم او يصدر قراره.

في الختام انا طولت عليكم لكن المره الجايه بتصير خفيفه ورؤوس اقلام وموعدنا القادم مع سوالف عن اعلامنا ثم اتحادنا السعودي وما راح اخلي احد الا وابسولف معكم عنه واللي زعل مني انا اسف واللي رضى عني يدعي لي بالمغفره والسلام ختام فالسلام عليكم ورحمة الله وبركاته وتمسو على خير ....................
اضافة رد مع اقتباس
  #2  
قديم 19/05/2007, 08:30 AM
الصورة الرمزية الخاصة بـ لــفــتــه
زعيــم متواصــل
تاريخ التسجيل: 03/03/2007
مشاركات: 83
كلامك روعه ومقنع

تصدق فكرت احطت بدل باكيتا هع

الياس كبتن والله

والشلهوب بس لو يقوي قلبه شوي ويدخل على الكرات ويشد مع اللعب

كان صاروا مبدعين زود

مشكور حبيبي

ولا هنت
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 03:44 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube