أنـــا والســرير واصبعــي والمسمــــار - نادي الهلال السعودي - شبكة الزعيم

الافضل · #1 07/05/2007, 01:59 PM

صبحكم بالخير يالعمال العماليه ومسيكم بالخير يالعمال العماليه , عطونا بنتكم الحلوه والزينه ,, ما نعطيكم هيا الا بالف
وميه,, وبنطق على دياركم ونكسر ابوابكم ..........

على طول بدخل وبقول وش صار لي امس

امس بعد رجوعي من صلاه المغرب رحت للملحق بدخل النت ولقيت أخوي جالس عليه

وقعدت أقلب في هالقنوات
ولا لقيت شي يفتح النفس وسكرت التلفزيون ورحت العب مع أخوي الصغير كوره في الحوش

واول ما بدينا نلعب مزعته مزعه

ولا عبدالله الجمعااان

ويقعد أخوي يصيح

المشكله توه صغير 4 سنين :p
وطبعا عقب المزعه حرمت العب معه ثانيه

طفش لا كميوتر لا تلفزيون لا كوره ولا أحب ادور بالسياره

وش السوات وأقعد افكر

وفجأه جت على اني اروح ازور السطح :p وأطلع للسطح والقى اشياء مدري وشي

وشكيت اني في بيتنا

مواصير على مكيفات على على أسلااااك على مربوعات على أخشاب

على سرير

قلت في نفسي بما أني فاضي ليش ما أركب السرير بدال هالفضاوه

وبعد ما ركبت في المخ واني بركب هالسرير قلت لاخوي يجيب العده للسطح ( العده مجموعه من السكاريت والمسامير والصواميل والمفاتيح و.... الخ )
<<<<< شرح بسيط عن العده

جلست شوي وفكرت قلت عشان ما يروح على الوقت <<<<<< مسوي يحافظ على الوقت

بجمع اجزاء السرير على ما يجيب أخوي العده .. وهنا بدأت المشكله

رحت وسحبت شبك السرير
وقدر الله اني أصبعي يجي في أحد المسامير

وصراحه حسيت بوجع بس ما شفت الاصبع هو نزل دم منه اول لأ

وحكيت راسي بالاصبع الجريح

<<<<<<<< حسيت اني أكتب عن أطفال فلسطين

وحكيت راسي وبعد الحكه وبرضه حسيت ان شي على جبهتي وأنا حسبته عرق وأنا اصلا توني مشتغلت

ومسحته بيدي والى الان مدري عن أصبعي انه جريح

وأشوف الارضيه مليانه دم

وقلت شكل هالدم من زماااااااااااان

وجاء أخوي بالعده
شاف جبهتي مليانه دم

قال جبهتك مليانه دم قلت لا يكثر طلع مفتاح 8 او 9 .. والحمد لله شفت الاصبع واشوفه ينزل بغزاااااره

واطمر على طول للبزبوز + حنفيه + صنبور

وقعد حول 10 دقايق عن البزبوز ولا وقف الدم
وأنزل تحت للمطبخ لان فيه صيدليه ومن سوء الحظ لقيتها فاضيه

وش السواات وبعد تفكير دام 10 ثواني طلعت فكره على ان أحط اصبعي في الفريزر

وصراحه ما فاد وجمت يدي بدون فايده ومازال الدم ينزل بغزااره

والقى في الفريزر باكنج بودر حق الطبخ

واحط اصبعي عليه كوده يتجمد ويقف الدم

وبرضه ولا فاد

وجوا أهلي وكل واحد جايب معه شي

امي جابت ليمون وملح ومسمار= قرنفل حق طبخ

طبع مطحون
واحط أصبعي عليه

وأقعد اطامر والله يحر بشكل والي ما جرب يجرب

ويجي اخوي ومسوي فاهم وانا ما شفته ويرش على أصبعي عطر

واقعد أطامر ولا قفز حواجز

والله بغيت أصيح بس اشوى صرت قوي

وااخوي الثاني جاب منديل مبلل بمويه بااااااااااااارده

عقب العطر مويه بارده حسيت اني رومنسي

<<<<<< لحد يدقق

وبعد هذا كلها الحمد لله خف نزول الدم ورحت للمستوصف وعقم الجرح <<<<<< بدري

وأول ما رجعت من المستوصف رحت للسطح وأخذت السرير وعلى طووووول للبلديه

وانتم بكرامه .

واعذروني على الاسلوب لاني أول مره في حياتي أكتب 8 سطور

..

سلااااااام

سهل · #2 07/05/2007, 02:10 PM

رح تسامح من اخوك الصغير ابو 4 سنوات قبل لا يتطور الوضع !
شكله صاكك بعين

LBa your heart · #3 07/05/2007, 02:15 PM

إقتباس


	وقعد حول 10 دقايق عن البزبوز ولا وقف الدم

حشى مو أصبع أدمي

شكل الدم يبي الفكه من جسمك <-وش يبي ذا

اما أخوك اللي جاب عطر هذا سالفته سالفه خخخخخخ

وسسسلام عليكم

ديـك الـجن · #4 07/05/2007, 02:15 PM

ايه .. وش صار بالمسمار

?

F I N A L · #5 07/05/2007, 02:18 PM

صراحه عليك مقدمــة رووووعه

إقتباس


	وبعد تفكير دام 10 ثواني

ما شاء الله عليك ,,, الله يحفظك من العين

إقتباس


	حياتي أكتب 8 سطور

هذي مو 8 أسطره هذي 17 سطر يالغالي

تقبل مروووووري

الافضل · #6 07/05/2007, 02:19 PM

إقتباس

الرسالة الأصلية كتبت بواسطة سهل


	رح تسامح من اخوك الصغير ابو 4 سنوات قبل لا يتطور الوضع ! شكله صاكك بعين

اييه طيب أتسامح ما بقى الا هي

هو المفروض يجي يحب راسي لان اخوه الكبير

تصدق يمكن صاكني بعين

لاهنت عل تشريفك الموضوع

الافضل · #7 07/05/2007, 02:22 PM

إقتباس

الرسالة الأصلية كتبت بواسطة كلي هلالي


	حشى مو أصبع أدمي شكل الدم يبي الفكه من جسمك <-وش يبي ذا اما أخوك اللي جاب عطر هذا سالفته سالفه خخخخخخ وسسسلام عليكم

هههههههههههههه اذكر الله

بس قهر اخوي الكبير ولا كان فقعت وجهه

وبعدين لا تدقق يمكن جلست تحت البزبوز 5 دقايق

لاهنت عالمرور

الافضل · #8 07/05/2007, 02:24 PM

إقتباس

الرسالة الأصلية كتبت بواسطة ديـك الـجن


	ايه .. وش صار بالمسمار ?

هههههههههه

هذا الي همك

لاهنت عالمرور وتشريفك للموضوع

LBa your heart · #9 07/05/2007, 02:26 PM

إقتباس

الرسالة الأصلية كتبت بواسطة الافضل


	هههههههههههههه اذكر الله بس قهر اخوي الكبير ولا كان فقعت وجهه وبعدين لا تدقق يمكن جلست تحت البزبوز 5 دقايق لاهنت عالمرور

لا اله الا الله

وماشاء الله على اصبعك

أول مره اسمع بأصبع ينصك بعين

الافضل · #10 07/05/2007, 02:27 PM

إقتباس

الرسالة الأصلية كتبت بواسطة ن و س 7 7 0


	صراحه عليك مقدمــة رووووعه ما شاء الله عليك ,,, الله يحفظك من العين هذي مو 8 أسطره هذي 17 سطر يالغالي تقبل مروووووري

المقدمه هذي لعبه قديمه ....

;)

الله يحفظ الجميع

لا تدقق بعد أنت

مرورك مقبول يالغلا ..

شرفت الموضوع

الافضل · #11 07/05/2007, 02:29 PM

إقتباس

الرسالة الأصلية كتبت بواسطة كلي هلالي


	لا اله الا الله وماشاء الله على اصبعك أول مره اسمع بأصبع ينصك بعين

مهب على الاصبع

على الدم اللي نزل من الاصبع

20 ياسر الجابر 9 · #12 07/05/2007, 08:35 PM

هههههههههههههههههههههههههه

الله يرج بليسك

خلك ما أحد قالك تسوي الجمعان على واحد عمره 4 سنوات :p

<< وده يشوف وجه أخوك بعد المزعه

أهم شي الحمد الله على سلامتك

وإذا فضيت مره ثانيه أترك عنك مجال الهندسه

< خلك عندنا في النت أصرف :p

سلااااام ;)

القيصر رهيب · #13 07/05/2007, 09:58 PM

إقتباس


	صبحكم بالخير يالعمال العماليه ومسيكم بالخير يالعمال العماليه , عطونا بنتكم الحلوه والزينه ,, ما نعطيكم هيا الا بالف وميه,, وبنطق على دياركم ونكسر ابوابكم ..........

يوووووووووووك

[QUOTE] قلت في نفسي بما أني فاضي ليش ما أركب السرير بدال هالفضاوه[/QUOTE

تعجبني

إقتباس


	على جبهتي وأنا حسبته عرق

الله يقرفك

إقتباس


	وقعد حول 10 دقايق عن البزبوز ولا وقف الدم

مسكين

إقتباس


	شفته ويرش على أصبعي عطر واقعد أطامر ولا قفز حواجز

ولقد حزنت عليك

شكرا على القصة المأساوية

وش رايك تبيعها يسوون فلم ؟

Mr.DL5 · #14 07/05/2007, 10:54 PM

بسم الله ع المسمار ..

سلامات والحمد لله ع سلامتك ..

خلك محد قالك تسوي فيها بتاع كلو ..

.. من التلفزيون الى كورة في الحوش الى تركيب سرير ..

تحولات سريعة في 10 دقايق

.. الله لا يضرك

واخرتها الضحية اصبعك ..

رح حب راس اخوك الصغير و باشر عليه في البقالة

شكلك من مزعته وهو مغير رافع يدينه وخذ دعاء عليك ..

و لاهنت يالغالي ع السالفة المأساوية ..

الكلاسيكي · #15 08/05/2007, 02:34 AM

هذي نهاية الفراااااغ ..

بعدين وش هالاحساس .. ايدك تنزف وانت ولا تدري مقزز !!
اقول انت متأكد ان ديناموا الحس يشتغل ولا موقف مايرقي للمخ !!

عموماً الحمد لله ع السلامه << كبر السالفه .
دمت بخير