:: خذوا الحذر عند أخذ الطلبات :: - نادي الهلال السعودي - شبكة الزعيم

الفيروسه الزرقاء · #1 23/04/2007, 03:13 PM

كونيتشيوا

..:: مداخل ::..

[ 1 ]

يمه مـ أعرف أتغدا من دون بيبسي

، وين البيبسي

،
الام : خلصوه اخوانك

! اطلبي من البقالة بيبسي عائله وفكينا من شرك

.

[ 2 ]

يـ الله ماكفى البسكويت لـ الحلى

، يمه وش نسوي

!
الام : أطلبوا من البقاله

.

[ 3 ]

مدام تايد مافيه خلص

.
الام : ورأ ماعلمتنا نكتبه مع المقاضي

خلاص خلاص لاتقرقرين واجد بنطلب من البقالة

[ 4 ]

وزعي يـ بنيتي بساكيت وكاكاوات ع عيّلي ، يمه مافيه دولابك شي

!
الأم : أجل شوفي وش يبون واطلبيه من البقاله

.

[ 5]

الأم : وراك نسيت ماتجيبب صامولي ترى بكره مدارس

!
الأب : لاتعصبين ماصار شي اطلبوا من البقاله

:
:
:
:
:
:
:
:

خلااااص تكفيكم 5 مداخل

:p ،،

تعددت المداخل ، والطريق واحد

وهو " التموينات

" .. فـ العائله السعودية بشكل عام معتمده ع توصيل الطلبات

فتجد التموينات احياناً تتشرط مايوصلون طلبات إلا أقل شي 10 ريال ---->> من زحمة الطلبات

،،

المشكله هنا فـ العماله الموصله لـ الطلبات

، فترى العامل تسيطر عليه شهوته فـ يتعرض ع محارم هذا المنزل

، ماابي اتهم كل عمال توصيل الطلبات " تحب تمويناتهم اللي في حارتهم

" لكن فيه تموينات وللاسف عمالها يشوهون سمعتها بسبب تصرفاتهم السخيفه

، إما التأخر فـ الطلب

او التعرض ع من في المنزل

[ سبب الموضوع

]

يوم الخميس رايحه لـ بيت جداني وطفش كـ العاده

قلت ورأ ماطلب من التموينات ووسع صدري

، طبعاً بيت جداني ماشاء الله فل مايفضى بزارين وش كثرهم ، سألت وش تبغون شيبس

كلهم يبون ليز بـ الخل والملح قلت زين كيس ليز كبير + بيبسي عائله + ليز ديلاتس " صغير " فلفل رومي وشوكلاتات لي

---->> أنانيه :p

وطبعاً من كثر مـ اطلب من تموينات أهلي صرت حافظه رقمهم

اتصلت عليهم وطلبت لأ وراعي البقاله يعرفني

، يقول إن شاء الله 5 دقائق عند انتا

..

وفعلاً ماجت 5 دقايق الا وجرس الانتر فون يدق

، البزارين لاهين قلت ورأ ماجيب الطلب بنفسي

توني طالعه من باب الفيلا الا وتشوفني مرة خالي ع وين

! قلت بجيب الطلب لحظة

..
قالت لأ خذي احد يوقف معك

قلت خير احد ليه بياكلني

! وانا اناقز مع الدرج

ومتوجه لـ الباب مادريت إلا حشد هائل من بزارين يتسابقون ع الباب .. عطيتهم الفلوس وجابوا الطلب

،،

واكلنا بـ الهناء والعافيه

، وطبعاً وأنا أكل

رحت لـ مرة خالي وقلت لها تعاااااااالي وش السالفة ليش تبغين احد يوقف معي عند الباب

! قالت شكلتس ماتدرين عن هـ القصص اللي صايره هـ الايام قلت لأ وشي

وقامت الله يجزاها خير مرة خالي سردت لي قصة صارت لـ جارة اختها

، ومن جد القصه أثرت فيني وانقهرررررت من اللي صاير لهم

..

[ القصة المؤثره ]

حرمه متزوجه وعندها طفلين ، الاول يبلغ من العمر 5 سنوات والاخر 2ونص ع مـ أعتقد ، المهم هذه الحرمه بشرتها بيضاء طلبت من التموينات في الصباح ، جاء العامل البنجلاديشي بالطلب فتحت له الباب وهي ماده يدها بـ الفلوس حط الاغراض تحت جت بتاخذهم وافكورس بتكون منحنيه علشان تاخذ الاغراض ، انفتن الرجال بلون بشرتها ولا شعورياً دف الباب ، قامت الحرمه تركض متوجه لباب الفيلا وقفلت الباب والبنجلاديشي وراها ، شاف الاطفال الاثنين يلعبون برا بالحوش فاخذهم وهددها بقتلهم ، قالها افتحي الباب والا ترى بقتلهم رفضت الحرمه واتصلت ع رجلها وهو في الدوام وعلمته بالسالفه ، وقامت واتصلت ع الشرطة رفضوا المجي بحجة ان مافيه محرم بالبيت" شي غريب استغربت ليه مايجون الا ولازم محرم !! لهالدرجة متشددين طب ورا مايجبون رجالين وانتهى الامر يعني لازم محرم ! افرضوا الرجال دوامه خارج منطقه الرياض متى بيجي المحرم !! اسمحوا لي لازم هالشرط يتغير ياضيفون رجالين يجون والا يجيبون معهم حريم دام لازم محرم

نكمل السالفه

" !
قالت المحرم بيجي في طريق بس تعالوا ، قام البنجلاديشي الحقير طلع ميداليته وكانت فيها سكينه صغيره واخذ الطفل ابو سنتين اتوقع وجرحه من عند المعصم

والحمدلله انه ماوفق عرق والا كان راح فيها

سمعت الام صرخة طفلها وقالها البنجلاديشي افتحي والا ترى بموت الثاني وفعلا اخذ الطفل الاخر وجرحه من عند الرقبه وتوفى الطفل

البنجلاديشي شاف الدماء وولى هارباً من المنزل

، يوم طلع فتحت الام الباب ولقت اطفالها باحوش واحد ميت والثاني يصارخ طلعت برا بالشارع تدور احد تسنجد فيه

، الاب جاء ولقى عياله بالحوش واحد ينزف ويصارخ

والثاني حوله الدم وميت

..
ع طول توجه للتموينات دخل ولقى صاحب المحل السعودي قال وين البنجلاديشي والرجال مستغرب وش يبي فيه ، لقى الرجال " صاحب المنزل " العامل مستخبيء ورا الثلاجه طلعه وضربه وضربه وطيحه ع الارض وطلع المسدس وقتله

فيه هاللحظات تو الشرطة توصل

" لو ان الحرمه قايله ان في بيتها ارهابي والله جوها ركض من دون شروط :p " اخذوا صاحب المنزل واسجنوه

والام ياعزتي لها جائها انهيار عصبي

..

الله يكون في عون هـ الاسره اللي تفككت بسبب مجرم حقير

..

@ بعد هـ القصة اللي صارت فكرت أرجع لـ طريقتي القديمه

ورقه وقلم واعطيها سواقنا

والله عندي السواق أضمن من هـ العمال اللي مدري عنهم

،،

ع العموم : انتبهوا وانتم تطلبون لاتخلون اطفالكم الصغار يفتحون لـ حالهم لازم مجموعه تفتح

علشان مايقدر يسيطر العامل ع الوضع

...

الله يحفظنا من كل شر