MANCHESTER UTD VS ROMA من كمرتي في الاولومبيكو - نادي الهلال السعودي - شبكة الزعيم

Hilaly OC · #1 10/04/2007, 12:26 AM

جميع الحقوق محفوضه

السلام عليكم ورحمة الله وبركاتة

اليكم بعض الصور من كمرتي وبعض مقاطع الفديو من ملعب الستاديو اوليمبيكو

المناسبه: Champions League
المكان: مدينة روما الايطاليه، استاديو اوليمبيكو
الفرق: AS ROMA VS MANCHESTER UNITED

المهم اول ما وصلنا الملعب والا زحمة العساكر ومكافحة الشغب بوجيهنا

قلت ايه ما فيه شي جديد حنى في ايطاليا
نزلنا من التاكسي المنسم، وتوجهنا للبوابه الا ونشوف العساكر كلهم يركضون على يميننا قلت اييييوووووه بدينا انا واخوياي هجينا ورا احد الكشكات هههه بس لانه كان فيه قنابل صوتيه ومسيل دموع وخرابيط الشغب والا اانا قلبي حجر

لاحضو ان كل هلحرش والمطاق قبل المبارات، المهم وحنا نمشي من بوابه لبوابه جاني كم من واحد يسالني معي تذاكر زايده والا لا ؟؟ كانهم دارين المهم وطلعت تذاكري الزايده لواحد روماوي وحش والتذاكر الي معي الزايده مع جمهور مانشستر يوم شاف التذاكر عطاني ذيك النضره الي تقول اي ؟ انا راسي

المهم وهجيت مره ثانيه هههههه
بلحسر وصلت للبوابه حقتي انا واخوياي،
المهم صارت مشكله وطلعو بعض الشباب في جمهور مانشستر يعني انلعب علينا بكم من تذكره ههههه المهم فيه البعض يحب مانشستر ففضل انه يدخل هناك ههه < والله يا هو بينجلد

اول ما دخلنا ولا الجمهور يغني ويرقص ومبسووووط ، انت يا جمهور روما وجمهور مانشستر جنبي اسمعه ما عنده الا الترجيم والتمصلخ ههه لانه فيه واحد هبلبي من كثر ما يتفصخ.
المشكله الي صارت بلملعب بين الشوطين بداياتها كانات برا الملعب ،،، اشتبكو ما يقارب 700 شخص برا الملعب قبل المبارات ب ساعتين اصيب منهم 20 و اربعه انطعنو بسكاكين رومانيه

مجانين كوره والله لا الانقليز والا الطلييان
المهم يوم دخلنا الملعب ولا والله القوارير تطير يمين ويسار والي زاد الطين بله بدو يرجمون الانقليز فلوس حديد اي كوينز ،،،، وش عندهم كاشات وبدو يفلقون بخلق الله، استمرت المباراه بهواش طول الوقت الى ما انطرد سكولز، اول ما انطرد سكولز، يوم التفت كل جمهورنا على جمهور مانشستر وبدا يضحك عليهم، استمرو الهولقنز بترجيم القواطي والكوينز،
جا هدفنا الاول
اول ما جا الهدف الاول اندفع جمهور روما الجالس ورا البيبان على جمهور مانشستر وبدو يصبخون على القزاز الفاصل بين الجمهورين، من كثرت الضغط من جمهور روما تدافعو الى ما دخلو على جمهور مانشستر، في هذي الحضه كل جمهور مانشستر بدا يرقا فوق للمدرجات لان جمهور روما الي دخل دخلو من الجمهور السفلي، هجو الانقليز الخوافين فوق بعدين تدخلو الشرطه ومكافحت الشغب ودفو جمهور روما الى ما رجعوهم محلهم يوم رجعو محلهم الجمهور الروماوي العساكر بتلو في مدرجات مانشستر يعني ما راحو ، والله وبدو جمهور مانشتر يفكفكون الكراسي ويقربون لمكافحة الشغب ورجمون عليهم كراسي

قفلت معهم الشرطه وبدو يحشرون جمهور مانشستر عشان ما يبونهم يقربون للجمهور الروماوي الي ورا البيبان لانهم مجانين، وحشرو جمهور مانشستر جنبنا وخذ ترجيم خاصه بين الشوطين

تدخلو الشرطه بشراسه بعد اصابه احد اعضاهم بين الشوطين ،
وانا اقول ايه عز الله راح فيها رفيقنا
استمرت نفس المشاكل الى ما هددو انهم يوقفون المبارات ، بعد ذا التهديد هجدو الناس الى الهدف الثاني، ورجع السناريو وانعاد.

حجرو جمهور مانشستر بعد المبارات لمده تزيد عن الساعه والنصف.

اسف على الاطاله ولكن حبيت اعبر

ما يصير صور بدون مقال، وهذي هي الحقيقه بعيني لا احد قالي ولا شفت بتلفزبون
مراسل الزعيم في بريطانيا صار مراسل اوروبي

طبعا هذي احلا لحضه لما كل الجمهور الي بلملعب ساكت ويشغلون اغنية الشامبينز ليق

صور من كمرات متعدده لاننا متوزعين بلملعب ،،،، ما قررنا نروح الا قبلها بثلاث ايام ما لقينا كراسي جنب بعض

هذي بعض صور الجلد ولاكن اسف مهيب واضحه شكله خويي كان خايف

ما الومه

بين الشوطين

السنتره شوط الثاني

فان دير سار يحب الصياح ههههه بعد الهدف الثاني قفلت مره، يمكن عشانه الغلطان ؟؟؟

احلا لوحه والله خاصه مع الاغنيه نهاية المبارات،

ــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وهنا بعض مقاطع الفديو من موقع يو تيوب
قريت الموضوع عن قوانين المنتداى ما في شي يعارض روابط يو تويب، شكرا

اول فيديو هو مقطع مشجعين روما يغنون مع بعض والله يا هم رهبييييين

هذي المطاقه من اكثر من كمره في الملعب
من محل قريب

مقطع 1 هولقنز

مقطع 2 هولقنز

-------------------------------------------
ارجو ان ينال الموضوع على اعجابكم وارجو التعليق على الموضوع، تراي اتحمس لردود، وما قريتو وش يقول نضام المنتدى ؟؟ يفضل انك تكتب شي اكثر من مشكور وو يعطيك العافيه والخخخخ،،،،،

مراسل الزعيم

انواع الاخطاء لاحد يدقق

KaKa_MiLaN · #2 10/04/2007, 12:34 AM

ألـف ألـف شكــر لك يا اخوي على هالصـور والمقـاطع الرائعة وفعلاً استمتعنـا بصـورك والفيـديو وخصـوصاً الفيـديو...

وبالفعـل ابدعـت في تصـوير نهائي رابطة المحتـرفين وها انت تبـدع في كتـابة وتصـوير مبـاراة تعـد من اهـم المبـاريات ....

وألف شكتر لك يالغالي مرة اخرى.

ayoos_100 · #3 10/04/2007, 12:37 AM

الأولى بسم الله الرحمن الرحيم
الثانية الزعيم .

G U N N E R S · #4 10/04/2007, 01:12 AM

يالحبيب مافيه صور تأكد من رفع الصور ؟
ولك تحياتي

زعــيــ511ــم · #5 10/04/2007, 01:40 AM

يالحبيب مافيه صور تأكد من رفع الصور ؟
ولك تحياتي

AHMAD_Z5 · #6 10/04/2007, 01:58 AM

يالحبيب تأكد زين

Hilaly OC · #7 10/04/2007, 02:10 AM

إقتباس

الرسالة الأصلية كتبت بواسطة AC hilal


	الرجال جالس ينزل الموضوع الان بس هذي بالغلط نزل يا ليت المشرفين يحذفوه

صادق ههههههه

memotrix · #8 10/04/2007, 02:20 AM

كلمة واحده هي شكرا
وحظك تحضر مباراة الماشستر والذئاب
وبين جمهورين لا يحتاج اي منهما الى تعريف
الطليان والانجليز
وان شاء الله الفوز للمانشستر اليوم
بس يا ترى ماذا فعلتو بعد هدف روني وكيف كانت ردة فعل جمهور روما وشكرا

ٍS7EVA · #9 10/04/2007, 02:21 AM

مشكور يالغالي على التغطية ..

وبالتوفيق للروما

..

Best Goal · #10 10/04/2007, 02:31 AM

مشكور يا هلالي على التغطية صراحة ,,

بكرة بتحضر ؟

اذا بكرة بتحضر سوي لنا تغطية تكفى ,,

مشكور و ما تقصر ,,

Pharma D · #11 10/04/2007, 02:35 AM

موضوع روعه و لـ زيادة روعته هذا مسمار التثبيت

<< G E R R A R D

ما شالله تبارك الرحمن يا حظك صور دقيقه ما شالله

عوافي يـ الغالي

اكبر فخر اني هلالي · #12 10/04/2007, 02:43 AM

يعطيك الف عافية يالغالي ..

موضوع رائع .. وسواليف ما تنمل ..

والحقيقة جمهور روما بالمباراة هذي مرررعب ورائع .. والأروع حضورك بينهم ..

بالتوفيق للذئاب .. في مباراة الاياب ..

الله لا يحرمنا من مواضيعك وصورك .. الف شكر

في حفظ الله

hilalemooot · #13 10/04/2007, 03:21 AM

السلام عليكم

اول شي الحمدللة على سلامتك وزين اللي طلعتوا سالمين من هالمجزرة

احييكم على شجاعتكم أولاً

وثانياً على التصوير الجميل ماشاء الله تبارك الله .. يعطيكم الف عافية ولا تعبتوا ان شاء الله .. واهم شي استمتعتوا

حنا نتابع المباراة بتلفزيون استمتعنا وشلون اللي حاضر المباراة بالملعب عاد

وكويس اللي وضحت الحقيقة اللي عرفنا منها .. من البادي بالإستفزاز عكس كلام بعض الشباب الله يهديهم اللي استعجلوا بالحكم

لكن نقول شوية عجلة

يا غالي اذا تبي ترفع صور مرة ثانية بلغني او بلغ احد الشباب في الإعلاميّة حتى نرفعها لك على السيرفر الخاص تبع الشبكة ونحط عليها الشعار او اسمك حتى ما تنسرق منك

مشكور يا مراسل الشبكة في أوروبـا

مسمار تثبيت

فـ مان الله ,.,.,

Hilaly OC · #14 10/04/2007, 03:46 AM

إقتباس

الرسالة الأصلية كتبت بواسطة hilalemooot


	السلام عليكم اول شي الحمدللة على سلامتك وزين اللي طلعتوا سالمين من هالمجزرة احييكم على شجاعتكم أولاً وثانياً على التصوير الجميل ماشاء الله تبارك الله .. يعطيكم الف عافية ولا تعبتوا ان شاء الله .. واهم شي استمتعتوا حنا نتابع المباراة بتلفزيون استمتعنا وشلون اللي حاضر المباراة بالملعب عاد وكويس اللي وضحت الحقيقة اللي عرفنا منها .. من البادي بالإستفزاز عكس كلام بعض الشباب الله يهديهم اللي استعجلوا بالحكم لكن نقول شوية عجلة يا غالي اذا تبي ترفع صور مرة ثانية بلغني او بلغ احد الشباب في الإعلاميّة حتى نرفعها لك على السيرفر الخاص تبع الشبكة ونحط عليها الشعار او اسمك حتى ما تنسرق منك مشكور يا مراسل الشبكة في أوروبـا مسمار تثبيت فـ مان الله ,.,.,

مشكور حبيبي ما قصرت بس حبيت اسالك تقدر الحين تحط شعار الزعيم عليها والا لا ؟؟

الله يخليك حاضرين حنى

بيكهام للأبد · #15 10/04/2007, 05:36 AM

حمد لله على سلااامتكـ اول شيء

وعساااكـ على القوهـ أخوي

تكفى ابرووح معكـ المره الجااايه << لاتفلهـــا اقووول

موضووعكـ قمة الجمااال والله العظيم موضووعكـ حلوو أقسم بالله العظيم موضوووعكـ قوي

تحياتي لكـ اخوي