وماذا بعد قمة الرياض..!! - نادي الهلال السعودي - شبكة الزعيم

بنـــت الزلفي · #1 29/03/2007, 02:53 AM

يالله حيهم ويبارك فيهم !!

إقلطوا إقلطوا

اليوم صراحه نفسي أنزل موضوع خصوصن إنه حديث الشارع العربي ألا وهو

القمه العربيه والتي أقيم هنا في المملكة العربيه السعوديه وتحديدا"

((في الرياض ))

وهي المدينه الأكثر سكانا وهذه المعلومات معروفه لدى الكــل

وفي القمه هذي خذها مني لا جديد بس جونا طول الله عمرهم وتمشو في

شوارع الرياض الحبيب ويبي يرحوووووووووون

(ويا دار ما دخلك شر )

واللي إستفدناه من هالقمه الإجازه( الثلاثاء والأربعاء) وبس وياليت القمه شهريا >>>>

لا أحد ينقزززز في وجهي ويقول طمعانه في يومين لاني بأقوله ليش شايف

الناس مثلك نوم ونت نت ونوم !! لا ورع صايح ولا قدر فايح >>>>>>>

<<<<<<<< وراى أسهم وخساير دراهم

( لا ومن خلال مصادري القووويه والتي كانت متواجده في قلب الحدث

إنه منع التجول في أنحاء الرياض وتحديدا الجزء الشمالي من

منطقه الرياض إنتهى كلامها رحمها الله >>> )

صطرت المصدر إلين مات اجل بيفشلونا عند اخواننا العرب نبي

نعلمهم إن الرياض هي المدينه اللي لا تنام

>>>> خخخخخ لا واضح

أحس إن الرؤساء العرب اول ما يجون الرياض بيسألون عن شارع التحليه

ولا !!بيحرصون على أخذ الصور التذكاريه فيه

بس في شي يقرقع في قلبي >> يقرقع ( يخفق بمعنى يدق)

قصدي فيني غبينه محترمه ومقهوره !

يعني يبي يوضحون لزوارنا الكرام إن رياضنا الحبيب مافيه زحمه الصباح !!

ولا يوقف حي السفارات في الصبح والظهر ولا فيه هجوله يوم الاربعاء

بعد الدوام !!

ولا فيه باصات ( الرسالة والامتياز ) تخوطـف بسرعة جنونية تتعدى 120

كيلو في الساعه وبوسط حاره في شارع عرضه 7 متر , كأن الشارع شارع

أبوهـ !

وشعب ما يطلع لدوامه في وقت واحد علشان ما تكون زحمه وإنه شعب هادي

منثبرين في بيوتهم !!

إييـييييييييييييييييييييييييييه والله قاهريني والله ليت مافيه إجازه

خلنا نوريهم الزحمه على أصولها خصوصا زحمه الظهر الساعه 2 والله

ليكرهون الساعه اللي وافقوا فيها إن تقام القمه في الرياض !!

فـأحب أقـولهم لا تستغربون الإجـازهـ فأنتم في الرياض !!

ولا نستغرب حنـا أيهـا الشعب فإننـا في الرياض !!

الشارع اللي ورا بيتكم خبركـ به سيدين تطلع وتلقاهـ طريق بيشه لا

تزعـل وتتفل العافيه بل إبتسم فأنت في الرياض !

لازم ننـثبر عندالإشارهـ أقل شـي ( نص ساعه ) بسبـة واحـد ابن لذينا

جالس يفطـر بيض

في السيارهـ !!

ولا عشان سواق هندي فاهي خرشته الكمخه اللي راكبه ورا , رح يمين ورح يسار , وتخ****ق وضاع المسكين

لا تعـلق على البوري وتنافخ بل إبتسم فأنت في الرياض !!

الأرصـفه صـايرهـ مخـارج وعليهـا جـرت الكفرات هـذا دليل إنكـ في

الرياض !!

أجسام صفراء ؟

جالسه في وسط الطريق ؟

هـذيكـ اللي عندهـا أنوار كـل شوي يحتفلون بهـا ؟

هـــاهـ عرفتــوهـا !!

وش أقـول عنهـا بس ؟؟

!! أفخاخ !!

!! خـنادق !!

مسوينـها علشان ت****ر السيارت وكلن يقعد في بيت أمه

شــقوق بفعل زلزال يساوي زلازل يوكوهـما !!

قـالوا إن إسمهـا حفريات

وانـــا أقــول مدافن لسياراتــنا؟

وفي كثير من الأحيان للبشر

لا ويقولون عنهـا إصلاحـات بالمسمى الجديد >>>>>>>> أقـــول ريحـونــا بس

لمـا تشـــوفون هذه الأشيـاء ثق تمـامـا أنكـ في الرياض ووسـع الصـدر

هذه هي الرياض عاصمة الثقافه عام 2000

وهذه الرياض اللي فتحت قلبهـا لـ28 دولة >>>>>>>>>>> بس أهـل الديرهـ نايمين

وما عندك ما عند جدتي

عقـبال ما نطـلع منـها >>>>>>>>>

لا يكثر بس إحمدي ربك

على فكره الأسهم خسرت بسبة ذا القمه يوم الأثنين الثلاثا والأربعاء
وجوكم أهل الرياض يا الشرقيه

والله ياإن أهل الشرقيه غثوكم أهل الرياض بينقلون الزحمه عندهم غصب طيب زحمه يعني زحمه
أهل الرياض روحه على الملاهي والأسواق وأصحاب الدار منثبرين في بيوتهم !!

لا وماسكين أبوانهم سرى على الفوال تعرفون لازم بسرعه يجيب العشاء

تلاقي أهل الشرقيه من أذن العشاء شخيييييييييير

وأهل الرياض فالين أمها عند البحر

قفله بسيطه بعد التغطيه

(( القمه العربيه في الرياض شعارها القطه الله لا يهينكم وكثروها هالمره لبنان إنضمت للعراق ولفلسطين! ))

أتمنى أستمتعتوا يأهل الرياض بالأجازه السعيده وويك إند صحححححححححح..!!

بس بذمتكم كل واحد يقول وش أستفاد من الغمه ( قصدي القمه )
تحياتي

بلد الوليد · #2 29/03/2007, 03:02 AM

لا اله الا اللللللللللللله
حاسدينا العالم على ذا الاجازه
اقول ورا ما تلفقينها لا اقوم الحين واسكتك
تراك قهرتيني

السوبر ستار · #3 29/03/2007, 03:03 AM

ههههههههههـ .. وسعتي صدري الله يوسع صدركـ ..

الصراحة الاجازة هذي ماشفت منها الا الهم والغم والنكد .. ولكن مانقول الا الحمد لله ..

الظاهر حنا منظولين يا أهل الرياض على الاجازة .. يمدحون التطييح والشخير في البيت يا أهل الرياض ..

تسلمين على قشارتكـ .. بس حلوة باصات الامتياز والرسالة.. هههههههه

القيصر رهيب · #4 29/03/2007, 03:16 AM

شكلك تسوقين أنتي

يا تاج رأس الأمكنة يالرياض

ياقاهرهم يا سامي <<< تحمس

تبقى رياض العز شامخة في بيداء نجد

بزحمتها وبدونها

من سكان مدينة الرياض

بنـــت الزلفي · #5 29/03/2007, 03:16 AM

إقتباس

الرسالة الأصلية كتبت بواسطة بلد الوليد


	لا اله الا اللللللللللللله حاسدينا العالم على ذا الاجازه اقول ورا ما تلفقينها لا اقوم الحين واسكتك تراك قهرتيني

تكفى عاد حلوه ألفقها ( يعني انطممممم)

بنـــت الزلفي · #6 29/03/2007, 03:20 AM

إقتباس

الرسالة الأصلية كتبت بواسطة رهيب الحزين


	شكلك تسوقين أنتي يا تاج رأس الأمكنة يالرياض ياقاهرهم يا سامي <<< تحمس تبقى رياض العز شامخة في بيداء نجد بزحمتها وبدونها من سكان مدينة الرياض

بلا رأسك مايستدير من المذوره

EMII · #7 29/03/2007, 03:25 AM

شوااارع الرياض شبه زحمه بس كلها دوريات
اجازة ولا بدون اجازه الزحمه فينا فينا,,

القيصر رهيب · #8 29/03/2007, 03:53 AM

إقتباس

الرسالة الأصلية كتبت بواسطة بنـــت الزلفي


	بلا رأسك مايستدير من المذوره

أساسا هو مستدير

الماسه الزرقاء · #9 29/03/2007, 05:18 AM

بنت الزلفي حالتك مستعصية إثر الخسارة غير المتوقعة في اليومين التي ذهبت

تعووضينها يالغالية , وابتسمي انت في الرياض

ونبي منك موضوع ثاني بعد ما تهدأ نفسك وتستوعبين الأحوال

من ناحيتي ... ماذا استفدت من القمة العربية ؟!!
الثلاثاء امممم ما اذكر ,
الأربعاء إلي هو اليوم , كالعادة اجتماع في بيت جدتي الله يحفظها , واهلي ناسين عندهم بنت
ورايحين مخيمين لأني تبريت منهم هاليومين

,,<<<< الناس تروح مكة واهلها مخيمين ,

الكلاسيكي · #10 29/03/2007, 08:17 AM

هــلا وغـــلا فيكـ اختي بنت الزلفي ..

والله حتى الآن ومن بداية القمه حتى الآه << كلها يومين:p ..
ما اطلعت على الصحف .. لاني عارف تماماً انها كلها عن القمه ..

ان شاء الله انهم استفادوا من القمه ووصلوا لحلول لفلسطين والعراق ..
وكل قضايا الامه العربيه ..

الحمد لله امانة الرياض جهزت الشمال تجهيز حلوو .. ويليق بسمعة الرياض ..
طبعا الجنوب ناسينها خلقه !!

وان شاء اله الضيوف استمتعوا وخاصه ان الدعوه ماهي زحمه .. والجو حلوو

ولو مافيه اجازه كان شفتي الضيوف يجون بطيارات خاصه ويرجعون بنفس اليوم ..

الحمد لله انهم اعطونا اجازه .. حاسدينا فيها .. كلها يومين ..
والرياض حلوه بكل شي .. يزحمتها اللي تخلي الواحد وده يرجع 100سنه لوقت الخيول والابل ..
وحلوه باهلها .. اللي لنما طلعوا ظلمت << يمدح نفسه ..

الله لا يبدعنا .. وان شاء الله القمه الجايه بعد في الرياض << خذنا عليه

..

اتمنى ان القمه تحققت اهدافها ..

تقبلي ارق التحايا ..
دمتي بخير

...SoMe OnE... · #11 29/03/2007, 11:32 AM

,,,
,,
,

إقتباس


	(( القمه العربيه في الرياض

إقتباس


	شعارها القطه الله لا يهينكم وكثروها هالمره لبنان إنضمت للعراق ولفلسطين! ))

اغلب اللي حضروا يقولون ناسين دفتر الشيكات بـ درج السياره

بنت الزلفي ...

شوارع الرياض يبي يجيها ارتداد يوم الجمعه باذن الله ..
والتقفيل زحمه يوم السبت الساعه 8 الصباح ..

عوافي والله .. الف شكر على اطلالتكـ وبالتوفيق للجميع

****

...SoMe OnE...

بنت فهد · #12 29/03/2007, 11:51 AM

إقتباس

الرسالة الأصلية كتبت بواسطة رهيب الحزين


	شكلك تسوقين أنتي يا تاج رأس الأمكنة يالرياض ياقاهرهم يا سامي <<< تحمس تبقى رياض العز شامخة في بيداء نجد بزحمتها وبدونها من سكان مدينة الرياض

حلللوووه

كوبي الزعيم · #13 29/03/2007, 12:09 PM

طيب والي بشركه مثلي وبالرجعه مغلقه كل الطرق وحالتي حاله وارجع من عند حوااااااااااااااااااااااااااااااااااااري وش ذنبي

بعدين يا بنت الزلفي وين الي بيجي شات الزعيم

الاعصار الاسيوي · #14 29/03/2007, 01:00 PM

والله حاله حاسديا على اليومين

هلاليه من الرياض · #15 29/03/2007, 01:39 PM

ياقلبي يا

الرياض

هي وزحمتها وكل شي فيها